Hosie 12
12
# 12: Ke mme ikpañwed Hibru ewet Hos 12:1-14 nte Hos 12:2-15. 1Ifrem adia afịm;
anye abịne afịm usakkautịn afịd usen
anyʌñ anam nsu ye afai etọt.
Anye anam edioomo adidiana keed ye Asiria,
anyʌñ anọ adan ọlif esọk Iyib.
2 Abọọñ anie ikpe adikoot Yuda;
anye ayaamia Yekọb#12:2 Yekọb awuọñọ anye ayịre ke itịghitịghi, ke usem Hibru awuọñọ anye abiaña. ufen akeene mme usʌñ amọ,
anyʌñ anọ anye utịb akeene mme adinam amọ.
3Anye asịne ke esịd idịb amʌm ayịneka amọ itịghitịghi;
nte awo anye amaada anwan ye Abasi.
4Anye amaanwana ye enyere anyʌñ akan;
anye amaatua anyʌñ akpeiye anye abo yak inọ imọ adidiọñ.
Anye amaakịt anye ke Beteel,
anyʌñ atañ ikọ ye anye do,
5 Abọọñ Abasi Andikponñkan,
Abọọñ ado anyịñ amọ!
6Ado ana afo atịmme akeene Abasi mfo;
tịm kama ima ye unenikpe,
nyʌñ bet Abasi mfo afịd ini.
7Anyamudua akama udomoñkpọ a-akwañake,
anyʌñ ama aditʌk awo.
8Ifrem anam inua,
“Ami mmenekke nnie ñkpọ; ami mmemọinyọ.
Ye afịd inie mmi ammọ idiikịtte
ukwaññkpọ me idiọọkñkpọ ndomokeed ke idem mmi.”
9“Ami mmedo Abọọñ Abasi ndufo
tọọñọ ndufo eketo Iyib edi;
ami ñyaanam ndufo emaana edʌñ ke mme atayad,
kpa naña akesido ke mme usen usọrọ ndufo.
10Ami mmaatañ ikọ ye mme prọfed,
nnọ ammọ uwak ñkukịd,
ñnyʌñ mboiyo ke inua ammọ ntañ ikọ ke ñke.”
11Ado nte Kilied ado ibak?
Mbon amọ iwuọñọke ñkpọ!
Nte ammọ esiwa ñyaaraenañ ke Kilkal?
Mme akpokoro uwa ammọ edibit mme itiad e-ekoonoke ekọọk
ke inwañ e-ekịmme isọñ ekappa.
12Yekọb amaafeghe akaa idịd Aram;
Isrel amaanam utom nọ abọ anwaan,
nọ anye akpe ekọmudua amọ, akena anye akpeme edọñ.
13 Abọọñ akeboiyo ke prọfed asio Isrel ke Iyib,
aboiyo ke prọfed akama anye.
14Ado Ifrem adịppe akpọsọñ idod iyadesịd amọ;
Abọọñ amọ ayaasaana ubiomikpe uduọk iyiib adot anye ke idem,
ayaanyʌñ anọ anye utịb emiom amọ.
Currently Selected:
Hosie 12: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.