Markus 10
10
Yesu mampololita ada mpotambi
(Mat. 19:1-9)
1Meangkami Yesu hangko i boea Kapernaum lao i tampo Yudea hai i tampo au ara ntanda i orupena owai Yarade. Bosahe tauna hawe motoleliki, hai Ia mopaturohe nodo biasana. 2Arahe bahangkia toParisi au mai mohaoki kamanawona Yesu, mekunehe, rauli, “Moula atura agamanta, ba peisa mpuu tobalilo mogaa hai towawinena?”
3Nahanai Yesu, nauli, “Parenta apa au naweikau nabi Musa?”
4Rahanai toParisi, “Musa mopaliu tobalilo mampogaaki towawinena, asala nababehi hampai sura mpogaa.”
5Nauli Yesu, “Anti kamatuana lalumi, Musa mouki parenta iti. 6Agaiana hangko i pewalina dunia, i tempona Pue Ala mampopewali manusia, ‘Napopewalihe tobalilo hai towawine.’#Pew. 1:27 7‘Ido hai tobalilo hangangaa mopalehi umana hai inana, hai tuwo hihimbela hai towawinena, 8bona au rodua iti mewalihe hawata-wata.’#Pew. 2:24 Mewali, tohamboko iti barapohe rodua, agaiana hawata-watamohe. 9Ido hai Kuuliangaakau, apa au napahintuwumi Pue Ala, inee mpuu hawe nagaa manusia.”
10Roo indo, Yesu hai topeguruNa mesua i lalu sou. Tanganda i lalu sou, mekune hulehe topeguruNa Iria kana i ada mpogaa.
11Nauliangaahe Yesu, “Hema au mampogaaki towawinena hai mampotambia towawine ntanina, lempona mebualosi. 12Nodo wori towawine au mampogaaki tobalilona hai mampotambia tobalilo ntanina, ia mebualosi wori.”
Yesu mowati anangkoi
(Mat. 19:13-15; Luk. 18:15-17)
13Hambela tempo, arahe tauna au moanti ananda i Yesu bona Natobo hai Nawatihe. Agaiana rakarumpuihe topeguruNa Yesu. 14Kanaitana Yesu apa au rababehi, Ia mokarumpuihe topeguruNa, Nauli, “Pogiangaahe anangkoi iti mai Iriko. Ineehe nikonto, lawi tauna au nodohe anangkoi ide ina mewali taunana Pue Ala i lalu poparentaNa. 15Tou lolitaNgku ide: ane barakau mengkoru i Pue Ala nodo hadua anangkoi, barakau ina mewali taunaNa i lalu poparentaNa.” 16Karoona mololita nodo, Nakalapuimohe anangkoi iti, Napaga tanoananda hai Nawatihe.
Topebuku mapari mewali taunana Pue Ala
(Mat. 19:16-26; Luk. 18:18-27)
17Ina meangka mbulimi Yesu mopaliliu polumaoNa, unga pea ara hadua tauna au melangka mai Iria, liliu molingkudu i lindoNa, hai mekune, nauli, “Guru au maroa, apa au hangangaa kubabehi bona molambina katuwo maroa au bara mokahopoa?”
18Nahanai Yesu, nauli, “Moapari hai nuuli tauna maroaNa? Bara ara hadua tauna au maroa, batena pea Pue Ala. 19Nuisato hawa au teuki i lalu Aturana Musa: ‘Inee mepapate, inee mebualosi, inee manangka, inee mohowara dongko, inee mebagiu, hai bila umamu hai inamu.’ ”
20Nauli tauna iti, “Guru, ope-ope hawa iti, aminami kupeulai hangko koi-koi peamona.”
21Yesu mototoki tauna iti lawi maahi laluNa, pane Nauliangaa, “Ara mani hampaka au hangangaa nubabehi. Laomoko hampai mampobalu hinangka anu-anumu, hai holona nuweihe tauna au meahi-ahi tuwonda. Ane nubabehi nodo, ina mahile hurungina au nuhumba i lalu suruga. Roo indo, maimoko meula Iriko.” 22I pohadina lolitana Yesu, masusami laluna hai padumi, lawi ngkaia anu-anuna.
23Yesu mototoki topeguruNa au meangkahe mantoleli, hai Nauliangaahe, “Mapari mpuu tauna au pebuku mesua i lalu poparentana Pue Ala.” 24Rapotingkara topeguruNa mohadi lolitaNa iti, ido hai nauliangaa mbulihe Yesu, “AnaNgku, mapari mpuu mesua i lalu poparentana Pue Ala. 25Hagolo mani hambaa onta mesua i kalolu gigiu, pane topebuku mesua i lalu poparentana Pue Ala.”
26Karahadina topeguruna Yesu lolitaNa iti, rapotingkara mpuu, rauli, “Oo, ane mogalo topebuku mapari molambi katuwo maroa au bara mokahopoa, apa mani tauna ntanina?”#10:26 Lawi rapekiri kapebuku iti iami tanda pewatina Pue Ala, mewali ane tauna au nawati Pue Ala mapari pesuana i suruga, apa mani ane tauna au bara Nawati.
27Natotokimohe Yesu hai Nauliangaahe, “Ane manusia bara nabuku, agaiana i Pue Ala bara nodo, lawi ope-ope peisa haha Nababehi.”
28Hangko indo, nauli Peturu, “Noumbami hai ide ikami? Mopalehimongkai hinangkana bona kiulaKo!”
29Nauli Yesu, “Bona niisa: hema au mopalehi halaluna, inana ba umana, anana ba souna ba bondena anti peulana Iriko hai anti Ngkora Marasa, 30batena molambi hurungina au mahile. I dunia ide ina molambi hangatu belana kangkaiana souna, halaluna, inana, anana, bondena, nauri molambi pepopeahi-ahi. Hai i alo pebotusi batena ina molambi katuwo maroa au bara mokahopoa. 31Agaiana bosa tauna au tepaioruami tuwonda ide-ide ina mewali tepaibokoa i alo au ina mai. Hai bosa wori tauna au tepaibokoa tuwonda ide-ide ina mewali tepaiorua i alo au ina mai.”
Kataluna belana Yesu mampololita kana i kapateNa
(Mat. 20:17-19; Luk. 18:31-34)
32Yesu hai topeguruNa mopaliliuhe polumaonda lao i Yerusale. Tanganda molumao, napehindorungihe Yesu. Tingkarahe topeguruNa, hai tauna bosa au meula Iria langahe. Mewali Yesu mokakio mbulihe topeguruNa au hampulo hai rodua Napatanihe, hai Nauliangaahe apa au hangangaa mewali i wataNa. 33Nauli, “Nipehadingi maroa! Ide-ide monontohimoke Yerusale. Inditimi, Iko Ana Manusia ina rahuhuNa i kapala-kapala tadulako mpenomba hai guru-guru agama, hai ina rabotusi bona rahuku mateNa. Roo indo, ina rahuhuNa i tauna au barahe to Yahudi. 34Ina rakakabosaiNa, ratinuduhiNa, rapapahaiNa, hai rapapateNa. Agaiana i alo katalu, ina tuwo huleNa.”
Tauna au mengkaiwoi, mahile tuwonda i peitana Pue Ala
(Mat. 20:20-28)
35Roo indo, Yakobu hai Yohane, anana Sebedeus, mohungkuki Yesu, rauliangaa, “Guru, ara hampaka au kipeinao kiperapi hangko Irio.”
36Nauli Yesu, “Apa au niperapi Iriko?”
37Rahanai, “Ane mewaliKo Datu au meawa, nupaliungkai mohuda hai moparenta hihimbela hai Oio, hadua ntanda i koanaMu, hadua ntanda i kabeoMu.”
38Nauliangaahe Yesu, “Niisa pae apa au niperapi iti? Nibuku pae mohalea kapari au hangangaa Kuhalea? Ba nibuku motodiha au ina Kutodiha?”
39Mehanahe Yakobu hai Yohane, rauli, “Kibuku!”
Nauli Yesu, “Tou, hangangaa nihalea mpuu kapari nodo au Kuhalea, hai ina nitodiha apa au Kutodiha. 40Agaiana bara Iko au mopakanoto hema au ina mohuda ntanda i koanaNgku hai ntanda i kabeoNgku. Batena pea UmaNgku au mopakanoto.”
41Karahadina topeguruNa au hampulo perapinda Yakobu hai Yohane iti, rumpumohe. 42Ido hai Yesu mokakio ope-ope topeguruNa, Nauliangaahe, “Niisato kamakancana poparentanda tauna au bara moisa Pue Ala moparentai tauna bosa. Tauna au mahile lantinda mopari-pari tauna bosa mampeulai hawanda. 43Agaiana ikamu, inee nodo babehiami! Hema au mampeinao mapangka lantina hangangaa mewali hampai nodo hadua topekadipura. 44Hai hema au mampeinao mahile hangana hangangaa mewali hampai nodo hadua hawi i hangka rangana. 45Mogalori Iko Ana Manusia, tunggaiaKu mai i dunia, baraNa mai bona mewali topohawa. KamaiNgku ide bona mewaliNa hawi, hai mokiraNa wataNgku rapapate mohuru salanda bosa tauna.”
Yesu mopakaoha Bartimeus
(Mat. 20:29-34; Luk. 18:35-43)
46Yesu hai topeguruNa hawehe i boea Yeriko. Hai i kapadunda hangko i boea iti, bosa tauna meula irihira. I wiwi rara, mohudami hadua tauna au bilo merapi-rapi. Hangana Bartimeus (lempona: Anana Timeus). 47Kanahadina Bartimeus Yesu to Nasare au moliu, meraroami, nauli, “Yesu pemuleana Datu Daudi! Pokaahi wongkoia!”
48Agaiana Rakarumpuiri tauna bosa, rauliangaa, “Mandiiko!”
Agaiana tobilo iti monganga-nganga pea masisimbuku, “Pemuleana Datu Daudi, pokaahi wongkoia!”
49Mengkaroomi Yesu, Nauli, “Nikakio mai!”
Rakakio mpuumi tobilo iti, rauliangaa, “Patinda lalumu! Meangkamoko, lawi Nakakiomoko!”
50Meangkami tobilo iti mowehika komona i rara, hai hoholiga lao i Yesu. 51Napekune Yesu iria, “Apa au nuunde bona Kubabehi?”
Nahanai tobilo iti, “Guru, kupeinao wongkoia meita!”
52Nauli Yesu, “Laomoko. Lawi mepoinalaiko Iriko, Kupakaohamoko!” Unga pea meita, hai liliu meula i Yesu.
Currently Selected:
Markus 10: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
