Lukasi 11

Yesu mopaguru topeguruNa kana i pekakae

(Mat. 6:9-13; 7:7-11)

1Hambela tempo, Yesu lao mekakae. KarooNa mekakae, hadua topeguruNa mouliangaa Yesu, “Pue, Nupaturo wongkamia mekakae, nodo Yohane Toperiu mopaturo worihe topeguruna.”

2Nauliangaahe Yesu, “Ane mekakaekau, niuli node,

Uma, kipomahile hangaMu au malelaha.

Nupopewalimi poparentaMu i dunia.

3Nuwei wongkamia paandeki au handa i alo-alona.

4Nuampungi wongkamia hangko i kamasalangki, lawi moampungi woringkai hema-hema pea au masala irikami.

Hai inee wongkamia Nupogiangaa rakelo.”

5Nauliangaa mbulihe Yesu, “Pandirina, ane ara hadua hangko irikamu au lao i rangana i tanga kaindi, nauli, ‘Ene, nuwei wongkoia talu oguna roti, 6lawi ara torarengku au hangko hawe, hai bara ara apa-apa au ina kuwei.’ 7Agaiana ia mehana node: ‘Ineena nusalempori. Tegilimi baba. Iko hai anangku, leta hahamongkai. Lohemona mearo. Barako peisa kuwei ba apa-apa.’

8Mewali noumbami? Nauri ia rangamu, bara mau mearo hai moweiko ba apa-apa. Agaiana ane barako maea merapi liliu, kahopoana ia ina mearo hai moweiko apa au nuparaluu. 9Mewali Kuuliangaakau: perapimide i Pue Ala, ina Naweikau. Haokimide apa au niparaluu i Pue Ala, ina nilambi. Tidongkomide baba, ina Nabungkahiakau. 10Lawi hema au merapi ina rawei. Hema au masaoki ina molambi. Hema au motidongko baba, ina rabungkahia. 11Arakau pae au mowei ile i anami ane anami merapi bau? 12Ba au mowei alipaa ane merapi tulu manu? Bara! 13Kehapirikau kadake, niisa mani mowei apa au maroa i anami. Apa mani Umami au ara i suruga! Batena ina mowei Inao Malelaha i tauna au merapi Iria.”

Yesu hai Beelsebul

(Mat. 12:22-30; Mrk. 3:22-27)

14Hambela tempo, ara hadua tauna au raanti i Yesu. Tauna iti napesuangi seta, hai bara peisa mololita. Yesu mampopeloho seta iti hangko i watana, alana peisa mololita. Mewali tingkaramohe tauna bosa. 15Agaiana ara worihe tauna au manguli, “KuasaNa iti hangko i Beelsebul, datu seta. Ido hai peisa mampopeloho seta.”

16Ara worihe au mampeinao mohaoki kamanawona Yesu. Merapihe i Yesu bona Napopaitaahe tanda kuasa bona tongawa kahangko i Pue Alana. 17Agaiana naisari Yesu apa au ara i lalunda. Ido hai Nauliangaahe, “Ane pandirina ara hadua datu, hai tauna bosa i lalu kadatuana mosisala liliuhe hai mombeewa, kadatua iti bara ina mantaha. Ane tauna hantina paka mosisala, ina magero pohintuwunda tina iti. 18Nodo wori i kadatua seta. Niuli, mampopelohoNa seta hai kuasa hangko i Beelsebul, datunda ope-ope seta. Agaiana ane Datu Tokadake moewa hangka tokadakena, batena ina magero kadatuana. 19Niuli mampopelohoNa seta hai kuasa hangko i Beelsebul. Agaiana ara wori rangami au mampopeloho seta. Kuasa apa au rapake rangami iti mampopeloho seta? Manoto kuasana Pue Ala. Mewali, hangko i babehianda rangami iti, tongawami kadana tou lolitami au manguli mampopelohoNa seta mopake kuasana Datu Tokadake. 20MampopelohoNa seta mopake kuasana Pue Ala. Itimi au mopakanoto kahawenami poparentana Pue Ala i olomi.

21Ane ara hadua au maroho pokampaina souna, hai handa parewana mombeala, ihi souna bara peisa raala. 22Agaiana ane mai hadua au meliu karohona, topokampai sou iti peisa naewa hai nanangi. Parewa pombeala au naharunga ampu sou iti, naala hai ope-ope ihi souna ina nakira-kiraahe rangana.#11:22 Tauna au maroho iami Datu tokadake hai tauna au meliu kamarohona iami Yesu haduduana.

23Hema au bara hihimbela hai Iko, iami iwaliNgku. Hema au baraNa motulungi mobago, ia moewaNa.”

Hadua seta au mesule hule

(Mat. 12:43-45)

24“Tauna kadake au tuwo tempo ide peisa rapandiri nodo hadua tauna au napesuangi seta. Padumi seta hangko i tauna iti, hai molulumao i pada wungi mohaoki paidaana. Anti kadana ara au nalambi, ido hai naulimi: ‘Agina mesule peana lao i paidaa au kupalehimi hangkoia.’ 25Pesulenami lao i tauna au napalehi hangkoia, naita tauna iti nodo sou au tekawohi malelaha hai tekadipura maroa. 26Ido hai laomi mokakio pitu hangka setana au meliu kakadakenda hangko iria. Lao mpuumohe mesua i tauna au napalehimi hangkoia, hai maidamohe inditi. Kahopoana, tetambaimi kameahi-ahina tauna iti hangko i nguru-nguruna.”

Hema au morasi

27Karoona Yesu mololita nodo, ara hadua towawine i olonda tauna bosa au mouliangaa Yesu, “Morasi mpuu towawine au mampoanakaKo hai au mopatomiKo!”

28Agaiana nahanai Yesu, Nauli, “Agaiana, au morasi iamohe tauna au mampehadingi hai mampeulaihe Ngkorana Pue Ala.”

Tanda nabi Yunu

(Mat. 12:38-42)

29Tanganda tauna bosa motoleliki Yesu, Napaliliumi lolitaNa irihira, Nauli, “Kadake ntepuukau au merapi bona Kupopaitaakau tanda kuasa. Agaiana bara ara tanda kuasa au ina rapopaitaakau. Au ina rapopaitaakau, batena pea tanda nodo au mewali i nabi Yunu hangkoia. 30Hangkoia Yunu mewali tanda i ampu boea Niniwe. Nodo wori Iko, Ana Manusia ina mewali tanda i tauna au tuwo ide-ide. 31I alo pebotusi i kahopoa dunia, datu towawine hangko i Lau ina rapatuwo hule hihimbela hai ikamu au tuwo ide-ide, hai ia ina motudungiakau salami. Lawi datu towawine iti hawe hangko i tampona au karao, mampeinao mampehadingi paturona Datu Salomo au matopa. Ide-ide arami i olomi au meliu kamahilena tuwoNa hangko i Salomo, agaiana bara nipoinalai lolitaNa. 32Nodo wori i alo pebotusi i kahopoa dunia, ampu boea Niniwe ina rapatuwo hule hihimbela hai ikamu au tuwo ide-ide, hai ihira ina motudungiakau salami, lawi menosomohe hangko i dosanda i pohadinda lolitana nabi Yunu. Agaiana ide-ide arami i olomi au meliu kamahilena tuwoNa pane nabi Yunu, hai bara nipoinalai lolitaNa.”

Pewangka hai kamakaindi

33“Bara ara hadua tauna au mohuwe hulo hai nabobongi. Hulo batena nawoli i paidaana bona pewangkana raita ope-ope tauna au mesua. 34Matamu iami hulona watamu, lawi ane maroa matamu, manoto petotokimu. Agaiana ane wura matamu, makaindi ntepuu petotokimu. 35Nodo wori hai lalumu. Hangangaa nupamaroa-roa bona lalumu au napamabaa Pue Ala inee nupamakaindi. 36Ane mabaa lalumu lawi nasimbaki pewangkana Pue duuna barapi ara au makaindi, ina mabaa wori ope-ope katuwomu nodo au nawangkahi hulo.”

Yesu mosalai toParisi hai guru-guru agama

(Mat. 23:1-36; Mrk. 12:38-40; Luk. 20:45-47)

37Karoona Yesu mololita, ara hadua toParisi au mokakio lao maande i souna. Mewali lao mpuumin Yesu maande. 38Tingkaramohe toParisi moita Yesu maande, lawi bara hampai memando moula ada agamanda. 39Ido hai nauliangaahe Yesu, “Ikamu toParisi nodokau hadua tauna au mobahoi paenua hai tabo i raoana pea. Agaiana i lalumi, kadake ntepuukau hai mampokaelukau anu-anuna rangami. 40Ntuli mpuukau! Bara pea watanta au napopewali Pue Ala. Ia mampopewali wori lalunta. 41Apa au ara irikamu hangangaa niweihe tauna au meahi-ahi tuwonda. Ane nodo nibabehi, ina mewali mpuukau tauna au malelaha.

42Hurewumokau toParisi! Madotakau mampeulai parenta au koi. Mogalori tuda-tuda i tabangaami nodo tangkada hai kulapare, nipopenomba hangkira hampulo i Pue Ala moula parentana Musa. Agaiana parenta mahile au manguli hangangaa mobabehikau apa au manoto i rangami hai hangangaa mampokaahikau Pue Ala, bara nipeulai. Katouana parenta itiri au hangangaa nipeulai, hai inee worikau mokabaha peulami i parenta au koi.

43Hurewumokau toParisi! Lawi matanakau ane rapopohudakau i pohudaa au raadai i lalu sou penombaa. Matanakau ane rabilakau tauna bosa i pobalu-balua. 44Hurewumokau, lawi ikamu nodokau talumba au bara mokatandaa. Talumba iti raihe-iheki tauna, agaiana bara raisa kaarana ngkaia pakana au merikai i laluna. Nodo wori ikamu, maroa i raoa peakau, agaiana kadake lalumi.”

45Hadua guru agama to Yahudi mouliangaa Yesu, “Ee Guru, ane nodo lolitaMu, ikami wori au Nusalai!”

46Mehana Yesu, “Hurewu worimokau guru agama! Lawi ikamumi au mopahaleangia tauna bosa hai parenta hai ada agama au mantimi, agaiana bara niunde motulungihe. Mogalori hangkau karawemi bara nipake modureihe. 47-48Hurewumokau! Nipakaroa daionda nabi au hangkoia, agaiana nodokau toiorumi au mopapatehe nabi iti. I babehia iti, nipokana babehianda toiorumi. 49Pue Ala moisa kakadakena babehiami. Babehiami iti himbela hai babehianda toiorumi au kadake. Ido hai hangkoia mongkorami Pue Ala node:

‘Ina Kutuduhe nabi-nabi hai suro-suroNgku lao irihira.

Hantangahe ina rapapate, hantangahe ina rapopeahi-ahi.’

50Mewali, ido hai tauna au tuwo i tempo ide ina rahuku anti karapapatenda ope-ope nabi hungkana dunia ide rapopewali 51mepongka i karapapatena Habeli hawe i Sakaria au rapapate i tabangaa Souna Pue Ala i olo sou au malelaha hai meja pohuwea popenomba. Tauna au tuwo i tempo ide ina rahuku anti ope-ope babehia iti!

52Hurewumokau guru agama! Katouana, keikamumi au hangangaa mopaturo hangka rangami bona moisahe noumba rara lao i Pue Ala. Agaiana ikamuri au bara mounde mampeulai rara iti, hai nihombo worihe tauna au mampeinao moula rara au manoto.”

53Kapaduna Yesu hangko inditi, rumpu ntepuumohe guru agama hai toParisi. Mepongka hangko inditi, raoaka mopaara ngkaia pampekune au rapekune Iria, 54lawi mohaokihe kamanawona pololitaNa.

Currently Selected:

Lukasi 11: NPY

Highlight

Copy