HECHOS 1
1
Jucha illaj Espirituta cusha nishcami
1C'uyashca Teófilo. Sarunman ñuca quillcashpaca, callarimanta tucui imallata Jesús rurashcata, yachachishcataca, 2jahua pachaman rina punllacama pai imallata rurashcataca ñami quillcarcani. Paica manaraj jahua pachaman rishpami pai agllashca apostolcunataca jucha illaj Espirituhuan imallata rurana cashcata mandarca. 3Paicunamanmi Jesusca huañushca q'uipaca chuscu chunga punllacama pai causaj cashcata alli yachachun cutin cutin ricurirca. Chaipica Taita Dios mandacujpica ima shina cana cashcatami yachachirca.
4Jesusca paicunahuan cashpaca, cashna nishpami mandarca:
–Jerusalenmantaca amaraj ringuichij. Ñuca sarunman huillashca shinallataj ñuca Yaya cusha nishca jucha illaj Espíritu shamungacama shuyanguichij. 5Juanca yacullahuanmi bautizarca. Ashtahuanpish cancunaca jucha illaj Espirituhuanmi asha punllacuna q'uipaca, bautizashca canguichij– nircami.
Jahua pachaman Jesús rishcami
6Chaipi tandanacushcacunaca:
–Mandaj Jesús ¿cunanllatajchu ñucanchij llajtata mandacujpaj maquimanta quichushpa ñucanchij judiocunallataj mandaj cachun churangui?– nircacunami.
7Chaimi Jesusca:
–Chaitaca, ñuca Yayallami yachan. Cancunaca ima huata, ima punlla canata mana yachanachu canguichij. 8Shina cajpipish jucha illaj Espíritu cancunapaj jahuaman shamujpimi, imatapish rurai tucuj canguichij. Chashna cashpami ñucamantaca Jerusalenpi, tucui Judeapi, Samariapi, cai pachapi tiyaj tucui llajtacunapi huillanguichij– nircami.
9Tucui caicunata nishca q'uipami, paicuna ricucujpi Jesustaca jahua pachaman apajpi, paita p'uyu chasquishpa pacajpica, ña mana ricui tucurcacuna. 10Jesús chashna rijta paicuna huichilla ricuracujpimi, ñapish ishqui runacuna yurajlla churanata churarishca paicunapaj c'uchupi ricurishpaca, 11cashna nircacuna:
–Galilea runacuna ¿ima nishpataj jahua pachata huichilla ricuracunguichij? Cancunapajmanta jahua pachaman apashca Jesusllatajmi, cutin tigramunga. Ima shinami pai rijta ricurcanguichij, chashnallatajmi shamunga– nircacunami.
Matiasta Judaspaj randi agllashcami
12Chai q'uipami Olivar shuti urcumantaca, Jerusalenman tigrarcacuna. Jerusalenmanta chai urcuca, samana punllapi purina shinallami carca. 13Chaiman chayashpaca, paicuna pozacushca altibajo huasimanmi huichiyarcacuna. Paicunaca Pedro, Jacobo, Juan, Andrés, Felipe, Tomás, Bartolomé, Mateo, Alfeopaj churi Jacobo, Zelote nishca Simón, Jacobopaj huauqui Judaspishmi carcacuna. 14Tucui paicunami maijan huarmicunandij, Jesuspaj mama Mariandij, Jesuspaj huauquicunandij shuj yuyailla tucushpa Taita Diosta mañashpa rogacurcallacuna.
15(Chaipi tandanacushpa mañajcunaca, patsaj ishqui chunga shinami carca). Chai punllacunapimi Pedroca, paicunapaj chaupipi shayarishpa cashna nirca:
16–Huauquicuna, jucha illaj Espíritu Davidta quillcachishcapi Judasmanta huillashcaca pajtanataj cashcamanta ñami pajtarca. Jesusta japijcunataca Judasmi Jesús maipi canman pushashpa rirca. 17Judasca ñucanchijpurapimi carca. Judasca ñucanchijhuan Jesusmanta huillagrichun cayashcami carca. 18Judas millaita rurashpa japishca cullquihuanca, allpatami randirca. Judasca jahuamanta urisingaman urmashpami, huijsa tugyajpi chunllullicunapish tallirirca. 19Chaitaca, Jerusalenpi tucui causajcunami yacharcacuna. Chaimantami chai allpataca, paicunapaj quiquin rimaipica Aceldamata shutichircacuna. (Acéldama nishpaca, “Yahuar Allpa” nisha ninmi). 20Salmos libropica, cashna nishpami quillcashca tiyacun:
“Pai causashca huasica shitashca saquirichun,
chaipi causajpish pi ama tiyachun”.
“Paipaj ruranatapish shujtaj japichun” ninmi.
21Chaimanta Mandaj Jesús ñucanchijpurapi causacujpiraj, ñucanchijhuan punllanta purij runacuna tiyanmi. 22Paicunaca Jesusta Juan bautizacushca punllamanta Jesús jahua pachaman ringacama purijcunami. Jesús causarishcata ñucanchijhuan huillaj cachun, paicunamanta maijantapish shujta agllanatajmi canchij– nircami.
23Pedro chashna nijpica, ishquitami ch'icanchircacuna. Shujca Justo nishca José shuti Barsabasmi carca. Caishujca Matiasmi carca. 24Chaimi cashna nishpa, Taita Diosta mañarcacuna: “Jatun Dios canca, tucuicunapaj shungutami rijsingui. Cunan cai ishquimanta maijanta can agllashcata ñucanchijman ricuchihuai. 25Paica can imalla rurai nishcata ñucanchijhuan rurachun, apóstol canatapish japichun. Judasca millaita rurashpa urmashcamantami pai maiman rina cashcaman rin” nircacunami.
26Mañashca q'uipa sorteajpica Matiaspajmi urmarca. Paimi chunga shuj apostolcunahuan tandanacurca.
Currently Selected:
HECHOS 1: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
