Lukasi 10
10
Yesu motudu pitu pulona topeulaNa lao mobambari Ngkora Marasa
1Roo indo, Pue Yesu mopilei pitu pulona topeulaNa au ntanina hai Natuduhe rorodua moioru i ope-ope boea au ina Nakalaongi. 2Nauliangaahe, “Tauna bosa nodohe pare au mangka. Ngkaia pare au mangkami, agaiana topepare barahe bosa. Ido hai hangangaa niperapi i ampu bonde bona natuduhe tauna lao mepare i bondena. 3Laomokau, agaiana hangangaa maroa-roakau. Lawi Kutudukau lao i olonda tauna au kadake. Ikamu nodo ana dimba i olonda serigala. 4Ineekau moanti dompe ba tasi ba kandupa. Ineekau motabe ba hema-hema pea i tanga rara.
5Ane mesuakau i lalu sou, hangangaa niuliangaahe ampu sou: ‘Tabea! Roa ngkatuwo hangko i Pue Ala hawe irikamu!’ 6Ane bula lalunda ampu sou iti modokokau, ina nawatihe Pue Ala. Agaiana ane bara maroa lalunda, barahe ina molambi pewati hangko i Pue. 7Ane radokokau, ineekau melimba-limba. Maidakau i sou iti duumi meangka lao i boea ntanina. Niande hai nienu apa au raweikau lawi hintoto mpuu ane topobago molambi sarona.
8Ane mesuakau i lalu hambua boea hai radokokau, niande apa au raweikau. 9Nipakaoha tomahai au ara i lalu boea iti, hai niuliangaahe ampu boea: ‘Ina hawemi poparentana Pue Ala irikamu.’ 10Agaiana ane mesuakau i lalu hambua boea hai barakau radoko, laomokau i rara mahile hai niuliangaahe, 11‘Mogalo awu hangko i boeami au mentaka i palanta bitingki, kitaronta i lindomi bona niisa barapi ikami au mohuru ane Pue Ala mohukukau. Agaiana maroa-roakau, lawi ina hawemi poparentana Pue Ala!’ 12Kuuliangaakau, i alo pebotusi i kahopoa dunia, ina meliu pehukuna Pue Ala i tauna iti pane pehukuNa i ampu boea Sodomo hangkoia.”
Yesu mokambaroa ampu boea Galilea
(Mat. 11:20-24)
13“Hurewukau to Korasim hai to Betsaida! Ngkaiami tanda kuasa au Kubabehi i boeami, agaiana bara mpuukau menoso hangko i dosami. Ane rapana tanda kuasa iti Kubabehi i lalu wanua Tirus hai Sidon, kemahaemohe menoso hangko i dosanda, nauri barahe to Yahudi. Kemangalamohe waru ngkasusa rapohampi, hai watanda raawui, tanda katebalikinami lalunda. 14I alo pebotusi i kahopoa dunia, ina rumihi mpuu pehukuna Pue Ala irikamu pane pehukuNa i to Tirus hai to Sidon.
15Hai ikamu wori to Kapernaum! Ba nipehangu ina naangkakau Pue Ala hawe i suruga? Bara! Ina Natendekau i lalu naraka!”
16Roo indo, mololita mbuli Yesu i topeguruNa, Nauli, “Hema au modoko lolitami, himbelami lolitaNgku au nadoko. Hema au mosapuakakau, himbelami Iko au nasapuaka. Hai hema au mosapuakaNa, himbelami Pue Ala au nasapuaka, lawi Ia au motuduNa.”
Pesulenda topeguruNa au pitu pulona
17Bahangkia kamahaena hangko indo, mesulemohe topeguruNa au pitu pulona. Matana mpuu lalunda, hai rauli i Yesu, “Pue, mogalori seta, mengkoru worihe irikami, hai kipopelohohe i lalu hangaMu.”
18Nauli Yesu, “Kuitami Datu Tokadake manawo hangko i langi nodo kila! 19Nipehadingi lolitaNgku: Kuweimokau kuasa moiheki ile ba topehingki hai kuasa monangi ope-ope kamarohona iwali. Bara ara hadua au peisa mopakarugikau. 20Agaiana nauri nodo, inee nipokatana pengkorunda seta irikamu. Aginari nipokatana kateukinami hangami i lalu suruga.”
Yesu mekakae
(Mat. 11:25-27; 13:16-17)
21I tempo iti, matanami Yesu i lalu Inao Malelaha, hai hangko i kamatanana laluNa, Nauli, “O Uma, Ampu langi hai tampo! KutoiaKo, lawi ope-ope au tewuniangi hangkoia Nupopaisaamohe tauna au i woi tuwonda, agaiana Nuwuniangiahe tauna au mapangka posikolanda hai tauna au mapande. Lawi nodomi peundeaMu, Uma.”
22Roo indo, nauli mbuli Yesu, “Hinangkana naweimoNa UmaNgku. Bara ara hadua au moisa kaIkona Anana Pue Ala, batena pea UmaNgku au moisaNa. Nodo wori, bara ara au moisa UmaNgku, batena pea Iko AnaNa hai hema pea au Kupopaisaa.”
23Hangko inditi bona dati rahadi tauna, Pue Yesu membalili i topeguruNa, Nauliangaahe, “Morasi mpuukau, lawi niitami ope-ope ide. 24Lawi hangkoia arahe bosa nabi hai datu au mampeinaohe moita apa au niitami, agaiana bara raita. Mampeinao mpuuhe mampehadingi apa au nihadi, agaiana bara rahadi.”
Ngkora pandiri kana i to Samaria au maroa laluna
25Ara hadua guru agama to Yahudi au mampeinao mampetandaka Yesu. Napekune, “Guru, apa au hangangaa kubabehi bona molambina katuwo maroa au bara mokahopoa?”
26Nauli Yesu, “Apa au teuki i lalu Aturana Musa? Apa au nubasa inditi?”
27Nahanai guru agama iti, “Au kubasa, node:
‘Nipokaahi Pue Ala, Ampumi,
i sukana kabulana lalumi,
i sukana pekirimi,
i sukana rohomi,
hai i sukana kapandemi.’
Hai teuki wori:
‘Nipokaahi hangka rangami nodo pampokaahimi watami haduduami.’ ”
28Nauli Yesu, “Kana pehanamu. Babehimide nodo bona molambiko katuwo maroa.”
29Agaiana guru agama iti mampeinao mopakanoto babehiana. Ido hai nauli, “Hemahe rangangku au hangangaa kupokaahi?”
30Nahanai Yesu, “Ara hadua tobalilo au molumao hangko i Yerusale lao i boea Yeriko. I tanga rara, tauna iti rapohidupaa toperampaki. Raperampaimi anu-anuna hai hampina, hai watana rapapahai duuna malimpu. Kahopoana rapalehi tedampa i wiwi rara. 31I tempo iti, ara hadua tadulako mpenomba au moliu i rara iti. Kamoitana tauna au marugi iti, naleliki pea. 32Nodo wori ara hadua to Lewi au moliu inditi. Kamoitana tauna au marugi iti, naliu pea wori.
33Bara mahae hangko indo, moliu wori hadua to Samaria i rara iti. Kamoitana tauna au marugi iti, maahi laluna iria. 34Laomi i tauna iti, nabahoi belana mopake lana mawongi hai anggoro, pane nawewehi. Roo indo, napopesawimi i kalidena, naanti lao i sou posanggaraha,#10:34 sou posanggaraha: Basa Indonesia: rumah penginapan. hai nakadipura inditi. 35Kahalona madondo, naalami rompeka doi pera, nawei ampu sou, nauliangaa, ‘Nukadipura hampai tauna ide. Ane mesulena mai deade hai doi ide bara mani handa, ina kubaiari ope-ope.’ ”
36Roo indo, mekunemi Yesu i guru agama iti, Nauli, “Moula pelambiamu, hangko i tauna au talu inona, hema au mewali rangana tauna au rapakarugi iti?”
37Nahanai guru agama, “Tauna au motudungia ahina.”
Nauli Yesu, “Kanami. Ido hai hangangaa nubabehi wori nodo.”
Yesu mosondaki Marta hai Maria
38Hangko indo, Yesu mopaliliumi polumaona hihimbela hai topeguruNa, hawemi i hambua boea. I lalu boea iti, ara hadua towawine au rahanga Marta mampopehupe Yesu i souna. 39Ara wori hadua halaluna Marta au towawine, hangana Maria. Maria iti mohuda i lindona Yesu hai mampehadingi liliu lolitaNa. 40I tempo iti, Marta rumpu i Maria, lawi ngkaia bagona morora torare. Ido hai laomi Marta i Yesu, nauliangaa, “Pue, halalungku ide barana nadurei. Haduduangku pea mobago! Nuuliangaa bona maina nadurei.”
41Nauli Pue Yesu, “Marta, Marta! Inee karao inaomu, hai inee mampopengaa nupekiri. 42Katouana, ara hampaka au paraluu ntepuu; hangangaa mampehadingike Ngkorana Pue Ala. Iti au maroa ntepuu, hai itimi au napilei Maria. Hai apa au napilei Maria bara ina raala hangko iria.”
Currently Selected:
Lukasi 10: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
