ỤBANỤ 5

Utumwa na Agwatana Tumwananɛ Faro

1Na aba ibɛ nazhɛ go Moses na Aron teneni Faro, ee mbishi bu, ɛɛ hiɛŋ, AGWANGWAMA na shɛ Agwatana atwa Isrɛl hiɛŋ, Ganga atwa Mi maa e zhe a n ndanɛ isene nụ ụshɛka.

2Ama ga Faro hiɛŋ, Gaaba shɛ AGWANGWAMA Ngɛɛ zhɛ ma hwuga-unu ubwa maa Ma ganga miaụŋ mi Isrɛl maa e hwurii? M mepi shi AGWANGWAMA gonu o, N zha shɛ kaa ma ganga miaụŋ mi Isrɛl maa mu hwuri o.

3Ɛɛ hiɛŋ bụ, Agwatana Ehibru twawa no tu, ta bụ lụpa, maa iti leneni maa ta zha tahaŋnụ iwɛŋnɛ itɛtu nụ ụshɛka, maa ta ta ụrụpɛ pa AGWANGWAMA tu, iwɛ maa kede ma tu kwụna nụ ụngwụ ụwɛ kwo kaa nu utokwobi o.

4Ama agwuma Ijipti hiɛŋ aŋ, Gabụ go Moses keeni Aron, iwembe po ahia jala maa hi becinji atwa ga nu ugondu wa abaa? Zhaga gwuricingo aŋ ma nu ugondu tijama ta aba. 5Ga Faro hiɛŋ, Hioko ma atwa ga gembi ufwugwo na cɛnjɛ tu ga, ahia jala maa hi peni aŋ ụhinjanụ nu ugondu tijama ta aba!

6Nụ ụjita ata gbaa ga Faro peni atwa ata a muna atwa ugondu keeni ehiu aba ugondu unu bɛɛ hiɛŋ, 7Tɛ dwɛjɛ aŋ ma ya ti'enyi maa a njɛ etemberi gana na ɛhi gɛ dwɛjɛ aŋ la o. Hiɛŋ aŋ ma ge e zhe a jarɛ tụ ni ikɛnyi aba. 8Ufwugwo we etemberi na aa shana a nda cala, ga a njɛ gana ata waa, ta munanana ma kwukwuŋ, iwɛnɛ aa zasa iyi tɛnda ibɛ po aa ugaga ma, Iti genji ta zha tɛ cɛ ụrụpɛ pa Agwatana tu. 9Kaana ma etwenyi ata ugondu maa u iri aŋ maa kede ono shilo acɛbɛ nu n-ndumwa ma ata mụ ụzagwụ o.

10Na aka ata atwa na a muna E'isrɛl ugondu, keeni ehiu ugondu wa aba beni ee zhe ee mbishi E'isrɛl ata, ɛɛ hiɛŋ, Ga Faro hiɛŋ kede ɛhi dwɛjɛ ya ti'enyi o. 11Zhaga jalakaka ma ofwo na ti'enyi tu namɛ maa hiɛ jarɛ ni ikɛnyi hiŋ, a zha shɛ kaa a munanana ufwugwo we etemberi hiŋ kwukwuŋ. 12Gabata atwa ata mburusonu ga hwɛɛ aba na cɛnjɛ ti Ijipti kpasaa, maa a na mwacɛ ekikici ambɛ tụlụkpashɛ te ti'enyi te etemberi tɛnda. 13Atwa na shɛ ehiu ugondu wa aba a ta aŋ izɛlɛgwu, ɛɛ hiɛŋ, No hwuwo ma ugondu hiŋ iyi-heri, gana na ahia shana ahia nda aka na ɛɛ hi dwɛjɛ la ti'enyi. 14Oo dubo atwa na shɛ ehiu ata miaụŋ mi Isrɛl, anaa na atwa Faro a na a muna aŋ ugondu peni tihiu, ɛɛ hiɛŋ, Iwembe po ahiɛ njɛ shɛ ufwugwo we etemberi hiŋ hwayɛ ga keeni wenebe gana na ahia shana ahia nda calaa?

15Ibɛ po atwa na shɛ ehiu miaụŋ mi Isrɛl zhegeni Faro nu n'ungwa, ɛɛ hiɛ, Iwembe po aba nda ajama ga bụ gana gaa? 16E dweji shi ya ajama ga bụ ti'enyi o, ɛɛ hiɛŋ kaa ga tu na nda etemberi. Hioko oo dubo kaa ajama ga bụ, utugbolo ibɛ kaa namɛ pa atwa bụ gbaa.

17Ga Faro hiɛŋ aŋ, Ahiɛba aruna ga, hiɛ namɛ ni i'ɛlɛ yo hondo, hi zasa iyi ma nda o, iwɛbɛ po ɛhi hiɛŋ, Ti zhɛ tɛ cɛ ụrụpɛ pa AGWANGWAMA. 18Zhaga nda ma ugondu, a zha shɛ kaa ɛ hi dwɛjɛ ti'enyi, hi zhɛ kaa hi na nda ufwugwo we etemberi hiŋ waa.

19Ibɛ po ehiu miaụŋ mi Isrɛl kwụbɛ maa i keeni wumana aŋ, iwɛnɛ ɛɛ hiɛŋ aŋ, Ta munanana ma ufwugwo we etemberi hiŋ nu gana na ahia shana ahia nda iyi-heri o. 20Gana na ta a banɛ na agba Faro, aa twa no Moses keeni Aron ta 'yacɛ aŋ. 21Ɛɛ hiɛŋ Moses na Aron, Ga AGWANGWAMA ihiɛ mbiyanɛ, maa duma ụshɛrɛya hiŋ, iwɛnɛ ahiɛ njɛ maa ta 'yagana Faro keeni anjɛ-ugondu ubwa ụhiụŋ, ahiɛ ndanɛ aŋ uhwaŋna na maa a tụ kwụnɛ.

Agwatana Shiri-unu maa Bi Zhɛ ba Lashɛga Aŋ

22Go Moses gwuri no ofwo AGWANGWAMA, bɛɛ hiɛŋ, Oo, AGWANGWAMA, iwembe po aba nda atwa ga bụ iyi iwɛɛ? Iwembe po abụ n tumwanɛɛ? 23Te kwuni aka na Ngaa zhaganɛ Faro Ama duma iwɛ nu bwa ni izeci bu; bu ta nda kaa waa atwa ga bụ iyi iwɛ, gabụ kaa bi leshiji shi aŋ kwukwuŋ.

Currently Selected:

ỤBANỤ 5: RBT

Highlight

Copy