GÉNESIS 31
31
Jacobca Labanpaj pacalla rinata yuyarishcami
1Labanpaj churicunaca: “Jacobca ñucanchij yaya imalla charishcacunatami japishca. Ñucanchij yayapaj charishcacunahuanmi cai tucuitaca charijyashca” ninacushcami Jacobpica uyarishca. 2Jacobca, Labanpish ña mana ñaupa shina c'uyaj ñahuihuan paita ricucushcatami ricurca. 3Chaimi Mandaj Diosca Jacobtaca: “Cambaj yaya mamapish, cambaj familiacunapish causacun llajtallamantaj tigrailla. Ñucami canhuan casha” nirca.
4Chaimi Jacobca Raqueltapish, Leatapish paipaj ovejacuna maipi canman cayachishpa, 5paicunataca:
–Cancunapaj yayaca ñucataca, ña mana ñaupa shina c'uyaj ñahuihuan ricunchu. Shina cajpipish, ñuca yayapaj Taita Diosca ñucahuanmi. 6Ñuca tucui fuerzahuan cancunapaj yayapajta rurashpa causacushcataca yachanguichijmi. 7Cancunapaj yayaca ñucata umashpami, paipajta rurashcamanta ñuca japina cashcataca chunga cutin shujtajyachishca. Taita Diosmari ñucata llaquichichunca mana saquihuashca. 8Labanca: Ñucapajta rurashcamantaca yana ovejacunaca tucuimi cambaj canga nijpica, tucui ovejacunami yanacunallata huacharca. Muru ovejacunami tucui cambaj canga nijpica, tucui ovejacunami murucunallata huacharca. 9Chashnami Taita Diosca cancunapaj yayapaj animalcunata quichushpa ñucaman curca.
10Ñucaca ovejacuna japinacuna punllacunapi muscuipi shina ricushpaca, huarmi ovejacunata japicuj c'ari ovejacunaca tucuicuna yanajlla, puzujlla, murujlla cajtami ricurcani. 11Chai muscuipimi Taita Diospaj angelca ñucataca: Jacob nijpi: Ñucaca caipimi cani nircani. 12Chaipimi angelca: Jacob, canta ima shina Labán llaquichicujtaca allimi yachani. Ashtahuanpish cunan can ricucujpi japinacucuj ovejacunaca tucuicunami yanata, puzuta, muruta huachanga. 13Ñucaca Bet-elpi canman ricurij Taita Diosmi cani. Chaipimi canca shuj rumi jahuapi aceiteta tallishpa, ñucapajta rurana tucurcangui. Chaimanta cunanca canca cai llajtamanta llujshishpa, can huacharishca llajtallamantaj tigrai ninmi– nircami.
14Chaimi Raquelpish, Leapish:
–Shinashpaca ñucanchij yayapajta imalla japina cashcataca, ña mana charinchijchu. 15Ashtahuanpish ñucanchij yayaca ñucanchijtaca, maimanta shamushcata shinami charin. Ñucanchijtapish canmanca c'atushcamari. Ñucanchijmanta can trabajashcahuanmari charijyashca. 16Ñucanchij yaya tucui imalla charishcacunata Taita Dios quichushcaca ñucanchijpajpish, ñucanchij huahuacunapajpishmari tucushca. Chaimanta Taita Dios imallata canman nishcata rurailla– nircacuna.
Labanpajmanta Jacob pacalla rishcami
17Chashna parlanacushpami Jacobca paipaj churicunatapish, huarmicunatapish camellocunapi tiyachishpa, 18Padan-arampi Labanpajta rurashcamanta pai japina cashcamanta japishca animalcunatapish, tucui imalla charishcacunatapish tandachishpa, Canaanpi caj paipaj yaya Isaacpajman tigrangapaj ñanpi yaicurca. 19Labanca paipaj ovejacunata rutunaman rishca cajpimi, Raquelca paipaj yayapaj dioscunata shuhuashpa rirca. 20Jacobca arameo Labanmanca pai rina tucushcataca mana huillashpami pacalla rirca. 21Jacobca pai imalla charishcacunata tucuita apashpa pacalla rishpaca, Éufrates jatun yacuta ch'imbashpami Galaad urcuman rirca.
Labanca Jacobta catishpa rishcami
22Jacob pacalla rishcataca, quimsa punlla q'uipami Labanmanca huillarcacuna. 23Labanca, paipaj familiacunata tandachishpa paihuan pushashpami Jacobta catishpa rirca. Canchis punllata purishpami Galaad urcupi japirca. 24Ashtahuanpish chai tutallatajmi Taita Diosca arameo Labanman muscuipi ricurishpaca: “Jacobtaca ama imata ninguichu” nirca.
25Labanca, Galaad urcupi maipimi carpa huasicunata shayachishpa Jacob tiyacun chaipi cati japishpami paipish carpa huasicunata shayachishpa paipaj familiacunandij chaipi tiyarirca. 26Chaipimi Labanca, Jacobtaca:
–¿Imatataj rurashcanguichu, imamí? ¿Ima nishpataj ñucapaj pacalla, ñuca ushushicunataca jatun macanacuipi mishashpa prezu apajcuna shina pushamurcangui? 27¿Ima nishpataj ñucaman mana huillashpa pacalla callpamurcangui? Can shamusha nishcata ñuca yachashca cashpaca tamborpi, arpapi tocashcacunahuan cantashcacunahuan cushicushpamari, sumaj micuita rurashpa caya minchacama nishpa cachaiman carcani. 28Ñuca nietocunata, ñuca ushushicunata muchashpa caya minchacama nichunllapish mana saquishcanguichu. Cai cutinca canca loco shinamari utca shamushcangui. 29Chashna rurashcamanta cancunataca imata rurashpapish ñuca maquihuan llaquichi tucunimi. Shina cajpipish cunan tutamari cambaj yayapaj Taita Diosca: Jacobtaca ama imata ninguichu nirca. 30Cambaj yayapaj huasiman tigranata munashcamanta tigracushpapish ¿ima nishpataj ñuca dioscunata shuhuamurcangui?– nirca.
31Chaimi Jacobca, Labantaca:
–Cambaj ushushicuna mana saquirisha nicujpipish ñucata quichushpa saquichingallatajmari nishpa manchashpami mana huillarcani. 32Caipi cajcuna maijanpish cambaj dioscunata charicujta can japijpica chaica huañungatajmi. Ñucapaj cajcunapi mashcashpa cambaj imalla cajcunata japishpaca, ñucanchij familiacunapaj ñaupajpi ricuchishpa apailla– nircami.
Jacobca Raquel paipaj yayapaj dioscunata shuhuamushcataca manataj yachashcamantami chashna nirca.
33Labanca Jacobpaj carpa huasiman, Leapaj carpa huasiman, Leapajta, Raquelpajta ruraj huarmicunapaj carpa huasicunaman yaicushpa mashcashpaca imata mana japircachu. Leapaj carpa huasimanta llujshishpaca, Raquelpaj carpa huasimanmi yaicurca. 34Raquelca rurashcalla dioscunataca camello parejo ucupi churashpami, chai jahuapi tiyarirca. Chaimi Labanca tucui carpa huasicunapi mashcashpapish maipi mana japirca. 35Raquelca paipaj yayataca:
–Ñuca amito, ñucaca quilla ungüihuan cashpami, caimantaca mana jatari tucuni. Ama p'iñaripangui– nircami.
Chaimi Labanca tucuipi callarishpa mashcashpapish, rurashcalla paipaj dioscunataca maipi mana japirca. 36Imata mana japijpimi, Jacobca achcata p'iñarishpa Labantaca:
–¿Ima mana allitataj rurarcaniri? Nina sindirij shina p'iñarishpa ñucata catishpa shamuchunca ¿ima juchatataj rurashcani? 37Ñuca imalla charishcacunapica, ñami tucuita mashcangui. Cambaj huasimanta imata apamushca cajpi japishpaca, ñucahuan cajcunapaj ñaupajpi, canhuan cajcunapaj ñaupajpi ricuchihuailla. Chaimi paicuna ricushpaca ñucanchij ishquimanta maijan mana allita ruraj cashcata ricungacuna. 38Ñucaca ishqui chunga huatacunatami cambajta rurashpa causarcani. Chaipica cambaj ovejacunapish, cambaj chivocunapish mana shullurcachu. Cambaj canlla ovejamanta shuj carnerollatapish huañuchishpa mana micurcanichu. 39Sacha animalcuna cambaj animalcunata huañuchijpipish, mana cambajman apamurcanichu. Chaipaj randica ñucami shujtajta churajlla carcani. Tuta cashpa punlla cashpa cambaj animalcunata shuhuajpica pagachijtajmi carcangui. 40Chaimantami rupai punlla yallitaj ruparicushpapish, casa tuta chirihuan cashpapish mana dormishpa alli cuidarcani. 41Chashnami ñucaca ishqui chunga huatacunata cambajta rurashpa causarcani. Chunga chuscu huatacunataca cambaj ishqui ushushicunamantami, cambajta rurarcani. Sujta huatacunataca cambajta cai ñuca japishca animalcunamantami cambajta rurarcani. Shina cajpipish ñucaman cusha nishcataca shuj cutinllapish mana chaitataj pajtachishpami, chunga cutin shujtajyachircangui. 42Abrahampaj Taita Dios, ñuca yaya Isaac manchashpa cazuna Taita Dios mana ñucahuan cashca cajpica, ñucataca chushaj maquillatami tigrachishpa cachanguiman carca. Ashtahuanpish ñuca maquicunahuan c'uyaillata cambajta trabajacujta ricuj Taita Diosmi, cunan tuta canman ricurishpa ama imata rurachun jarcashca– nircami.
Jacobpish Labanpish mana p'iñanacunata ari ninacushcami
43Chaimi Labanca Jacobtaca:
–Cambaj huarmicunaca ñuca ushushicunami. Paicunapaj huahuacunapish ñuca churicunami. Cambaj ovejacunapish ñuca ovejacunami. Tucui caipi can imallatami charicungui, tucui chaicunami ñucapaj. Shina cajpipish ñuca ushushicunatapish, paicuna huachashca churicunatapish imata mana rurai tucunichu. 44Ashtahuanpish cunanca canpish ñucapish alli tucunacushcata ricuchij shuj ruranata ari ninacushun– nirca.
45Shina nijpimi Jacobca, Labanhuan ari ninacushcata ricuchij cachun shuj rumita japishpa shayachishpaca, 46tucui paipaj huasi ucupuracunataca:
–Rumicunata japichij– nijpi, tucuicuna rumicunata japishpa chai jahuallapitaj montonarcacuna.
Chai q'uipaca rumicunata montonashca jahuapimi micurcacuna. 47Chaitaca Labanca Jegar Sahadutami shutichirca. Jacobca Galaadtami shutichirca.
48Chaimi Labanca Jacobtaca:
–Cai rumi montonmi ñucanchij ishqui ari ninacushcata ricuchij canga– nishpami, chai pambataca Galaadta shutichishpa, 49Mizpa shutitapish shutichishpaca Jacobtaca:
–Canpish ñucapish ch'icanyashpa carupi causacujpica, Mandaj Dios cantapish ñucatapish cuidachun ninimi. 50Ñuca ushushicunata llaquichijpipish, mana cashpaca ñuca ushushicunata charishca jahua shujtaj huarmicunata cambaj huarmi cachun japijpipish, canpish ñucapish mana tandalla cajpipish cantapish ñucatapish ricucuj Taita Dios imatapish nichun ninimi– nircami.
51Labanca Jacobtaca cashnapish nircarajmi:
–Riqui, cai rumi montonta rurashpa shayachishca canhuan ñucahuan chaupipi cajmi canhuan ñucahuan ari ninacushcata ricuchij canga. 52Cai rumi montonmi canpish ñucata llaquichinaman cai rumi montonta mana pasana cashcata, ñucapish canta llaquichinaman cai rumi montonta mana pasana cashcata ricuchij canga. 53Ñucanchij chashnataj rurashunmi ninacushcataca cambaj abuelo Abrahampajpish, ñuca abuelo Nacorpajpish Taita Diosllataj chaitataj pajtachina yuyaita cushca cachun– nircami.
Shina nijpimi Jacobca, paipaj yaya Isaac cazushpa manchana Taita Diospaj shutipi chashnataj pajtachinata ari nirca. 54Chai q'uipami Jacobca, chai urcupi Taita Diosman animalcunata cushpa huañuchishpa rupachirca. Jacobca tucui paipaj familiacunatami micuchun cayarca. Paicunaca chaipi micushpaca chai tutaca chaillapitajmi dormircacuna.
55Labanca utcata jatarishpami paipaj ushushicunatapish, paipaj nietocunatapish muchashpa alli cashca canguichij, caya minchacama nishpa paipaj llajtallamantaj tigrarca.
Currently Selected:
GÉNESIS 31: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
