Markus 14

Yesu raliwoaka rapapate

(Mat. 26:1-5; Luk. 22:1-2; Yoh. 11:45-53)

1Rongalo rai ina hawe Alo Posusa Pasa hai Posusa Roti Au Bara Raragii. I tempo iti, kapala-kapala tadulako mpenomba hai guru agama mohaoki rara mohaka ngkandii Yesu bona rahuhu rapapate. 2Rauli, “Agaiana inee tahaka i tempo alo mahile bona dati ara pohiho i olonda tauna bosa.”

Hadua towawine motidorohi Yesu hai lana mawongi

(Mat. 26:6-13; Yoh. 12:1-8)

3Tempona Yesu ara i boea Betania, Ia maida i souna Simo, au hangkoia ketangga. TangaNa maande inditi, hawemi hadua towawine moanti habotolo lana mawongi au masuli ntepuu holona, au rababehi hangko i uaka kau au mawongi. Napengkami botolona, hai lana iti natidorohia waana Yesu tanda pebilana. 4Arahe bahangkia tauna inditi au rumpu moita apa au nababehi towawine iti. Mololitamohe hadua hai hadua, rauli, “Moapari pane lana mawongi au masuli iti ratende mbero pea? 5Ane rapana lana mawongi iti rapobalu, holona labi talu atuna doi pera.#14:5 doi pera: Hampeka doi pera himbela hai sarona tauna mobago hangalo. Aginami rapobalu hai holona raweihe topeahi-ahi.” Ido hai mokarumpuihe towawine iti.

6Agaiana Nauliangaarihe Yesu, “Pogiangaa peamide. Moapari hai nipakasusa laluna? Apa au nababehi Iriko, maroa. 7Lawi tauna au meahi-ahi, ara mpaliliuhe irikamu. Ane niunde motulungihe, arato katepakami. Agaiana Iko, baraNa ara liliu irikamu. 8Towawine iti mobabehimi apa au peisa nababehi. NabumbuhiaNa lana mawongi bona mopasilolonga amimi wataNgku i karatawuNgku. 9Bona niisa: i humalele dunia, iumba pea Ngkora Marasa rabambari, apa au nababehi towawine iti batena tekabelai, tanda karakatuinaona.”

Yudasi mampobalu Yesu

(Mat. 26:14-16; Luk. 22:3-6)

10I tempo iti, hadua hangko i topeguruna Yesu au hampulo hai rodua, au rahanga Yudasi Iskariot, lao i kapala-kapala tadulako mpenomba, mampololita tunggaiana kaina mampobaluna Yesu irihira. 11Matanamohe mohadi tunggaiana iti, hai radandiami rawei doi. Hangko inditi, Yudasi mohaokimi katepaka au maroa mohuhu Yesu irihira.

Yesu moande paande Posusa Pasa hihimbela hai topeguruNa

(Mat. 26:17-25; Luk. 22:7-14,21-23; Yoh. 13:21-30)

12I alo pepongkaa Posusa Roti Au Bara Raragii i tempona dimba Pasa rasambale, topeguruna Yesu mekune Iria, rauli, “Pue, iumba peundeaMu lao kipasilolonga paande Pasa au ina taande?”

13Mewali Natudumohe rodua topeguruNa, Nauliangaahe, “Laomokau i lalu wanua. Inditi ina nipohidupaa hadua tobalilo au moanti pantambuana au moihi owai. Meulamokau iria. 14Ane mesuakau i lalu sou, niuliangaa ampu sou iti: Guru mekune ba iumba Ia peisa moande paande Posusa Pasa hihimbela hai topeguruNa? 15Ampu sou iti ina motudungiakau hambua hologa mahile au ara i wongko. Hologa iti tepasilolonga amimi, handami parewana. Inditimi nipasilolongaake paande Pasa.”

16Lao mpuumohe topeguruNa au rodua iti mesua i lalu wanua. Kahawenda inditi, ope-ope mewali nodo au nauliangaahe Yesu, hai mopasilolongamohe paande Pasa.

17Kaindina, hawemi Yesu hihimbela hai topeguruNa au hampulo hai rodua i hologa au rapasilolongami inona. 18Tanganda mohuda, mololitami Yesu, Nauli, “Tou mpuu lolitaNgku ide: hadua hangko irikamu au maande sambelake ide-ide, ina mampobaluNa.”

19Karahadina lolitaNa iti, maparimi lalunda, hai mekunemohe hadua-hadua i Yesu, rauli, “Inee mpuu pae iko Pue?”

20Nahanaihe Yesu, “Au mampobaluNa, iami hadua hangko irikamu au hampulo hai rodua ide au moeme sambela roti hai Iko i hambua tabo. 21Tou mpuu, Iko Ana Manusia hangangaa mateNa nodo au tepakanotomi i lalu Sura Malelaha. Agaiana hurewumi tauna au mampobaluNa. Agina tauna iti, ineemi rapoanaka.”

Yesu mokira-kira roti hai anggoro i topeguruNa

(Mat. 26:26-29; Luk. 22:15-20; 1Kor. 11:23-25)

22Tanganda maande, Yesu moala roti hai mekakae i Pue Ala. Roo nodo, roti iti Nabise-bise hai Nakira-kiraahe topeguruNa, Nauli, “Niala, hai niandemi. Idemi kamba wataNgku.” 23Roo nodo, Naala worimi hambua paenua anggoro, mekakae i Pue Ala, hai Nahuhuahe. Opemohe maenu hangko i paenua anggoro iti, 24hai Nauliangaahe, “Anggoro ide kamba waheNgku au mabubu i kapateNgku mohuru salanda tauna bosa. WaheNgku iti morohongi dandina Pue Ala au mopahintuwu Pue Ala hai manusia. 25Bona niisa: mepongka ide-ide, anggoro ide barapi ina Kuenu duuna hawe tempona maenuNa anggoro au wou i lalu poparentana UmaNgku” 26Roo indo, monanihe hampaka nani petoia. Karoonda monani, padumohe hangko i wanua laohe i Bulu Saitun.

Yesu mampololita kaina mesapuakana Peturu

(Mat. 26:30-35; Luk. 22:31-34; Yoh. 13:36-38)

27Tanganda mempanai lao i Bulu Saitun, Yesu mouliangaahe topeguruNa, “Ikamu ope-ope ina nipalehiNa, lawi ara teuki i lalu Ngkorana Pue Ala node:

‘Toporewu iti ina rapapate,

alana dimbana mahawuhe.’#Sak. 13:7

28Agaiana i katuwoNgku hule, ina moioruNa lao i tampo Galilea, hai Kupegiakau indolou.”

29Nauli Peturu, “Kehapiri ope-opehe mopalehiKo Pue, agaiana iko bara!”

30Nauli Yesu, “Kuuliangaako: hangko damani motuturua manu karombelana deade kaindi, talumi belana nusapuakaNa.”

31Agaiana hambela mani napakaroho Peturu lolitana, nauli, “Kehapirina mate hihimbela hai Oio, bara mpuu ina kusapuaka kakuisaMu!” Nodo wori pololitanda topeguruNa au ntanina.

Yesu mekakae i Getsemani

(Mat. 26:36-46; Luk. 22:39-46)

32Roo indo, hawemohe i bonde au rahanga Getsemani. Inditi Yesu mouliangaahe topeguruNa, “Mohudamokau inde. Iko, laoNa hampai mekakae.” 33Agaiana Peturu, Yakobu hai Yohane Nawawahahe meula Iria. I tempo iti, masusami laluNa hai moradami. 34Nauliangaahe, “Mapari mpuu ide laluNgku, nodomoNa ina mate. Indemokau hampai hai mainga-ingamokau. Ineekau leta!”

35Roo indo, lao karao haodi, molingkudu, motumpa mekakae. I lalu pekakaeNa, merapi bona ane peisa inee molambi kapari iti, 36Nauli, “UmaNgku! Bara ara au bara Nubuku Nubabehi. Nupakaraoa wongkoia kapari au ina morumpaNa ide. Agaiana bara peundeaKu au Kuula, peundeaMuri Uma.”

37Roo indo, lao mbulimi i topeguruNa au talu, Nalambihe tanganda leta. Nauli i Peturu, “Simo! Ba letarikau pae? Mogalori pae hajaa bara nibuku mojaga-jaga? 38Mainga-inga hai mekakaekau bona datikau narumpa pekelo. I lalumi niunde mpuu mobabehi au manoto, agaiana bara nibuku lawi watami batena malede.”

39Hangko inditi, lao mbulimi mekakae. PekakaeNa iti himbela hai pekakaeNa au nguru-nguruna. 40Roo indo, mesule mbulimi mampombelambia topeguruNa, hai Nalambi mbulihe tanganda leta anti kamaleluenda. Mewali bara raisa apa au hangangaa rauliangaa Yesu.

41Lao mbulimi Yesu mekakae i kataluna belana, hai roo indo, mai mbulimi i topeguruNa, Nauliangaahe, “Leta manikau pae? Handami! Hawemi tempona Iko Ana Manusia rapobalu hai rahuhu i tauna au kadake. 42Mearomokau! Laomoke! Peita, oloumi mai tauna au mampobaluNa.”

Yesu rahaka

(Mat. 26:47-56; Luk. 22:47-53; Yoh. 18:1-11)

43Tangana mani Yesu mololita, hawemi Yudasi, hadua hangko i topeguruNa au hampulo hai rodua, hihimbela hai bosa tauna au moanti piho hai pewombe. Tauna iti ratuduhe kapala-kapala tadulako mpenomba, guru agama hai totosaenda to Yahudi bona laohe mohaka Yesu. 44Nauliangaa amimohe Yudasi tanda bona raisa kaumbana Yesu, nauli, “Hema au kuangki, iami Yesu. Nihaka hai niantimi, nikampai mpuu.” 45Mewali, kahawenda inditi, laomi Yudasi mampohidupaa Yesu, nauli, “Guru!” hai naangki. 46Roo indo, rahakami Yesu hai rahilu taiena. 47Hangko inditi, hadua tauna au meangka hungku i Yesu mowuka pihona mobata hawina Tadulako Mpenomba Mahile, kana talingana pane maingihi.

48Nauli Yesu i tauna au mehaka, “Tauna kadakeriNa pae dide, pane maiNa nihaka moantikau piho hai pewombe? 49Alo-alona araNa hihimbela hai ikamu i Souna Pue Ala mepaturo. Moapa hai baraNa nihaka i tempo iti? Agaiana ope-ope ide hangangaa mewali bona tepabukei apa au teuki i lalu Sura Malelaha.”

50Roo indo, melangkamohe ope-ope topeguruNa mopalehi Yesu.

51I tempo iti, ara wori hadua anantomoane au meula i Yesu au bara mehampi, mekomo pea au bula. Tauna iti rahaka wori, 52ido hai tewosuimi komona, hai melangka mengkabela.

Yesu i lindona Topeparesa Mahile Agama Yahudi

(Mat. 26:57-68; Luk. 22:54-55,63-71; Yoh. 18:12-14,19-24)

53Hangko inditi, raantimi Yesu lao i souna Tadulako Mpenomba Mahile. Inditi, moteruhumohe ope-ope kapala tadulako mpenomba, guru agama hai totosaenda to Yahudi au ntanina. 54Peturu meula ngkarao pea duuna hawe i tabangaa souna Tadulako Mpenomba Mahile. Inditi, ia mohuda mamindu hihimbela hai topekampai.

55I tempo iti, kapala-kapala tadulako mpenomba hai ope-ope tadulako agama mohaokimohe sabi au mosalai Yesu bona rahuku mate. Agaiana bara ralambi salaNa. 56Bosa mpuu sabi au mosalai Yesu, agaiana tongawa dongkonda pea lawi bara himbela lolitanda. 57Ara bahangkia au meangka hai au mosabi dongko, rauli, 58“Tauna ide, kihadi manguli node: ‘Ina kugero Souna Pue Ala au naaro manusia, hai i lalu talu alona ina kuaro hule au ntanina, au bara nababehi manusia.’ ” 59Agaiana i posabinda iti, bara wori himbela lolitanda.

60Meangkami Tadulako Mpenomba Mahile i lindonda ope-ope tadulako mouliangaa Yesu, “Barahe pae Nuhanai pesalainda iti Irio?” 61Agaiana Yesu bara mehana, nauri hampaka lolita. Hambela mani Tadulako Mpenomba Mahile mekune Iria, nauli, “Oio mpuu pae Datu Topehompo, Anana Pue Ala au hintoto ratoia?”

62Nahanai Yesu, Nauli, “Io, Ikomi, hai ina niitaNa, Iko Ana Manusia, mohuda ntanda i koanana Pue Ala au makuasa, hai ina niita woriNa mai mendaulu hangko i suruga i lalu gawu.”

63Kanahadina Tadulako Mpenomba Mahile apa au nauli Yesu, mohepami baduna anti karumpuna, nauli, “Barapi mobundu ara sabi! 64Nihadimi lolitaNa au mopapakoi Pue Ala. Noumba pobotusimi?”

Rabotusi sambelami katouna Yesu masala hai hintoto rahuku mate.

65Hangko inditi, arahe au motinuduhi Yesu, ara worihe au mampopowadi-wadi: ratuko mataNa, rajangguru, hai rauliangaa, “Ee nabi! Uli ba hema au mojangguruKo!” Topekampai mohapa worihe Yesu.

Peturu mosapuaka peulana i Yesu

(Mat. 26:69-75; Luk. 22:56-62; Yoh. 18:15-18,25-27)

66I tempona mani Peturu i tabangaa, maimi hadua towawine au mobago i souna Tadulako Mpenomba Mahile. 67Kamoitana Peturu mamindu, napelengge maroa, hai liliu nauliangaa, “Bara pae oio wori hadua rangana Yesu to Nasare olou?”

68Agaiana nasapuaka Peturu, nauli, “Bara kuisa apa au nuuli!” Roo indo, melimbami lao hungku i babaka. Motuturuami manu.

69Towawine iti moita mbulimi Peturu, hai nauli i tauna au ara inditi, “Ia ide au hihimbela hai Yesu.” 70Agaiana mesapuaka mbulimi Peturu.

Bara mahae hangko indo, tauna au meangka inditi mouliangaa wori Peturu, “Manoto oio ranganako Yesu! Lawi to Galilea woriko.”

71Mosumpami Peturu, nauli, “Mate-matena ane kuisa tauna au niuli iti!” 72I tempo iti, motuturuami manu karombelana. Nakatuinaomi Peturu lolitana Yesu au manguli, “Hangko damani motuturua manu karombelana, talumi belana nusapuakaNa.” Ido hai moteriami Peturu monggoro-nggoro.

Currently Selected:

Markus 14: NPY

Highlight

Copy