UMOZHIGO 19

Atumwa-azuba Eyebi Zhaganɛ Lụt

1Nazhɛ atumwa ata azuba eyebi zhe Sụdụm nụ ụrụmɛ ata, ga Lụt jɛjɛ no odubo Sụdụm. Tu ga Lụt kwụbɛ aŋ, bɛɛ ishijɛ bee teji aŋ uhwaŋna, bee kwuzhi, bee ubi ụpɛshɛka ubwa na cɛnjɛ. 2Bɛɛ hiɛŋ aŋ, N-nyarɛ mi mi, ma hi tabwa, maa hi vwurɛ pi yɛu gɛ hiŋ ugondu, maa hi woto, maa hi fwoci shivwɛvwɛjɛ shi hiŋ, nazhɛ hi gbatụ ti'ishɛga beyi nu uvwungwa maa hi hwuri.

Ɛɛ jishijɛ bụ, ɛɛ hiɛŋ, Ti zhɛ to woto no tupohondo tu ga uuwa iyi heri. 3Baa uranjɛ aŋ uuwa nazhɛ a vwụrɛ pu bwa, ee teni nu umwono ubwa, baa ndanɛ aŋ iyimɛyɛ baa 'imɛ aŋ ugaiŋ, na akara na zasa Ifucingɛ, aa yɛ. 4Etwenyi Sụdụm bananjɛ kpaaŋ, ta miaụŋ, tu n-nyarɛ, aa zhajɛ oo rungwutwonu umwono ata, tobwolo agaiŋ ata te zhe shi no ofwo buweci o. 5Ee keri Lụt ụhiɛŋshɛ, ɛɛ hiɛŋ bụ, Ce etwenyi ga zhajɛ pụ bụ nụ ụrụmɛ go namɛɛ? Utu bacɛnganɛ aŋ maa to woto na aba.

6Ga Lụt banɛ bee zhe no ofwo aba no odubo, bee kepi odubo mabaaba, bɛɛ hiɛŋ aŋ. 7Ma hi tabwa, ahiɛba eyejilo mi, ta nda ma iyi ici'nyɛ gɛnɛ gɛ o. 8Hioko ma, N 'yajɛ miaụŋ-mo-o mi yebi mu na mi ta shɛ asapa, okwu ma, me ci ba ma hiɛ bacɛnganɛ aŋ maa hiɛ njɛ aŋ gana elele na ihiɛ kwụlanɛ, inɛ etwenyi ga i shɛ ta nda aŋ ma iyi elele o, iwɛnɛ to o twonuo ya nu umwono mu maa ma jilanɛ aŋ.#Ajɛmɛ 19:22-24

9Ɛɛ hiɛŋ bụ, Kaana beye izhɛ gabụ bụlashɛ ga, Gaaba abɛ shɛ bwa maa no ti shilono iwɛɛ? Hwuwayɛ go iyi nɛ ɛti zhɛ ta bụ nda zhɛ ya wụmangwụ uhwuri gana na ɛti gɛ zhɛ ta nda aŋ. Ee shishingeni Lụt beye, ee suri maa e bweji ukpa.

10Ama atwa ata eyebi bwɛ u'ala ee shepi Lụt ee tecinji nu umwono no ofwo aba, ee kepi odubo. 11Ee libicinji shishe sha atwa ata tileni no odubo umwono ata, ta na gwụmwatangwụ, ta na gembenji, gabata ee lukwumenji no odubo umwono ata tijalakaka.#2 Shɛgwu 6:18

12Nazhɛ atumwa ata azuba hiɛŋ Lụt, Bu ta 'yajɛ bụtụ be elele epe namɛ swooŋ ne hiŋ ga hŋ? Anua bụ, ta miaụŋ mụ bụ me eyi, ta mu na mo o, keeni bụtụ be elele na abụ ta 'yajɛ bacɛnga aŋ nụ ụshɛpwụ ga. 13Ti zhɛ ta nda epe ufwu, iwɛnɛ to rundu ra aba ru hwuleji no ofwo AGWANGWAMA, AGWANGWAMA kaa utu tumwanɛ maa ta nda uŋ ufwu.

14Ga Lụt beni bee zhegeni atwa na zeni miaụŋ mu bwa, bɛɛ hiɛŋ aŋ, Ishijɛ ma hi beni epe kakayɛ, iwɛnɛ ta AGWANGWAMA zhɛ a nda ụshɛpwụ ga ufwu. Ama i shanɛ olwo miaụŋ mu bwa gana maa itɛjɛ baa njɛ.

Ga Lụt na Atwa umwamwa Ubwa Beni nu Sụdụm

15Aka na ti iyi heri atumwa ata azuba a ta Lụt izɛlɛgwu, ɛɛ hiɛŋ, Ishijɛ kakayɛ maa shepi biyikwo bu, ta miaụŋ mụ bụ mo o mi yebi mu na mu namɛ epe, iwɛ maa kede hiɛ njɛ ufwu nu ulwapɛ na ɛɛ zhɛ a pana ụshɛpwụ ga o. 16Ama ga Lụt ba nda ti'insu, ibɛ po etwenyi ata 'imɛ bụ u'ala, tu u'ala biyikwo bwa, keeni i'ɛlɛ miaụŋ mu bwa mo o mi yebi. AGWANGWAMA hieci inyɛmɛnyɛmɛ ibwɛ, ɛɛ bɛcinjɛ aŋ, aa gɛgɛcɛnjɛ aŋ no tupohondo tu ụshɛpwụ ata.#2 Pita 2:7 17Aka na tɛ ɛ bɛcinjɛ aŋ no tupohondo, atumwa ata azuba hiɛŋ bụ, Gozhigo iwɛ uhiuhiu bu, ta mbiyanɛ ekwunyi o, to shikono kaa nụ ụdadarɛ we elele o, gozhigo zhaga ni Ishɛmɛ ɛtɛ, iwɛ maa kede hiɛ njɛ ufwu o.

18Ga Lụt hiɛŋ aŋ, Oo n-nyarɛ mi mi, kede i shɛ gana ata o. 19Hi kwụbwa inyɛmɛnyɛmɛ mi duwa, ehi m bicingwo kaa, ama N eri shi kaa mo gozhigo mo to Ishɛmɛ ɛtɛ o, iwɛ maa iyi iwɛ mo n jitono hwayɛ mo 'wo tobwolo N te ci shi apata o. 20Hioko ma, ụshɛpwụ ye gwumwonu, na Ngee eri mo gozhigo mo tono nu ubwa, ubwa du kaa gwumwa dice. N leneni ma maa mo gozhigo apata, okwo tu waa namɛ dice, iwɛ maa mo bino!

21Bɛɛ hiɛŋ bụ, N leneneni iwɛ nɛ abɛ jɛmɛ, maa N zha shɛ ma nda ụshɛpwụ ata aba njɛ iwɛ ubwa ufwu o. 22Shana ikɛnyi maa ci apata, N zha shɛ ma nda iyi elele nazhɛ ci apata o. Iwɛbɛ po ɛɛ hiɛŋ izeci ụshɛpwụ ata Zoa.#19:22 Zoa: Egini Zoa i shɛ, dice. 23Uwaŋna banɛ aka na tu ga Lụt teni Zoa.

A njɛ Sụdụm keeni Gụmụra Ufwu

24Aka ata AGWANGWAMA leni maa ge tuwiŋ-tu-uwaŋna keeni ulwa banɛ na azuba maa ti ngbe nu Sụdụm keeni Gụmụra.#Mat 10:15; Luk 10:12; 17:29; 2 Pita 2:6; Judu 7 25Wee iricinji ashɛpwụ ata, tụ ụdadarɛ ata kpaaŋ, ta atwa na zwegeni na ashɛpwụ ata kpaaŋ, ti iyi nɛ waŋnɛ na cɛnjɛ. 26Ama biyikwo Lụt na gɛ lɛ ekwunyi nu bwa mbiyanɛ ekwunyi, ibɛ po baa shɛ umanga manɛ.

27Ga Abraham zhinjɛ nu uvwungwa dididi, bee zhe kakayɛ no ofwo ata bee shikeni la nu umbe AGWANGWAMA. 28Bee shepi eshe geri bu Sụdụm keeni Gụmụra, ti geri bụ ụdadarɛ ata kpaaŋ, baa kwụbɛ nshikwo mụ ụshɛpwụ ata ti mɛ ishijɛ na cɛnjɛ tututu gana nshikwo mu ujigo ụ'wụtụ.#N-ndu 9:2 29Na aba ibɛ gana na ta Agwatana njɛ ashɛpwụ ata namɛ nụ ụdadarɛ ata ufwu kpaaŋ, Agwatana teyinje Abraham, gana na ti bɛɛ bɛcinjɛ Lụt na ashashɛ tuhwuŋzwo ta ata, na aka na bee hwuŋzetenji ashɛpwụ ata na ga Lụt ga namɛ la na amɛ ubwa.

Iwɛwɛ nɛ Miaụŋ mo o mu Lụt mi Yebi mɛ Njɛ

30Ga Lụt banɛ baa jɛjɛ ni Ishɛmɛ ɛtɛ, miaụŋ mu bwa mo o mi yebi mu namɛ nu bwa, iwɛnɛ tu baa nda inyɛsɛ tɛgɛga nu Zoa. Iwɛbɛ po baa jɛjɛ na amɛ apangwụ, na miaụŋ ma ata mu bwa mi yebi. 31Nazhɛ yɛu ibwɛ i'wɛtwɛ hiɛŋ buhongwu bwa, Bishi tu injɛ ya, i zasa kaa butubwenyi be elele na namɛ na cɛnjɛ tu ga maa woto no tu gana na ta atwa unyizo ga kpaaŋ a nda o. 32Hwure, ti peni bishi tu mayaga maa mɛ 'imɛ bụ, maa tu woto nu bwa, maa bishi tu 'yaga ajalụ.

33Ee peni ga bishi ba aba mayaga nụ ụrụmɛ ata, nazhɛ yɛu ibwɛ i'wɛtwɛ teni bee weci ne bishi bwa, ga Lụt mepi shi kaa aka na bee weci keeni aka na bɛɛ ishijɛ o.

34Ti iyi heri, ibɛ yɛu ibwɛ i'wɛtwɛ hiɛŋ, buhongwu bwa, Hioko, N nge weci ne bishi mi wenebe nụ ụrụmɛ. Ti peneneni bu hwayɛ mayaga nụ ụrụmɛ maa teneni bu maa woto nu bwa iwɛ maa ti tileneni bishi tu ajalụ. 35Ee peneneni ga bishi ba aba mayaga jita ata nụ ụrụmɛ, nazhɛ yɛu ɛtɛ tidice ishijɛ bee zhe bee weci ne bishi bwa. Ga Lụt mepi shi aka na tu baa zhajɛ bee weci, na aka na ti bɛɛ ishijɛ o.

36Gabata miaụŋ mu Lụt mi yebi mi le shifubo ne bishi ba aba. 37Ibɛ yɛu ibwɛ i'wɛtwɛ meci yɛu-ye-eyi, boo po iŋ izeci tu go Moab,#19:37 Moab:Egini to Moab i shɛ, i banɛ no olugwo bishi mi. ubwa shɛ bishi ba Amoab tutu ta hwayɛ. 38Buhongwu du meci yɛu-ye-eyi, boo po iŋ izeci ti gɛ Bɛn-ami,#19:38 Bɛn-ami: Egini tɛ Bɛn-ami i shɛ, yɛu-ye-eyi ya atwa mi. ubwa gatata shɛ bishi ba A'amon tutu ta hwayɛ.

Currently Selected:

UMOZHIGO 19: RBT

Highlight

Copy