GÉNESIS 36
36
Esaupaj huahua huahuacunami
(1 Cr 1.34-54)
1Edom nishca Esaupaj huahua huahua callari yayacunaca caicunami: 2Esauca cananea huarmicunatami paipaj huarmi cachun japirca. Shujca heteo Elonpaj ushushi Ada huarmimi carca. Caishujca heveo Zibeonpaj churi Anapaj ushushi Aholibama huarmimi carca. 3Caishujca Ismaelpaj ushushi Basemat huarmimi carca. Paica Nebaiotpaj panimi carca. 4Ada huarmipi Esaú charishca churica Elifazmi carca. Basemat huarmipi charishca churica Reuelmi carca. 5Aholibama huarmipi charishca churicunaca Jeús, Jaalam, Coré shuticunami carca. Chaicunaca Canaanpi Esaú causacujpi chaipi huacharishca huahuacunami.
6Esauca paipaj huarmicunata, churicunata, ushushicunata, paipaj huasipi causaj gentecunata pushashpa, Canaanpi causacushpa tucui imalla charishcacunata, huagracunata, animalcunatapish tucuita apashpami paipaj huauqui Jacobmanta ch'ican causangapaj shujtaj llajtaman rirca. 7Ishquindijtaj yallitaj charijcuna cashcamantami, tandallaca mana causai tucurcacuna. Paicuna causacun llajtapi tiyaj michina pambacunapish animalcunata michinapajca ña mana pajtarcachu. 8Chaimi Edom nishca Esauca, Seir urcupi causarca.
9Edom nishca Esaumanta mirarishpa Seir urcupi causajcunaca caicunami. 10Esaupaj churicunapaj shuticunaca: Ada huarmipi Esaú charishca churica Elifazmi carca. Basemat huarmipi Esaú charishca churica Reuelmi carca. 11Elifazpaj churicunaca Temán, Omar, Zefo, Gatam, Cenaz shuticunami carca. 12Esaupaj churi Elifazca, Timna shuti caishuj huarmitapishmi charirca. Chai huarmipica Amalec churitami charirca. Chaicunaca Ada huarmipi Esaú charishca churipaj churicunami carca. 13Reuelpaj churicunaca Nahat, Zera, Sama, Miza shuticunami carca. Chaicunaca Basemat huarmipi Esaú charishca churipaj churicunami carca. 14Zibeonpaj churi Anapaj ushushi Aholibama huarmipi Esaú charishca churicunaca Jeús, Jaalam, Coré shuticunami carca. Chaicunaca Aholibama huarmipi Esaú charishca churicunami carca.
15Esaupaj huahuacunapurapi mandajcunaca caicunami: Esaupaj punta churi Elifazpaj churicunamanta mandajcunaca Temán, Omar, Zefo, Cenaz, 16Coré, Gatam, Amalecmi carca. Elifazmanta mirarishpa Canaanpi causaj edomitacunata mandajcunaca chaicunami. Chaicunaca Ada huarmipi Esaú charishca churipaj churicunami carca. 17Esaupaj churi Reuelpaj huahuacunapurapi mandajcunaca: Nahat, Zera, Sama, Miza shuticunami carca. Reuelmanta mirarishpa Edompi causajcunata mandajcunaca chaicunami. Chaicunaca Basemat huarmipi Esaú charishca churipaj churicunami carca. 18Aholibama huarmipi Esaú charishca churicunapaj huahua huahuacunapurapi mandajcunaca: Jeús, Jaalam, Coré shuticunami carca. Chaicunaca Ana runapaj ushushi Aholibama huarmipi Esaú charishca churipaj churicunami carca. 19Edom nishca Esaumanta mirarishcacunaca tucui chaicunami. Paicunaca quiquin aillullatataj mandajcunami carca.
20Chai llajtallapitaj causaj horeo Seirpaj churicunaca: Lotán, Sobal, Zibeón, Aná, 21Disón, Ezer, Disán shuticunami carca. Horeo Seirpaj churicunaca chaicunami. Paicunaca Edompi causaj horeocunata mandajcunami carca. 22Lotanpaj churicunaca Hori, Hemam shuticunami carca. Lotanca Timna shuti panitami charirca. 23Sobalpaj churicunaca Alván, Manahat, Ebal, Sefo, Onam shuticunami carca. 24Zibeonpaj churicunaca Aja, Aná shuticunami carca. Chai Anami paipaj yaya Zibeonpaj burrocunata shitashca pambapi michicushpaca, achca yacu t'imburishpa llujshicujta japirca. 25Anaca Disón shuti churita, Aholibama shuti ushushitami charirca. 26Disonpaj churicunaca: Hemdán, Esbán, Itrán, Querán shuticunami carca. 27Ezerpaj churicunaca: Bilhán, Zaaván, Acán shuticunami carca. 28Disanpaj churicunaca: Uz, Arán shuticunami carca. 29Horeocunata mandajcunaca: Lotán, Sobal, Zibeón, Aná, 30Disón, Ezer, Disán shuticunami carca. Chaicunaca Seir llajtapi paicunapaj quiquin aillucunata mandajcunami carca.
31Israelcuna jatun mandajta manaraj charijpica, Edom llajtataca cai jatun mandajcunami mandacurca: 32Edom llajtata mandajca Beorpaj churi Belami carca. Paipaj puebloca Dinaba shutimi carca. 33Bela runa huañujpica, Zerapaj churi Jobabmi paipaj randi mandarca. Paica Bosra pueblomantami carca. 34Jobab huañujpica, Temán llajtamanta caj Husammi paipaj randi mandarca. 35Husam huañujpica, Bedadpaj churi Hadadmi paipaj randi mandarca. Paipaj puebloca Avit shutimi carca. Pai mandacushpami Moab pambacunapi madianitacunahuan macanacushpaca misharca. 36Hadad huañujpica, Masreca pueblomanta caj Samlami paipaj randi mandarca. 37Samla huañujpica, Éufrates yacu c'uchullapi tiyaj Rehobot pueblomanta caj Saulmi paipaj randi mandarca. 38Saúl huañujpica, Acborpaj churi Baal-hananmi paipaj randi mandarca. 39Acborpaj churi Baal-hanán huañujpica, Hadar runami paipaj randi mandarca. Paipaj puebloca Pau shutimi carca. Hadar runapaj huarmica Mizaabpaj churi Matredpaj ushushi Mehetabelmi carca.
40Esaupaj huahua huahuacunaca quiquin familiapuracunata, quiquin llajtata mandajcunaca caicunami. Paicunaca: Timna, Alva, Jetet, 41Aholibama, Ela, Pinón, 42Cenaz, Temán, Mibzar, 43Magdiel, Iram shuticunami carca. Quiquin llajtacunata rurashpa, quiquin aillucunallatataj Edompi mandajcunaca chaicunami carca. Esaullatajmi Edom carca. Paimi edomitacunapaj yayaca carca.
Currently Selected:
GÉNESIS 36: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
