Lukasi 13
13
Menoso hangko i dosa
1I tempo iti, arahe tauna au mopahawe i Yesu kana i bahangkia to Galilea au napapate Pilatu tanganda mohuhu popenombanda i Pue Ala. 2Kanahadina Yesu lolitanda, Nauli, “Ba nipehangu to Galilea iti rapapate nodo lawi melumbu dosanda hangko i ranganda? 3Bara! Agaiana ane barakau menoso hangko i dosami, batena worikau rahuku. 4Ara wori hampulo hai ualu tauna au mate lawi nadungkangi sou au mapangka i Siloam au ara i Yerusale. Ba nipehangu kapatenda iti mewali nodo lawi melumbu dosanda hangko i ope-ope tauna ntanina i Yerusale? 5Bara! Agaiana ane barakau menoso hangko i dosami, batena worikau rahuku.”
Ngkora pandiri kana i kau ara au bara mowua
6Roo indo, napaliliumi Yesu lolitaNa hai ngkora pandiri ide, Nauli, “Ara hadua tauna au motuda kau ara i bonde anggorona. Hambela tempo, laomi ampu bonde bona mampeita ba ara wuana. Agaiana bara huba haogu wuana. 7Ido hai nauli ampu bonde iti i topokadipura bondena: ‘Peita, i lalu talu parena, maina moparesa kau ide, agaiana bara huba haogu wuana au kulambi. Mewali, nutiwi peami! Apa bunduna tuwo inde; mopaope pea karudu tampo.’
8Agaiana nahanai topokadipura bondena: ‘Ampu, nupogiangaa hampai tuwo hampare mani. Ina kubahi patoana, hai kuwoli awu bona marudu. 9Mole mowuato pae pare mai. Ane bara mowua, hangko kutiwiri.’ ”
Yesu mopakaoha hadua towawine i Alo Pengkarooangaa
10Hambela tempo, Yesu mepaturo i sou penombaa i Alo Pengkarooangaa. 11Inditi, ara hadua towawine au hampulomi hai ualu parena mahai, lawi napesuangi seta. Towawine iti bungku, bara peisa meangka togo. 12Kanaitana Yesu towawine iti, Nakakiomi, Nauliangaa, “Ina! Maohamoko hangko i hakimu.” 13Roo indo, Yesu motobo towawine iti. Unga pea manoto bengona, meangkami, hai liliu motoia Pue Ala.
14Agaiana inditi ara hadua tadulako sou penombaa au koi inaona moita Yesu mopakaoha tauna i Alo Pengkarooangaa. Ido hai nauli i tauna bosa, “Ini alona, peisake mobago. I alo-alo iti, peisakau mai mampopepakaoha, inee i Alo Pengkarooangaa!”
15Nahanai Pue Yesu, “Ikamu, maroa i raoa peakau! I Alo Pengkarooangaa, ope-ope tauna mokabaha japinda hai baulanda hangko i gimpunda bona raanti lao rapaenu i raoa. 16Inde, ara hadua towawine au pemuleana wori Burahima; hampulomi hai ualu parena nahilu Datu Tokadake. Bara pae hintoto ane towawine ide rakabaha hangko i karatakana i Alo Pengkarooangaa?” 17Lolitana Yesu iti mopakaeahe timaliNa, agaiana tauna bosa mampokatana ope-ope tanda kuasa au nababehi Yesu iti.
Ngkora pandiri kana i lihu hahawi hai ragi
(Mat. 13:31-33; Mrk. 4:30-32)
18-19Napaliliu Yesu lolitaNa, Nauli, “Ane poparentana Pue Ala hawe i dunia, noumba pewalina? Poparentana Pue Ala nodo lihu hahawi i lalu ngkora pandiri ide: ara haogu lihu hahawi au naala hadua tauna, hai natuda i bondena. Lihu hahawi iti tuwo hai kamahile-hilea, duuna mewali nodo hampoa kau. Hawemohe tadasi mobabehi haranda i daana.”
20Napahawe mbuli Yesu hampaka ngkora pandiri i tauna bosa, Nauli, “Poparentana Pue Ala rapandiri nodo ragi i lalu ngkora pandiri ide: 21Ara ragi au naala hadua towawine, nagalo hai tapu. Nauri ragi iti haodi pea peisa mampopembongke tapu au ngkaia#13:21 tapu au ngkaia: Basa Yunani: “tapu talu satas” lempona: ‘ini pulona kati tapu’..”
Baba au maigu
22I polumaona Yesu lao i Yerusale, Ia mampolumaongi ngkaia boea au mahile hai au koi, mopaguru tauna. 23Ara hadua tauna au mekune i Yesu, nauli, “Pue, ba haodi pea tauna au ina molambi katuwo maroa au bara mokahopoa?”
Nahanai Yesu, nauli, 24-25“Au molambi katuwo maroa, peisa rapandiri nodo hadua tauna au mesua i baba au maigu. Hangangaa nipari-pari mesua i baba au maigu iti liana mani tebungkahi. Lawi ane hawemi tempona baba iti natuko ampu sou, bosa tauna ina mampeinaohe mesua, agaiana barapohe peisa. Mewali ane meangka manikau i raoa, ina mekakakiokau merapi bona rabungkahiakau baba. Ina niuli, ‘Ampu bungkahia wongkamia baba!’
Ina nahanai: ‘Barakau kuisa, hai bara wori kuisa kahangko iumbami mai.’
26Ina niuli, ‘Ampu! Maande hai maenu sambelamongkai hai oio! Mepaturomoko i lalu boeangki!’
27Agaiana ina nahanaikau ampu sou: ‘Barakau kuisa, hai bara wori kuisa kahangko iumbami mai. Pelohokau hangko inde, ikamu ope-ope au kadake babehiami.’
28I tempo iti, ina moitakau toiorumi hangkoia nodo Burahima, Isaki hai Yako hai ope-ope nabi. Ina mohudahe matana-tana i lalu poparentana Pue Ala. Agaiana ikamu ina moteteriakau hai mantodiha liliukau, lawi rapotukoakau baba, hai ikamu i raoa pearaikau. 29Bosa tauna au barahe to Yahudi ina mewali taunana Pue Ala i lalu poparentaNa. Ina maihe hangko i humalele dunia, mohudahe hai maandehe matana-tana i lalu poparentana Pue Ala. 30Kahopoana, tauna au tepaibokoa ina mewali tepaiorua. Hai tauna au tepaiorua ina mewali tepaibokoa.”
Masusa laluna Yesu mampekiri wanua Yerusale
(Mat. 23:37-39)
31I tempo iti, arahe bahangkia toParisi au mai i Yesu, rauliangaa, “PadumoKo hangko inde, hai laomoKo i boea ntanina, lawi ara tunggaiana Datu Herode mopapateKo.”
32Nauliangaahe Yesu, “Niuliangaa topeakalangi iti node: Alo ide hai kahalo Kupopolumao mani pobagoNgku mampopeloho seta hai mopakaoha tauna au mahai. Agaiana i kataluna alona, ina hopomi bagoNgku. 33Agaiana kehapiri nodo, hangangaa molumao liliuNa monontohi Yerusale. Lawi bara hintoto ane hadua nabi rapapate i raoa wanua Yerusale.
34To Yerusale, to Yerusale! Mopapatemokau nabi-nabi. Hai tauna au natudu Pue Ala lao irikamu, niwatuihe. Bosa belana Kupeinao mokalapuikau nodo hambaa manu ntina au motaoboki anana, agaiana bara niunde. 35Bona niisa: ina napalehikau Pue Ala! Tou mpuu Kuuliangaakau, barapoNa niita, duuna hawe tempona niuli: ‘Rawatimi tauna au mai i lalu hangana Pue!’ ”
Currently Selected:
Lukasi 13: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
