Lúkasɛ 20

Iŋgínə́ yɛ Yə́susu

(Mat 21.23-27; Mə́l 11.27-33)

1Hinó hímotí, Yə́susu a ka báá ɔ bɛndɔ uwukúniə ɔ Tɛ́mbɛlɛ, a bəə́bu Imbə́nú Yɛɛsɛ nɔŋɔnakɛna tɔ́na. Bisə́lúkú bɛ́ bətitiəmahánɛna, bamanyumbə́ndə́ bá ná ndə́fə́mə́kə́níə́ na bɛnatákɛ. 2Bá ná wɛɛ́ya batá bá sɛ́á: «Lɛná bəsú na yanɛ́ kuənjə ɔ ndɔ bɛ́ɛ́yɛ́ bɛkɔa kɛna əə́? Ɛ́yánɛ́ a ná aŋɔ́á iŋgínə́ índíə́ ɔ nɔ́yɛ́ ɔkɛa əə́?» 3A sɛ́á: «Mɛaŋɔ́á tɔ́na, ɛkasɛ mɛ́ bənú ɛmbataka bata. Nɔ́ ámɛ lɛ́na: 4Ɛ́yánɛ́ a ná Yɔhánɛsɛ lɔ́má ɔ nɛsɔa uwíndiənə əə́? Á Huɛlɛ́ alɛ́ɛ́ bɛndɔ əə́?» 5Mba, bá ná botólíə́ ɔ utə́ŋə́niə bəə́bu na bəə́bu, bá sɛ́á: «Ábá tɔ ná wɛɛ́ya bɛ́kámɔ́sɔ́ná tɔ sɛ́á á Huɛlɛ́ a ná wɛɛ́ya lɔ́má, a ndɔ bəsú lakɛna a sɛ́á: “Ɛlɔ́áyɛ́ yatɛ́ nɔ sa Yɔhánɛsɛ lumininə əə́?” 6Ábá tɔ ná bɛ́kámɔ́sɔ́ná tɔ́ sɛ́á bɛndɔ bá ná wɛɛ́ya lɔ́má, bɔnɔŋɔ bukimə bɔ́ ndɔ bəsú lúmə́kə na miɔkɔ bɔkɔasɛ́á, bá ndɔ fɛka bá sɛ́á Yɔhánɛsɛ a ka báá mɔhɛ́nátɔtányɛ́.» 7Bá sɛ́á: «Tɔ lɛ ndɔ wɛ́ɛ́yɛ́ manya ɔwá a ná wɛɛ́ya lɔ́má ɔ nɛsɔa uwíndiənə.» 8Yə́susu a sɛ́á: «Ata mɛaŋɔ́á tɔ́na mɛ sɔ́ ŋɔ bənú lɛna na yanɛ́ kuənjə mɛ́ ndɔ bɛ́táyɛ́ bɛkɔa kɛɛna.»

Ɔŋana wɔ́ bakɛmakɛma

(Mat 21.33-46; Mə́l 12.1-12)

9A ná ilúkunə wúuwu ɔŋana tɛ́ná a sɛ́á: «Mɔndɔ ɔmɔtɛ́ a ka ɛtɔbɔtɔ́bɔ́ nyɔɔkɔ, a ná índíə́ ɔ ɛlɛ́ndɛa ɔ bəhuə, a ná ákáná ɔ mɔkɛnda wɔ́ ikúílí yɛtatánɛ. 10Ɛnaka ikúílí yɛ́ məhuə yɛ́ ndáfámá, a ná mɔnyɛna lɔ́ma á bááyɛ́ busíə́ ɔkɛaka ɔwá, bá wɛɛ́ya nɛ́áyɛ́á nioko nɛ́ bɛlɔŋɔ́tɛ́ híə́níníə́. Mba, bəhuə bá ná mɔnyɛna subəkə, bá ná wɛɛ́ya tilə́síə́ makátá ndəmə. 11A ná wɔmɔtɛ́ mɔnyɛna lɔ́má tɔ́na, bá ná wɛɛ́ya súbə́kə́, bá ná wɛɛ́ya kɔbaka, bá ná wɛɛ́ya tilə́síə́, bá lɛ índíə́ ata bɔɔ́la. 12A ná mɔnyɛna lɔ́má ɔ bikúílí bɛ́lálɔ́, ɔ wɛ́ɛ́yɛ́, bá ná wɛɛ́ya úmúísə́kíə́, bá ná wɛɛ́ya bulə́kə. 13Isə́lúkú yɛ ɛtɔbɔtɔ́bɔ́ a sɛ́á: “Nəníə́ mɛ háha kɛáka əə́? Ɛkasɛ mɛ wamɛ́á mɔná wuhikiə lɔma, ɔmbáŋíndíə́ bá ŋɔ wɛɛ́ya bə́təkiə muɛsɛ.” 14Mba, ɛnaka bəhuə bá mɔná yámá, bá ná bɛ́láá bəə́bu na bəə́bu bá sɛ́á: “Á wə́ə́ní a ŋɔ ɛhálálá tíkə́nənə. Tɔ́ wɛɛ́ya ɔ́nɔ́kɔ́ mbá ɛtɔbɔtɔ́bɔ́ yɛ́ ŋɔ híána yə́su.” 15Bá ná wɛɛ́ya fámáná ɔ ɛtɔbɔtɔ́bɔ́, bá ná wɛɛ́ya ɔnɔkɔ.» Yə́susu a ná batá a sɛ́á: «Yatɛ́ Isə́lúkú yɛ ɛtɔbɔtɔ́bɔ́ a ŋɔ bəə́bu kɛaka əə́?» 16A ŋɔ ndafama, a ŋɔ bááyɛ́ bakɛma ɔ́nɔ́kɔ, a ŋɔ yáyɛ́á ɛtɔbɔtɔ́bɔ́ índíə́ ɔ bənə́bənə́. Ɛnaka bɛndɔ bá bɛ́ɛ́yɛ́ bɛtambá ɔ́kɔ́, bá sɛ́á: «Bóo! Nɔ́yɛ́ yɛ́ sa óso ɔbɛ́kɛa.» 17Mba, a ná bəə́bu məə́sə tala, a sɛ́á: «Yatɛ́ ɛtambá yɛ́ Mətilə yɛ́ ndɔ siə ɔlaa:

“Muɔkɔ ɔwá bafalaba bá ná ombóko,

wɔ́ ka híána muɔkɔ wɔ́ nihíkíli əə́?”

18Ata ɛ́yánɛ́ mɔndɔ ɔwá a ŋɔ kɔɛna ɔ mútə́yí muɔkɔ a ŋɔ bɛ́nɔ́kɔkɔ, mba, ábá muɔkɔ wɔ́ ná mɔndɔ kɔɛ́na, wɔ́ ŋɔ muití ɔ́kɔkɔ.»

Ɔsábɔ́na wɔ́ ɛtásɛ yɛ́ Káyɛsa

(Mat 22.15-22; Mə́l 12.13-17)

19Bamanyumbə́ndə́ na bisə́lúkú bɛ́ bətitiəmahánɛna bá ka siəkə ɔ ɔwayɛ́ ɔhalɛna ɔ yɛ́táyɛ́ ikúílí bɔkɔasɛ́á, bá ka manya bá sɛ́á uwəbú ɛlɔ́á a ná wííyí ɔŋana tɛɛna, mba, bá ilúkunə kɔ́lɔ́maka. 20Bá ná botólíə́ a Yə́susu ɔ ɔtɛ́ka; əlimə yɛ ikúílí, bá ná wɛɛ́ya bɛndɔ lɔ́mɛ́ná ɔbá bá ndɔ bínə́niə bá sɛ́á bá lɛa bátaká, ɛlɔ́áyɛ́ ɔwayɛ́ ɔlámbɛ́na na ɛmbataka; bá hɛkɔma bɔ́ŋɔ mbá bá wɛɛ́ya halɛ́na, bá índíə́ ɔ makátá má mɔmanɛna. 21Bá ná wɛɛ́ya yɛ́ɛyɛ ɛmbataka batá bá sɛ́á: «Á Mulə́liə, tɔ ndɔ manya tɔ sɛ́á ɔ ndɔ laa, ɔ ndɔ úkúniə tɔ́na á bɛkɔa bɛ́ taká, ɔ lɛ ndɔ nifəŋə háá ətíə́ yɛ bɛndɔ; mba, ɔ ndɔ úkúniə á taká ɔyɛ́á Huɛlɛ́ a ndɔ bəsú bata a sɛ́á tɔ kɛ́áka. 22Lɛná bəsú ɛ́ɛ, ata bóo! Tɔ báka na kuənjə ɔ ɛtásɛ ɔsábɔ́nɛna á Káyɛsa əə́?» 23Mba, Yə́susu a ná manyá a sɛ́á hɛlámba hííyí; a ná bəə́bu lɛ́na a sɛ́á: 24«Nɔ́ mɛaŋɔ́á ɛcácɔ́ ínə́níə́ ɛ́mɔtɛ́; bɔ́ánɛ́ busíə́ na nɛ́ánɛ́ niínyə nɛ́ lɛ́á lutə́tɔ́ ɔ yɛ́táyɛ́ ɛcácɔ́ əə́?» Bá sɛ́á: «Bɔ́ Káyɛsa.» 25A ná bəə́bu lɛ́na a sɛ́á: «Nɔ́ índíə́ á Káyɛsa yatɛ́ ɔyɛ́á yɛ́ lɛ́á yɛ́ Káyɛsa, á Huɛlɛ́ yatɛ́ ɔyɛ́á yɛ́ lɛ́á yɛ́ Huɛlɛ́.» 26Bá sa hɛkɔma bɔ́ŋɔ ɔ bɛtambá bɛ́ Yə́susu ɔ busíə́ bɔ́ ilúkunə, yáyɛ́á ɛbɛ́kámɔsɔna yɛ́ ná bəə́bu ə́lə́mə́nə́síə́, bá ná nə́yə́níə́ yə́ə́bu.

Ɛmbataka ɛlɔ́áyɛ́ nɛhɔŋɔa nɛ́ bəwə́nú

(Mat 22.23-33; Mə́l 12.18-27)

27Bɔ́mɔtɛ́ Bɛsalutúsia bá ná bɛ́nyálɛ́la á Yə́susu ɛmɛ́ŋɛ́; uwəbú ɔbá bá ndɔ sáŋɔ́na ɔwá, abáka bəwə́nú bá lɛ hɔŋɔ́á, bá ná wɛɛ́ya batá bá sɛ́á: 28«Á Mulə́liə, Mósisi a ka umbə́ndə́ tiləkə ɛlɔ́áyɛ́ əsú a sɛ́á: “Ábá mɔndɔ wa bɛ́lɛ́nátɔ́ a báka na munínyə́ mbá a ná wə́ə́ ɛŋaná mɔná, munínyə́ a ná hɔ́ánána ilíkə́ ɔbɛ́lɛna ɔkɛaka ɔwá, a wɛ́ɛ́yɛ́ ɛndɛkɛ tíkínə́ ɔwá a ná wəə.” 29Ɔ yɛ́táyɛ́ ikúílí, bənínyə́ bá ka báá bálɛ́ndɔ́lɔ́mɔnɔ; wəbusíə́ a ná bɛ́lɛ́ná, a ná wə́ə́ ɛŋaná mɔná. 30Ɔwá a ná úndúsíníə́ báfandɛ́ a ná ilíkə́ ɛ́ta, a ná ayɛ́ wə́ə́ tɔ́na ɛŋaná mɔná. 31Yɛ́ ná bɛ́kɛ́áká tɔ́na nɔ́yɛ́ ɔ wa niɔŋgɔnɔ nɛ́ bənínyə́ bálálɔ́, hɔ́ánánátɔ́ na bááyɛ́ bálɛ́ndɔ́lɔ́mɔnɔ, bá ná hɔ́á ɔ uwə́ə́ ɛŋaná baná. 32Ɔ utifəkə, muəndú a ná ayɛ́ wəə. 33Ɔ buɔsɛ́ bɔ́ nɛhɔŋɔa nɛ́ bəwə́nú, a ŋɔ báá wanɛ́ muəndú əə́? Ɔ taká, a ka báá muəndú wa bəə́bu bálɛ́ndɔ́lɔ́mɔnɔ bəkimə.»

34Yə́susu a sɛ́á: «Abáka balɛ́mɛndɔ́ na bəəndú bá yɛ́ɛyɛ misí bá bɛ́lɛakɛnana. 35Mba bɛndɔ ɔbá bá lɛ́á hɔ́ánánɛ́nátɔ́ ɔ nɛhɔŋɔa nɛ́ bəwə́nú, na uniŋə ɔ misí yɛ ɔsákɔna, abáka bá lɛ bɛ́lɛ́nána. 36Bá sá hɔ́ánana uwə́ə́ tɔ́na bɔkɔasɛ́á, bá lɛ hɔ́ákátɔ́ ɔ bɛáŋgɛlɛ. Bá lɛ baná bá Huɛlɛ́ bɔkɔasɛ́á, Huɛlɛ́ a ná bəə́bu huŋúə́síə́. 37Mósisi a ka ínə́niə tə́lə́ŋu ɔwá, bəwə́nú bá ŋɔ hɔŋɔakɛa, ɛnaka a bá a ndɔ hɛ́na ɛsalɛ yɛ́ hiwə hɛ́ ɛfakafáká nuúmə́; a ndɔ Isə́lúkú ɛ́lɛnɛna a sɛ́á: “Huɛlɛ́ yɛ Ábɛlaháma, yɛ Ísakɛ, na yɛ Yákɔbɔ.”» 38Yə́susu a ná kɔndá a sɛ́á: «Huɛlɛ́ a lɛ báá Huɛlɛ́ yɛ bəwə́nú, mba, yɛ bɔɔmɔ́ bɔkɔasɛ́á, bəkimə bá ndɔ niŋə ɛ́lɔ́áyɛ́ ayɛ́.» 39Bɔ́mɔtɛ́ bamanyumbə́ndə́ bá ná wɛɛ́ya lɛ́na bá sɛ́á: «Á Muinə́niə, ɔ ná hɔ́ɔ́kɔ́ muɛsɛ.» 40Ɔ taká, bá sa óso tɔ́na ɛmbataka yinə́yinə́ ɔ ɔwayɛ́ ɔbata.

Mɛ́sia a lɛa Isə́lúkú yɛ Ndə́witi

(Mat 22.41-46; Mə́l 12.35-37)

41Yə́susu a ná bəə́bu lɛná tɔ́na a sɛ́á: «Nəníə́ bɛndɔ bá ndɔ laa bá sɛ́á Mɛ́sia a lɛa mɔná wa Ndə́witi əə́? 42Ɔ taká, Ndə́witi a ndɔ fə́mə́ləniə wɛɛ́ya bɛ́múɛ́tɛ́ ɔ hiəfulə hɛ́ tumboŋo a sɛ́á: “Sɔ́nɔ ɔ ndətuə́nə ɔ ɔwámɛ mɔkátá wɔ́ bɛnɔ́mɛ; 43mɛ ŋɔ kɛaka ɔwá báwɔ́á bokóyíkoyi bá bámɛ́nɛ́ná nɛbɛ́lɛ́nɛ́ná nɛ́ máwɔ́á makɔlɔ́.” 44Nɔ́yɛ́, Ndə́witi a ndɔ wɛɛ́ya ɛ́lɛnɛna a sɛ́á “Isə́lúkú”, mba, nəníə́ ɛkasɛ Mɛ́sia a bá tɔ́na mɔná wa Ndə́witi əə́?»

Yə́susu a ndɔ bɔkɔ́nɛna lɛna ɔwá bá bɛtataka

(Mat 23.1-36; Mə́l 12.38-40)

45Ilúkunə yikimə yɛ́ ka báá məlúə́ básɛ́átɔ́ á Yə́susu, ɛnaka a bá a ndɔ báyɛ́á bɔkɔ́nɛna lɛna a sɛ́á: 46«Nɔ bɛ́tátáka, nɔ lɛ kɛ́á ɛ́sɛ́á bamanyumbə́ndə́! Bááyɛ́ ɔbá bá ndɔ hikiə ɔkɛnda na maŋgɔmba matatánɛ, bá hikəkiə tɔ́na bá sɛ́á bá bəə́bu hólókíə́ ɔ manáka, bá bɛɔkɔ́ bíbúsíə́ tɛ́fáka ɔ məə́bə má mabɛ́kálɛ́na, ɔ bɛbɔ́ka bɛ́ tuúmə ɔ manɛ́áka. 47Bá ndɔ bilíkə́ makátá kɔ́lɔ, na uyəŋiə ɔ mabɛ́kálɛ́na ɔkɛaka ɔwá mbá bá bəə́bu siəkínə. Ɛlɔ́áyɛ́ nɔ́yɛ́, Huɛlɛ́ a ŋɔ bəə́bu sɔ́kɔ́tɛa mɔŋɛ́ŋa ɔ ɔyáyɛ́na.»

Currently Selected:

Lúkasɛ 20: tvu

Highlight

Copy