LUCAS 17

Juchapi urmachinaca jatun llaquimi

(Mt 18.6-7, 21-22; Mr 9.42)

1Jesusca paipaj yachacujcunataca cashnami nirca: “Mana alli yuyaicunaca tiyanataca tiyangallatajmi. Chai yuyaicunahuan shujtajcunata pandachijcunaca ¡aij imachari tucunga! 2Ñucata catij cai uchillacunata pandachijtaca, molino rumita cungapi huatashpa, mama cuchapi shitanachari ashtahuan alli canman. 3¡Chaimanta cancunallataj alli yuyaringuichij! Cambaj huauqui canta llaquichijpica, ama chashna ruraichu nishpa rimangui. Llaquirishpa alli tucujpica, perdonanguilla. 4Shuj punllapi canchis cutin canta llaquichishpa, chai punllallataj canchis cutin mana allitami rurashcani: “Perdonapai” nijpica, perdonanguilla” nircami.

Crina yuyaita ashtahuan cuhuai nishcami

5Apostolcunaca Mandaj Jesustaca:

–Ñucanchijman ashtahuan crina yuyaita cuhuai– nircacunami.

6Chaimi Mandaj Jesusca:

–Uchilla mostaza muyu shinallatapish crishcata charishpaca, cai sicómoro yurataca: “Sapindij llujshishpa, mama cuchapi tiyarigri” nijpica cazunmanllami.

Servijca ima shina canami

7Cancunamanta ¿maijantaj shuj servijta charishpaca yapushpa, mana cashpaca michishpa tigramujpica: “Shamui, micuj tiyari” ninguichij? 8Ashtahuanpish: “Churanata utca cambiarishpa micunata yanushpa ñuca imalla micuna cashcata ñucamanraj carai. Chai q'uipa canca micungui, ubyanguillami” ninguichijmi. 9Chai servij cancuna ima nishcata rurajpipish mana pagui ninguichijmanchu yuyanimi. 10Cancunapish, Taita Dios tucui mandashcacunata rurashpaca: “Ñucanchijca alli servijcunaca mana canchijchu, imata rurana cashcallatami rurarcanchij” ninami canguichij– nircami.

Leprahuan caj chunga runacunata alliyachishcami

11Jesusca Jerusalenman ricushpaca, Samariahuan, Galileahuan chaupitami rirca. 12Shuj uchilla llajtaman yaicugrijpica, leprahuan caj chunga runacunami Jesushuan tupanaman shamurcacuna. Paicunaca carullamanmi shayarircacuna. 13Chai runacunaca:

–¡Yachachij, Jesús ñucanchijta llaquihuayari!– nishpami caparircacuna.

14Jesús paicunata ricushpaca:

–Richij, curacunaman ricuchirigrichij– nijpi ñanta ricushpaca ña alliyarcacunallami.

15Paicunapuramanta shujca alliyachishca cashcata ricushpami, Taita Diosta sumajmari cangui nishpa caparishpa Jesuspajman tigramurca. 16Paica, Jesuspaj ñaupajpi cungurishpa, pambacama cumurishpami pagui nicurcalla. Chai runaca, Samariamantami carca. 17Chaipimi Jesusca:

–¿Maipitagari iscuncunaca? Chungatamari alliyachircani. 18Taita Diosta sumajyachingapajca caishujcunaca mana tigramurcacunachu. Ashtahuanpish mana judío caj runarajmari tigramushca– nircami.

19Chaimi Jesusca chai runataca:

–Canca crishcamantami alliyashcangui. Jatari, rilla– nirca.

Taita Diosca ima punllamantataj mandanga nishcami

(Mt 24.23-28, 36-41)

20Fariseocunaca Jesustaca: –Taita Diosca ima punllamantataj mandai callaringari– nishpa tapujpi, Jesusca:

–Taita Dios mandai callarinaca mana ricunallachu canga. 21“Caipimari mandacun, chaipimari mandacun” nishca mana uyaringachu. Ashtahuanpish Taita Diosca ñamari cancunapaj chaupipi mandacun– nircami.

22Jesusca paipaj yachacujcunataca:

–Runa Aichayujpaj punllata shuj punllallatapish ricunayachina punllacuna chayamungami. Ricusha nishpapish mana ricunguichijchu. 23Chai punllacunapica: “Caipimari, chaipimari” ningacunami. Chaimanca ama ringuichijchu, ama catinguichijchu. 24Runa Aichayuj shamui punllapica, jahua pachamanta relampa achij nishpa tucuita achijyachij shinami canga. 25Chaipajca paica achca llaquicunata puntaca apangarajmi. Cai punllapi causajcuna p'iñashcarajmi canga. 26Noé causai punllacuna ima shinami carca, chashnallatajmi Runa Aichayuj shamunapajpish canga. 27Chai punllacunapica huambuj huasiman Noé yaicungacamami, micucurcacuna, ubyacurcacuna, cazaracurcacuna, cazarachicurcacuna. Ña pai huambuj huasiman yaicujpica, yacu juillu shamushpami tucuita chingachirca. 28Lot causai punllacunapipish chashnallatajmi micucurcacuna, ubyacurcacuna, c'atucurcacuna, randicurcacuna, tarpucurcacuna, huasichicurcacuna. 29Ashtahuanpish Lot Sodoma pueblomanta llujshijpica, jahua pachamanta ninahuan, azufrehuan tamyashpami tucuicunata chingachirca. 30Runa Aichayuj shamuna punllapish chashnallatajmi canga.

31Chai punllapica, huasi jahuapi cajpish, ima charishcacunata huasi ucumanta apanamanca ama yaicuchun. Chagrapi cajpish, huasiman ama tigrachun. 32Lotpaj huarmi ima tucushcata yuyarichij. 33Pipish paipaj causaita llaquijca, chingaringami. Pipish paipaj causaita mana llaquijca quishpiringami.

34Cancunaman huillanimi: Chai tutapica, shuj camapi ishqui dormicushpapish, shujca apashcami canga, shujca saquishcami canga. 35Ishqui huarmicunapish cutacungami. Shujca apashcami canga, shujca saquishcami canga. 36Ishqui runacunami chagrapi canga. Shujca apashcami canga, shujca saquishcami canga– nircami.

37Chaimi paicunaca:

–Mandaj Jesús ¿Maipitaj chashnaca tucunga?– nijpi, Jesusca:

–Maipimi huañushca siricun, chaipimi ullahuangacunaca jundaringa– nircami.

Currently Selected:

LUCAS 17: QCHI04

Highlight

Copy