Lukasi 16
16
Topamboli doi au bara manoto
1Roo indo, Yesu mopahawe ngkora pandiri ide i topeguruNa, Nauli, “Ara hadua topebuku au ngkaia doina. Ia moangka hadua tauna mokadipura doina hai anu-anuna. Agaiana arahe tauna au morai topobagona iti, rauliangaa ampuna, ‘Topobagomu iti motende ntoo pea doimu!’ 2Ido hai topebuku iti mokakio topobagona, nauliangaa, ‘Ara lolita au rapahaweana kana i pobagomu. Ba tou ba bara? Mewali, hangangaa nupasilolonga ope-ope suramu bona kuparesa. Roo naparesa, nauli topebuku iti, Oio barapoko ina mokadipura doingku hai anu-anungku.’
3Nauli laluna topobago iti, ‘Oo, apami au hangangaa kubabehi? Nakabahamona ampuku hangko i bagongku. Ane motongkona bara kubuku, hai maeana merapi-rapi.’ 4Hangko indo, nauli laluna, ‘Aa, ide-ide kuisami! Lawi ina rakabahana hangko i bagongku, agina mohaokina hampai himadangku au bosa bona radokona i sounda.’
5Mewali, nakakiomohe ope-ope topoinda i ampuna. I tauna au nguru-nguruna, napekune: ‘Hangkia indamu i ampuku?’
6Nahanai tauna iti, ‘Hangatu belena lana.’
Nauli topobago iti, ‘Idemi sura indamu. Mohudamoko, nuuki inde lima pea pulona bele!’
7Roo indo, lao i tauna au hadua, nauliangaa, ‘Oio, hangkia indamu?’
Nahanai, ‘Hasabu karuna pare.’
Nauli topobago iti, ‘Idemi sura indamu. Mohudamoko, nuuki inde ualu pea atuna karuna.’
8Kanahadina topebuku iti apa au nababehi topobagona, natoia lawi nauri motengko babehiana agaiana naisa mampekiri karao bona maroa katuwona. Lawi nauri kadake babehianda, agaiana raisa wori mampekiri karao bona maroa katuwonda i alo au ina mai. Kamapandenda melumbu pane tauna au mengkoru i Pue Ala. 9Ido hai Kuuliangaakau: tauna au mengkoru i Pue Ala hangangaa mampekirihe karao. Anu-anumi i dunia ide hangangaa nipake motulungi hangka rangami bona ane hawe tempona anu-anumi iti barapi mobundu, ina radokokau i paidaa au maroa duuna i hae-haena.
10Ane hadua tauna peisa rapoinalai i anu-anu au haodi, ia peisa wori rapoinalai i anu-anu au ngkaia. Agaiana ane bara manoto pokadipurana anu-anu au haodi, apa mani pokadipurana anu-anu au ngkaia! 11Mewali, ane bara nibuku mokadipura maroa anu-anumi i dunia ide, hema pae ina mampoinalaiakau peawa au tou-tou i suruga? 12Hai ane bara niisa mokadipura maroa anu-anunda tauna ntanina au rapoinalaiakau, hema pae ina moweikau anu-anu au mewali anumi haduduami?
13Bara ara hadua tauna au nabuku mampobagoa rodua tauna, lawi hadua ina napokaahi, hai hadua nakahihi. Hadua ina napeulai hawana, hai hadua nakoi hawana. Nodo wori ikamu, barakau peisa mampeulai peundeana Pue Ala hai mohahaoki wori anu-anu dunia.”
14Karahadina toParisi lolitana Yesu, raele-eleri, lawi mohahaoki peahe doi. 15Agaiana nauliangaahe Yesu, “Mampemanotokau i peitana tauna, agaiana Pue Ala moisa ihi lalumi. Lawi apa au nahaoki manusia, itimi au nakahihi Pue Ala.
16Mepongka hangkoia duuna kahawena Yohane Toperiu, Aturana Musa hai suranda nabi-nabi rabambarimi hai rapaturoahe tauna. Agaiana mepongka ide-ide, Ngkora Marasa kana i poparentana Pue Ala au rabambari liliu. Ido hai bosa tauna mopari-pari mesua i lalu poparentaNa. 17Ope-ope lolita au teuki i lalu Sura Aturana Pue Ala hangangaa mewali. Ane ara mani langi hai tampo, batena bara ara hampaka lolita i lalu Sura Aturana Pue Ala au bara ina mewali.
18Hema au mampogaaki towawinena hai mampotambia towawine au ntanina, mebualosi. Hai hadua tobalilo au mampotambia hadua towawine au napogaaki rangana, mebualosi wori.”
Topebuku hai Lasaru
19Hangko indo, nauli Yesu, “Ara hadua topebuku. Pehampina nodo pehampi-hampi datu, ope-ope hampina masuli holona. Katuwona alo-alona, mosusa liliu. 20I baba souna, ara hadua tauna au meahi-ahi tuwona, hangana Lasaru. Watana buke tangga. 21Anti kamarimina, napeinao woia moande wuta au ratende hangko i mejana topebuku iti, agaiana bara rapaliu. Tangana mohuda inditi, mairihe dike modilai mahaiana.
22Roo indo, matemi Lasaru, hai ia raanti malaeka lao i pohudaa au maroa i holana Burahima. Bara mahae hangko indo, mate worimi topebuku iti, hai ratawu. 23Agaiana topebuku iti raanti i paidaa tomate, hai inditi ia mantodiha liliu. Roo indo, mengoami hai moita ngkarao Burahima. Lasaru mohuda i holana. 24Mekakiomi topebuku iti, nauli: ‘Uma Burahima! Nupokaahina wongkoia! Nutuduana Lasaru moeme karawena i owai bona mai motudoi dilangku. Mapari ntepuu kuhadi i lalu api ide!’
25Nahanai Burahima: ‘Anangku, nukatuinao tuwomu i dunia: i tempo iti, molambimoko ope-ope au maroa, agaiana Lasaru molambi pea kapari. Ide-ide, tepalindomi Lasaru inde, agaiana oio hangangaa molambi kapari. 26I olonta ara hambua kabe au matindo ntepuu, au bara peisa rapoliungi. Ido hai tauna hangko inde bara peisa lao inditi, hai tauna hangko inditi bara peisa mai inde.’
27Roo indo, nauli mbuli topebuku iti: ‘Ane nodo, kuperapi mpuu bona nutudu Lasaru lao i souna umangku, 28lawi ara manihe lima halalungku au maida indowei. Nutudu Lasaru mampopaingaahe kana i apa au mewali iriko dati worihe molambi paidaa au mapari ide.’
29Nahanai Burahima: ‘Bara! Lawi arami surana Musa hai suranda nabi-nabi au raukiahe. Pogiangaamohe mampeulai apa au teuki i lalu sura iti.’
30Nauli topebuku iti, ‘Uma Burahima, ane iti pea, bara handa! Ane nutudu hadua tomate au tuwo hule lao mololita irihira, hangko mampenosoirihe dosanda!’
31Agaiana nauli Burahima, ‘Ane lolitana Musa hai lolitanda nabi bara radoko, batena barahe ina mepoinalai, kehapiri ara tomate au tuwo hule.’ ”
Currently Selected:
Lukasi 16: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
