JUAN 8

Huainayashpa causaj huarmita Jesuspajman pushashcami

1Chai q'uipami Jesusca, Olivocuna tiyan urcuman rirca. 2Cayandij tutamantaca Jesusca Taita Diospaj huasimanmi tigramurca. Chaipica tucuicuna paipajman shamujpimi tiyarishpa paicunata yachachirca. 3Chaimanmi mandashcacunata quillcajcuna, fariseocunapish huainayacujta japishca huarmita pushamushpaca tucui chaipi cajcunapaj chaupipi churashpa, 4cashna nircacuna:

–Yachachij, cai huarmitaca huainayacujtamari japimushcacuna. 5Moisés Mandashcapica, chashna huarmicunataca, rumicunahuan shitashpa huañuchichun ninmi. Canca caitaca ¿imatataj ningui?– nircacunami.

6Jesús ima nijta uyashpa juchachinga raicullami chashna nircacuna. Ashtahuanpish Jesusca cumurishpami, pambapi maquihuan quillcacurca. 7Paicuna cutin cutin tapucujllapimi, Jesusca:

–Cancunamanta maijan jucha illaj cashpaca, pairaj cai huarmita rumihuan shitachun– nirca.

8Shina nishpaca pambaman cutin cumurishpami, dedohuan pambapi ashtahuan quillcacurcalla. 9Chashna nijta uyashpaca, paicunapaj yuyaillapitaj mana alli cashcata yuyarishpami yuyajcunamanta callarishpa q'uipa huiñaicunacama shuj shujlla rircacuna. Jesusca, chai huarmindijllami saquirirca. 10Jesús shayarishpa pita mana ricushpaca, chai huarmitaca:

–¿Maipitaj canta juchachicujcunaca? ¿Manachu maijan cantaca huañunami cangui nirca?– nijpimi,

11chai huarmica:

–Amito, pi mana imata nincunachu– nijpi Jesusca:

–Ñucapish imata mana ninichu. Rilla, pajta cutin juchallinguiman– nirca.

Jesusca cai pachapaj luzmi

12Jesús cutin yachachi callarishpaca:

–Ñucaca cai pachapi causajcunapaj luzmi cani. Maijanpish ñucata catijca, mana amsapi puringachu. Ashtahuanpish causaita cuj luztami charinga– nijpimi,

13fariseocunaca:

–Canca, canllataj alli ricuringa raicullami huillacungui. Canllataj huillarishcaca yangallami– nircacuna.

14Chaimi Jesusca:

–Ñucallamantataj huillashpapish, ñucaca ima shina cashcatatajmi huillani. Ñucaca maimanta shamushcata, maiman rina cashcatapish yachanimi. Cancunaca ñuca maimanta shamushcata, maiman rigrishcatapish mana yachanguichijchu. 15Cancunaca cai pachapi causajcuna ruraj cashca shinallatajmi ñahuita ricushpalla juchachinguichij. Ñucaca pita mana chashnaca juchachinichu. 16Pitapish imalla rurashcata ñuca ricuchishpaca ima shina cashcatatajmi ricuchini. Chashna rurangapajca mana ñucallachu cani, ñucata cachaj Yayahuanmi cani. 17Cancunapaj mandashcapica: “Ishqui huillajtaj chai shinallataj huillajpica, mana yangachu” nishpami quillcashca tiyacun. 18Shina cajpica ñucapish ñucallamantataj huillajmi cani. Ñucata cachaj Yayapish ñucallamantataj huillajmi– nircami.

19Chaimi paicunaca:

–¿Maipitaj cambaj Yayaca?– nircacuna. Shina nijpi Jesusca:

–Ñucatapish, ñuca Yayatapish mana rijsinguichijchu. Ñucata rijsishpaca, ñuca Yayatapish rijsinguichijmanmi– nirca.

20Jesusca, Taita Diospaj huasipi yachachicushpami, ofrendata cushpa churana c'uchupi cashpa chashnaca nirca. Chaipica paita japina horas manaraj pajtajpimi, mana pi japircacuna.

Ñuca ricunmanca cancunaca mana ri tucunguichijchu nishcami

21Jesusca cutinmi paicunataca:

–Ñucaca rigrinimi. Ñucataca mashcanguichijmi. Ashtahuanpish juchapi huañushca cashcamanta ñuca maipi canmanca cancunaca mana ri tucunguichijchu– nijpimi,

22judiocunaca:

–¿Paillataj huañuchirinata yuyashpachu: “Ñuca ricunmanca, cancunaca mana ri tucunguichijchu” nin imashi?– nircacuna.

23Chaimi Jesusca:

–Cancunaca cai jucha pachamantami canguichij, ñucaca jahua pachamantami cani. Cancunaca cai pachamantami canguichij, ñucaca mana cai pachamantachu cani. 24Chaimi cancunataca cancunapaj juchallapitajmi huañunguichij nircani. Chashna nishca shinallatajmi ñuca pi cashcata mana crishpaca cancunapaj juchallapitaj huañunguichij– nirca.

25Chashna nijpimi:

–Canca ¿pitaj cangui?– nijpi Jesusca:

–Ñuca pi cashcataca callarimantami cancunamanca ña huillarcani. 26Cancunataca achcata ninatami charini. Cancuna ima shina cashcataca chaitataj ricuchishpami rimana cani. Ñucata cachaj Yayaca ima shina cashcatataj rimajmi. Ñucaca pai ima shina rimangui nishca shinallatajmi cancunataca rimani– nircami.

27Chaita uyajcunaca Yaya Diosmanta Jesús chashna rimacushcataca mana entendircacunachu.

28Chaimi Jesusca cashna nirca:

–Runa Aichayuj ñucataca jahuaman huarcushpami, ñuca pi cashcataca rijsinguichij. Imatapish ñuca quiquinllamantatajca mana ruranichu. Ñuca Yaya yachachishcallatami rimani. 29Ñucata cachaj Yayaca ñucahuanmi. Ñucaca pai munashcallatami rurani. Chaimantami ñucallataca mana saquin– nircami.

30Jesús chashna rimajpica, achcacunami paita crircacuna.

Mana llullami huatashca shinamantaca cacharichin

31Jesusca, paita crij judiocunataca cashnami nirca:

–Ñuca yachachishcacunata catirashpaca, ñuca yachacujcunatajmi canguichij. 32Chashna cashpami, mana llullataca rijsinguichij. Chai mana llullami huatashca shinamanta cacharichinga– nijpimi,

33paicunaca:

–Abrahampaj huahua huahuacunamari canchij. Pipaj huatashca mana canchijchu. ¿Ima nishpataj canca: “Cacharichishcami canguichij” ninguiyari?– nircacuna.

34Chaimi Jesusca:

–Pipish juchata rurana yuyailla rurashpa causajca, huatashca shinami juchapi causan. Chaica chashnatajmi. 35Amopajta rurajca amopaj huasipica mana causacungallachu. Churimi causacungalla. 36Chashna cajpica cancunata huatashcamanta Taita Diospaj Churi cacharichijpica ña cacharichishcatajmi canguichij. 37Abrahampaj huahua huahuacuna cajtaca yachanitajmari. Shina cashpapish, ñuca yachachishcacunaca mana cancuna munashca cajpi mana chasquishpami, ñucataca ima shinapish huañuchishun nicunguichij. 38Ñucaca Yayapaj c'uchupi cashpami paimanta imata ricushcata huillani. Cancunaca cancunapaj yayahuan cashpami pai rurai nishcata ruracunguichij– nircami.

Cancunaca diablopaj huahuacunami canguichij nishcami

39Chaimi paicunaca:

–Ñucanchij yayaca Abrahammi– nircacuna.

Chaimi Jesusca:

–Abrahampaj huahua huahuacuna cashpaca, Abraham rurashca shinallatajmi ruranguichijman. 40Taita Diosmanta imata uyashcataca chaitataj huillashcamantami, cunanca ñucataca ima shinapish huañuchishun nicunguichij. Abrahamca mana chashna rurajchu carca. 41Cancunaca, cancunapaj yaya ruraj cashca shinallatajmi ruracunguichij– nijpimi,

paicunaca:

–¡Ñucanchijca mana huainapaj huahuacunachu canchij! ¡Ñucanchijca shujlla Yaya Diostami charinchij!– nircacuna.

42Chaimi Jesusca:

–Cancunapaj Yaya, Taita Dios cajpica, ñucataca c'uyanguichijmanmi. Ñucaca, Taita Diospajmantami shamurcani. Mana ñuca yuyaillamantachu shamurcani. Paimari ñucataca cacharca. 43¿Ima nishpataj ñuca yachachishcataca mana entendinguichigari? Cancunallataj mana uyasha nishcamantami mana entendinguichij. 44Cancunapaj yayaca diablomari. Paipaj munaillatami rurashun ninguichij. Paica callarimanta huañuchijmi, yallitaj jatun llullami. Tucui pai nishcacunaca llullami. Llullashpaca pai ima shina cashca shinallatajmi llullan. Llullata callarichij cashcamanta llullapaj yayami. 45Chashna cashpami cancunaca mana llullashpa ñuca huillashcataca mana cringuichij. 46¿Maijan cancunataj juchata ñuca rurashcata ricuchi tucunguichij? Shinashpaca ima shina cashcatataj huillacujpica ¿ima nishpataj ñucataca mana cringuichij? 47Maijanpish Taita Diospajtaj cajca, paipaj Shimitaca uyanllami. Ashtahuanpish cancunaca mana Taita Diospaj cashpami paipaj Shimitaca mana uyashun ninguichij– nircami.

Cristoca Abrahampaj ñaupami ña tiyashca nishcami

48Jesús chashna nijpimi judiocunaca:

–Canca supaitamari charingui. Samariataj Samaria nishpaca, allitajmari nishcanchij– nircacunami.

49Chaimi Jesusca:

–Ñucaca mana supai japishcachu cani. Ñuca Yayatamari cazucuni. Cancunaca ñucatamari yanganchinguichij. 50Mana ñucachu ñucata alli nichunca munani. Taita Diosmi ñucata alli nichunca munan. Ñucata mana chashna nijpica paillatajmi imatapish ninga. 51Pipish ñuca yachachishcacunata cazujca, manataj huañungachu. Chaica chashnatajmi canga– nijpimi,

52judiocunaca:

–Abrahampish, profetacunapish huañurcami. Canca: “Pipish ñuca yachachishcacunata cazujca mana huañungachu” ninguimi. Cunantajca cantaca supai japishca cashcatami yachanchij. 53¿Canca, ñucanchij ñaupa yaya Abrahamta yallichari canguiyari? Paipish, profetacunapish huañurcacunami. Canca ¿pi cashcatataj yuyanguiyari?– nircacunami.

54Chaimi Jesusca:

–Ñucallataj allimi cani nirijpica, ñuca allimi cani nirishcaca yangallami canman. Ñuca Yayami ñucataca alli nin. Paillatatajmi cancunapish ñucanchij Taita Diosmi nicunguichij. 55Chashna nishpapish cancunaca paitaca mana rijsinguichijchu. Ñucaca paitaca rijsinimi. Rijsishca jahuallataj mana rijsinichu nishpaca, cancuna shinallataj llullami caiman. Ñucaca paita rijsishcamantami, paipaj Shimi nishcata pajtachini. 56Cancunapaj ñaupa yaya Abrahamca, ñuca shamuna punllata ricuna cashcamanta cushicurcami. Ricushpacarin, ashtahuanmi cushicurca– nijpimi,

57judiocunaca:

–Manaraj pichca chunga huatayujllapish canguica. ¿“Abrahamta ricurcani” ninguichu imamí?– nircacuna.

58Shina nijpi Jesusca:

–Abraham manaraj tiyajpimi, ñucaca ña tiyarcani. Chaica chashnatajmi– nirca.

59Chashna nijpica Jesusta shitangapajmi rumicunata japircacuna. Ashtahuanpish Jesusca pacatucushpami, Taita Diospaj huasimanta paicunapaj chaupillatataj llujshishpa rirca.

Currently Selected:

JUAN 8: QCHI04

Highlight

Copy