ỤBANỤ 9

Tishikpe to Tu'wo ti Iyimabiga

1Nazhɛ AGWANGWAMA hiɛŋ Moses, Zhaga tonono Faro, mbiso bu maa AGWANGWAMA na shɛ Agwatana Ehibru hiɛŋ, Ganga atwa mi maa e zhe a n zhɛbɛ. 2Yaa shɛ abụ lacɛ aŋ tuganga, abu ta untanganɛ aŋ waa, 3N zhɛ ma tumwanɛ ụngwụ ụwɛ na zhɛ wa kwụna iyimabiga bụ, ti idɛkwɛ, tu nzhinyacɛ, tu nruhondo, ti inɛ, ti iyweywe keeni agwụdụ. 4Ama N zhɛ mo shilo ogwungwu ni iyimabiga ya atwa Isrɛl ni iyimabiga ya atwa Ijipti, iyimabiga nɛ atwa Isrɛl 'yajɛ zha shɛ yo 'wo okwo ike o. 5Nazhɛ AGWANGWAMA shiri aka ibɛ, bɛɛ hiɛŋ, Beyi Ngɛɛ zhɛ ma nda ijɛ na cɛnjɛ tu ga. 6Iyi tuholo ibɛ AGWANGWAMA njɛ ga ijɛ; iyimabiga ye Ejipti 'wi kpaaŋ, ama iyimabiga ye E'isrɛl 'wi shi okwo ike gba o. 7Ga Faro tumwanɛ butumwa apata, ɛɛ kwubɛ maa iyimabiga ye E'isrɛl 'wi shi okwo ike o. Amɛ Faro shɛshɛpanɛ waa, bi genji shi atwa ata maa ee hwuri o.

Tishikpe ta Shitwa

8Nazhɛ AGWANGWAMA hiɛŋ Moses keeni Aron, Sugo ma ma'alụ ni i'ɛlɛ hiŋ pwomuu, maa go Moses 'wɛŋ mụ na azuba ne eshe Faro. 9Mi zhɛ ma sha upwupwutu na cɛnjɛ ti Ijipti kpaaŋ, mi zhɛ ma sha du shitwa shɛ na shi zhɛ sha tagana atwa, keeni iyimabiga na cɛnjɛ ti Ijipti kpaaŋ. 10Ee suji ga ma'alụ ma ata, ee shikeni na agba Faro, go Moses 'wɛŋ ma'alụ ma ata na azuba, maa shɛ ga shitwa shɛ na shi tegeni atwa, keeni iyimabiga.#N-ndu 16:2 11Anjɛ-tishino eri shi o shikono na agba Moses, iwɛ shitwa sha ata o, iwɛnɛ ta shitwa shi tegeni du anjɛ-tishino gana atwa vwɛ Ijipti kpaaŋ. 12AGWANGWAMA leni kaa maa amɛ Faro shɛshɛpanɛ, bi leni shi n-ndumwa mu Moses na Aron tuhwuga, nu gana na ta AGWANGWAMA mbiswo la Moses.

Tishikpe ta Atayɛ-eshilo

13Nazhɛ AGWANGWAMA hiɛŋ Moses, Gbatụ beyi ti'ishijɛ nu uvwungwa dididi maa zhe shikono na agba Faro, maa mbishi bu maa, AGWANGWAMA na shɛ Agwatana Ehibru hiɛŋ, Ganga atwa mi maa a n zhɛbɛ. 14Iwɛnɛ po na aka ga Ngɛɛ zhɛ ma bụ tumwananɛ iyi ye eseyida mi a na wumanjɛ kpaaŋ, keeni anjɛ-ugondu bu, keeni atwa bụ, iwɛ maa mepi maa i zasa bụtụ na shɛ gana mi na cɛnjɛ tu unyizo kpaaŋ o. 15Hwuwayɛ go N eri ma bụ bacɛnganɛ ukpahiŋ mu maa Ma bụ nda ufwu nu ụngwụ ụwɛ keeni atwa bụ, iwɛ maa e bi becinji na cɛnjɛ tu unyizo. 16Ama iwɛ inɛ gɛ kaa Ngee bi shiri, maa Mo bu mbisono ukpahiŋ Mu, iwɛ maa izeci mi beni urishi na cɛnjɛ tu unyizo kpaaŋ.#Rom 9:17 17Bu to momo mungwicingo waa na atwa mi, abụ lacɛ aŋ tuganga maa e hwuri. 18Hioko, aka gana ga beyi, N zhɛ mɛ 'wɛŋ atayɛ-eshilo a'wụtụ a na usara wa aba ta zasaba la kwukwuŋ te kwuni na aka na ti Ijipti kwuni uuwa i ci aka ga. 19Iwɛbɛ po tumwana atwa hwuwayɛ go, maa a intanganɛ iyimabiga bu keeni iyi elele bu nɛ namɛ ne ehilo tebiye; iwɛnɛ ta atayɛ ata eshilo zhɛ a tagana bụtụ be elele keeni iyimabiga ye elele nɛ namɛ ne ehilo, nɛ ee suji shi maa a intanɛ ni ihwɛɛ, i zhɛ kaa yo 'wo. 20Nazhɛ anjɛ-ugondu Faro oko a na a nda inyɛsɛ n-ndumwa ma AGWANGWAMA, tecenji ajama aba, ti iyimabiga ya aba no shimwono. 21Ama atwa na n-ndumwa ma AGWANGWAMA mu tatụlanụ sụ, gɛnjɛ ajama aba keeni iyimabiga ya aba ne ehilo.

22Nazhɛ AGWANGWAMA hiɛŋ Moses, Sakana u'ala bụ na azuba, iwɛ maa atayɛ-eshilo ngbe na cɛnjɛ ti Ijipti kpaaŋ, maa e tegeni bụtụ be elele, ti iyimabiga, ti iyi elele nɛ aa bɛrɛ na cɛnjɛ ti Ijipti kpaaŋ. 23Go Moses sekeni ga bukwuto bwa na azuba; nazhɛ AGWANGWAMA tumwanɛ oto keeni atayɛ-eshilo, ulwa leshegeji ofwo geri geri. AGWANGWAMA leni maa atayɛ-eshilo ngbe na cɛnjɛ ti Ijipti. 24Atayɛ-eshilo namɛ, ulwa na kaa hintotongwu na atayɛ-eshilo ata wumanjɛ duwa, usara ubwa ta zasaba la kwukwuŋ te kwuni aka na ti Ijipti kwuni uuwa i ci aka na Ijipti 'yajɛ udenji wa aba.#N-ndu 8:7; 16:21 25Atayɛ ata eshilo kwụnɛ iyi elele nɛ namɛ no tupohondo na cɛnjɛ ti Ijipti kpaaŋ, ta atwa, ti iyimabiga, atayɛ ata eshilo du kwunananɛ iyi elele nɛ aa bɛrɛ ne ehilo, yaa sashanjɛ i'wɛ'wɛ ye elele nɛ namɛ ne ehilo. 26Asha na cɛnjɛ tu Goshɛn, tu na miaụŋ mi Isrɛl mu namɛ kiri atayɛ ata eshilo zasaba.

27Ga Faro tumwanɛ butumwa, aa suyanɛ Moses na Aron, bɛɛ hiɛŋ aŋ, N njɛ i'wɛwɛ na aka ga; n-ndumwa mɛ zhɛmɛ AGWANGWAMA, ama Gamba na atwa mi, tu 'wanjɛ. 28Tabwa ma AGWANGWAMA, inɛ gɛ gwumwa ya, iwɛ maa oto ga keeni atayɛ-eshilo o hwuwowu ya; nazhɛ Ma hi ganga maa hi hwuri, hi zha shɛ hio ilogogo ya epe o.

29Go Moses mbishi Faro, bɛɛ hiɛŋ, Gunu na ti Ngee beni hwayɛ nụ ụshɛpwụ ga, N zhɛ mo sugono AGWANGWAMA i'ɛlɛ mi na azuba. Oto zhɛ a ganga, atayɛ-eshilo zhɛ o hwuwowu, iwɛ maa mepi maa cɛnjɛ tu unyizo ga tɛ shɛ ma tu ta AGWANGWAMA. 30Ama M mepi maa tu gabụ, ta anjɛ-ugondu bu, hi ta sụmɛ shɛ AGWANGWAMA na shɛ Agwatana inyɛsɛ o.

31Tizhe keeni iyimɛyɛ bali njɛ ufwu; iwɛnɛ ti iyimɛyɛ bali i towo shifubo, tizhe kaa tu sumbi aka ata. 32Ama iyimɛyɛ wit njɛ shɛ ufwu o, iwɛnɛ ti yaa gbatụ sụ tuna. 33Go Moses banɛ ga no olugwo Faro, bee genji ụshɛpwụ ata, bee sekeni AGWANGWAMA u'ala ubwa; nazhɛ oto, na atayɛ-eshilo keeni eshilo dwa ya. 34Ama aka na tu ga Faro kwụbɛ maa eshilo, na atayɛ-eshilo keeni oto genji ya, baa ndaananɛ iwɛwɛ, boo to tɛshɛshɛpana na amɛ ubwa, tu ubwa, keeni anjɛ-ugondu ubwa. 35Gabata amɛ Faro shɛshɛpanɛ, bi genji shi miaụŋ mi Isrɛl maa e hwuri o, nu gana na ta AGWANGWAMA ga dumwa no Moses.

Currently Selected:

ỤBANỤ 9: RBT

Highlight

Copy