Lukasi 9

Yesu motudu topeguruNa mopahawe Ngkorana Pue

(Mat. 10:5-15; Mrk. 6:7-13)

1Yesu mokakiohe topeguruNa au hampulo hai rodua. Naweihe kuasa monangi ope-ope seta hai mopakaoha tauna au mahai. 2Natuduhe lao mopahawe bambari kana i poparentana Pue Ala hai mopakaohahe tauna au mahai. 3Nauliangaahe Yesu, “Ineekau moanti apa-apa i polumaomi. Ineekau moanti lai ba tasi ba baku ba doi. Inee worikau moanti badumi morontau. 4Ane radokokau tauna i sou haogu, maidamokau inditi duumi padu lao i boea ntanina. 5Ane hawekau i boea hai barakau radoko ampu boea, nipalehi boea iti, hai nitaronta awu au mentaka i palanta bitimi, tandana barapi ikamu au mohuru ane Pue Ala mohukuhe.”

6Karoonda napaturo Yesu, meangkamohe lao i boea-boeana mobambari Ngkora Marasa hai mopakaohahe tauna au mahai iumba pea.

Datu Herode hai Yesu

(Mat. 14:1-12; Mrk. 6:14-29)

7I tempo iti, Herode Antipas au moparenta i Galilea. Ia mohadi ope-ope au nababehi Yesu, ido hai wuli laluna. Lawi ara au manguli, “Yesu iami Yohane Toperiu au tuwo hule.” 8Ara wori au manguli, “Yesu iami nabi Elia au hawe mbuli.” Hai ara wori au manguli, “Yesu iami hadua nabi hangkoia au tuwo hule.” 9Nauli Herode, “Hangkoia kutudumi tauna mobohoki tambolona Yohane. Mewali, hema Yesu ide? Bosami belana kuhadi tauna mololita kana Iria.” Ido hai Herode mohaoki rara mampohidupaa Yesu.

Yesu mopaande lima sabuna tauna

(Mat. 14:13-21; Mrk. 6:30-44; Yoh. 6:1-14)

10I pesulenda topeguruna Yesu au hampulo hai rodua, mopahawehe i Yesu ope-ope au rababehimi i boea-boeana. Roo indo, Yesu moanti topeguruNa lao i paidaa au boa hungku i boea Betsaida. Tunggaiana Yesu bona mopalehihe tauna bosa. 11Agaiana kalaoanda raisa tauna bosa, ido hai mekulelehe. Kahawenda i Yesu, Nadokohe hai Napaturoahe kana i poparentana Pue Ala. Hai hema pea au mahai, Napakaoha.

12Ina tampumi alo, laomohe topeguruNa au hampulo hai rodua i Yesu, rauliangaa, “Guru, ide paidaa au boa. Agina Nutudumohe tauna bosa ide lao i boea au hungku bona mohaokihe paandenda hai paturuanda.”

13Agaiana nahanai Yesu, “Ikamu au mopaandehe.”

Rahanai topeguruNa, “Apami pae au kiweihe? Lawi au ara irikami, batena pea lima oguna roti hai rombaa ikane. Peisato asala laongkai hampai meholo paande bona handahe tapaandea tauna bosa ide.” 14(Kabosanda ba aratohe pae lima sabuna tobalilo, barahe teimba towawine hai anangkoi.)

Nauli Yesu i topeguruNa, “Nituduhe tauna bosa iti mohuda motobu-tobu, lima pulona i lalu hantobu.” 15Apa au natuduahe Yesu, rapeulai mpuumi topeguruNa.

16Mohudamohe ope-ope, naalami Yesu roti au lima oguna hai ikane au rombaa, mengoa i langi mekakae i Pue Ala. Roo nodo, Nabise-bisemi roti hai ikane iti, pane Naweihe topeguruNa bona rakira-kiraahe tauna bosa. 17Maandemohe ope-ope duunda mabuhu. Karoonda maande, topeguruNa moguluhe pentarana, hampulo hai rombingka.

Peturu mopangaku kaYesuna Datu Topehompo

(Mat. 16:13-20; Mrk. 8:27-30)

18Hambela tempo, tangana Yesu mekakae haduduana, hawehe topeguruna Iria. Mekunemi Yesu irihira, Nauli, “Moula pangulinda tauna bosa, ide Iko hemaNa?”

19Rahanai, “Arahe au manguli Yohane Toperiu. Ara worihe au manguli nabi Elia. Ara worihe au manguli Oio hadua nabi hangkoia au tuwo hule.”

20Napekune mbulihe, Nauli, “Ane moula pelambiami, ide Iko, hemaNa?”

Nahanai Peturu, “Oiomi Datu Topehompo au nadandi Pue Ala!”

21Agaiana nakonto mpuuhe Yesu bona inee hampai rapapahowa i hema pea.

Yesu mampololita kana i kapateNa

(Mat. 16:21-28; Mrk. 8:31–9:1)

22Nauli mbuli Yesu, “Iko, Ana Manusia, hangangaa molambi ngkaia kapari. Ina rasapuakaNa totosae boea, kapala-kapala tadulako mpenomba hai guru-guru agama. Ina rapapateNa agaiana i kataluna alona ina tuwo huleNa.”

23Hangko inditi, Yesu mouliangaahe ope-ope tauna, “Hema au mampeinao meula Iriko, hangangaa mokabaha peundeana haduduana hai alo-alona mohalea kau popakuana. Ane nodo, hangko peisari meula Iriko. 24Hema au mokabaha peundeana haduduana anti peulana Iriko kehapiri rapapate, iami au molambi katuwo maroa. Agaiana hema au mampeulai peundeana haduduana bara molambi katuwo maroa. 25Apa bunduna morampuke ope-ope peawa i dunia ide, ane barake molambi katuwo maroa i alo pebotusi? 26Hema au maea mopangaku peulana Iriko hai mampokaea paturoNgku, Iko wori ina maea mopangaku kaiana topeulaNgku i kahaweNgku hule hangko i suruga. I tempo iti, Iko, Ana Manusia, ina mendaulu mai hangko i suruga, hai ina meawaNa anti kuasaNgku hai kuasana UmaNgku hai peawanda malaeka au malelaha. 27Nipehadingi maroa apa au Kuuliangaakau ide: ara i olomi au bara mani mate hangko damani moita poparentana Pue Ala.”

Yesu rapopeawa i wongko bulu

(Mat. 17:1-8; Mrk. 9:2-8)

28Ualu alona hangko i pepaturoNa iti, Yesu moanti Peturu, Yohane hai Yakobu mempanai lao i wongko bulu bona mekakae. 29Tangana Yesu mekakae, tebalikimi lindoNa, hai hampiNa mengkila-ngkila. 30Unga peahe ara rodua nabi au molololita hai Ia, iami Musa hai Elia. 31Tauna au rodua iti mewangka hai meawa mpuuhe. Ihira mampololitahe kapatena Yesu au ina Napabukei i Yerusale.

32I tempo iti, letahe Peturu hai rangana. Pearonda, moitamohe Yesu, meawa mpuu wataNa, hai rodua tauna arahe i holaNa. 33I kapadunda tauna au rodua iti mopalehi Yesu, mololitami Peturu, nauli, “Guru, maroa mpuu ane maidake inde! Agina kibabehi talu oguna bambaru, haogu Irio Pue, haogu i Musa, hai haogu wori i Elia.” (Agaiana bara naisa apa au nahowara.)

34Tangana mani Peturu mololita, hawemi gawu mobalungkuhihe. Langamohe moita gawu iti. 35Unga peahe mohadi hambua wotu hangko i lalu gawu au manguli, “Idemi AnaNgku au Kupilei. Nipehadingi lolitaNa!”

36Karoonda mohadi lolita iti, moitamohe Yesu haduduaNa pearai. Apa au raita topeguruNa au talu iti, bara hampai rapopololita i hema pea.

Yesu mopakaoha anangkoi au napesuangi seta

(Mat. 17:14-21; Mrk. 9:14-29)

37Kahalona, mendaulumohe hangko i wongko bulu, hai bosahe tauna mai mampohidupaa Yesu. 38Ara hadua tobalilo i olonda tauna bosa au mekakio, nauli, “Guru! Tulungi wongkoia, Peitaana anangku. Ia ana saduduangku. 39Ane napesuangi seta, monganga-nganga hai morada-rada, duuna mowire ngangana. Seta iti mampopeahi-ahi liliu anangku. 40Kuperapi tulungimi i topeguruMu bona tokadake iti rapopeloho, agaiana bara rabuku.”

41Nauli Yesu i tauna bosa, “Noumbarikau dide? Moapari pane bara mani maroho pepoinalaimi i Pue Ala? Hangkia mani kamahaena ina hihimbelaNa hai ikamu? Hangkia mani kamahaena hangangaa Kusabarai peewami?” Roo indo, tauna iti Nauliangaa, “Anti mai iti anamu!”

42Tangana mani anangkoi iti molumao monontohi Yesu, madungka mbulimi hai morada-rada anti kanapesuangina seta. Agaiana Yesu mokambaroa tokadake iti, alana anangkoi iti maoha. Roo indo, nauli Yesu i umana, “Maimide ala ide anamu. Maohami.” 43Tingkara mpuuhe ope-ope tauna moita kamahilena kuasana Pue Ala.

Karombelana Yesu mampololita kana i kapateNa

(Mat. 17:22-23; Mrk. 9:30-32)

Tanganda mani tauna bosa mampotingkara ope-ope tanda kuasa iti, mololitami Yesu i topeguruNa, nauli, 44“Nipehadingi maroa-roa lolitaNgku ide: Iko Ana Manusia, ina rahuhuNa i kuasa manusia au kadake.” 45Agaiana bara raisa topeguruNa apa tunggaiana lolitana Yesu, lawi tewuniangi mani lempona irihira. Bara worihe bai mekune Iria apa lempona lolitaNa.

Hema au mahile tuwonda

(Mat. 18:1-5; Mrk. 9:33-40)

46Hambela tempo, mombehahanaimohe topeguruna Yesu, ba hema hangko i olonda au meliu kamahilena tuwona. 47Naisa Yesu apa au ara i lalunda. Ido hai Naalami hadua anangkoi, Napopeangka i holaNa, 48hai Nauliangaahe, “Hema au modoko hai au motulungi anangkoi ide anti peulana Iriko, lempona Ikomi au nadoko. Hai hema au modokoNa, bara Iko pea au nadoko, agaiana modoko wori Pue Ala au motuduNa. Hema au mengkaiwoi, iami au mahile tuwona.”

49Roo nodo, mololitami Yohane, nauli, “Guru, ara kiita hadua tauna au mampopeloho seta i lalu hangaMu, agaiana kikonto lawi ia bara meula irikita.”

50Nahanai Yesu, nauli, “Inee rakonto, lawi hema au barahe meewa irikamu, ihirami au hihimbela hai ikamu.”

To Samaria au barahe mau modoko Yesu

51Hungkumi tempona Yesu ina mengkaore lao i suruga, Ia mopakanotomi tunggaiaNa lao i Yerusale. 52Natudumi bahangkia topeguruNa moioru. TopeguruNa au Natudu iti mesuamohe i hambua boeanda to Samaria bona mopasilolongahe ope-ope au raparaluu i kahawena Yesu. 53Agaiana ampu boea iti, barahe mau modoko Yesu, lawi raisa tunggaiaNa lao i Yerusale. 54Karaisana Yakobu hai Yohane kadanda mau modoko Yesu, merapimohe i Yesu, rauli, “Pue, ane Nuunde, merapingkai mai api hangko i langi mopapatehe ampu boea ide!” 55Agaiana Yesu membalili irihira, hai Nakambaroahe. 56Roo indo, liliumohe lao i boea ntanina.

Tauna au mampeinao meula i Yesu

(Mat. 8:19-22)

57Tanganda molumao, ara hadua tauna au mouliangaa Yesu, “Iumba pea kalaoaMu, kupeinao meula Irio!”

58Nahanai Yesu, nauli, “Serigala ara kalolunda, hai tadasi ara haranda, agaiana Iko, Ana Manusia, bara ara sou au Kupaturui.” 59Roo indo, nauli Yesu i tohaduana, “Meulako Iriko.”

Agaiana nahanai tauna iti, “Pue, Nupaliuna hampai lao motawu umangku.”

60Nauli Yesu, “Pogiangaamide tomate motawu hangka tomatenda.#9:60 Pogiangaamide tomate motawu hangka tomatenda! Lempona, pogiangaamide tauna au mate pepoinalainda mokadipura anu-anu i dunia ide. Agaiana oio, laomoko mopahawe bambari kana i poparentana Pue Ala!”

61Ara wori hadua au mouliangaa Yesu, “Pue, kuunde mpuu meula Irio. Agaiana Nupaliuna hampai mesule mepalakana i tinangku.”

62Agaiana nauliangaa Yesu, “Tauna au mepongka mopajeko, bara peisa membalili i taleu. Nodo wori tauna au mampeinao meula Iriko agaiana mobuhuinao liliu apa pea au napalehi, bara hintoto mewali topobago i lalu poparentana Pue Ala.”

Currently Selected:

Lukasi 9: NPY

Highlight

Copy