Lukasi 17
17
Bahangkia pakana paturona Yesu
1Roo indo, nauli Yesu i topeguruNa, “Batena ara pekelo au mopamanawo tauna alanda madosa. Agaiana hurewumohe tauna au mopaara pekelo iti! 2Hema au mopakanawo hadua tauna au koi tuwona alana barapi mepoinalai Iriko, ina rumihi mpuu pehukuna Pue Ala i tauna iti. Aginami haogu watu pogilia au mahile ratoe i tambolona hai ratende i tanga tahi. 3Ido hai hangangaa mainga-ingakau!
Ane halalumi mobabehi sala, hangangaa nikonto. Ane tebalikimi laluna, niampungi woia. 4Ane halalumi masala irikamu kehapiri pitu belana i lalu hangalo, hai bela-belana masala mai merapi ampu irikamu, hangangaa niampungi.”
5Rauli topeguruNa, “Pue, pakarohoa wongkamia pepoinalaingki!”
6Nahanai Yesu, “Ane arami pepoinalaimi nauri kokoi pea nodo lihu hahawi, peisakau mouliangaa kau mahile ide: ‘Mawukamoko hangko inde, hai melimbako i tahi!’ hai batena ina mewali moula hawami.”
Poantina hawi
7Napaliliu Yesu lolitana hai ngkora pandiri ide, Nauli, “Pandirina, ara hadua hangko irikamu au ara hawina. Hawi iti lao mowia ba mokampai porewumu. Ane mesule hangko i pobagoana, apa au niuliangaa? Ba niuli: ‘Maimoko maande’? 8Manoto bara! Ina niuliangaari node: ‘Nupasilolongaana paandeku! Mempahuruko hampai. Nukampaina hawena roo maande; hangko peisariko maande.’ 9Bara wori ina niuli ngkaia kamaroana i hawi iti, lawi ikamumi ampuna hai ia mia-mia moula hawami. 10Nodo wori ikamu. Ane nipeulaimi ope-ope au nahawaakau Pue Ala, hangangaa niuli: ‘Ikami ide, hawi peangkai au barangkai hintoto ratoia. Kibabehi pea apa au Nahawaangkai ampuki.’ ”
Yesu mopakaoha hampulo tauna au ketangga
11I lalu polumaoNa lao i Yerusale, Yesu moula pariolo tamponda to Samaria hai to Galilea. 12KahaweNa i hambua boea, hampulo tauna au ketangga mai mampohidupaa. Kakarao mani, mekakiomohe, 13rauli, “Yesu! Guru! Nupokaahi wongkamia!”
14Kanaitanda Yesu, Nauliangaahe, “Laomokau nipetudungia watami i tadulako mpenomba bona tongawa kamaohamimi.” Tanganda molumao, maohamohe.
15Hadua hangko i tauna iti mesule lao i Yesu, nauli masisimbuku, “Tetoiami Pue Ala. Maohamona!” 16Ia molingkudu motumpa i lindona Pue Yesu hai manguli ngkaia kamaroana Iria. Tauna iti iami hadua to Samaria.
17Roo indo, nauli Yesu i ope-ope tauna au meula Iria, “Bara pae hampulohe au Kupakaoha? Iumbamohe au hahio? 18Moapari pane hadua pea au mesule manguli ngkaia kamaroana i Pue Ala? Hai ia bara to Yahudi!” 19Hangko indo, nauli mbuli Yesu i tauna iti, “Meangkamoko, hai laomoko. Anti pepoinalaimu Iriko, ido hai maohamoko.”
Poparentana Pue Ala
(Mat. 24:23-28,36-41)
20Bahangkia toParisi mekunehe i Yesu, ba impira ina hawe poparentana Pue Ala i dunia. Nahanai Yesu, “Kahawena poparentana Pue Ala i dunia, bara ara tanda-tanda au ina raita. 21Nodo wori, bara ara tauna au ina manguli, ‘Peita olou, itimi!’ ba: ‘Peita inde, idemi!’ Lawi poparentana Pue Ala arami i olomi.”#17:21 Lawi poparentana Pue Ala ara i olomi. Potasere ntanina: Lawi Pue Ala moparenta i lalumi.
22Roo indo, nauli Yesu i topeguruNa, “Hambela tempo, ina nipeinao mpuuNa niita, agaiana baraNa ina niita. 23I tempo iti, ara tauna au ina mouliangaakau: ‘Peita, oloumi mai Ana Manusia!’ Ara wori au ina manguli: ‘Idemi!’ Agaiana ineekau meula irihira! 24Lawi ane i kahaweNgku hule, Iko Ana Manusia, ina tongawa mpuu. KahaweNgku ina raita nodo pewangka kila au mesupa i Mata alo hai mewangka hawe-hawe i Katampua alo. 25Agaiana nguru-nguruna, Iko hangangaa ina rapopeahi-ahiNa hai rasapuakaNa tauna au tuwo ide-ide.
26Apa au mewali i tempona nabi Noho hangkoia, ina mewali wori i alo kahaweaNgku, Iko Ana Manusia. 27I tempona nabi Noho hangkoia, manusia mampomalea, barahe moisa apa au ina morumpahe. Maande-ande hai maenu-enu peahe, motambihe hai rapopotambihe. Iti au rababehi liliu duuna nabi Noho mesua i lalu duanga mahile. Unga peahe naumbala owai mewali opehe mate. 28Nodo wori kamampomaleanda tauna i wanua Sodomo i tempona Looti maida inditi. Maande-ande hai maenu-enu peahe, mobalu-baluhe, mowiahe hai moarohe sou. 29Agaiana i kapaduna Looti hangko i wanua Sodomo, tauna iti ranawongihe api hai watu belerang hangko i langi, hai tehuwehe ope-ope. 30Nodo wori kamampomaleanda tauna i kahaweNgku hule, Iko Ana Manusia, i dunia.
31I alo iti, tauna au mohuda-huda i pengkangkalahea i wongko sou, ineehe mesua i lalu sou mangala anu-anunda. Nodo wori tauna au i bonde, ineehe hampai mesule i boea mangala ba apa-apa. Hangangaa liliuhe melangka! 32Nikatuinao apa au mewali i towawinena Looti!#17:32 Towawinena Looti mampembalilingi apa au napalehi i wanua Sodomo. Ido hai Nahukumi Pue Ala mewali watu bure. Peita: Pew. 19:26. 33Hema au mampeulai peundeana haduduana, bara molambi katuwo maroa. Agaiana hema au mokabaha peundeana hai meula Iriko kehapiri rapapate, iami au molambi katuwo maroa.
34Tou mpuu au Kuuliangaakau: i alo pesuleaNgku, ara rodua au maturu i hambua koi, hadua raala hai hadua rapalehi. 35Rodua towawine tanganda mombau, hadua raala hai hadua rapalehi. 36[Rodua tauna mobago sambela i bonde, hadua raala hai hadua rapalehi.]”
37Karoona Yesu mololita, mekunehe topeguruNa Iria, rauli, “Pue, iumba pewaliana ope-ope iti?”
Nahanaihe Yesu, Nauli, “Iumba ara au mate, indo worihe tadasi kaloa mogulu. Nodo wori, ina tongawa mpuu kahaweNgku hule i dunia.”
Currently Selected:
Lukasi 17: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
