Markus 11
11
Yesu rapomahile tauna bosa i Yerusale
(Mat. 21:1-9; Luk. 19:28-38; Yoh. 12:12-15)
1Hungkumohe Yesu hai topeguruNa i Yerusale, hawehe i boea Betpage hai Betania i Bulu Saitun. Inditi, Yesu motudu rodua topeguruNa moioru, 2Nauliangaahe, “Laomokau i boea au talindo. Ane hawekau inditi, ina niita hambaa ana kalide au rataka, au bara mani hambela rapodara. Nikakahi hai niantiaNa mai. 3Ane ara tauna mekune irikamu moapa hai nikakahi, niuliangaahe node, ‘Naparaluu Pue, Napebolo pea hai ina Napopesule deade.’ ”
4Kalaonda topeguruNa au rodua iti, rahumba mpuumi hambaa ana kalide au tetaka i wiwi rara hungku i babaka. Tanganda mokakahi kalide iti, 5tauna au meangkahe inditi mekune irihira, rauli, “Moapari hai nikakahi kalide iti?”
6Rahanai nodo au nauliangaahe Yesu inona. Karahadina tauna iti lolitanda, rapogiangaamohe moanti kalide iti. 7Kalide iti raanti lao i Yesu, hai ralampii badunda. Roo ralampii, mesawimi Yesu. 8-9Laomohe monontohi Yerusale. Bosa tauna meula Iria, arahe au moioru, ara worihe au i boko. Bosahe au mowoke hampinda i tanga rara au napoliungi Yesu, hai hantanga worihe lao mangala tawe harao i bonde hai rataleha i tanga rara, tanda pampomahilenda Yesu. Tauna au bosa iti, monganga-nganga liliuhe, rauli,
“Hosana!#11:8-9 Hosana ane i basa Ibarani Hosana lempona Kuperapi bona Nuhoremangkai. Hai lolita ide wori biasa rahowara ane tanganda tauna matana-tana.
Rawatimi Tauna au mai i lalu hangana Pue!
10Rawatimi poparentaNa, Ia ina moparenta nodo Datu Daudi, toiorunta hangkoia.
Horemangkai, O Pue Ala au indora i suruga!”#Pta. 118:25-26
11Kahawena Yesu i wanua Yerusale, liliu mesua i lalu Souna Pue Ala. Inditi Ia moparesa mantoleli Sou iti. Roo indo, lawi ina kaindimi, mesule mbulimi hai topeguruNa, laohe mohambengi i boea Betania.
Yesu mogane kau ara
(Mat. 21:18-19)
12Kahalona, padu mbulimohe hangko i Betania lao i Yerusale. I tanga rara, marimimi Yesu. 13Yesu moita ngkarao hampoa kau ara au motawemi. Laomi Napeita ba ara wuana. Agaiana bara huba haogu wuana, lawi bara mani tempona mowua. 14Ido hai Naganemi kau iti, Nauliangaa, “Mepongka alo ide, barapi ara hadua tauna au ina moande wuamu.” LolitaNa iti rahadi topeguruNa.
Yesu mowurahe topobalu-balu i Souna Pue Ala
(Mat. 21:12-13; Luk. 19:45-48; Yoh. 2:13-16)
15Hawe mbulimohe i Yerusale, laomi Yesu i tabangaa Souna Pue Ala. Inditi, Ia mowurahe topobalu-balu. Mejanda topointolohi doi nadungka, nodo wori pohudaanda topobalu-balu tadasi manggebodo. 16Roo indo, barapi mopaliu tauna moanti anu-anunda melempo i tabangaa Souna Pue Ala. 17Roo indo, Napaturohe, Nauli, “Bara pae niisa apa au teuki i lalu Sura Malelaha? Pue Ala manguli node:
‘SouNgku ina mewali sou pekakaea au rapake tauna hangko i humalele dunia.’
‘Agaiana ikamu, nipopewaliri sou pogulua topebagiu!’ ”#Yes. 56:7; Yer. 7:11
18Karahadina kapala-kapala tadulako mpenomba hai guru agama apa au nababehi Yesu iti, mohaokimohe rara mopapate Yesu anti kalanganda Iria, lawi raisa ope-ope tauna matanahe mampehadingi paturoNa. 19Ina kaindimi, Yesu hai topeguruNa padu mbulimohe hangko i Yerusale.
Paturona Pue Yesu kana i pekakae
(Mat. 21:20-22)
20Kahalona madondo-dondo, lao mbulimohe Yesu hai topeguruna i Yerusale. I tanga rara, moitahe kau ara au nagane Yesu. Matemi, bangi hawe i uakana. 21Nakatuinaomi Peturu lolitana Yesu. Ido hai mouliangaa Yesu, “Guru! Peita pae kau ara au Nugane iti, bangimi!”
22Nahanai Yesu, Nauli, “Mepoinalaimokau i Pue Ala! 23Tou mpuu au Kuuliangaakau: ane rapana niuliangaa bulu iti: ‘Teangkamoko, manawoko i lalu tahi!’ batena ina mewali asala bara bata-bata lalumi hai nipoinalai mpuu pewalina apa au niuli iti. 24Mewali, nipehadingi lolitaNgku ide: ane mekakaekau mamperapi ba apa-apa, hangangaa nipoinalai kaina Naweimi Pue Ala apa au niperapi, hai batena nilambi.
25Ane mekakaekau hai ara mani rangami au mopakoi inaomi, niampungi hampai bona Umami au ara i suruga moampungi wori salami. 26[Agaiana ane barakau moampungi rangami, salami bara wori ina Naampungi Umami au i suruga.]”
Tadulako agama Yahudi mekune i Yesu kahangko iumbana kuasaNa
(Mat. 21:23-27; Luk. 20:1-8)
27Hawe mbulimohe Yesu hai topeguruNa i Yerusale. I temponda molulumao i tabangaa Souna Pue Ala, hawemohe kapala tadulako mpenomba, guru agama hai totosaenda to Yahudi au ntanina. 28Mekunehe i Yesu, rauli, “Nuuliangaangkai, hangko iumba kuasaMu mobabehi ope-ope iti i Souna Pue Ala. Hema au moweiKo kuasa iti?”
29Nahanai Yesu, “Ara wori hampaka pampekuneNgku irikamu. Ane nihanai pekuneNgku, hangko kuuliri kahemana au moweiNa kuasa mobabehi ope-ope iti. 30Hangko iumba kuasana Yohane Toperiu moriu tauna? Hangko i Pue Ala, ba hangko i manusia?”
31Mololitamohe tadulakonda to Yahudi iti hadua hai hadua, rauli, “Noumbami katahanaina? Ane tauli hangko i Pue Ala kuasana, ina Nauliangaake: ‘Ane nodo, moapari hai barakau mepoinalai i Yohane?’ 32Agaiana mapari wori ane tauli hangko i manusia pea kuasana.” Tadulakonda to Yahudi iti langahe mopakoi Yohane Toperiu datihe raewa tauna bosa, lawi ope-ope tauna manguli Yohane iti hadua nabi. 33Mewali rahanai, rauli, “Bara kiisa.”
Ido hai Nauliangaahe Yesu, “Ane nodo, bara worikau ina Kuuliangaa kahangko iumbana kuasaNgku mobabehi iti.”
Currently Selected:
Markus 11: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
