LUCAS 14

Ungushca runata Jesús alliyachishcami

1Jesusca samana punllapimi, fariseocunata pushaj fariseopaj huasipi micugrirca. Chaipi micucujpica, shujtaj fariseocunaca Jesusta imapi juchachingapaj nishpami chaparacurcacuna. 2Chaipica tucui aicha punguishca runami Jesuspaj ñaupajpi tiyacurca. 3Chaipimi Jesusca, mandashcacuna ima nisha nishcata yachachijcunata, fariseocunatapish:

–¿Samana punllapica ungushcataca alliyachinachu, manachu alliyachina?– nishpa tapurca.

4Ashtahuanpish pi imata mana nijpimi Jesusca, ungushcata cayashpa alliyachishpaca rilla nishpa cacharca. 5Chaipi cajcunapajman tigrarishpaca:

–¿Pi cancunataj cancunapaj burro cashpa, huagra cashpa mai jutcupi huashicujpica, samana punlla cajpipish mana llujshichinguichijman?– nircami.

6Jesús chashna nijpica, paicunaca imata mana cutichi tucurcacunachu.

Bodaman cayashcacunami

7Bodaman cayashcacuna puntapi tiyaringapaj mashcacujta ricushpami, yuyachij shuj parlota cashna nishpa parlarca: 8“Maijan bodayuj cayajpi rishpaca, ama ashtahuan alli tiyarinapi tiyaringui. Ñataj canta yalli alli nishcata, bodayuj cayashca tiyanman. 9Paitapish, cantapish, cayaj bodayuj shamushpa: “Cai tiyarinata paiman cupai” nishpa jatarichijpica, pingai tucushpa huasha tucuri tiyarinapi tiyarigringuiman. 10Chaipaj randica maijan bodayuj cayajpi rishpaca, bodayuj shamushpa: “Riqui amigo, cai ñaupajman tiyari” ningacama tucuri tiyarinapi tiyaringui. Bodayujllataj chashna rurajpimi, canca tucui chaipi cajcuna alli nishca cangui. 11Maijanpish jatun tucujtaca, pingachishcami canga. Mana jatun tucujtaca, jatunyachishcami canga” nircami.

12Bodayujtapish Jesusca cashnami nirca:

–Bodapi micuchun cayashpaca, canhuan alli apanacujcunallata, huauquicunallata, familiacunallata, c'uchullapi causaj achcata charijcunallataca ama cayanguichu. Paicunaca canta tigra cayashpa chashnallataj tigrachingallami. 13Jatun micuita rurashpaca, huajchacunata, mancocunata, cojocunata, mana ricujcunata cayangui. 14Paicuna mana tigrachi tucushcamantaca Taita Diosmi cantaca cushichinga. Ashtahuanpish cashcata rurajcuna causari punllapimi can cushcamantaca Taita Diosca cunga– nircami.

Jatun micuipi micunata yuyachishpa parlashcami

15Chaita uyashpaca, Jesushuan micushpa tiyacujcunamanta shujca:

–¡Taita Dios mandacujpi jatun micuipi micujca, cushichishcami canga!– nijpi, 16Jesusca: “Shuj runami jatun micuita rurasha nishpa achcacunata cayarca. 17Ña micuna hora tucujpica, paipajta rurajtaca: “Cayashcacunata, ñami tucui allichishca shamuichijlla nigrichunmi” cacharca. 18Ashtahuanpish cayashcacunaca tucuicuna caita chaita juchachishpa mana rishun nishpami: “Ñucami shuj haciendata randircani, chaitami ricunaman ricuni. Chaimi mana shamui tucuni ninmi nigripai” nircami. 19Caishujca: “Ñucami pichca yunta huagrata randircani, chaitami yapushpa ricugricuni. Chaimantami mana shamui tucuni ninmi nigripai” nircami. 20Shujtajca: “Ñucami cunanlla cazararcani. Chaimantami mana ri tucuni ninmi nigripai” nircami. 21Amopajta ruraj tigrashpaca, paipaj amomanca cayashcacuna imalla nishcatami huillarca. Chaimi amoca achcata p'iñarishpa paipajta rurajtaca: “Utca rishpa plazacunapi, pueblo ñancunapi caj imata mana charijcunata, mancocunata, cojocunata, mana ricujcunatapish caiman pushamugri” nirca. 22Amopajta ruraj tigrashpaca: “Amito, can mandashca shinallatajmi pushamuni, manaraj jundanchu” nijpimi, 23amoca paipajta rurajtaca: “Mai ñancunata ricujcunata, pata huashata puricujcunata pushamushpa ñuca huasipi jundachun yaicuchimugri” nirca. 24Puntaman cayashcacunaca ñuca jatun micuitaca shujllapish manataj micungacunachu. Chaica chashnatajmi” nishpami parlarca.

Cristota catingapajca imallata saquina cashcami

25Jesusca paihuan ricuj achcacunata tigrarishpa ricushpaca cashnami nirca: 26Pipish ñucata catisha nijca paipaj yayata, mamata, huarmita, huahuacunata, huauquicunata, panicunata, quiquin causaitapish llaquijca, mana ñuca yachacuj cai tucunchu. 27Chacatashpa huañuchina llaquita apana cajpipish, ñucata catijllami ñuca yachacuj cai tucun. 28Cancunamanta maijanpish shuj torreta shayachisha nishpaca, tucuringacama rurangapajca mashna pajtana cashcata ricungapaj ¿manachu tiyarishpa ricunguichijraj? 29Mana chashna yuyarishpa torreta shayachinata callarishpalla saquijpica, shujtajcuna ricushpa asishpa pingachingapajca, 30cashnami ningacuna: “Cai runaca torreta shayachinata callarircamari, ashtahuanpish mana tucuchi tucunchu” ningacunami. 31Maijan jatun mandajca, caishuj jatun mandajhuan macanacungapajca, paica chunga huaranga soldadocunallata charishpa, caishujca ishqui chunga huaranga soldadocunahuan shamucujpica, chunga huarangacunallahuanca mishai tucunichu, manachu mishai tucuni nishpa ¿manachu yuyaringapaj tiyarinmanraj? 32Mana mishaipaj cashpaca, caishujcuna carupiraj cajpimi, ima shinapish alli tucupashun ninaman paipaj randi huillajcunata cachanman. 33Chai shinallatajmi cancunamanta maijanpish, tucui charishcacunata mana saquisha nishpaca, mana ñuca yachacuj cai tucunguichij.

Mishquiyachinata cachi chingachishpaca llaquimi

(Mt 5.13; Mr 9.50)

34“Cachica tucuipaj allimari. Ashtahuanpish cachi ña mana mishquichijpica ¿imahuanshi mishquichinguichijman? 35Chashna mana mishquichishpaca, allpapi shitanapajllapish, majadapajllapish mana allichu. Canllaman shitanapajllami canga. Maijanpish uyanapaj rinrinta charijca, tucui yuyaihuan uyachun” nircami.

Currently Selected:

LUCAS 14: QCHI04

Highlight

Copy