Yuel 2
2
Udịmekọñ Ñkukuñkpọyọriyọ
1Ifịt adukpoñ ke Saiyọn;
Ibọñ ñkpọ ke adisana abod mmi.
Yak afịd mbon se idʌñ ke abio enyeñ idem,
sia usen adidi Abọọñ asʌk adi.
Anye akpere ama,
2usen ekịm ye mfʌhọ,
usen ntọñanyọñ ye ekịm.
Nte naña usiere atara afʌk mme ikpọabod,
ekamba ye akpọsọñ udịmekọñ esʌk edi,
utọ i-idiikibaaha akpa ke ini esed,
idiinyʌññọ ibaba ke mme ini iso.
3Ikañ abem ammọ iso asobo,
edemeikañ ñko asak akeene ammọ ke edem.
Isọñ ke iso ammọ aba nte inwañ Idịn,
ukpọk akpautatan aba ammọ ke edem,
ñkpọ ndomokeed ibọhọke ammọ.
4Ammọ ebit mme enañmbakara;
enyʌñ etaam itọk nte mbon ekọñ ewatta enañmbakara.
5Ammọ etataam ke mme anyọñ ikpọabod,
ye uyom a-abaaha nte ake mme sariọd,
ukem nte edemeikañ a-ataaha ikpotok abakpa,
nte akpọsọñ mbon ekọñ e-ekaaha iso ekọñ.
6Mme idịd eba ke ayeemensia, ke adikịt ammọ iso;
afịd iso awo aduọkkọ.
7Ammọ ebịmme nte mme anwana ekọñ;
ammọ etamma ndibene nte mbon ekọñ.
Afịd ammọ esaña ke udịm,
ammọ iwuọhọ ikpọñ usʌñisañ ammọ.
8Ammọ idutọọrọke ye emọ-emọ;
ammọ keedekeed esaña ekaa iso ke nnen-nnen usʌñ.
Ammọ etamma efrọ mme ñkpọ ubiọọñọ,
ado idutịmeke udịm ammọ.
9Ammọ ebịmme edʌk abio;
enyʌñ efeeñe eboiyo ke anyọñ ndibene.
Ammọ edọọk edʌk mme ufọk;
ammọ eto ubenafịm edʌk nte mbon inọ.
10Isọñ anyeeñe ke iso ammọ,
anyọñ ñko anyeeñe,
utịn ye afiọñ ekappa abubịd,
ntantaafiọñ ñko iyammake aba.
11 Abọọñ aduat ke akpọsọñ uyio,
ke iso mbon ekọñ amọ;
awo ikanna ibat udịmekọñ amọ,
mbon ekọñ se ikop uyio amọ edo mme ñkpọsọñ.
Usen Abọọñ akpon;
anyʌñ anie ataa ndịk.
Anie akeme adiyọ anye?
Iwai Esịd Ndufo
12 Abọọñ abo, “Kpa idahami,
itịmme imbịne miin ke afịd esịd ndufo,
ke utreudia ye ntuaña ye mfʌhọ.”
13Iwai esịd ndufo,
ikiiwai mme afọñ ndufo.
Itịmme ibịne Abọọñ Abasi ndufo,
sia anye afọn ido anyʌñ anie mbọm,
isọppọ iyadesịd ado ayọhọ ye ima,
ñko anye iwakka adinọ awo ufen.
14Anie idiọọñọ? Anye akeme ikappa esịd anyʌñ akpəho
ndin akappa anọ adidiọñ,
mme enọ ñkpasi ye mme enọ ukọd,
enọ Abọọñ Abasi ndufo.
15Ifịt adukpoñ ke Saiyọn,
isian adisana utreudia,
ikoot akwa esob mbon nti esịd.
16Ikoot mme awo ibok,
idiọñ esob mbon nti esịd,
ikoot mme ñkpisọñ ibok itie keed,
ikoono ntəkayịn ibono itie keed,
kpa ye mbon se iwọp eba.
Yak ebendọ akpọñ ubeed amọ,
anwaan ndọ anyʌñ akpọñ ikʌk ndọ amọ.
17Yak mme aku, e-enamma utom ke iso Abọọñ,
etua ayịd ke ufọọd esa ye akpokoro uwa.
Yak amọ ebo: “Abọọñ, tua ikọd mfo mbọm.
Kuuyak ikọd mfo edo ñkpọ nsaha,
ñkpọ ekpọhọ ikọ ke atu mme idịd.
Nsoo ido ntak a-ammọ ekpebooho ke atu mme awo ete,
‘Abasi ammọ aba ke mmọọ?’ ”
Ibọọrọ Abọọñ
18Akem Abọọñ amaafịbe ufịb abaña isọñ amọ,
anyʌñ akop mbọm anọ ikọd amọ.
19Ndin Abọọñ amaabọọrọ ammọ ate:
“Ami ñyaanọ abakpa, ufa ukọd ye adan ọlif isọk ndufo,
se idiikem inyʌñ inekke iyʌkkọ ndufo;
tutu amama ami ndiinamma ndufo edo ñkpọ nsaha aba
enọ mme idịd.
20“Ami ñyaabịne uwak atu awo e-etooho adoro ñkaa anyan usʌñ ikpọñ ndufo,
ñyaanək ammọ ñkedọñ ke nsaad ikpu-ikpu isọñ;
atu mbon ammọ ke usakkautịn eyaesịp ke Ñkpaikpa Inyañ.
Ñko atu mbon ammọ ke usobutịn eyaesịp ke Akpainyañ Mediterenia.
Ñko utebe ammọ ayaawuọ adọọk;
ufịk ammọ ayaawuọ adọọk adi.”
Ke akpanikọ anye a-anam mme ikpọ ñkpọ!
21Isọñ Yuda, kuufeghe ndịk;
nem esịd nyʌñ daara.
Ke akpanikọ Abọọñ a-anam mme ikpọ ñkpọ!
22Ndufo mme ndiọi unam, ikiifeghe ndịk,
sia mme mbid ke unaisọñ etọọñọ ediseghe.
Mme eto esʌk enwịm mfịd;
eto fik ye fain enwịm ayọhọ mfịd ammọ.
23Nditọ Saiyọn, inem esịd,
idaara ke Abọọñ Abasi ndufo,
sia anye inọọ ndufo akpa inua edịm,
sia anye ado anam akpanikọ.
Anye inọọ ndufo uwak mbara,
akpa inua edịm ye akpatre inua edịm, naña akesido.
24Eyaedọñ abakpa ayọhọ mme afe ubeek abakpa,
ikịm ayaayọhọ aduọiyọ ye ufa ukọd ye adan ọlif.
25“Ami ñyainọ ndufo usiene ke abaña mme isua edem a-mme ñkukuñkpọyọriyọ eketaaha,
ikpọ ñkukuñkpọyọriyọ ye ñyịn ñkukuñkpọyọriyọ,
mme utọ ñkukuñkpọyọriyọ mfen, ye ekamba udịm ñkukuñkpọyọriyọ,
ekamba udịmekọñ a-ami ñkenọọhọ adi atu ndufo.
26Ndufo eyaenie uwak ndidia se edia tutu iyʌkkọ ndufo,
eyaenyʌñ etooro anyịñ Abọọñ Abasi ndufo,
a-anamma mme utịppeñkpọ inọọ ndufo;
ñko ikọd mmi idiikịtte abuud aba ke nsi-nsi.
27Ndin ndufo eyaediọọñọ ke ami mmọdo ke Isrel,
ke ami ndo Abọọñ Abasi ndufo,
ñko ke mfen ibaaha;
ikọd mmi idiikịtte abuud aba ke nsi-nsi.
Usen Abọọñ
28“Ndin ke ami amaaboiyo,
ami ñyaanwañña Sịbidịd mmi nduọk afịd awo ke idem.
Nditọ ndufo ideen ye ibaan eyaetañ prọfesi,
ñkaan ideen ndufo eyaedappa ndab,
ñkparawa ideen ndufo eyaekịt ñkukịd.
29Kpa ye nditọufọk mmi, ideen ye ibaan,
ami ñyaanwañña Sịbidịd mmi ndot ammọ ke mme usen ado.
30Ami ñyaawọt mme utịppeñkpọ ke mme hefịn
ye ke isọñ,
iyiib ye ikañ ye mme eboho nsʌñikañ.
31Utịn ayaakappa ado ekịm,
afiọñ ayaanyʌñ akappa iyiib,
mbemiso adidi ekamba ye anie ndịk usen Abọọñ.
32Ndin afịd awo se ikoot
anyịñ Abọọñ eyaebọkkọ;
sia ke Abod Saiyọn ye ke Yeruselem
ke ubọkkọ adiiba,
kpa naña Abọọñ atañ,
kpa ke atu mbon se isʌhọ
A-Abọọñ akoodo#2:32 Ke mme ikpañwed Hibru ewet Yu 2:28-32 nte Yu 3:1-5..
Currently Selected:
Yuel 2: ICB
Highlight
Share
Compare
Copy
Want to have your highlights saved across all your devices? Sign up or sign in
Adisana Ñwed Abasi ke Ikọ Ibibio Ayio Mfịn™
© 2020, 2025 Biblica, Inc.
Enam ke emaekebọ Unyịmme. Emʌm afịd unen ekama ke afịd ederimbod.
Ibibio Contemporary Bible™
Copyright © 2020, 2025 by Biblica, Inc.
Used with permission. All rights reserved worldwide.