Lukasi 12
12
Raginda toParisi
(Mat. 10:26-27)
1Arahe isabuna tauna au moteruhu mampeinaohe moita Yesu, mombeupi-upihe alana mombepangka-pangkamohe. I tempo iti, Yesu mouliangaahe topeguruNa, “Maroa-roakau i raginda toParisi. Ineekau meguru i toParisi, lawi maroa i raoa peahe agaiana kadake lalunda. 2Agaiana ope-ope au ara i lalunda ina tewungkehi. Lawi ope-ope au ratuko ina tebungkahi, hai ope-ope au tewuniangi batena ina tongawa. 3Mewali, apa au nipololita i kakaindiana batena ina tewungkehi i kabaakana. Hai apa au nikanenia rangami i lalu soumi au tetuko, batena tebambari i humalele boea.”
Nipokalanga Pue Ala
(Mat. 10:28-31)
4“Halalu, nipehadingi maroa lolitaNgku: ineekau mampokalanga tauna au peisa pea mopapate watami, lawi bara ara kuasanda mohukukau hawe i hae-haena. 5Agaiana au hangangaa nipokalanga iami Pue Ala. Lawi Pue Ala makuasa mopapate watami, hai makuasa wori motendekau i lalu naraka. Tou mpuu au Kuuliangaakau, Iami au hangangaa nipokalanga.
6Lima baana dena peisa rapobalu rompeka pea doi see. Agaiana nauri nodo, bara ara hambaa au bara nakadipura Pue Ala. 7Apa mani ikamu. Mogalori weluami, naisa Pue Ala kangkaiana. Mewali ineekau langa. Melumbu pekadipurana Pue Ala irikamu pane pokadipuraNa dena au bosa.”
Nipangaku Pue Yesu i lindonda tauna bosa
(Mat. 10:32-33; 12:32; 10:19-20)
8“Pehadingi maroa lolitaNgku: hema au mopangaku i lindonda tauna bosa peulana Iriko, Ana Manusia, ia ina Kupangaku wori i lindonda malaekana Pue Ala. 9Agaiana hema au mosapuakaNa i lindonda tauna, ia wori ina Kusapuaka i lindonda malaekana Pue Ala.
10Hema au mosapuaka Ana Manusia, peisa mani teampungi salana. Agaiana hema au mosapuaka Inao Malelaha, barapi peisa raampungi salana.
11Ane raantikau i tadulako agama ba i topoparenta boea anti peulami Iriko, ineekau langa kana i apa au ina niuliangaahe hai ba noumba pehanami. 12Lawi i tempo iti, Inao Malelaha ina mopagurukau apa au hangangaa nihowara.”
Ngkora pandiri kana i topebuku au ntuli
13Ara hadua tauna hangko i olonda tauna bosa au mai i Yesu, nauli, “Guru, Nuuliangaa halalungku bona naweina wongkoia kirangku hangko i sosoranda tosaengki.”
14Nahanai Yesu, “Halalu, hema au moangkaNa mewali topetanga-tangaimi au mampokiraakau sosoranda tosaemi?” 15Roo indo, mololitami Yesu i tauna bosa, Nauli, “Mainga-ingakau hai maroa-roakau, ineekau mampeinao morampu anu-anu dunia. Lawi kehapiri ngkaia anu-anumi, barari iti au mopaara katuwo maroa.”
16Ido hai napahawe Yesu ngkora pandiri ide, Nauli, “Ara hadua topebuku, ngkaia tampona hai maroa tuda-tudana. 17Nauli laluna topebuku iti: ‘Apa au hangangaa kubabehi? Barapi handa tambaruku kupambolii parengku.’ 18Kahopoana nahumba akala, nauli, ‘Agina tambaru au koi ide kubaliki, hai kuaro au mahile bona inditi kuwoli ope-ope parengku hai anu-anungku. 19Roo indo, barapona paraluu mobago, lawi ngkaiami pambolingku, melabi-labimi hai barapi ina ope. I tempo iti, ina maande hai maenu pearaina i lalu katana-tana!’
20Agaiana Pue Ala mongkora iria Nauli, ‘Ee tontuli! Kaindi ide, inaomu ina raala. Mewali, ope-ope au nurampu iti, hemami ampuna?’ ”
21KarooNa mopahawe ngkora pandiri iti, nauli mbuli Yesu, “Nodomi kahurewunda tauna au mampeinao morampu peawa dunia, agaiana barahe mohaile Pue Ala hai barahe mampokaahi hangka ranganda.”
Inee karao inaomu
(Mat. 6:19-21,25-34)
22Nauli Yesu i topeguruNa, “Ido hai Kuuliangaakau inee karao inaomi ba niuli, ‘Apami wei au taande?’ Inee karao inaomi ba niuli, ‘Apami au tapohampi?’ 23Lawi katuwomi melumbu hangko i paande hai pehampi. 24Nipeitahe tadasi! Barahe mowia, barahe mepare, bara ara tambarunda. Nauri nodo, Pue Ala batena mopaandehe. Apa mani ikamu. I peitana Pue Ala, meliu katuwomi pane katuwonda tadasi. 25Apami pobunduana ngkaia au nipekiri? Kehapiri karao inaomi mampekiri mampopengaa, barakau peisa motambai tinuwumi nauri hambengia pea. 26Mewali, ane bara nibuku mobabehi au koi iti, moapari hai mampokalangakau mampopengaa? 27Nipeita bunga au tuwo i tanga mpada. Barahe mobago, barahe mandau. Agaiana Kuuliangaakau, mogalori Datu Salomo au pebuku ntepuu, hampina bara himbela peraena hai bunga iti. 28Mewali, ane Pue Ala mampoperae hehi i pada au tuwo alo ide hai rahuwe kahalo, apa mani ikamu! Meliu pekadipurana Pue Ala irikamu. Mewali, moapari hai bara niharunga pekadipuraNa iti? 29Inee karao inaomi ba nipekiri liliu, niuli: ‘Apami wei au taande hai taenu?’ 30Ope-ope iti rahaoki liliu tauna au bara moisa Pue Ala. Agaiana ineekau langa, lawi ope-ope au niparaluu, naisa haha Umami au i suruga. 31Mewali, hangangaa nipaioru poparentana Pue Ala i lalu katuwomi, hai hinangkana au niparaluu batena Naweikau.”
Anu-anu i suruga
32“Ikamu au meula Iriko, ineekau langa, nauri barakau bosa. Lawi hangko i kabulana laluna Pue Ala Umami, mopileikau molambi katuwo maroa i lalu poparentaNa. 33Ido hai Kuuli, nipobalumi anu-anumi, hai holona niweihe tauna au meahi-ahi tuwonda. Lawi ane nibabehi nodo, mowolikau anu-anumi i lalu kusau au bara peisa mahepa, lempona, i lalu suruga. Anu-anumi iti bara ina matanta, lawi bara peisa rapanangka hai bara peisa naande bubu. 34Niwolimi anu-anumi i lalu suruga, lawi iumba kaarana anu-anumi, inditi wori lalumi.”
Hawi au mainga-inga
(Mat. 24:43-51)
35-36Roo indo, Yesu mopahawe ngkora pandiri ide, Nauli, “Hangangaa mainga-inga liliukau hai hangangaa masilolonga peamokau bona ineekau napatingkara ba apa pea. Ikamu hangangaa nodokau hawi au mampegiahe ampunda mesule hangko i posusaa petauna. Hawi iti, tekadipura hampinda, masilolonga liliuhe, hai hulonda tuwo liliu. Ane hawemi ampunda motidongko baba, liliu rabungkahia. 37Morasihe hawi au mainga-inga hai mampegia ampunda, duuna hawe. Lawi ampunda iti ina mowewe pekona, napopohudahe, hai narorahe. 38Morasi mpuuhe hawi au mepegia hai masilolonga i kahawena ampunda, kehapiri i laembengi ba liu hangko indo.
39Hangangaa nipailalu ngkora pandiri ide: ane naisa ami ampu sou impira kahawena topanangka, batena mainga-inga; bara napogiangaa mesua i lalu souna. 40Ido hai hangangaa mainga-ingakau, lawi bara niisa impira kahaweNgku, Iko Ana Manusia.”
Hawi au manoto hai au bara manoto
41Napekune Peturu i Yesu, “Pue, hema au Nutunggai i lalu ngkora pandiri iti, ba ikami pea ba tauna bosa worihe?”
42Nahanai Pue Yesu, “Nipailalu ngkora pandiri ide: Ara hadua hawi au manoto laluna hai au peisa napoinalai ampuna. Ia naangka ampuna motosaengi hawi ntanina hai mourusi paandenda alo-alona. 43Morasi mpuu katuwona hawi iti, ane i pesulena ampuna, nahumba tangana mampopolumao bagona. 44Hawi iti batena ina naangka ampuna mokadipura ope-ope anu-anuna. 45Agaiana noumba ane hawi iti bara maroa poantina? Nauli laluna, ‘Bara ina polo hawe ampuku,’ alana barapi mampopolumao bagona. Napepongkami mopapahaihe hangka hawina maroa towawine maroa tobalilo. Ia maande hai maenu liliu duuna malangu-langu. 46Agaiana, ina hawe ampuna i alo hai i jaa au bara nahaharunga. Hawi iti ina napapahai duuna mate hai napahimbela hai tauna au bara moisa Pue Ala.
47Hadua hawi au moisa peundeana ampuna, agaiana bara mainga-inga hai bara mobabehi peundeana ampuna, hawi iti batena rumihi rapapahai. 48Agaiana ane ara hadua hawi au bara woia moisa peundeana ampuna hai mobabehi au sala, bara rumihi karapapahaina. Lawi hema au rawei ngkaia, ngkaia wori au ina raperapi hangko iria. Hai ane ngkaia au rapoinalaia hadua tauna, ngkaia wori au ina rahaoki hangko iria.”
Anti kaYesuna, tetambaimi posisalanda tauna
(Mat. 10:34-36)
49“MaiNa moanti api i dunia. Maroa mpuu ane api iti rore. 50Agaiana ara mani kapari au hangangaa morumpaNa. Ina masusa laluNgku duuna mewali. 51Inee niharunga kamaiNgku ide ina mopahintuwu tauna. Bara! KamaiNgku ide ina mampoposisala tauna. 52Mepongka ide-ide, tauna hantambi ina mosisalahe. Pandirina, ane ara lima i lalu hantambi, ina mosisalahe lawi talu meula Iriko, hai rodua bara. 53Au rapouma ina moewa anana tobalilo, hai ana tobalilo ina moewa umana. Au rapoina ina moewa anana towawine, hai ana towawine ina moewa inana. Au rapopenganti ina moewa maniana, hai au rapomania moewa pengantina.”
Nipekatandai apa au ina mewali
54Nauli mbuli Yesu i tauna bosa, “Ane niita gawu ntanda i Katampua alo, niuli ina keuda, hai keuda mpuu. 55Ane mewui himburu hangko i Lau, niuli ina madii, hai batena mewali nodo. 56Mengkamapande mpuukau! Niisa mampekatandai tanda i langi hai i dunia, agaiana bara niisa mampekatandai apa au nababehi Pue Ala i tempo ide.”
Mohintuwukau hai iwalimi
57“Ikamu ide, moapari pane bara nibuku mobotusi apa au maroa hai au bara maroa? 58Agina nibotusi sadudua apa au maroa i tempona mani ara katepakami. Ane rapana, ara hadua tauna au mampeinao mosalaiko i lindona tadulako boea, hangangaa modamekau. Lawi ane barakau modame, ina naanti mpuuko lao i topebotusi, hai topebotusi iti ina mohuhuko i pulisi, hai pulisi ina mampopesuako i lalu tarunggu. 59Tou mpuu au Kuuliangaakau, barapoko tekabaha hangko i lalu tarunggu ane bara mani piri indamu nubaiari.”
Currently Selected:
Lukasi 12: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
