Yuel 1
1
1Anye ami ado ikọ Abọọñ a-akediighe abịne Yuel ayịn Petuel.
Nsobo Ñkukuñkpọyọriyọ
2Ndufo mme ñkpisọñ, ikop ami;
afịd mbon se idʌñọ ke isọñ ikpañ utọñ.
Nte utọ ñkpọ se iba ntom atịppe akpa ke ayio ndufo,
me ke ini mme eteete ndufo?
3Itañ inọ nditọ ndufo,
nọ nditọ ndufo ñko etañ enọ nditọ ammọ,
nditọ ammọ enyʌñ etañ enọ emana mfen.
4Se mme udịm ñkukuñkpọyọriyọ eta esʌhọ
mme ikpọ ñkukuñkpọyọriyọ e-eta;
se mme ikpọ ñkukuñkpọyọriyọ eta esʌhọ
mme ñyịn ñkukuñkpọyọriyọ e-eta;
se mme ñyịn ñkukuñkpọyọriyọ eta esʌhọ
mme ñkukuñkpọyọriyọ mfen e-eta.
5Ndufo mbon inaam ukọd, idemme, inyʌñ itua ayịd!
Etua ebọñ ñkpo, afịd ndufo mme anwọñ ukọd;
itua ibọñ ñkpo ke ntak ufa ukọd,
sia ifịppe ndufo ukọd esio ke ñkpọkinua.
6Idịd keed a-adʌk adi anwan ke abio mmi,
akwa udịmekọñ a-awo idiikanna ibat;
anye anie eded ekpe,
anie mbañ uman ekpe.
7Anye a-abiat inwañ fain mmi,
anyʌñ asobo mme eto fik mmi.
Anye a-akwat mme ikpọk eto ayaaña,
anyʌñ atop anye aduọọk,
akappa mme ñkọk ammọ anịm afia.
8Fʌhọ nte mboppo a-asịneke afọñikpo,
a-atuaha abaña ebe uyịn amọ.
9E-ebiat enọ ñkpasi ye mme enọ ukọd
efep ke ufọk Abọọñ.
Mme aku eba ke ntuaña,
mbon e-enamma utom ke iso Abọọñ.
10E-esobo mme inwañ ado,
isọñ asat;
e-esobo mme ñkpasi,
ufa ukọd asat,
adan ọlif iwuọhọ aba.
11Ndufo mme atọ inwañ iduọọk idodanyen,
isio ñkpo, ndufo mme atọ fain;
ifʌhọ ibaña abakpa mbakara ye baali,
sia esobo idọk inwañ.
12Fain asaat
ñko eto fik ayeppe;
mme pomekrened, ayob ye eto apịl,
afịd mme eto ke inwañ, esaat.
Ke akpanikọ idaara mme awo
akpa mfʌhọ.
Ikood Adinam Aseeme
13Ndufo mme aku, isịne afọñikpo, inyʌñ ifʌhọ;
itua ayịd, ndufo e-enamma utom ke iso akpokoro uwa.
Ndufo idi, isịne afọñikpo ke afịd akonayio,
ndufo e-enamma ñkpọ ke iso Abasi mmi,
sia emʌm mme enọ ñkpasi ye mme enọ ukọd
ekama ke ufọk Abasi ndufo.
14Ndufo ikoot adisana utreudia;
ikoot akwa esob mbon nti esịd.
Idọñ ekoot mme ñkpisọñ
ye afịd awo se idʌñ ke abio,
yak edi ufọk Abọọñ Abasi ndufo,
enyʌñ eseeme enọ Abọọñ.
15Mbọm usen ado!
Sia usen Abọọñ akpere;
anye adiidi nte nsobo a-atooho Andikponñkan#1:15 Ke usem Hibru ado Sadai.
16Nte awo ikpịkkeke ndidia isio
ke iso ñnyịn,
idaara ye inemesịd
ifep ke ufọk Abasi ñnyịn?
17Mme ñkpasi e-efiime
ke idak ebohontan.
Mme afe ubonoñkpọ e-ewuudo,
e-ewuut mme aba ubono ñkpasi,
sia mme ñkpasi ndidia e-esaat.
18Mme ufene eba ke mmịm!
Mme udịmenañ ewuọñọ ekpọọrọ,
sia ammọ inieghe itie awawa mbid;
kpa mme udịmedọñ ñko esʌk ebọ ufen.
19 Abọọñ, afo ke ami mbọọñ ñkoot,
sia ikañ asobo mme itie awawa mbid ke anaan,
edemeikañ a-anyʌñ ata afịd eto ke inwañ.
20Itọñ mfo adọñ kpa mme ndiọi unam;
mme idịm mmọọñ esat
ñko ikañ afọp mme itie awawa mbid ke anaan.
Currently Selected:
Yuel 1: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.