GÉNESIS 35
35
Taita Diosca Bet-elpi Jacobta alli cashca cachun nishcami
1Taita Diosca Jacobtaca: “Jatari, Bet-elman huichiyashpa chaipi causagri. Chaipica cambaj huauqui Esauta miticushpa ricujpi, ricurij Taita Diospaj shuj altarta ruragri” nijpimi, 2Jacobca paihuan caj tucuicunataca:
–Cancunapurapi caj rurashcalla shujtaj dioscunataca anchuchishpa shitaichij. Tucuicuna armashpa, shujtaj churanacunata churashpa allichirichij. 3Cunanca Bet-elman huichiyashunchij. Taita Diosca ñuca llaquilla puricujpipish tucui ñanpimi ñucataca huaquichihuarca. Paita pagui ningapajmi, ñucaca chaipi shuj altarta Taita Diospaj ruragrini– nirca.
4Chaimi paicunaca rurashcalla shujtaj dioscunatapish, rinrinpi aparishca zarcillocunatapish Jacobman tucuita curcacuna. Jacobca paicuna cushcacunataca, Siquem pambapi caj encina yura ucupimi pambashpa pacarca. 5Paicuna Bet-elman ña ricujpimi, Taita Diosca chai muyundij llajtacunapi causajcunaman jatun manchaita cujpi Jacobtapish, paihuan caj tucuicunatapish llaquichingapajca mana catishpa rircacuna.
6Jacobca tucui paihuan cajcunandijmi, Canaán llajtallapitaj caj Bet-elman chayarca. Chai pambaca ñaupamanca Luz nishcami carca. 7Chaiman chayashpaca, chaipi shuj altarta rurashpami, chai pambataca El-bet-elta shutichirca. Paipaj huauquita miticushpa ricujpi Taita Dios chaipi paiman ricurishcamantami chai shutita shutichirca. 8Rebecata huiñachij Débora huarmi chaipi huañujpimi paitaca Bet-el ura nijllapi caj encina yura ucupi pambarca. Chaimi chai yurataca: “Alón-bacutta” shutichirca.
9Jacobmanca, Padan-arammanta tigracujpimi Taita Diosca cutinllataj ricurishca carca. Chaipimi canmanca achca allicunatami cusha nishpaca, 10cashna nirca:
“Cambaj shutica Jacobmi.
Ashtahuanpish cunanmantaca ña mana Jacob shutichu cangui.
Israel shutimi cangui” nishpami, Israel shutita shutichishca carca.
11Taita Diosca chaillapitajmi cashnapish nirca:
“Ñucaca Ñucalla Tucuita Rurai Tucuj Taita Diosmi cani.
Canca huahuacunayuj tucushpa achcata mirarilla.
Canmantami shuj jatun llajtapish, achca aillucunapish tucunga.
Cambaj huijsamanta llujshishca huahua huahuacunaca jatun mandajcunami canga.
12Abrahamman, Isaacman cushca llajtataca canman, cambaj huahua huahuacunamanpishmi cusha” nircami.
13Shina nishpaca Taita Diosca Jacobhuan parlanacucushca pambamantaca rircallami. 14Chaimi Jacobca, Taita Dios paihuan maipi parlanacushcata ricuchij cachun shuj rumita japishpa chaipi shayachirca. Chai rumi jahuapica vinota aceitetami tallirca. 15Jacobca Taita Dioshuan parlanacushca pambataca, Bet-eltami shutichirca.
Raquel huañushcami
16Bet-elmanta Efrata puebloman ricujpimi, chaiman chayanapaj ashalla illajpi Raquelca huachana pajtajpi huacharca. Ashtahuanpish paica mana alli ungurcachu. 17Yallitaj nanaihuan ancha cajpimi, partera huarmica: “Ama manchaichu shujtaj c'ari huahuahuanmari ña charingui” nirca. 18Ñalla huañugrishpa paipaj alma llujshigrijpimi chai huahuataca Benonita shutichirca. Ashtahuanpish Jacobca Benjamintami shutichirca.
19Chashnami Raquelca huañurca. Paitaca Efrataman rina ñanpimi pambarcacuna. Chaillatajmi cunanca Belén. 20Jacobca Raquelta pambashca jahuapica, shuj jatun pircatami rurarca. Raquelta maipi pambashcaca cunancama ricunallami. 21Yaya Israel chaimanta rishpaca, Migdal-edar nishca torre chaininijllapimi paipaj carpa huasita shayachishpa causarca.
22Yaya Israel ña chaipi causacujpimi, Rubenca paipaj yayapaj Bilha shuti caishuj huarmipajman rishpa paihuan dormirca. Chaitaca yaya Israelca yachaj chayarcami.
Jacobpaj huahuacunami
(1 Cr 2.1-2)
Yaya Israelpaj churicunaca chunga ishquimi carca. 23Leahuan charishca churicunaca caicunami: Punta churica Rubén. Q'uipa churica Simeón, Leví, Judá, Isacar, Zabulón shutimi carcacuna. 24Raquelhuan charishca churicunaca José, Benjamín shutimi carcacuna. 25Raquelpajta ruraj Bilhahuan charishca churicunaca Dan, Neftalí shutimi carcacuna. 26Leapajta ruraj Zilpahuan charishca churicunaca Gad, Aser shutimi carcacuna. Paicunaca yaya Jacob, Padan-arampi causacujpi chaipi huacharishcacunami.
Isaac huañushcami
27Jacobca paipaj yaya Isaacta ricungapajmi paipaj yaya causacun Arba pueblopi caj Mamreman rirca. Chai puebloca Abraham Isaac causashca Hebrón pueblomi. 28Isaacca, 180 huatacunatami causarca. 29Isaacca uni huatacunata, yallitaj yuyajcamami causarca. Isaacca espíritu paimanta llujshijpi huañushpaca, paipaj ñaupa gentecunahuanmi tandanacugrirca. Paitaca paipaj churi Esaú, Jacobmi pambarcacuna.
Currently Selected:
GÉNESIS 35: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
