Hosie 2
2
# 2: Ke mme ikpañwed Hibru ewet Hos 2:1-23 nte Hos 2:3-25. 1“Tañ baña nditọeka mfo ideen, ‘Mbon mmi,’ ye nditọeka mfo ibaan, ‘Mme ndima mmi.’
Emia Isrel Ufen Emaana Enọ Ammọ Itie
2“Sua nọ eka mfo, sua nọ anye,
sia anye idooho anwaan mmi,
ami ñko ñnyʌññọ ndo ebe amọ.
Yak anye atre adikama iso nte awonwaan efịbe
ye unana akpanikọ ke ufọọd eba amọ.
3Imiidooho ntoro ami ñyaasuuk anye ifed
ñnyʌñ nnam anye aba nte usen e-ekemanna anye;
ami ñyaanam anye aba nte akpautatan,
nnam anye akappa aba nte nsaad isọñ,
ñnyʌñ mmia anye ufen ye nsaditọñ.
4Ami ndiiwọttọ nditọ amọ ima mmi,
sia ammọ edo nditọ efịbe.
5Eka ammọ inamma akpanikọ
anyʌñ ayommo ammọ ke asuenne.
Anye amaabo, ‘Ami ñyaakaa mbịne mbon ima mmi,
mbon se innọọ miin ndidia ye mmọọñ,
afọñ idededọñ ye linen mmi, adan ọlif mmi ye ukọd mmi.’
6Ke ntoro ami ñyaafak usʌñ amọ ye ikọd ñkukịm;
ami ñyaakọọk akọ nsịn anye mbaak anye adidiọọñọ usʌñ amọ.
7Anye ayaabịne mbon ima amọ ado idiisịmeke ammọ;
anye ayaayem ammọ ado idiikịtte ammọ.
Ndin anye ayaabo,
‘Ami ñyaatịmme mbịne ebe mmi naña akedo ke ntọọñọ,
sia idaha ado amamfọn miin akan naña ado idahami.’
8Anye inamma nọ ediọọñọ ke ami ñkedo awo ado,
a-akenọọhọ anye ñkwa abakpa, ufa ukọd ye adan,
a-akenwaññake silfa ye kold afʌk anye,
a-ammọ ekekamake enam ñkpọ enọ Baal.
9“Ke ntoro ami ñyaabọ anye ñkwa abakpa mmi ke amaadat,
ye ufa ukọd mmi ke emaenam ema.
Ami ñyaatịmme mben idededọñ mmi ye linen mmi,
a-akenaaha eben efʌk ifed amọ.
10Ke ntoro ami ñyaayaara ifed amọ
ke iso mbon ima amọ;
awo ndomokeed idiimbọọhọ anye ke ubọk mmi.
11Ami ñyaatre afịd mme usọrọ amọ:
mme usọrọ afịd isua amọ, mme Ufa Afiọñ amọ,
mme usen Sabad amọ, afịd mme usọrọ amọ.
12Ami ñyaabiat mme fain amọ ye mme eto fik amọ,
a-anye akebooho ke akedo ekọmudua se mbon ima amọ ekenọọ anye;
ami ñyaanam ammọ ekappa edo akai,
ndin ndiọi unam ikọd eyaeta ammọ.
13Ami ñyaamia anye ufen ke mme usen
se anye akefọp insensi anọ mme Baal;
anye amaabana idem amọ ke mme ñkpannuun ubọk ye ñkpọ mmaidem amọ,
anyʌñ abịne mbon ima amọ,
ado anye amamfre miin,” Abọọñ atañ.
14“Ke ntoro idahami ami ñyaatap anye;
ami ñyaadat anye usʌñ ñkaa nsaad isọñ,
ñnyʌñ ntañ ikọ ye anye ke sʌñ-sʌñ uyio.
15Do ami ñyaamaana ñyaak mme inwañ fain amọ nnọ anye,
ñyaanyʌñ nnam Abedeñ Akọọ#2:15 Akọọ awuọñọ ntịme. akappa ado usʌñ idodanyen.
Do ke anye adiimaana iba naña anye akeba ke ini uyịn amọ,
kpa nte usen a-anye akewuọhọ akpọñ Iyib.
16“Ke usen ado,” Abọọñ atañ,
“afo ayañkoot miin ‘ebe mmi’;
afo uduumaanake uñkoot miin ‘eteufọk mmi.’
17Ami ñyaasio anyịñ mme Baal mfep ke inua amọ;
awo idiitommoke anyịñ ammọ aba.
18Ke usen ado ami ñyaanam edioomo nnọ ammọ
ye mme unam ke inwañ, mme inuen ke anyọñ
ye mme unam se isaaña ke isọñ.
Utịgha ye akañkañ ye ekọñ
ami ñyaasio ammọ mfep ke iso isọñ,
nọ ato do afịd awo esuuk ena ke ifuuro.
19Ami ñyauyaak fiin nnọ idem mmi ke ndọ ke nsi-nsi;
ami ñyauyaak fiin nnọ ndọ ke adinenido ye unen,
ke ima ye mbọm.
20Ami ñyauyaak fiin nnọ ke mbuọdidem,
afo ñko ayaadiọọñọ Abọọñ.
21“Ke usen ado ami ñyaabọọrọ,”
Abọọñ atañ,
“Ami ñyaabọọrọ mme ikpaanyọñ,
ammọ ñko eyaebọọrọ ederimbod;
22ndin ederimbod ayaabọọrọ ñkpasi,
ufa ukọd ye adan ọlif,
ndin ammọ eyaebọọrọ Yesriil#2:22 Yesriil awuọñọ Abasi atọ..
23Ami ñyaatọ anye nnọ idem mmi nte inwañ ke abio;
ami ñyaawọt ima mmi nnọ anye a-ami ñkekoodo ‘Idooho awoima mmi.’
Ami ñyaabo mbon se ekoot ‘Idooho mbon mmi,’ ‘Ndufo edo mbon mmi’;
ammọ ñko eyaebo, ‘Afo ado Abasi ñnyịn.’ ”
Currently Selected:
Hosie 2: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.