GÉNESIS 34
34
Leapaj ushushi Dinata cananeocuna llaquichishpa pingaichijpi paicunatapish llaquichishcami
1Leaca Jacobpajtaca, Dina shuti ushushitami charirca. Chai solteraca chai llajtapi causaj solteracunata rijsinamanmi rirca. 2Paitaca chai llajtata mandaj heveo Hamorpaj churi Siquem moso ricushpami mana nicujllatataj pushashpa paihuan dormishpa pingaichirca. 3Siquemca Leapaj ushushi Dinapi shunguta churashpa yallitaj munashcamantami, Dinapish paita c'uyachun nishpa sumajta rimarca. 4Chaimi Siquemca paipaj yaya Hamortaca:
–Cai soltera ñuca huarmi cachun, paipaj yayata mañagripai– nirca.
5Jacobca, paipaj ushushi Dinahuan Siquem moso dormishpa pingaichishcata yachashpapish, paipaj churicuna michinamanta tigramungacama upalla carcallami. 6Chaicamaca Siquempaj yaya Hamorca, Jacobhuan parlanacungapajmi rirca.
7Jacobpaj churicunaca michinamanta tigramushpami, paicunapaj pani ima tucushcata yachaj chayarcacuna. Paicunapaj yaya Jacobpaj ushushihuan Siquem moso dormishpaca, manapish rurana cashcata rurashpa israelcunata jatun pingaipi churashcamantami achcata llaquirishpa yallitaj p'iñarircacuna. 8Hamor runa paicunahuan parlashpaca:
–Ñuca churi Siquemca cambaj ushushipi shunguta churashpami yallitaj munan. Chaimanta paitaca ñuca churipaj huarmi cachun cuchunmi rogani. 9Ñucanchijca cancunapaj ushushicunata, cancunapish ñucanchij ushushicunata quiquin huarmicuna cachun japishpa, familiapura tucushunchijlla. 10Chashna rurashpa ñucanchijhuan causashunchijlla. Cai llajtapica maipipish cancuna munashcapi causaichijlla. Imatapish c'atushpa randishpa causaichijlla– nircami.
11Siquem mosopish Dinapaj yaya Jacobta, turicunataca:
–Ñuca mañashcata cancuna ari nijpica, cancuna ima mañashcatami cusha. 12Shuj huarmimanta cuna cashcacunatapish, convidana cashcacunatapish ashtahuan yallihuan mañaichijlla. Ñucaca cancuna mashnata mañashcata cushallami. Ashtahuanca solterata ñuca huarmi cachun cupaichij– nircami.
13Jacobpaj churicunaca, paicunapaj pani Dinata llaquichishpa pingaichishcamantaca Siquemtapish, paipaj yaya Hamortapish umangapajmi, 14cashna nircacuna:
–Ñucanchijpurapica circuncisionta mana rurachishca c'arihuan cazarachinaca yallitaj millananami. Ñucanchij panitaca cambaj huarmi cachunca mana cui tucunchijchu. 15Cunanca cancuna cashna rurajllapimi ñucanchij panitaca cui tucunchij: Cancunaca ñucanchij shinallataj cangapajca, cancunapurapi caj tucui c'aricunami circuncisionta rurachina canguichij. 16Chashna rurajllapimi ñucanchij ushushicunataca cancunaman cushun, ñucanchijpish cancunapaj ushushicunata japishpa cancunahuan causashpa shuj pueblolla tucushun. 17Ashtahuanpish ñucanchij nishcata mana uyashpa circuncisionta mana rurachijpica, ñucanchij panita pushashpa cai llajtamanta rishunllami– nircacunami.
18Paicuna chashna nishcaca alli yuyachijpimi, Hamorpish paipaj churi Siquempish chashna rurashun nircacuna. 19Siquem mosoca Jacobpaj ushushita yallitaj munashcamantami mana uniyashpalla, circuncisionta rurachirca. Paipaj yayapaj huasi ucupurapica, Siquem mosollami tucuicunata yalli alli nishca carca. 20Chaimi yaya Hamorpish, paipaj churi Siquempish puebloman yaicuna pungu c'uchullaman rishpa chaipi caj tucuicunaman cashna nishpa parlarcacuna:
21–Chai runacunaca ñucanchijhuanca allicunami. Cai llajtaca paicuna causanalla yallitaj achcami. Chaimanta paicunaca cai llajtapimi c'atushpa randishpa causangacuna. Ñucanchijca paicunapaj ushushicunata ñucanchij huarmi cachun japishun, ñucanchijpish ñucanchij ushushicunatami paicunapaj huarmi cachun cushun. 22Chai runacunaca ñucanchij caita rurajllapimi ñucanchijhuan causashpa shuj pueblolla tucungacuna: Paicunaca circuncisionta rurashca cashcamantaca ñucanchijtapish tucui c'aricunatami circuncisionta rurachichun nincuna. 23Ñucanchij chashna rurajpica paicunapaj huagracunapish, imalla charishcacunapish, animalcunapish tucuimi ñucanchijpaj canga. Chaimanta ñucanchijca paicuna nishcataca chashna ruranaca allimi ninallami canchij. Chashnami paicunapish, ñucanchijpish tandalla causashun– nircacunami.
24Hamorhuan paipaj churi Siquemhuan nishcacunataca chai pueblo punguta llujshicujcunaca tucuicuna allimi nishpa cazushpami, chai pueblo punguta llujshijcunaca tucuicuna circuncisionta rurachircacuna.
25Circuncisionta rurachishca quimsa punllapica paicuna ashtahuan nanaihuan cajpirajmi, Jacobpaj ushushi Dinapaj turicunamanta Simeonhuan, Levihuanca paicunapaj espadata apashpa chai pueblopi causajcunapajman cungaillapi rishpa tucui c'aricunata huañuchircacuna. 26Hamortapish paipaj churi Siquemtapish espadahuan huañuchishpami, paicunapaj pani Dinataca Siquempaj huasimanta pushashpa tigrarcacuna. 27Jacobpaj churicunaca paicunapaj panita llaquichishpa pingaichishcamantami, chai pueblopi caj huañushcacunapaj jahuata saru saru purishpa, tucui chaipi causajcuna imalla charishcacunata apashpa rircacuna. 28Ovejacunata, vacacunata, burrocunata, chai pueblopi tucui imalla tiyajcunata, chagracunapi imalla tiyajcunatapishmi tucuita aparcacuna. 29Huarmicunata, huahuacunatapish, paicuna imalla charishcacunandijmi prezu aparcacuna. Huasicunapi tucui imalla tiyashcacunatapish shuhuashpami aparcacuna. 30Chaimi Jacobca, Simeontapish Levitapish:
–Cancuna chashna rurashpaca, ñucatamari cai llajtapi causaj cananeocunapi, ferezeocunapi p'iñaipi churashpa, jatun llaquipi churanguichij. Ñucaca ashalla gentecunatamari charini. Chaimanta cunanca paicuna tandanacushpami ñucatapish, ñuca huasi ucupuracunatapish huañuchishpa chingachingacuna– nircami.
31Chaimi paicunaca:
–Ñucanchij panitaca ¿maitataj huainayashcahuan causaj huarmita shinaca rurana carcari?– nircacuna.
Currently Selected:
GÉNESIS 34: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
