Lukasi 6
6
Topeguruna Yesu mokanuki pare i Alo Pengkarooangaa
(Mat. 12:1-8; Mrk. 2:23-28)
1Hambela tempo i Alo Pengkarooangaa,#6:1 Alo Pengkarooangaa: Basa Indonesia: hari Sabat. Alo Satu iami Alo Pengkarooangaanda to Yahudi. Yesu hai topeguruNa moliuhe i halimbo bonde. Tanganda moliu i bonde iti, topeguruna Yesu mokanukihe pare, hai ranuku bona raande.
2Karaitana toParisi, liliu rakambaroahe, rauli, “Moapari pane molingkaikau atura agamanta? Mobagokau i Alo Pengkarooangaa!”
3Nahanaihe Yesu, Nauli, “Bara pae nibasa apa au nababehi Datu Daudi hai ranganahe hangkoia i temponda marimi? 4Daudi mesua i lalu sou penombaa, moande roti au rapopenomba i Pue Ala, hai nakira-kiraa worihe rangana. Moula ada agamanta, Tadulako Mpenomba pea au peisa moande roti iti. Agaiana nauri nodo, babehiana Daudi iti bara rasalai.”
5Napaliliu Yesu lolitaNa, Nauli, “Nodo wori Ana Manusia, makuasa mopakanoto apa au peisa rababehi i Alo Pengkarooangaa.”
Yesu mopakaoha hadua tauna au mate taiena hambali
(Mat. 12:9-14; Mrk. 3:1-6)
6Hambela tempo i Alo Pengkarooangaa wori, laomi Yesu i sou penombaanda to Yahudi hai mepaturo inditi. I sou penombaa iti, ara hadua tauna au mate taie koanana. 7Ara worihe bahangkia toParisi hai guru agama au mohaoki kanawoana Yesu, ba ina mobago i Alo Pengkarooangaa. Ido hai rakamata liliu apa au ina nababehi Yesu, lawi rapeinao mosalai Yesu. 8Agaiana naisari Yesu tunggaiana lalunda. Ido hai mouliangaa tauna au mate taiena hambali iti, “Maiko meangka inde i lindo!” Lao mpuumi meangka inditi. 9Roo indo, Nauliangaahe Yesu, “Moula atura agamanta, apa au peisa tababehi i Alo Pengkarooangaa: mobabehike au maroa ba au kadake? Motulungike ranganta ba mopapateke ranganta?” 10Membalilimi Yesu, Natotokihe ope-ope hai mouliangaa tauna au mate taiena hambali iti, “Ona taiemu!” Naona mpuumi taiena, liliu maoha.
11Hangko indo, rumpu ntepuumohe guru agama hai toParisi. Ido hai mogombomohe mohaoki akala, ba apa au ina rababehi i Yesu.
Yesu mopilei topeguruNa au hampulo hai rodua
(Mat. 10:1-4; Mrk. 3:13-19)
12Hambela tempo, Yesu laomi i tongku-tongkuna, hai mekakae hambengia i Pue Ala. 13Mesupami alo, Nakakiomohe tauna au meula Iria, hai Napileihe hampulo hai rodua hangko i olonda. Ihira itimi au Napakanoto Yesu bona mewali suroNa au mobambari Ngkora Marasa i tauna bosa. 14-16Idemi hanganda:
Simo au Nahanga Peturu,
Andaria adina Simo,
Yakobu hai Yohane,
Pilipu hai Bartolomeus,
Matiu hai Tomas,
Yakobu anana Alfeus,
Simo to Selot,#6:14-16 Simo iami hadua anggota partai nasionalis (au rahanga “to Selot”) au moewa poparentana to Roma.
Yudasi anana Yakobu,
hai Yudasi Iskariot au mampobalu Yesu.
Yesu mopakaoha tauna au mahai
(Mat. 4:23-25)
17Roo indo, mempanaulumi Yesu hihimbela hai topeguruNa. Mengkaroomohe i lempena, lawi inditi bosahe tauna au meula Iria mepegia. Inditi ara worihe bosa tauna au hangko i humalele tamponda to Yahudi, hangko i wanua Yerusale hai hangko i wanua Tirus hai Sidon au i wiwi ntahi. 18Hawehe inditi, lawi mampeinaohe mohadi lolitana Yesu hai merapihe bona Napakaohahe. Au napesuangihe seta Napakaoha worihe. 19Tauna bosa iti mopari-parihe motobo Yesu, lawi ara kuasa au mesuwu hangko i wataNa au mopakaohahe ope-ope tauna.
Morasihe tauna au mampeulai peundeana Pue Ala
(Mat. 5:1-12)
20Yesu mototoki topeulaNa hai Nauliangaahe:
“Morasikau au meahi-ahi tuwomi,
lawi ikamumi au mewali taunana Pue Ala i lalu poparentaNa.
21Morasikau au marimi,
lawi ikamumi au ina rapamabuhu.
Morasikau au moteria,
lawi ikamu au ina matana-tana.
22Morasikau au rakahihi, au barakau rapohintuwua, rakakabosai hai rasalai tauna anti peulami Iriko Ana Manusia. 23Iti au rababehi worimi toiorunda i nabi-nabina Pue Ala hangkoia. Mewali, ane iti au rababehiakau, mesende-sendekau anti kamatanana lalumi. Hangangaa matanakau lawi mahile hurungina au ina nihumba i lalu suruga.
24Agaiana marugikau, ikamu au pebuku ide-ide,
lawi nihumbami kamatanami,
hai barapokau ina matana.
25Marugikau au mabuhu ide-ide,
lawi ina marimikau.
Marugikau au matana ide-ide,
lawi ina masusa lalumi hai ina moteriakau.
26Marugikau ane ratoiakau ope-ope tauna,
lawi nabi-nabi au mepakanawo ratoia worihe toiorunda hangkoia.”
Nipokaahi iwalimi
(Mat. 5:38-48)
27“Agaiana ikamu au mampehadingi lolitaNgku, idemi hawaNgku: nipokaahi iwalimi, hai nibabehi au maroa i tauna au mokahihikau. 28Niwatihe au motunda-tundakau, nipekakaeahe tauna au kadake irikamu. 29Ane pandirina ara tauna au mohapa kalimpimi hambali, inee nihurungi. Niwei wori kalimpimi au hambali. Ane ara au moala komomi, niwei wori badumi. 30Ane ara au mamperapi ba apa pea, niwei woia. Hai ane ara au moala ba apa-apa hangko irikamu, ineemi niperapi sule. 31I paka-pakana, apa au niunde rababehi rangami irikamu, iti wori au hangangaa nibabehi i rangami.
32Ane maahi peakau i tauna au mampokaahi worikau, inee nipehangu ina nawatikau Pue Ala. Mogalori tauna au kadake, maahihe i tauna au mampokaahihe. 33Ane maroa pea babehiami i tauna au mobabehi roa irikamu, inee nipehangu ina nawatikau Pue Ala. Mogalori tauna au kadake, nodo wori rababehi. 34Ane nikira ba apa rapebolo i tauna au nabuku pea mampopesule, inee nipehangu ina nawatikau Pue Ala. Mogalori tauna au kadake, mowei worihe doi i hangka ranganda au kadake, lawi raharunga ina rapopesule pea.
35Inee nodo babehiami! Hangangaa nipokaahi iwalimi, hai hangangaa nibabehi au maroa irihira. Ane ara tauna au mampeinao mebolo irikamu, niwei woia hai inee niharunga pesulena. Ane nibabehi nodo, ngkaia pewati ina naweikau Pue Ala, hai ina raimbakau anaNa, lawi nodomi kamaroana laluna Pue Ala i tauna au kadake hai i tauna au bara raisa manguli ngkaia kamaroana Iria. 36Kamaahimi hangangaa nodo kamaahina Umami i suruga.”
Ineekau mosalai hangka rangami
(Mat. 7:1-5)
37“Ineekau mosalai hangka rangami dati worikau nasalai Pue Ala. Inee niuli tauna ntanina au masala hangangaa rahuku, hai ikamu bara worikau ina nahuku Pue Ala. Niampungi kamasalana rangami, bona naampungi worikau Pue Ala. 38Maroakau i rangami, mewali nilambi wori au maroa. Pehoka au maroa, au melabi hai au rapii-pii hawe melumbea, iti ina nilambi. Lawi hoka au nipake i hangka rangami iti wori au rahokaakau.”
39Napaliliu Yesu lolitaNa hai ngkora pandiri ide, Nauli, “Ane ara hadua tobilo au monini hangka tobilona, batena ina manawohe rorodua i lalu kalolu. 40Nodo wori, bara ara toposikola au meliu karabilana hangko i guruna. Ane hopomi posikolana, hangko himbelari hai guruna.”
41Roo indo, Yesu mopahawe ngkora pandiri ide, Nauli, “Moapa hai nuparesa pupu i matana rangamu, moleri rangka kau au ara i matamu bara nuita? 42Noumba pane peisa nuuliangaa rangamu: ‘Halalu, mai kuingihi pupu matamu,’ moleri rangka kau i matamu bara nuita? Ineeko mengkamaroa! Hangangaa nuingihi hampai rangka au ara i matamu, hangko manotori petotokimu moingihi pupu i matana rangamu.”
Kau hai wuana
(Mat. 12:33-35)
43“Kau au maroa, maroa wori wuana, hai kau au kadake, kadake wori wuana. 44Niisa kamaroana hinangkana kau ane niitami powuana. Anggoro bara rapupu hangko i dui sumbali. Kau rodo bara mowua gambu. 45Nodo wori i manusia. Tauna au maroa ina mohowara apa au maroa, lawi lalunda buke roa. Tauna au kadake ina mohowara apa au kadake, lawi lalunda buke dake. Lawi apa au ara i lalunta, iti wori au mesuwu hangko i humenta.”
Sou au raaro i wongko watu hai sou au bara ara watuna
(Mat. 7:24-27)
46“Moapa hai nikakioNa Pue, agaiana bara nipeulai hawaNgku? 47-48Idemi ngkora pandiriKu: hema au mampehadingi hai mampeulai lolitaNgku peisa rapandiri nodo hadua tauna au mapande moaro sou. Ia mokae tampo napakaladu, nawoli hampai watu au maroho, hangko moarori souna i wongko watu iti. Toa uda kebuu, meumbalami owai morumpa souna iti, agaiana bara madungka, lawi raaro i wongko watu au maroho. 49Agaiana tauna au mohadi lolitaNgku hai bara napeulai, ia nodo hadua tauna au moaro souna i wongko tampo pea, bara mopake watu. Ane meumbala owai morumpa souna, ina liliu madungka duuna magero ope-ope.”
Currently Selected:
Lukasi 6: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
