ỤBANỤ 7

1Nazhɛ AGWANGWAMA hiɛŋ Moses. Hioko, N zhɛ ma bụ nda gana Agwatana pu Faro; ga Aron, batagwụ bụ, ubwa zhɛ ba sha bilesheji bu. 2No mbiso batagwụ bụ ga Aron n-ndumwa me elele na Ngee bi peni-unu muba. Ga Aron tuba zhɛ no mbiso Faro maa ga ganga miaụŋ mi Isrɛl maa e beni na cɛnjɛ tu bwa. 3Ama tuba N zhɛ ma ta amɛ Faro tɛshɛshɛpana, iwɛ maa ge iyi tudama keeni iyi ya arụhwajɛ mi na kaana ufwugwo tugombo na cɛnjɛ ti Ijipti. 4Ama kaa ga Faro zha shɛ bo shilo ụcɛbɛ nu n-ndumwa mụ bụ o, iwɛ maa Ma pana cɛnjɛ ti Ijipti ulwapɛ na wumanjɛ, iwɛ maa Mo sugo unyama mu, aba shɛ miaụŋ mu ga mi Isrɛl maa Ma bacɛnga aŋ na cɛnjɛ ti Ijipti.#Ugo 7:36 5Aka na Ngoo mbo u'ala mu Ngee peteni uŋ ni Ejipti, nazhɛ Ejipti zhɛ a mapa maa Gamba n shɛ AGWANGWAMA, nazhɛ Ngɛɛ zhɛ mɛ bɛcinjɛ miaụŋ mi Isrɛl apata. 6Go Moses keeni Aron njɛ ga gana na ta AGWANGWAMA peni aŋ unu. 7Shiywa shu Moses shɛ namɛ dupu-nu-talacɛ, (80) ma shɛ Aron shɛ namɛ dupu-nu-talacɛ-na-shɛba-shɛ-tatụ, (83) na aka ata oo mbiso Faro iwɛ.

Bukwuto Aron Jɛshɛrɛjɛ Uhwa

8Nazhɛ AGWANGWAMA hiɛŋ Moses keeni Aron, 9Aka na ga Faro ihi hiɛŋ, Nda ma ụrụhwajɛ uko ma kwụba, aka ata hiɛŋ Aron, ga kala bukwuto bwa na cɛnjɛ nu umbe Faro, maa jɛshɛrɛga uhwa. 10Aka na go Moses na Aron zhe no ofwo Faro, aa njɛ gana na ta AGWANGWAMA ge peni aŋ unu. Ga Aron keri bukwuto bwa na cɛnjɛ nu umbe Faro keeni umbe anjɛ-ugondu ubwa, baa jɛshɛrɛjɛ ga uhwa. 11Ga Faro suyanɛ atwa ubwa ti'inta keeni anjɛ-tishino, anjɛ-tishino Ijipti njɛ tishino ta aba du gana ata. 12Bụtụ bụtụ ba aba keri bukwuto bwa na cɛnjɛ, shaa jɛshɛrɛjɛ ahwa. Ama tuba bukwuto Aron tweri shekwute sha aba. 13Amɛ Faro ta shɛshɛpanɛ waa, bu ta lacɛ maa shilo ụcɛbɛ na aba, gana na ta AGWANGWAMA ga dumwa.

Meni mɛ Jɛshɛrɛjɛ Mehieŋ

14Nazhɛ AGWANGWAMA hiɛŋ Moses, Amɛ Faro shɛshɛpanɛ, bu ta lacɛ maa ganga atwa ga. 15Zhagana Faro beyi nu uvwungwa, ti bɛɛ zhɛ nu uhwulwo; gabụ tuba shikono nụ ụpalanụ Urefu maa 'yaka bụ. 'Waŋna bukwuto ata bụ ga jɛshɛrɛjɛ uhwa. 16Mbiso Faro maa, AGWANGWAMA, na shɛ Agwatana Ehibru, n tumwanɛ maa Mo bu mbiso maa, Ganga atwa ubwa maa a zhɛbɛ bụ nụ ụshɛka; bụ ta hwụjɛ shɛ waa taa hwayɛ o. 17AGWANGWAMA hiɛŋ, Ni inɛ gɛ, ɛbi zhɛ ba mapa maa ubwa shɛ AGWANGWAMA. Hioko, N zhɛ ma pa bukwuto ga Ngaa 'waŋnɛ nu Urefu ga, nazhɛ wɛɛ zhɛ wa jɛshɛrɛga mehieŋ.#N-ndu 16:4 18Ijɛnɛ nɛ zweni nu Urefu ga zhɛ yo 'wo, meni mu bwa mi zhɛ ma 'yagana Ejipti ụhiụŋ keeni inyizhi tuswa. 19Nazhɛ AGWANGWAMA hiɛŋ Moses, mbiso Aron maa, Shapa bukwuto bu maa nderishinji u'ala bụ maa peteni bu ne meni mi Ijipti, te erefu aba, ta awapa aba, to okwokwo keeni nsoso ma aba, maa mɛ shɛ mehieŋ; iwɛ maa mehieŋ mu nama no ofwo elele na cɛnjɛ ti Ijipti, ti iyi uhwara ya aba i'wɛ'wɛ keeni inɛ ya atayɛ kpaaŋ.

20Go Moses keeni Aron njɛ gana na ta AGWANGWAMA peni aŋ unu, bee shepi bukwuto bwa na azuba, boo po bu nu Urefu Nayɛl, ne eshe Faro keeni eshe anjɛ-ugondu ubwa hwɛɛ, ibɛ po Urefu ata shɛ mehieŋ kpaaŋ. 21Ijɛnɛ nɛ zweni ni Nayɛl 'wi, nazhɛ Urefu ata 'yajɛ ya ụhiụŋ, Ejipti eri shi a swa ya meni mu bwa o; iwɛnɛ te mehieŋ mu namɛ no ofwo elele ni Ijipti. 22Anjɛ-tishino Ijipti njɛ du gana ata no tishino ta aba; nazhɛ amɛ Faro a kaana tɛshɛshɛpana waa, baa lacɛ maa hwuga iwɛ ya aba, gana na ta AGWANGWAMA ga dumwa. 23Ga Faro panɛ aba, bee teni nu umwono ubwa, okwo ti yaa shɛ gana ata, bi shiyeni shi iwɛ gɛ na amɛ ubwa waa o. 24Ibɛ po atwa Ijipti kpaaŋ hinenji a'ibwa nụ ụpalanụ Urefu ata iwɛ maa a kwụbɛ meni mu tuswa, iwɛnɛ te e eri shi a swa meni mu Urefu ata.

25I namwawaŋ kaa ijitɛ icenje ta AGWANGWAMA jibi Urefu ata.

Currently Selected:

ỤBANỤ 7: RBT

Highlight

Copy