Markus 15

Yesu i lindona Gubernur Pilatu

(Mat. 27:1-2,11-26; Luk. 23:1-5,13-25; Yoh. 18:28–19:16)

1Madondo-dondo, ope-ope tadulako agama hai kapala-kapala tadulako mpenomba hai guru agama hai totosaenda to Yahudi au ntanina himpudumohe bona Yesu rahilu taiena hai raanti lao i lindona Pilatu. Kahawena Yesu inditi, 2mekunemi Pilatu Iria, nauli, “Datunda mpuuKo pae to Yahudi?”

Nahanai Yesu, Nauli, “Tou, nodo au nuulimi.”

3Hai ngkaia mani pakana pesalai i Yesu au rapahawe kapala-kapala tadulako mpenomba i Pilatu i tempo iti. 4Ido hai mekune mbuli Pilatu i Yesu, nauli, “Barahe pae Nuhanai? Ngkaia pakana au rasalaiaKo.” 5Agaiana Yesu bara mau mehana, ido hai napotingkara Pilatu.

6Pare-parena i Alo Posusa Pasa, Pilatu mokabaha hadua tauna au ratarunggu, hema pea au raperapi tauna bosa. 7I pare iti, ara hadua toratarunggu au meewa i topoparenta, hangana Baraba. Baraba hai rangana mopapatehe tauna i lalu peewanda i topoparenta Roma. 8Mewali, moteruhumohe tauna bosa, merapi i Pilatu bona nakabahaahe hadua au ratarunggu nodo au nababehi pare-parena. 9Mekunemi Pilatu, nauli, “Noumba? Ba niunde ane kukabahaakau datunda to Yahudi ide?” 10(Pilatu manguli nodo, lawi naisa: kapala-kapala tadulako mpenomba mohuhuhe Yesu iria anti kamahinanda.)

11Agaiana kapala-kapala tadulako mpenomba mohuweki lalunda tauna bosa bona raperapi Baraba au rakabahaahe.

12Hangko inditi, nauli mbuli Pilatu i tauna bosa, “Ane rapana Baraba au kukabahaakau, kupanoumbami tauna ide au niuli datumi to Yahudi?”

13Mongangamohe tauna bosa, rauli, “Papate i kau mombehape!”

14Mekune Pilatu, nauli, “Dake apari au Nababehi?”

Agaiana monganga-ngangahe “Papate i kau mombehape!” 15Pilatu mampeinao mopabukei peundeanda tauna bosa, ido hai nakabahaamohe Baraba. Roo indo, natudumohe surodadona mohepe-hepe Yesu hai pekandangi au modui, hai nahuhuamohe bona rapaku i kau mombehape.

Surodado mampopowadi-wadi Yesu

(Mat. 27:27-31; Yoh. 19:2-3)

16Roo indo, surodado moantihe Yesu lao i hologa pebotusia i souna Gubernur, hai mokakiohe ope-ope ranganda. 17Yesu rabadui hantau badu au malentoro nodo badu datu. Hangko inditi, rababehimi hambua songko hangko i daangkau au modui au nodo songko datu, hai rasongkoia. 18Roo indo, rapopowoo-woomi, rauliangaa, “KibilaKo, datunda to Yahudi!” 19Rawombe-wombemi waaNa hai lai, ratinuduhi, hai molingkudumohe motumpa i lindoNa nodo tauna au raadai. 20Karoona rapopowoo-woo, rawosui hulemi badu au malentoro au rabaduia inona, hai rabaduia hulemi hampiNa. Roo indo, raantimi Yesu lao i raoa wanua bona rapaku i kau mombehape.

Yesu rapaku i kau mombehape

(Mat. 27:32-44; Luk. 23:26,33-43; Yoh. 19:17-27)

21I tanga rara, mampohidupaahe hadua tauna au ina mesua i wanua. Hangana Simo to Kirene, umanda Aleksander hai Rupus. Surodado to Roma mopari-pari Simo motalondo kau popakuana Yesu. 22Bara mahae, hawemohe i paidaa au rahanga Golgota, lempona Bulu Banga waa. 23Inditi, Yesu rapaenu anggoro au ragalo mur,#15:23 Mur iti ragalo hai anggoro hai rawei Naenu bona dati gaga mahai Nahadi. agaiana bara mau moenu. 24Roo nodo, rapakumi Yesu i kau mombehape; hampiNa rakira-kira. Motendehe dadu bona mopakanoto kiranda hadua-hadua.

25Karapakuna Yesu i kau mombehape, tinti hahio madondo. 26I kau popakua i wongko waaNa, rapopatakai pata. I pata iti teuki apa au rasalaia. Node au rauki: DATUNDA TO YAHUDI. 27Ara wori rodua tauna au kadake rapaku i kau mombehape hihimbela hai Ia, hadua ntanda i koanaNa hai hadua ntanda i kabeoNa. 28[Mewali, apa au rababehi iti mopabukei apa au teuki i lalu Sura Malelaha au manguli, “Datu Topehompo rapahimbela hai tauna au kadake.”]

29Tauna au melempo inditi, molili-liliahe waanda mopapakoi Yesu, rauli, “Ee! Nuuli woo ina mogeroKo Souna Pue Ala hai Nuaro hule i lalu talu alona! 30Ane nodo, tulungimide wataMu! MendaulumoKo hangko i kau mombehape iti!”

31Nodo wori kapala-kapala tadulako mpenomba hai guru-guru agama mopapakoi worihe Yesu. Mololitahe, hadua hai hadua, rauli, “Tauna ntanina Natulungihe. WataNa haduduaNa bara Nabuku Natulungi! 32Nauli kaIana Datu Topehompo, Datunda to Isaraeli! Ane nodo, maroa ane mendaulu hangko i kau popakuaNa iti bona taita hai tapoinalai!” Mogalo tauna au rapaku hihimbela hai Ia, mopapakoi worihe Yesu.

Yesu mate

(Mat. 27:45-56; Luk. 23:44-49; Yoh. 19:28-30)

33Pualomi, unga pea makaindi i humalele tampo iti i lalu talu jaa. 34Tinti talu kalumba, meraroami Yesu masisimbuku, Nauli, “Pue AlaNgku! Pue AlaNgku! Moapari hai NupalehiNa?” I lalu basanda to Yahudi, “Eloi, Eloi, lama sabaktani?”

35Arahe bahangkia tauna au meangka hungku i popakuana Yesu mohadi peraroaNa, mewali rauli, “Pehadingi! Ia mokakio nabi Elia.” 36Ara hadua au melangka lao moala lomo, naememi i lalu anggoro mangilu, nawoli i wuntu daangkau, hai napakana humena Yesu, “Pegia, tapeita hampai ba mai mpuu Elia mokabaha hangko i kau mombehape!”

37Hangko inditi, mongangami Yesu masisimbuku, pane opemi inaoNa.

38I tempo iti, rindi bana au tetoe i lalu Souna Pue Ala mahepa ntanga hangko i wongko hawe i woi. 39Tadulako surodado au meangka molindo kau mombehape iti, moita noumba kapatena Yesu. Ido hai nauli, “Tou mpuu Ia ide Anana Pue Ala!”

40Ara worihe inditi bahangkia towawine au mampeita ngkarao. I olonda ara Maria Magdalena. Ara wori Maria inanda Yakobu au mangura hai Yoses, hai ara wori Salome. 41Towawine iti au moula hai motulungihe Yesu i tampo Galilea. Hai bosa mani wori towawine au ntanina au meula i Yesu hangko i Galilea hawe i Yerusale.

Yesu ratawu

(Mat. 27:57-61; Luk. 23:50-56; Yoh. 19:38-42)

42Kalumbami i alo pampasilolongaa, hai mepongka i katampuna alo rapaliami mobago moula ada to Yahudi lawi mepongkami Alo Pengkarooangaa. Mewali, 43maimi hadua tauna au rahanga Yusupu to Arimatea. Yusupu iti, hadua tadulako agama Yahudi au rabila hai au mahaemi mampegia kahawena poparentana Pue Ala i lalunda tauna i dunia. Napengkabaikimi lao i Pilatu mamperapi watana Yesu. 44Tingkara Pilatu mohadi Yesu polo mate. Ido hai mokakio tadulako surodado napampekunei ba tou-tou mpuumi mate. 45Kanahadina Pilatu lolitana tadulako iti, naiomi pamperapina Yusupu.

46Roo indo, laomi Yusupu meholo bana bula, hai liliu lao motaura watana Yesu hangko i kau mombehape, nabungkuhi hai bana iti. Karoona nabungkuhi, laomi nadampa i lalu talumba au rakae i bulu watu, hai mololimi haogu watu napopotuko baba talumba iti. 47Maria Magdalena hai Maria inana Yoses moita kaiumbana watana Yesu rawoli.

Currently Selected:

Markus 15: NPY

Highlight

Copy