LUCAS 18
18
Viuda huarmimanta millai juezmanta yuyachishpa parlashcami
1Taita Diosta mañanataca mana shaicushpa tucui imapipish mañacunallami nishpa yachachingapajca, cai yuyachij parlotami Jesusca, 2cashna nishpa parlarca: “Shuj pueblopimi Taita Diostapish, runacunatapish mana manchaj juez causarca. 3Chai pueblollapitajmi shuj viuda huarmipish causarca. Paica: “Ñucata p'iñajta imallatapish nipai” nishpami, juezpajman shamucujlla carca. 4Juezca pai huillashcataca mana uyasha nircachu. Punllanta puricujllapimi, cashna yuyarirca: Taita Diostapish, runatapish mana manchanichu, 5shina cajpipish cai viuda huarmica, yallitajmi p'iñachin. Ama cutin cutin shamushpa p'iñachicuchunllaca paita p'iñajta cayashpa rimasha” nirircami.
6Chaimi Mandaj Jesusca: “Millai juez cashpapish ima shina nishcata yuyarichij. 7Taita Dioscarin tutapish punllapish pai agllashcacuna caparijpica, ¿manachu imatapish mana uniyashpalla paicuna mañashcata cutichinga? 8Cancunaman huillanimi: Paica mana uniyashpallami paicuna mañashcata cunga. Ashtahuanpish Runa Aichayuj shamushpaca ¿cai pachapica chashna crijtaca japingachu imashi?” nircami.
Fariseomanta impuestota japijmanta yuyachishpa parlashcami
9Cashcata rurajcunami canchij yuyashpa, shujtajcunata p'iñajcunata yuyachingapajca cai yuyachij parlotami Jesusca cashna parlarca: 10“Ishqui runami Taita Diospaj huasipi Taita Diosta mañangapaj rircacuna: Shujca fariseo, caishujca impuestota japijmi carca. 11Fariseo shayarishpaca, paillataj alli nirishpami cashna mañarca: “Taita Dioslla, cantami pagui nini. Ñucaca mana shujtaj runacuna shina: Shuhuaj, cashcata mana ruraj, huainayaj mana canichu. Impuestota japij cai runa shinapish mana canichu. 12Semanapica ishqui cutinmi ayunani. Tucui ñuca ganashcamantapish, chungamanta shujtami cuni” nirircami.
13Ashtahuanpish impuestota japijca caruman shayarishpa, mana huichilla ricushpallapish shungupi huajtarishpami: “Taita Dioslla, ñucata llaquihuayari, juchasapamari cani” nirirca. 14Cancunaman huillanimi: Impuestota japij runarajmi huasimanca Taita Dios alli nishca tigrarca. Fariseo mañashcataca mana chasquircachu. Maijanpish jatunmi cani nirijtaca, pingachishcami canga. Mana jatun tucujtaca, jatunyachishcami canga” nircami.
Huahuacunapi Jesús tuparichun paicunata pushamushcami
(Mt 19.13-15; Mr 10.13-16)
15Huahuacunapi Jesús tuparichun nishpami apamurcacuna. Yachacujcuna ricushpaca sinchita rimashpami jarcarcacuna. 16Chaimi Jesusca, yachacujcunata cayashpa cashna nirca:
–Huahuacuna ñucapajman shamuchun saquichij, ama jarcaichijchu. Cai huahuacuna shina tucujcunatami Taita Diosca mandacun. 17Taita Dios paita mandachun shuj huahua shina maijanpish mana chasquijca, Taita Dios mandacujpica mana yaicungachu. Chashnatajmi canga– nircami.
Achcata charij mozo Jesusta tapushcami
(Mt 19.16-30; Mr 10.17-31)
18Chai q'uipami shuj mandajca:
–Yachachij canca allimari cangui. Huiñai causaita charingapajca ¿imatataj rurana cani?– nishpa tapujpi, 19Jesusca:
–¿Ima nishpataj ñucataca alli ningui? Allica pi mana tiyanchu, ashtahuanpish Taita Diosllami allica tiyan. 20Mandashcacunataca yachanguillatajmi: “Ama huainayangui, ama huañuchingui, ama shuhuangui, ama llullashpa huillangui, cambaj yaya mamatapish alli ningui” ninmi– nircami.
21Chaimi paica:
–Tucui chaicunataca, huahuamanta pachami pajtachishcani– nirca.
22Chaita uyashpami Jesusca:
–Shujca illanrajmi: Can imalla charishcacunata tucui c'atushpa, huajchacunaman cugri. Chaimi jahua pachapica achcata charingui. Chai q'uipaca, shamui ñucata cati– nirca.
23Chai uyashpaca achcata charij cashcamantaca, yallitajmi llaquirirca. 24Achcata llaquirijta Jesús ricushpaca cashnami nirca:
–¡Achcata charijcunaca Taita Dios mandacujpica, mana jahualla yaicui tucungacunachu! 25Shuj camellorajmi auja rinrintaca, jahualla pasan. Taita Dios mandacujpi shuj charij chaiman yaicunaca, chaitapish yalli sinchimari– nircami.
26Chaita uyacujcunaca:
–Shinashpaca ¿pitaj quishpiri tucungari?– nijpimi, 27Jesusca:
–Gentecunapajca sinchitajmari, ashtahuanpish Taita Diospajca imapish jahuallami– nirca.
28Chaimi Pedroca:
–Ñucanchijca tucui imalla charishcacunata saquishpami, cantaca caticunchij– nirca.
29Chaimi Jesusca:
–Taita Dios mandacujpi chaipi cangapaj huasita, yaya mamata, huauquicunata, huarmita, huahuacunatapish saquishpaca, 30cunan punllacunapish ashtahuan achcatami chasquinga. Shamuj punllapicarin huiñai causaitami chasquinga. Chaica chashnatajmi– nircami.
Jesusca caihuanca pai huañuna cashcata quimsa cutin huillashcami
(Mt 20.17-19; Mr 10.32-34)
31Chai q'uipami Jesusca, chunga ishqui yachacujcunallata pushashpa cashna nirca:
–Cunanca Jerusalenmanmi rigrinchij. Chaipica Runa Aichayuj imalla tucuna cashcata profetacuna quillcashcami tucui pajtanga. 32Chaipica mana israelcunamanmi cunga. Paicunaca chanzata rurashpami asingacuna. C'amishpa rimangacunami, ch'ucangacunami, 33azotingacunami, chai q'uipaca huañuchingacunami. Huañuchijpipish quimsa punllapica causaringallami– nirca.
34Shina nijpipish yachacujcunaca, chai tucui imalla nishcacunaca mana entendipajlla cashcamantami ima nisha nishcata mana entendircacuna.
Jericopi causaj mana ricuj runata Jesús alliyachishcami
(Mt 20.29-34; Mr 10.46-52)
35Jericoman Jesús ña chayagricujpica, shuj mana ricuj runami ñan c'uchupi mañashpa tiyacushpa, 36achcacuna chaita pasacujta uyashpa imataj nishpa tapujpi, 37–Nazaretmanta Jesusmari ricun– nircacuna. 38Chaimi paica:
–¡Davidpaj Churi Jesús, ñucata llaquihuai!– nishpa caparijpi, 39ñaupashpa ricujcunaca upalla cai nircacuna. Ashtahuanpish paica:
–¡Davidpaj Churi, ñucata llaquihuai!– nishpami, ashtahuan sinchita caparirca.
40Chaimi Jesusca shayarishcahuan, paipajman pushamuchun mandarca. Ña chayamujpica, 41–¿imatataj rurachun ningui?– nijpi, chai runaca:
–Amito, ricuj canatamari chasquisha nini– nirca.
42Chaimi Jesusca:
–Ña ricuilla, can crishcamantami alliyashcangui– nirca.
43Shina nincami ricuita chasquishpa, Taita Diosta sumajyachishpa Jesusta catirca. Tucui chaipi cajcunapish ricushpaca, Taita Diostami alabarcacuna.
Currently Selected:
LUCAS 18: QCHI04
Highlight
Share
Copy
Want to have your highlights saved across all your devices? Sign up or sign in
Quichua Chimborazo Bible Revision 2010 © United Bible Societies, 2010.
