UMOZHIGO 20

Ga Abimɛlɛk Shepi Biyikwo Abraham

1Ga Abraham beni nu Mamre, bee hwuri zalụ tuta ti Kenan, baa jɛjɛ na ashashɛ Kadɛsh nu Shu. Yaa namɛ fwalaa baa jɛjɛ ya ni Gira. 2Ga Abraham ba duma iwɛ Sara biyikwo bwa, bɛɛ hiɛŋ, Bụngwụfwụ mi baa shɛ. Ga Abimɛlɛk agwuma Gira, tumwanɛ bụtụ, aa shapɛrɛganɛ bụ Sara.#Umoz 12:13; 26:7

3Ama Agwatana zhaganɛ Abimɛlɛk nụ ụwalabụ nụ ụjita, bɛɛ hiɛŋ bụ, Hioko, bi zhɛ bo 'wo iwɛ biyikwo ata ebi shepi, iwɛnɛ po biyikwo bụtụ baa shɛ. 4Ga Abimɛlɛk kaa te timengeni shi biyikwo ata o, bɛɛ hiɛŋ, Agwangwama, bi tɛ zhɛ suu ba kwụna waa udenji tiririri? 5Shɛ ubwa suu ni ikɛnyi ibwɛ m mbishi maa bụngwụfwụ bwa baa shɛ? Te biyikwo du ni ikɛnyi ibwɛ hiɛŋ maa ikwenyi ibwɛ tɛ. N njɛ ijɛ na ahaŋsa mi tụrụmbɛɛ, N njɛ shɛ iyi nɛ 'wanjɛ kwukwuŋ.

6Nazhɛ Agwatana mbishi bu nu ụwalabụ ata, bɛ hiɛŋ, Iwɛ-tɛkana, M mepi maa na ahaŋsa bụ tụrụmbɛɛ abɛ njɛ iŋ. Gamba du kaa m bụ njɛ ukwurishi iwɛ maa kede n njɛ i'wɛwɛ o, iwɛbɛ po Ngee leni shi maa timengeni bu. 7Hwuwayɛ go asha gwuricingono bụtụ ata biyikwo bwa iwɛnɛ po bigesere baa shɛ, nazhɛ bɛɛ zhɛ ba nda adua iwɛ bụ, iwɛ maa bini. Yaa shɛ kaa ebi gwuricingeni shi bu biyikwo bwa, mapa maa bi zhɛ bo 'wo tilɛɛ, ta atwa elele na abu 'yajɛ.

Ga Abimɛlɛk Leyiteni Abraham

8Nazhɛ ga Abimɛlɛk gbatụ ti'ishijɛ nu uvwungwa dididi, baa suyanɛ anjɛ-ugondu ubwa kpaaŋ, bee mbishi aŋ n-ndumwa mu ga kpaaŋ, maa a hwụjɛ. Ibɛ po atwa ata njɛ inyɛsɛ duwa. 9Ga Abimɛlɛk suyanɛ Abraham, bee heŋteni bu, bɛɛ hiɛŋ, Imbe nɛ abɛ tɛ njɛɛ? Cee Ngee bi pindeni upo ebi ti peteni iwɛwɛ gɛ i'wɛtwɛ 'wɛtwɛ, ta atwa cɛnjɛ ti mii? Ijɛ abɛ n njɛ bana i ga lanɛ shɛ maa bụtụ njɛ binya bwa o. 10Ga Abimɛlɛk hiɛŋ Abraham, Ahaŋsa imbe kwuuŋ namɛ na amɛ bụ upo abɛ njɛ ijɛɛ?

11Ga Abraham hiɛŋ, Iwɛnɛ ti Ngee heŋshi maa atwa epe sụmɛ shɛ Agwatana inyɛsɛ o, ɛ zhɛ ma n kwụna maa e leshiji biyikwo mi. 12Okwo ti yaa shɛ gana ata, bụngwụfwụ mi yibwa baa shɛ gom, bishi mi meci bu ama shɛ amɛ oko tuba atu banɛ nu bwa o, ibɛ po Ngee zeni bu. 13Aka na ta Agwatana leni maa ma banɛ ni ihwɛ bishi mi, Ngɛɛ hiɛŋ bụ, Uwebiye nɛ ɛbi zhɛ bu ma ndana na, ofwo elele na eti teni, na duma iwɛ mi maa, Ikwenyi bu Ngaa shɛ.

14Ga Abimɛlɛk peni Abraham agwụdụ, ti inɛ, ta ajama o o, keeni ajama eyi. Nazhɛ bee gwuricingeni Abraham biyikwo bwa ga Sara. 15Ga Abimɛlɛk hiɛŋ Abraham, Cɛnjɛ ti mi tu ta tụ bụ balanɛ, gɛga no ofwo elele na ụbụ kwụlanɛ.

16Ga Abimɛlɛk hiɛŋ Sara, M pwonuo ikwenyi bu azụrụfa akpakwụ-a-ta (1,000), gɛ inɛ ɛtɛ shɛ iyi n-ndumwa mụ bụ ụzhɛ ne eshe atwa elele na namɛ pụ bụ, n-ndumwa ee bi peni ụzhɛ ne eshe atwa elele, maa mepi maa bɛ njɛ shɛ iyi iwɛ ye elele o.

17Ga Abraham lụpɛ Agwatana, nazhɛ Agwatana nɛnjɛ Abimɛlɛk, te biyikwo bwa keeni ajama ubwa o o, nazhɛ ee meci miaụŋ. 18Iwɛnɛ po Agwatana go kopwo n-ngwuno mu tumata me eyikwo ihwɛ Abimɛlɛk hwɛɛ iwɛ Sara biyikwo Abraham.

Currently Selected:

UMOZHIGO 20: RBT

Highlight

Copy