ỤBANỤ 6

1Ama AGWANGWAMA hiɛŋ Moses, Hwuwayɛ nazhɛ ɛbi zhɛ ba kwụba iyi nɛ Ngɛɛ zhɛ ma nda Faro. Tedure nu ugondu ukpahiŋ na Ngɛɛ zhɛ ma nda nazhɛ bɛɛ zhɛ ba ganga aŋ, iwɛ-tɛkana, tedure nu ugondu ukpahiŋ na Ngɛɛ zhɛ ma nda nazhɛ bɛɛ zhɛ bo unzo aŋ maa e beni na cɛnjɛ tu bwa.#Ugo 13:17

2Nazhɛ Agwatana hiɛŋ Moses, Gamba n shɛ AGWANGWAMA. 3Gamba m bananɛ la Abraham, na Azik keeni Jekob caakwụ, maa Gamba n shɛ Agwatana na Hwuri Kpaaŋ.#6:3 Agwatana na Hwuri Kpaaŋ: Ibɛ shɛ Ɛl-shadai ne Rihibru. Ama M mbiseni shi aŋ la izeci mi nɛ shɛ AGWANGWAMA maa e mepi o.#Umoz 17:1; 28:3; 35:11; Ụban 3:13-15 4Ngee shikicingeni aŋ sasana unu mu tutwa maa, N zhɛ ma pana aŋ cɛnjɛ te Ekenan, cɛnjɛ tu na aa jɛjɛ na tuba gana alashɛ. 5Ngaa hwugananɛ i'nye nɛ miaụŋ mi Isrɛl, mu na Ijipti suji aa njɛ ajama aba o 'nyongo, Ngee teyinje kaa unu mu tutwa.

6Ibɛ po mbiso miaụŋ mi Isrɛl maa, Gamba n shɛ AGWANGWAMA, N zhɛ kaa ma hiɛ bacɛnga nu ugondu tijama te Ejipti, tedure nu ukpahiŋ ụ'wụtụ keeni ụshɛrɛya ụ'wụtụ, ibɛ Ngɛɛ zhɛ me hi bicingo.#Ugo 13:17 7N zhɛ mo hi sugo ma nda atwa mi, Ngɛɛ zhɛ kaa ma sha Agwatana hiŋ, ɛhi zhɛ kaa du hia mapa maa, Gamba n shɛ AGWANGWAMA na shɛ Agwatana hiŋ na ihi bɛcinjɛ nu ugondu tijama te Ejipti. 8Nazhɛ Ngɛɛ zhɛ mo hi sugo na cɛnjɛ tu na Ngee teji la Abraham, na Azik keeni Jekob maa N zhɛ ma pana aŋ. N zhɛ kaa ma hi pana tụ maa hi 'yaga. Gamba AGWANGWAMA na.

9Go Moses mbishi miaụŋ mi Isrɛl gana ata; ama shɛmɛ shɛ tụhaŋtụ sha aba keeni ugondu tijama na aa nda leneni shi aŋ maa e shiri acɛbɛ nu n-ndumwa mu Moses o.

10Nazhɛ AGWANGWAMA hiɛŋ Moses, 11Tonono Faro agwuma Ijipti, mbiso bu maa ga ganga miaụŋ mi Isrɛl maa e beni na cɛnjɛ tu bwa. 12Ama go Moses hiɛŋ AGWANGWAMA, Hioko, Miaụŋ mi Isrɛl mi shiri shi ya acɛbɛ nu n-ndumwa mi mi o, gana na ga Faro zhɛ bo shilo ụcɛbɛ nu n-ndumwa mi mii? N-ndumwa mi mi kaa mi zegeri shi o.#6:12 N-ndumwa mi mi kaa mi zegeri shi o: Ecilo ibɛ i shɛ maa bi 'yajɛ tugbudu. Tɛjɛshɛrɛga tu ko ti hiɛŋ, Teleyi tu umudu, kwo kaa teleyi tu na ti jeji shi.

13Ama AGWANGWAMA peni Moses keeni Aron unu, bɛɛ hiɛŋ aŋ, Mbiso ma miaụŋ mi Isrɛl keeni Faro agwuma Ijipti maa, Gamba n hi eni maa hi becinji atwa Isrɛl ni Ijipti.

Tukwuno tu ukpogwu Moses nu una Aron

14Atwa na shɛ ehiu nhwaŋ me eshi aba na. Miaụŋ-me-eyi mu Rubɛn, na shɛ yɛu Jekob ihiiŋ na: ga Hanok, na Palu, nɛ Hɛzron keeni Kami; atwa ukpogwu Rubɛn ta.

15Miaụŋ-me-eyi mi Simion na: gɛ Jɛmuɛl, na Jamin, no Ohad, na Jakin, no Zoha, keeni Shaul na biyikwo bi Kenan metenji bu; atwa ukpogwu Simion ta.

16Nzeci mu miaụŋ-me-eyi ma alamụ Livai na: ge Geshon, no Kohat keeni Merari. Shiywa shɛ na ge Livai yɛ uraiŋ shɛ namɛ dipi-yebi-nu-talacɛ-na-shɛba-shi-cenje (137).

17Miaụŋ-me-eyi mi Gɛshon na: ge Libni, ne Shimei, ukpogwu wa aba ta.

18Miaụŋ-me-eyi mu Kohat na: ga Amram, ne Izha, nɛ Hɛbon keeni Uziɛl. Shiywa shɛ na go Kohat yɛ uraiŋ shɛ namɛ dipi-yebi-nu-talacɛ-na-shɛba-shɛ-tatụ (133).

19Miaụŋ-me-eyi mi Merari na: ga Mali keeni Mushi. Atwa ukpogwu Livai gana na ta alamụ aba namɛ ta.#Tɛrɛ 3:17-20; 26:57,58; 1 Shɛrụ 6:16-19

20Ga Amram zeni ushumwa ubwa go Jokɛbɛd, bee meci Aron keeni Moses. Shiywa shɛ na ga Amram yɛ uraiŋ shɛ namɛ dipi-yebi-nu-talacɛ-na-shɛba-shi-cenje (137).

21Miaụŋ-me-eyi mi Izha na: go Kora, ne Nefɛg keeni Zikri.

22Miaụŋ-me-eyi mu Uziɛl na: ge Mishɛl, nɛ Ɛlzafan keeni Sitri.

23Ga Aron zeni Ɛlisheba, yɛu Aminadab bụngwụfwụ Nashon; bee meci Nadab, na Abihu, nɛ Ɛleaza keeni Itama.

24Miaụŋ-me-eyi mu Kora na: ga Asi, yɛu Ɛlkana keeni Abiasaf; atwa ukpogwu Kora ta.

25Ge Ɛleaza, yɛu Aron zeni yɛu Putiɛl ike; bee meci Finehas. Atwa ata aba shɛ ehiu ukpogwu Livai.

26Ga Aron keeni Moses ga, aba AGWANGWAMA hiɛŋ aŋ, Bɛcinjɛ ma alamụ miaụŋ mi Isrɛl ni Ijipti. 27Aba shɛ atwa na mbishi Faro agwuma Ijipti maa ga ganga miaụŋ mi Isrɛl maa e beni ni Ijipti, aba gana na shɛ go Moses keeni Aron.

Ga Aron Zhɛ na Lashagana Moses N-ndumwa

28Aka na AGWANGWAMA jɛmɛ n-ndumwa no Moses na cɛnjɛ ti Ijipti, 29Bɛɛ hiɛŋ Moses, Gamba n shɛ AGWANGWAMA; no mbiso Faro agwuma Ijipti n-ndumwa me elele na Omo bu mbiso. 30Ama go Moses jishijɛ AGWANGWAMA, bɛɛ hiɛŋ, Bi mepi kaa maa N shɛ igbidu n-ndumwa kaa zegeri shi nu unu mu o, gana na ga Faro zhɛ bo shilo ụcɛbɛ nu n-ndumwa mi mii?

Currently Selected:

ỤBANỤ 6: RBT

Highlight

Copy