Markus 12
12
Ngkora pandiri kana i topobonde anggoro
(Mat. 21:33-46; Luk. 20:9-19)
1Roo indo, Yesu mopahawe hampaka ngkora pandiri i tadulakonda to Yahudi, Nauli, “Ara hadua tauna au motuda anggoro i bondena. Tauna iti mokadipura bondena hai nawala mantoleli. Mokaemi kalolu mobabehi popiengaa anggoro, hai naaro worimi bambaru pokampaia. Karoona ope-ope iti napobago, bonde iti naweihe topobagona bona rakadipura hai rakiraia wori wuana. Roo indo laomi modaga. 2Hawemi tempo popupu wua anggoro, natudumi hadua hawina lao merapi kirana i topokadipura bondena. 3Agaiana topokadipura bonde iti mohakarihe hawi au ratudu iti, rapapahai hai ratudu mesule loa-loa. 4Roo indo, ampu bonde iti motudu mbuli hadua hawina. Hawe i bonde, hawi iti rapapahai wori duuna bela waana, rawura hai ratunda-tunda. 5Hangko indo, natudu mbulimi hadua hawina. Hawe inditi, hawi iti rapapateri. Hai batena nodo haha karababehina i ope-ope hawi au natudu ampu bonde iti: arahe au rawombe-wombe, arahe au rapapate.
6Barapi ara au ntanina au peisa natudu ampu bonde iti, batena rai anana au haduduana au napokakaia. Kahopoana anana itimi au natudu lao i topokampai bondena. Nauli laluna ampu bonde iti, ‘Anangku iti batena ina raadai.’
7Agaiana, i karaitana topokadipura bonde anana ampu bonde iti, mogombomohe, rauli, ‘Oloumi mai anana, iami au ina mewali ampu bonde ide. Agina tapapate bona taala bondena!’ 8Mewali, rahaka mpuumi anana iti, rapapate hai ratende i raoa bonde.”
9Roo indo, mekunemi Yesu, Nauli, “Mewali, apa au ina nababehi ampu bonde iti? Batena ina mai mopapate topokadipura bondena, hai bondena ina naweihe tauna ntanina. 10Bara mani pae nibasa lolita i lalu Sura Malelaha au manguli node:
‘Watu au ratende topoaro sou,
watu iti au mewali pohudaa sou.
11Iti mewali moula peundeana Pue,
hai maroa ntepuu apa au Nababehi iti!’ ”#Pta. 118:22-23
12Karahadina tadulakonda to Yahudi lolitana Yesu, rapeinaomi rahaka, lawi raisa kaihirana au Natunggai hai ngkora pandiri iti. Agaiana barahe bai, lawi mampokalangahe tauna bosa. Mewali, padu pearaihe.
Tadulako agama Yahudi mekune i Yesu ba hintoto mobaiari asele i Kaisar
(Mat. 22:15-22; Luk. 20:20-26)
13Hangko inditi, tadulakonda to Yahudi motudumohe bahangkia toParisi hai taunana Datu Herode lao i Yesu.#12:13 Taunana Datu Herode mampokanahe pobaiari asele i Kaisar, agaiana bara rapokana toParisi. Tunggaianda, rapeinao mopakanawo Yesu hai pekunenda. 14Kahawenda i Yesu, rauliangaa, “Guru, kiisa Oio tauna manotoKo. MepaturoKo i katou-touana moula peundeana Pue Ala. Barako langa i hema pea, lawi baraKo mampopontani tauna. Ido hai mekunengkai Irio: moula atura agamanta, ba hintoto ane mobaiarike asele i Kaisar, ba bara?”
15Mole naisari Yesu tunggaiana lalunda. Ido hai Nauliangaahe, “Moapa hai ina nipakanawoNa? NipopaitaaNa mai doi au biasa nipopobaiari asele bona Kuita.” 16Hangko inditi, rahuhua hampeka doi pera. Nadokomi Yesu hai Napekune, “Lenggena hema hai hangana hema au ara i doi ide?”
Rahanai, “Lengge hai hangana Kaisar.”
17Nauli Yesu, “Ane nodo, wei Kaisar apa au hintoto rawei Kaisar, hai wei wori Pue Ala apa au hintoto rawei Pue Ala.” Tingkara mpuuhe mohadi pehanaNa.
Tosaduki mekune i Yesu kana i katuwo hulenda tomate
(Mat. 22:23-33; Luk. 20:27-40)
18Roo indo, arahe bahangkia toSaduki au hawe i Yesu. (ToSaduki iti iamohe tadulako agama Yahudi au barahe mampoinalai katuwo hulenda tomate.) 19Kahawenda toSaduki iti, mohaokihe kanawoana Yesu, hai rauliangaa, “Guru, nabi Musa mouki i lalu sura atura agamanta node: ane hadua tobalilo au motambimi mate agaiana bara mani ara anana, halaluna hangangaa mampotambia bembana bona tauna iti ara pea pemuleana. 20Mewali, arahe pitu topohalalu, tobalilo hahahe. Au towutu motambimi, agaiana bara mani woia ara ananda, matemi. 21Adina hangangaa mampotambia bembana. Bara mani worihe moana, matemi. Nodo wori au mewali i kataluna. 22Nodomi au mewali duuna hawe i kapituna. Matemohe ope-ope agaiana bara mani ara ananda. Kahopoana, mate worimi towawine iti. 23Mewali, i alo pearonda tomate, ane tou-tou mpuu tomate tuwo hulehe, towawine iti hemami ampuna? Lawi pitumohe au mampotambia.”
24Nahanai Yesu, “Sala mpuu iti pekirimi, lawi bara niisa ihi Sura Malelaha, bara wori niisa kuasana Pue Ala. 25Lawi i pearonda hule tomate, katuwonda nodomi katuwo malaeka i lalu suruga, barapohe motambi ba rapopotambi. 26Kana i pearonda tomate, bara mani pae hambela nibasa lolita au ara i lalu Sura Malelaha au mopakanoto katuwonda hule tomate? I lalu sura Aturana Musa, tabasa tuntukana au mopahaweake noumba Pue Ala mongkora i nabi Musa hangko i rore api i lalu lopo. I tempo iti, Burahima, Isaki hai Yako mahaemohe mate. Agaiana nauri nodo, Pue Ala mouliangaa Musa node: ‘Ikomi Pue Ala au rapenombai Burahima, Isaki, hai Yako.’ 27Mewali, hangko i lolitana Pue Ala iti, taisa mpuumi Burahima, Isaki hai Yako, tuwo hulemohe. Lawi au menomba i Pue Ala, barahe tomate, agaiana tauna au tuwo pea. Sala mpuu pekirimi.”
Hadua guru agama mekune i Yesu parenta umba au meliu kamahilena
(Mat. 22:34-40; Luk. 10:25-28)
28I tempo iti, hadua guru agama to Yahudi hawe i Yesu. Guru agama iti mohadimi pombehanainda toSaduki hai Yesu inona, hai nauli laluna, “Maroa mpuu pehanana Yesu!” Ido hai mekune worimi i Yesu, nauli, “Parenta umba au meliu kamahilena hangko i ope-ope parenta?”
29Nauli Yesu, “Idemi parenta au meliu kamahilena:
‘Nipehadingi to Isaraeli!
Amputa Pue Ala hadua pea.
30Nipokaahi Pue Ala, Ampumi,
i sukana kabulana lalumi,
i sukana pekirimi,
i sukana kapandemi,
hai i sukana rohomi.’#PM 6:4-5
Itimi parenta au kaisa. 31Hai parenta au karompakana, node: ‘Nipokaahi hangka rangami nodo pampokaahimi watami haduduami.’#AMp. 19:18 Bara ara parenta ntanina au meliu kamahilena hangko i au rompaka iti.”
32Nauli guru agama iti i Yesu, “Tou, Guru! Lawi kana pehanaMu. ‘Pue Ala hadua pea, bara ara au ntanina.’#PM 4:35 33Hai hangangaa tapokaahi Pue Ala hangko i kabulana lalunta, hangko i sukana kapandeta, hai hangko i sukana rohonta. Hai hangangaa tapokaahi hangka ranganta nodo watanta haduduanta. Iti au meliu kamaroana hangko i ope-ope binata hai anu-anu ntanina au tapopenomba i Pue Ala.”
34Kanahadina Yesu kamanotona pehanana tauna iti, Nauliangaa, “Hungkumoko mewali taunana Pue Ala!” Hangko indo, barapi ara hadua au bai mekune-kune i Yesu.
Yesu mekune i toParisi kahemana Datu Topehompo
(Mat. 22:41-46; Luk. 20:41-44)
35I tempona Yesu mepaguru i tabangaa Souna Pue Ala, Nauli, “Moapa hai rauli guru agama Datu Topehompo iami pemuleana Datu Daudi? 36Mole Daudi haduduana mopakanoto Datu Topehompo iami Pue au napenombai. Anti peninina Inao Malelaha Daudi mampololita kana i Datu Topehompo node:
Pue mongkora i Ampuku au kupenombai, Nauli:
‘MohudamoKo ntanda i koanaNgku
duuna Kupopengkoruhe
ope-ope iwaliMu Irio.’#Pta. 110:1
37Mewali, ane Daudi haduduana manguli Datu Topehompo iami Pue au napenombai, noumba hai rauliri pemuleana?” Tempo iti bosa mpuu tauna au moteruhu i tabangaa Souna Pue Ala hai matanahe mohadi paturoNa.
Paturona Yesu kana i tadulako agama Yahudi
(Mat. 23:5-7; Luk. 20:45-47)
38I tempona Yesu mopaguru tauna bosa, Nauliangaahe, “Maroa-roakau, ineekau mampeulai babehianda guru agama. Raunde molumao mopake badu au mandoe hai mampeinaohe rabila tauna bosa i pobalu-balua. 39Raunde mohuda i pohudaa au raadai i sou penombaa hai i posusaa. 40Moleri mopakanawotohe towawine au bemba hai rarampaki sounda. Mekakaehe mahae-hae mole motabungihirihe babehianda au kadake. Ina mantimi mpuu karahukunda.”
Popenombana hadua towawine au bemba hai meahi-ahi
(Luk. 21:1-4)
41Yesu mohuda hungku i peti pambolia doi popenomba, hai mokamata tauna au mopusa doi popenombanda i lalu. Bosa tauna au pebuku mopusa doi au ngkaia. 42I tempo iti, hawe worimi hadua towawine tobemba au meahi-ahi tuwona au mopusa doi popenombana. Au napopesua iti, rompeka doi tambaga au haodi pea imbana. 43Yesu mokakio topeguruNa, Nauliangaahe, “Tou mpuu au Kuuliangaakau: tobemba au meahi-ahi tuwona iti, popenombana melumbu hangko i ope-ope tauna ntanina au mopusa popenombanda, 44lawi ihira mokira hangko i pelabiana pea doinda. Agaiana tobemba au meahi-ahi tuwona, mokira ope-ope au ara iria au katouana naparaluu woia i lalu katuwona alo-alona.”
Currently Selected:
Markus 12: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
