Lukasi 5
5
Yesu mopilei topeguruNa au nguru-nguruna
(Mat. 4:18-22; Mrk. 1:16-20)
1Hambela tempo, tangana Yesu meangka i wiwi Rano Genesaret,#5:1 Rano Genesaret rahanga wori Rano Galilea. bosahe tauna mombeupi-upi mampeinao mohadi Ngkorana Pue Ala. 2I tempo iti, Yesu moita roogu duanga i wiwi rano; ampu duanga mendauluhe hangko i duanganda laohe mobahoi dalanda. 3Laomi Yesu mesawi i duanga au haogu, duangana Simo Peturu, hai Naperapi bona Simo mobohe duangana karao haodi hangko i wiwi rano. Roo indo, mohudami i lalu duanga mopaguru tauna bosa.
4Roomi mepaturo, nauli Yesu i Simo, “Nubohe duangamu i kakaladuana, hai nitende dalami bona molambikau ikane.”
5Nahanai Simo, “Guru, hambengiamongkai modala, agaiana bara huba hambaa ihi dalangki. Agaiana nauri nodo, ina kutende mpuu, lawi Oio au motudungkai.”
6Hangko inditi, ratendemi dalanda, hai ngkaia mpuu ikane au mesua i lalu, alana dalanda mepongka mahepa. 7Mokawemohe ranganda au ara i duanga ntanina bona maihe medurei. Mai mpuumohe, hai roogu duanga iti raihii ikane duuna ina tirimi anti kamantimina.
8-9Tingkarami Simo Peturu hai ope-ope tauna au hihimbela hai ia moita kangkaiana ikane au ara i lalu dalanda. Ido hai molingkudumi Peturu i lindona Yesu, nauli, “Pue, ineena Nuhungkuki lawi ide iko tomadosana.” 10Ara worihe rodua rangana Simo Peturu au mampotingkara. Hanganda iami Yakobu hai Yohane, ananahe Sebedeus au mobago sambelahe hai Simo Peturu.
Nauli Yesu i Simo, “Ineeko langa. Mepongka ide-ide, barapoko modala ikane, agaiana manusiami au nudala.” 11Roo indo, modiimohe duanganda i lorena hai mopalehihe ope-ope anu-anunda, pane meulahe i Yesu.
Yesu mopakaoha hadua tauna au ketangga
(Mat. 8:1-4; Mrk. 1:40-45)
12Tangana Yesu i hambua boea, maimi hadua tauna au ketangga humalele watana. Kamoitana Yesu, molingkudumi motumpa i lindoNa, hai meadede Iria, nauli, “Pue, kuisa kaNubukuna mopakaohana. Ane Nupokana, pakaoha wongkoia!”
13Napetobomi Yesu tauna iti, Nauliangaa, “MauNa. Maohamoko!” Unga pea maoha tauna iti.
14Roo indo, Yesu mokonto tauna iti, Nauli, “Inee nupopololita i hema pea apa au mewali inona. Laomoko hampai nupetudungia watamu i Tadulako Mpenomba bona naita kamaohamumi, hai nuantimi popenombamu moula parenta au teuki i lalu Aturana Musa bona tongawa i ope-ope tauna kamaohamumi.”
15Agaiana nauri nodo lolitana Yesu, bambari iti tehawuka iumba-umba pea, alanda bosa tauna mai i Yesu bona mohadihe lolitaNa hai Napakaohahe hangko i hakinda. 16Agaiana Yesu mengkambeiha lao mekakae i hambua paidaa au boa.
Yesu mopakaoha hadua topalu
(Mat. 9:1-8; Mrk. 2:1-12)
17Hambela tempo, tangana Yesu mepaturo, arahe bahangkia toParisi hai guru-guru agama au mohuda inditi. Ihira hawe hangko i boeanda i tampo Galilea, Yudea, hai hangko i wanua Yerusale. Kuasana Pue Ala ara i Yesu, ido hai Nabuku mopakaoha tomahai. 18I tempo iti, hawemohe bahangkia tauna au mokowa hadua topalu. Mohaokihe rara mesua i lalu sou, lawi mampeinaohe moanti ranganda i Yesu. 19Agaiana barahe peisa mesua, lawi sou iti buke tauna. Ido hai mengkahemohe i tuka moanti ranganda lao i wongko sou. Roo indo, mohongkahe atu sou, pane topalu iti raulu sambela hai alena duuna toa i lindona Yesu au ara i olonda tauna bosa. 20Kanaitana Yesu pepoinalainda, mololitami i topalu iti, Nauli, “Halalu, teampungimi dosamu.”
21Bahangkia guru agama hai toParisi mohadihe lolitana Yesu iti. Nauli lalunda, “Hemari tauna ide pane bai mopahimbela kuasaNa hai Pue Ala? Bara ara hadua au peisa moampungi dosa, batena pea Pue Ala!”
22Naisa Yesu apa au ara i lalunda. Ido hai Nauliangaahe, “Moapari hai nodori pekirimi? 23Umba au mamura rauli, ‘Teampungimi dosamu,’ ba ‘Pearo, hai molumaomoko.’ 24Bona niisa, i dunia ide, Iko, Ana Manusia, makuasaNa moampungi dosa. Ide-ide ina Kupatongawaakau kaarana kuasaNgku moampungi dosa.” Hangko inditi, membalilimi Yesu i topalu iti, Nauliangaa, “Mearomoko, nulolomi alemu, hai mesulemoko! 25Meangka mpuumi topalu iti i lindonda tauna bosa, mololomi alena, hai mesule lao i souna, hai tangana lumao ia motoia liliu Pue Ala.
26Tingkara mpuuhe ope-ope tauna au moita, hai motoiahe Pue Ala. Langa worihe, rauli, Metingkarai mpuu apa au taita inona!”
Yesu mopilei Lewi bona mewali topeguruNa
(Mat. 9:9-13; Mrk. 2:13-17)
27Roo indo, padumi Yesu, hai i tanga rara, Ia moita hadua toperuru asele au mohuda i bambaru pobaiaria asele, hangana Lewi. Nauliangaa Yesu, “Peulamide Iriko.” 28Meangka mpuumi Lewi mopalehi hinangka anu-anuna, pane meula Iria.
29Roo indo, Lewi mamposusai mahile Yesu i souna, hai arahe bosa toperuru asele hai tauna ntanina au rakakio maande sambela hai ihira. 30Inditi ara worihe toParisi hai guru-guru agama au mampeulai paturonda toParisi. Ihira mosasalaihe Yesu i topeguruNa, rauli, “Moapari pane ikamu maande hai maenu hihimbela hai toperuru asele hai tauna ntanina au kadake babehianda?”
31Nahanaihe Yesu, Nauli, “Tauna au bara mahai, bara moparaluu sando. Tomahai pea au moparaluu sando. 32BaraNa mai mokakio tauna au manoto babehianda. KamaiNgku ide, maiNa mokakio tomadosa bona mampenosoihe dosanda.”
Topeguruna Yesu barahe mopuasa i tempona mani Ia ara hihimbela hai ihira
(Mat. 9:14-17; Mrk. 2:18-22)
33I tempo iti, arahe bahangkia tauna au mouliangaa Yesu, “Topeguruna Yohane Toperiu paka mopuasa hai mekakaehe. Nodo wori topegurunda toParisi. Moapari pane topeguruMu barahe mopuasa? Maande hai maenu liliuhe.” 34Nahanaihe Yesu hai ngkora pandiri ide, Nauli, “Tauna i posusa petauna barahe mopuasa i tempona toratauna tobalilo ara mani i olonda. 35Agaiana hambela tempo, toratauna tobalilo ina raala hangko i olonda. I tempo itirai, hangko mopuasahe.”
36Yesu mopahawe wori ngkora pandiri ide, Nauli, “Bara ara hadua tauna motampelei badu hae hai hasepa bana au nahepaki hangko i badu au wou. Lawi ane nababehi nodo, ina mahepa pea bana wou popotampeleina iti. Hai bara wori maroa raita ane hasepa bana au wou ratampeleika i badu au hae.
37Nodo wori, bara ara hadua tauna au mokando anggoro au wou i pambolia#5:37 Hangkoia pambolia anggoro rababehi hangko i koli binata. au hae. Lawi ane rengke, ina mahepa pambolia au hae iti, alana anggoro iti mabubu, hai paidaana wori marugi. 38Mewali anggoro au wou hangangaa rakando wori i pambolia au wou.#5:36-38 Tunggaiana Yesu mopahawe ngkora pandiri ide, node: paturona Yesu iami paturo au wou. Bara hintoto ane paturona Yesu ragalo hai ada agama Yahudi au haemi.
39Bara ara hadua tauna au naunde maenu anggoro au wou ane roo maenu anggoro au hae. Lawi ina nauli, ‘Anggoro au hae iti matama.’ ”
Currently Selected:
Lukasi 5: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
