Markus 5
5
Yesu mopakaoha to Gerasa au napesuangi seta
(Mat. 8:28-34; Luk. 8:26-39)
1Hangko inditi, laomohe Yesu hai topeguruNa ntanda i orupena rano i tampo Gerasa. 2Kahawenda i tampo Gerasa, maimi hadua tauna au napesuangi tokadake mampohidupaa Yesu. 3Tauna iti maida pearai i talumba. Mogalori hai rante, bara rabuku tauna mohilu, lawi rumihi kamarohona. 4Bosami belana bitina hai taiena rahilu, agaiana koloro hai rante batena pea nabotu-botu. Ido hai bara ara hadua au pebai mohaka. 5Hahangaloa hai hahambengia, ia molulumao i talumba hai i tongku-tongkuna, monganga-nganga hai mobelai watana hai watu. 6Karao mani Yesu, tauna iti moitami Yesu, hai melangka lao Iria, pane molingkudu menomba i lindoNa. 7-8Yesu mowura seta au mampesuangi tauna iti, Nauli, “Melohomoko hangko i tauna ide!”
Monganga tauna iti, nauli, “Yesu Anana Pue Ala au i suruga! Apari mai Nuala? Kuperapi bona modandiKo i lalu hangana Pue Ala, barana ina Nupopeahi-ahi.”
9Yesu mekune iria, Nauli, “Hema hangamu?”
Nahanai, “Hangangku Legion, lawi bosangkai.”#5:9 Hanga Legion iti, lempona: isabuna. 10Seta iti merapihe i Yesu bona ineehe Napopeloho hangko i tampo iti.
11Bara karao hangko inditi, arahe boe hambanguna tanganda masui i tampeka. 12Seta iti merapihe i Yesu, rauli, “Tudungkai mesua i boe olouhe.” 13Nauli Yesu, “Laokau!” Roo indo, meloho mpuumohe seta iti liliu mesua i boe. Pesuanda i boe, melangkamohe boe iti hai mengkanawohe i rano, pane matehe maliso. Kabosanda ba aratohe pae rosabu baana.
14Karaitana tauna au mokampai boe apa au mewali, melangkamohe lao i boea hai i bonde au hungku mopahawe apa au raita. Ido hai maimohe ampu boea mampeinao moita apa au mewali iti. 15Kahawenda i Yesu, moitahe tauna au napesuangi isabuna tokadake inona, mohudami nodo biasa, mebadu, hai manotomi pekirina. Ido hai langamohe. 16Tauna au moita apa au nababehi Yesu inona, motuntuahe tauna au hawe kana i apa au mewali i tauna au napesuangi tokadake, hai apa au mewali i boenda. 17Roo indo, ampu boea iti mopari-parihe Yesu bona padu hangko i tamponda. Mewali, mesawi mbulimi Yesu i lalu duanga.
18Tangana Yesu mesawi i duanga, tauna au napesuangi tokadake inona merapi bona meula Iria. 19Agaiana bara napaliu Yesu, Nauliangaa, “Mesulemoko lao i soumu, nuuliangaahe hambomboeamu apa au nababehi Pue Ala irio hai noumba kamaroana laluNa irio.” 20Lao mpuumi i tampo Dekapolis#5:20 Dekapolis lempona: Hampulo Boea. mopahawe apa au nababehi Yesu iria. Tingkarahe tauna au mohadi bambari iti.
Yesu mopatuwo hule anana Yairus, hai mopakaoha hadua towawine au motobo baduNa
(Mat. 9:18-26; Luk. 8:40-56)
21Mesule mbulimi Yesu lao ntanda i orupena rano Galilea. I kahaweNa, liliu ratoleliki bosa tauna. TangaNa mani i wiwi rano, 22hawe hadua tadulako sou penombaanda to Yahudi, hangana Yairus. Kamoitana Yesu, molingkudumi i lindona Yesu 23merapi tulungi, nauli, “Anangku towawine ina matemi. Laoke i soungku, Nupetobo bona maoha hai batena pea woia tuwo.” 24Meulami Yesu i tauna iti, hai bosa tauna meula duuna Yesu barapi peisa mokale.
25I olonda tauna bosa, ara hadua towawine au hampulomi hai rompare motorare liliu, bara mengkangkaroo. 26Bosami belana rapakulii sando, duuna ope ihi souna napobalu napopobaiari. Agaiana bara mau maoha, karurumihiari hakina. 27-28Kanahadina apa au rapololita tauna kana i Yesu, nauli laluna, “BaduNa pea kupetobo, hangangaa maohana!” Mewali mengkalumpiimi i olonda tauna bosa mohungkuki Yesu hangko i taleu, hai natobo mpuumi wuntu baduNa. 29I kanatobona, unga pea teompo wahena. Nahadi maoha mpuumi.
30I tempo iti wori, nahadi Yesu ara kuasa au mesuwu hangko Iria. Membalilimi i tauna bosa hai mekune, Nauli, “Hema au motobo baduNgku?”
31Rahanai topeguruNa, “Guru, bosa ntepuu tauna au mombeupi-upi mogaguKo. Moapari hai Nupekune hema au motoboKo?” 32Agaiana Yesu membalili mantoleli mohaoki tauna au motobo baduna.
33Naisa towawine iti apa au mewali i watana. Moradami anti kalangana, ido hai mai molingkudu i lindona Yesu mopangaku apa au nababehi. 34Yesu mouliangaa towawine iti, “AnaNgku! Maohamoko lawi mepoinalaiko Iriko. Mesulemoko maroa-roa. Maohamoko, barapi ara hakimu.”
35Tangana mani Yesu mololita, hawemohe bahangkia suro hangko i souna Yairus au mouliangaa Yairus, “Tua, anamu mepalehimi. Ineemoko mopakasusa Guru.”
36Kanahadina Yesu apa au rauli suro iti, Ia mololita i Yairus, Nauli, “Ineeko langa! Nupoinalai peamoNa!” 37Napaliliumi Yesu polumaoNa agaiana bara mopaliu tauna bosa meula Iria, batena pea Peturu, Yakobu hai Yohane adina. 38KahaweNa i souna Yairus, Yesu moita bosa tauna au mogewo-gewo hai rumihi poterianda. 39PesuaNa i lalu sou, Nauliangaahe, “Moapari hai mogewo-gewokau hai rumihi poteriami? Ia bara mate. Leta pea.” 40Karahadina, raele-eleri. Hangko indo, Yesu motuduhe ope-ope tauna meloho hangko i lalu sou, pane mesuami i paturuana anangkoi iti hihimbela hai tosaena anangkoi iti, hai topeguruNa au talu. 41-42(Tinuwuna anangkoi iti hampulo hai rompare.) Yesu mokingki taiena anangkoi iti, hai Nauliangaa, “AnaNgku, mearomoko!” I lalu basanda to Yahudi, nodemi lolitaNa, “Talita kum!” Mearomi anangkoi iti hai liliu molumao. Tingkara mpuumohe ope-ope tauna au moita. 43Agaiana Nakontohe Yesu, Nauli, “Inee nipopololita apa au hangko mewali ide.” Hai Nauliangaahe, “Nipaande anangkoi ide.”
Currently Selected:
Markus 5: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
