GÉNESIS 37
37
Josemantapish paipaj huauquicunamantapish
1Jacobca paipaj yaya causashca Canaanpimi causarca. 2Jacobpaj huahua huahua callari yayacunamanta parlashcaca cashnami: Joseca chunga canchis huatacunayuj cashpami, paipaj huauquicunahuan ovejacunata michishpa purij carca. José mosoca Bilha, Zilpa caishuj huarmicunapi paipaj yaya Jacob charishca churicunahuan purishpami, paipaj huauquicuna mana allita rurashcataca, yaya Jacobman huillaj carca.
3Yaya Israelca yuyaj cashpa Joseta charishcamantami, paitaca caishuj churicunata yalli c'uyashpa, paimanca murujlla churanata rurashpa churachirca. 4Paipaj huauquicunaca paicunapaj yayaca paicunata yallica Joseta c'uyajta ricushpami, yallitaj p'iñashpa Josehuanca mana rimasha nijcunallapish carca.
5Joseca shuj muscuitami muscurca. Chaita paipaj huauquicunaman parlajpicarin, paicunaca ashtahuanmi p'iñarircacuna. 6Joseca cashnami nirca:
–Uyaichij, cunanca ñuca imata muscushcatami parlagrini: 7Tucui ñucanchijmi chagrapi trigota huayungacurcanchij. Chaipica ñuca huayungaca jatarishpa ñapish shayarircallami. Cancunapaj huayungacunapish jatarishpami, ñapish ñuca huayunga muyundijpi shayarishpa cungurircacuna– nircami.
8Chaimi paipaj huauquicunaca:
–¿Shinashpaca canchu jatun mandaj tucusha ningui? ¿Canchu ñucanchijta mandasha yuyangui?– nishpa, pai muscushcata José parlajpica, ashtahuan p'iñarcacuna.
9Chai q'uipapish Joseca, shujtaj muscuita muscushpami paipaj huauquicunamanca:
–Ñucaca shujtaj muscuitamari muscurcani. Intitapish, lunatapish, chunga shuj luzerocunatapish ñucata cumuricujtamari muscuni– nishpami parlarca.
10Paipaj yayamanpish, paipaj huauquicunamanpish parlajpimi paipaj yayaca Josetaca:
–¿Imatataj muscushcanguichu imamí? Ñucapish, cambaj mamapish, cambaj huauquicunapish cambaj ñaupajpi cungurichunchu ningui– nishpami sinchita rimarca.
11Chaipicarin paipaj huauquicunaca ashtahuanmi p'iñarcacuna. Ashtahuanpish paipaj yayaca, chai muscuica imatashi nisha nin nishpami yuyacurcalla.
Joseta paipaj huauquicuna c'atushcami
12Shuj punllaca Josepaj huauquicunaca, paicunapaj yayapaj ovejacunata Siquempi michinamanmi rircacuna. 13Yaya Israelca Josetaca:
–Cambaj huauquicunaca Siquempimi ovejacunata michicungacuna. Canca paicunapajman ri– nijpimi Joseca:
–Ari, rishallami– nirca.
14Yaya Israelca Josetaca:
–Cunanca cambaj huauquicunapish, ovejacunapish ima shinalla cashcata ñuca yachangapaj ricushpa tigramugri– nishpami paitaca Hebrón pambamanta cachajpi Joseca Siquemman chayarca. 15Chai pambapi José chingarishca puricujpimi, shuj runa tupashpaca:
–¿Imatataj mashcashpa puricungui?– nijpi,
16Joseca:
–Ñuca huauquicunatami mashcashpa puricuni. Paicuna maipi michicujta ricurcanguipishchari huillahuai– nirca.
17Chaimi chai runaca:
–Ñamari caimantaca rishcacuna. Dotanman jacuchij ninacucujtami uyarcani– nijpimi, Joseca paipaj huauquicunata mashcashpa rishpaca Dotanpi japirca.
18Josepaj huauquicunaca José paicunapajman caruta shamucujta ricushpami, manaraj pai chayajpi paita huañuchinata yuyarinacushpa, 19paicunaca caishuj chaishuj:
–¡Chaitaca muscuj huambramari shamucun! 20Cunanca, pai muscushca ima shina pajtajta ricungapaj c'amachij huañuchishpa jutcupi shitashunchij. Yayamanca: Sacha animalmi micushca canga nishunllami– nircacuna.
21Rubén chaita uyashpami, paicunapaj maquimanta quishpichisha nishpa paicunataca:
–Ama huañuchishunchijchu.
22Ama yahuarta jichashunchijchu. Ashtahuanpish cai shitashca pambapi caj chaquishca jutcullapi shitashunchij. Paipica ama maquita churaichijchu– nirca.
Paicunapaj maquimanta chashna quishpichishpa yayapajman tigrachishpa cachangapajmi chashna nirca. 23José paipaj huauquicunapajman ña chayajpica, José churarishca murujlla churanata quichushpami, 24Josetaca japishpa jutcupi shitarcacuna. Ashtahuanpish chai jutcuca yacu illajllami carca. 25Chai q'uipaca micungapajmi tiyarircacuna. Paicuna huichilla ricushpaca, tauca ismaelitacuna shamucujtami ricurcacuna. Chaicunaca Galaadmantami mishquijllata ashnaj balsamota, mirrata camellocunaman apachishpa Egiptoman ricurcacuna. 26Chaimi Judaca paipaj huauquicunataca:
–Ñucanchij huauquita huañuchishpa paita huañuchishca jahua ñucanchijca mana yachanchijchu nishpaca imata mana japishunchu. 27Paica ñucanchij quiquin huauqui, ñucanchij quiquin aichallatajmi. Paipica ama maquita churashunchijchu. Ashtahuanpish ismaelitacunaman c'atushpa cachashunchij– nijpimi caishuj huauquicunaca tucuicunallataj allimi nircacuna. 28C'atushpa randishpa purij madianitacuna ña paicunapaj chaita ricujpimi, paicunaca Joseta jutcumanta llujshichishpaca, ismaelitacunaman ishqui chunga cullquipi c'aturcacuna. Chaicunaca Josetaca, Egiptomanmi aparcacuna.
29Chai q'uipami Rubenca, chai jutcuman tigrashpa chaipi Joseta ña mana japishpaca, paipaj churanata lliquirirca. 30Paipaj huauquicunapajman tigrashpaca:
–Joseca manamari ricurinchu. Ñucaca ¿maimantaj rishari?– nirca.
31Paicunaca shuj huahua chivota cungata p'itishpami, Josepaj churanataca chai yahuarhuan tucuita llihuircacuna. 32Josepaj murujlla churanataca yayapajmanca cashna nishpami cacharca: “Cai churanatami japinchij. Cambaj churipaj cashcata, mana cambaj churipaj cashcata rijsipai” nishpami ricuchichun cacharcacuna.
33Jacobca paipaj churipaj churana cashcata rijsishpami: “Cai churanaca ñuca churipajtajmari. Ima millai animalmari Josetaca mirga mirgata rurashpa millpushca canga” nirca. 34Jacobca paipaj churanacunata lliquirishpa, cañamazuta churarishpami paipaj churimantaca achca punllacunata llaquilla carca. 35Chaimi Jacobtaca churicunapish ushushicunapish cushichishun nishpa tucuicuna c'uchuyashpa sumajta rimarcacuna. Ashtahuanpish Jacobca imata mana uyasha nishpami paicunataca: “¡Ñucaca, seolpi ñuca churihuan tandanacugringacamami llaqui churanata churashca causasha!” nishpami huacarca.
36Madianitacuna Egiptoman chayashpaca, Josetaca Potifarmanmi c'aturcacuna. Potifarca, faraonta cuidaj soldadocunata mandajmi carca.
Currently Selected:
GÉNESIS 37: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
