LUCAS 15

Chingarishca ovejamanta yuyachishpa parlashcami

(Mt 18.10-14)

1Jesús huillashcata uyangapajmi impuestota japijcuna, juchayujcunapish tucuicuna c'uchuyarcacuna. 2Chaita ricushpami fariseocunapish, mandashcacunata quillcajcunapish huashalla parlanacushpaca:

–Caica juchayujcunahuan tandanacushpa paicunahuan micunllamari– ninacucujpimi, 3Jesusca, cai yuyachij parlota cashna nishpa parlarca: 4“Maijan cancunataj patsaj ovejacunata charishpa shuj chingarijpica, iscun chunga iscunta michicushcapi saquishpa, ¿chai chingarishcataraj japingacama mashcanguichijman? 5Japishpaca rigra jahuashpami, cushicushpa shamunman. 6Huasiman chayamushpaca paipaj alli rijsishcacunata, c'uchullapi causajcunatapish tandachishpami: “Ñamari chingarishca ovejataca japimuni, shamuichij ñucahuan cushicushunchij” ninmanmi. 7Cancunaman huillanimi. Iscun chunga iscuncunaca ñucanchijca cashcata rurajcunami canchij nishpa imamantataj cutirishunri nicujpipish shuj runaca juchayuj cashcata yuyashpa cutirijpica jahua pachapica ashtahuan cushicuimi tiyan.

Chingarishca cullquimanta yuyachishpa parlashcami

8Maijan huarmitaj chunga dracma cullquita charicushpa, shuj chingarijpica lamparata japichishpa huasi ucuta p'ichashpa, ¿japingacama mana mashcanmanri? 9Chaita japishpaca paipaj alli rijsishcacunata, c'uchullapi causajcunatapish tandachishpami: “Ñamari chingarishca cullquitaca japini, shamuichij ñucahuan cushicushunchij” nishpa cushicunmanmi. 10Cancunaman huillanimi: Chashnallatajmi shuj juchayuj runa Taita Diosman cutirijpica, Taita Diospaj angelcunapish cushicun” nircami.

Chingarishca churimanta yuyachishpa parlashcami

11Jesusca caitapishmi nirca: Shuj runami ishqui churita charirca. 12Chai ishquimanta q'uipa churimi yayataca: “Yaya, ñuca japina cashcata chaupishpa cuhuai” nijpimi, yayaca pai japina cashcata chaupishpa curca. 13Chaimanta asha punllacuna q'uipaca, tucui pai japishcata c'atushpa cullquita tandachishpami q'uipa churica caru llajtaman rirca. Chaipimi pai apashcacunataca millaillapi causashpa tucuita chingachirca. 14Millaillapi tucuita tucuchishca q'uipaca, chai llajtapica jatun yaricai callarijpimi, paipish tucui ima illajlla yaricaihuan carca. 15Chaimi chai llajtapi causaj shuj runapajpi trabajota mashcanaman rijpi, chai runaca paipaj haciendapi c'uchicunata michigrichun cacharca. 16Paica achca yaricaihuanmi carca. Chaimi cuchicuna micucun algarrobata micuiman yuyarca. Ashtahuanpish pi imata mana cararcachu. 17Chaipimi paica cashna yuyarirca: “¡Ñuca yayapaj huasipi trabajajcunaca micunata atichicungacunami! ¡Ñucaca caipica, yaricaihuan huañucunimari! 18Ñuca yayapaj huasiman tigrashalla. Chaiman chayashpaca: Yayitu, jahua pachapi caj Taita Diostapish, cantapish p'iñachishpami juchallishcani. 19Chaimanta ña mana cambaj churi shinataj canichu. Cambaj shuj trabajaj shinallata chasquipai nigrisha” nishpami yuyarirca. 20Chaimi paipaj yayapajman tigrarca. Pai caruta shamucujpirajmi paipaj yaya ricushpaca achcata llaquirishpa, callpashpa, rishcahuan ugllarishpa mucharca. 21Chaipimi paipaj churica: “Yayitu, jahua pachapi caj Taita Diostapish, cantapish p'iñachishpami juchallishcani. Cunanca ña mana cambaj churitaj shinachu cani” nijpi, 22yayaca paipajta rurajcunataca cashnami nirca: “Tucuimanta yalli alli churanata llujshichimushpa churachichij. Maqui dedopica sortijasta, chaquipica pargateta churachichij. 23Jatun fiestata rurashpa micungapaj huirayashca bizita pushamushpa huañuchichij. 24Cai ñuca churica huañushcami carca, cunanca causarishcami. Chingarishcami carca, cunanca tigramushcami” nishpami, yallitaj cushicui callarircacuna.

25“Chaicamaca, punta churica chagrapimi carca. Chagramanta tigrashpa ña huasiman chayamucushpaca, tocacujta, danzacujcunatapish uyashpaca, 26paipajta rurajta cayashpami, imamanta bullacushcata tapurca. 27Chaimi paipajta rurajca: “Cambaj huauquimari tigramushca. Mana ungushca alli tigramushcamantami cambaj yayaca, huirayashca bizita huañuchichishpa fiestata ruracun” nirca. 28Chaimi achcata p'iñarishpa mana yaicusha nijpi, paipaj yaya llujshishpaca yaicupai nishpa rogarca. 29Ashtahuanpish paipaj yayataca cashnami nirca: “Manataj imata c'ariyashpamari, cai tucui huatacunata can ima nishcata rurani. Ñuca alli rijsishcacunahuan cushicuchun, shuj chivollatapish mana cushcanguichu. 30Ashtahuanpish cambaj cai churica, tucui can cushcacunataca huainayashpa causaj huarmicunahuanmi tucuchimushca. Chashna rurajpirajmari paihuan cushicungapajca huirayashca bizita huañuchichishcangui” nircami. 31Chaimi paipaj yayaca: “Huahua, canca tucui punllacunami ñucallahuantaj cangui. Chaimanta tucui ñuca imalla charishcacunaca cambajmi. 32Ashtahuanpish cambaj cai huauquica, huañushcami carca, cunanca causarishcami. Chingarishcami carca, cunanca tigramushcami. Chaimantaca jatun fiestata rurashpa cushicunatajmi canchij” nircami” nishpami parlarca.

Currently Selected:

LUCAS 15: QCHI04

Highlight

Copy