JUAN 21

Canchis yachacujcunaman Jesús ricurishcami

1Chai q'uipaca Tiberias cucha c'uchupimi, Jesusca cutin paipaj yachacujcunaman ricurirca. Chaipica cashnami tucurca: 2Simón Pedrondij, ishqui huacharishca Tomasndij, Galileapi caj Canamanta caj Natanaelndij, Zebedeopaj churicunandij, shujtaj ishqui paipaj yachacujcunandijmi chaipica tandacushca carca. 3Chaipimi Simón Pedroca:

–Chalhuacunata japinamanmi rigrini– nijpi, caishujcunapish:

–Ñucanchijpish canhuanmi rishun– nircacuna.

Chaimantaca shuj barcopi llujshishpami tucuicuna rirca. Ashtahuanpish chai tutaca, ima chalhuata mana japircacunachu.

4Ñalla pacarimugrijpimi, Jesusca cucha uripi ricurirca. Yachacujcunaca, Jesús cashcataca mana yacharcacunachu. 5Jesusca paicunataca:

–Huahuacuna, ¿imallatapish micungapaj charinguichijchu?– nijpi, paicunaca:

–¡Mana imata charinchijchu!– nircacunami.

6Chaimi Jesusca:

–Barcopaj alli ladoman linchita shitaichij, japinguichijmi– nijpi paicuna shitashpaca, achca chalhuacuna linchipi junda cajpimi, ña mana llujshichi tucurcacuna. 7Chaimantami Jesuspaj c'uyashca yachacujca, Pedromanca:

–¡Paica Mandaj Jesusmari!– nirca.

Simón Pedroca, Mandaj Jesusmari nijta uyashpaca, churanata llujshichishca cashpami churanata churarishcahuan yacuman shitarishpa Jesuspajman rirca. 8Caishuj yachacujcunaca, linchi junda chalhuata barcohuan aisashpami rircacuna. Allpaman chayanapajca, iscun chunga metro shinallami illarca.

9Barcomanta allpaman uriyashpaca, nina jahuapi shuj chalhua cusaricujta, tandatapishmi ricurcacuna. 10Jesusca paicunataca:

–Cunan cancuna japimushca asha chalhuacunata apamuichij– nircami.

11Simón Pedro barcoman huichiyashpaca, linchitaca allpamanmi aisarca. Linchipica 153 jatun chalhuacuna junda cajpipish, linchica mana lliquirircachu. 12Chai q'uipami Jesusca:

–Shamuichij, micunguichij– nirca.

Chaipica Mandaj Jesús cashcata yachashcamantami, yachacujcunaca: “¿Canca pitaj cangui?” nishpa maijan mana tapurcacuna. 13Jesús c'uchuyashpaca, tandata japishpami paicunaman curca. Shinallatajmi chalhuatapish curca. 14Huañushcacunapaj chaupimanta causarishca q'uipaca, caihuanca quimsa cutinmi Jesusca paipaj yachacujcunaman ricurirca.

Jesusca Simón Pedrotaca ñuca ovejacunata michingui nishcami

15Micushca q'uipami Jesusca, Simón Pedrotaca:

–Jonaspaj churi Simón, ¿canca ñucataca caicunata yallichu c'uyangui?– nijpi paica:

–Ari Mandaj Jesús, ñuca canta c'uyashcataca quiquinllataj yachanguimi– nijpi Jesusca:

–Ñuca bachujcunata cuidangui– nirca.

16Jesusca cutinmi:

–Jonaspaj churi Simón, ¿Ñucataca c'uyanguitajchu?– nijpi, Pedroca:

–Ari Mandaj Jesús, quiquinta ñuca ima shina c'uyaj cashcataca quiquinllataj yachanguimi– nijpi Jesusca:

–Ñuca ovejacunata michingui– nirca.

17Jesusca caihuanca quimsa cutinmi:

–Jonaspaj churi Simón, ¿Ñucataca c'uyanguichu?– nirca.

Caihuanca quimsa cutin: “¿Ñucataca c'uyanguichu?” nijpimi Pedroca llaquirishpa:

–Mandaj Jesús, quiquinca tucuitami yachangui. Quiquinta ñuca ima shina c'uyaj cashcataca quiquinllataj yachanguimi– nijpi Jesusca:

–Ñuca ovejacunata cuidangui. 18Canca chairaj cashpaca, canllataj chumbillirishpami, can maiman risha nishcaman rij carcangui. Ashtahuanpish yuyajyashpa cambaj maquicunata chutajpica, shujtaj chumbillichishpami, can mana risha nishcamanpish pushanga. Chaica chashnatajmi canga– nircami.

19Chashna nishpaca, Pedro ima shina huañushpa Taita Diosta jatunyachina cashcata entendichunmi, chashna nirca. Chai q'uipaca:

–Ñucata cati– nircami.

Jesuspaj c'uyashca yachacujmi

20Pedro tigralla ricushpaca, Jesuspaj c'uyashca yachacuj caticujtami ricurca. Chai yachacujllatajmi sarun micucujpica, Jesuspi huancarishpa: “Mandaj Jesús ¿Canta huañuchichun japichijca pitagari?” nishpa tapujca carca. 21Chai yachacujta Pedro ricushpaca:

–Mandaj Jesús, paica ¿imataj tucunga?– nijpi,

22Jesusca:

–Ñuca munajpica, ñuca tigramungacama paica causacuchun canca ¿ima ninatataj charingui? Canca ñucata catilla– nirca. 23Jesús chashna nijpimi, paipaj yachacujcunapurapica chai yachacujca mana huañungachu ninacushpa, huasha huasha parlanacurcacuna. Mana huañuna cashcataca, Jesusca mana nircachu. Ashtahuanpish: “Ñuca munajpica, ñuca tigramungacama paica causacuchun, canca ¿ima ninatataj charingui?” nircallami.

24Chai mana huañungachu nicushca yachacujmi caicunataca huillashpa quillcan. Pai huillashcacunaca tucui chashnataj cashcatami yachanchij. 25Jesús rurashcacunaca, ashtahuan tiyanrajmi. Chai tucuicunata quillcasha nijpica, cai pachapica librocunata maipi churanapajca mana pajtanmanchu yuyanimi. Chashna cachun.

Currently Selected:

JUAN 21: QCHI04

Highlight

Copy