UMOZHIGO 21

Tumata ta Azik

1Ibɛ AGWANGWAMA hieci inyɛmɛnyɛmɛ Sara, gana na ti bee shileni bu la unu. 2Ga Sara le ofubo, bee metenji Abraham yɛu-ye-eyi na aka ti'inga tu bwa, na aka na ta Agwatana mbishi bu la gom.#Ehib 11:11 3Ga Abraham po yɛu ɛtɛ ga Sara metenji bu izeci ti ga Azik. 4Ga Abraham kaa jeji teleyi ti yɛu ibwɛ ga Azik na aka na tu baa ulwa ijitɛ itindɛtu te e meci bu, gana na ta Agwatana peni bu la unu. 5Tɛzhɛla ta Abraham tɛ shɛ shiywa dipi-yebi (100) na aka na te e metenji bu Azik.

6Ga Sara hiɛŋ, Agwatana upo Ngaa hiɛnjɛ ilɛtu, atwa elele na hwụjɛ, ɛ zhɛ a hunga du ilɛtu ne mi. 7Bɛɛ hiɛŋ, Gaaba gɛ tɛ zhɛ bɛ hiɛŋ Abraham maa ga Sara tɛ zhɛ ba pana miaụŋ mosuboo? Gamba na kaa m metenji bu yɛu na ti'inga tu bwa. 8Yɛu ɛtɛ ya waŋna, ga Abraham njɛ iyimɛyɛ i'wɛtwɛ unyasa nụ ụjita na ga Azik jwe unu no mosubo.

E Unzhi Haga keeni Ishmɛl

9Ga Sara kwụbɛ gana na ti yɛu Haga na shɛ Bijipti metenji Abraham ya nda Azik asada. 10Ga Sara hiɛŋ Abraham, Kala bujama ga bụ bo o, ti yɛu ibwɛ, iwɛnɛ po yɛu bujama ga bo o shɛ shɛ ya ya ogwu bu ni yɛu mi ga Azik o.#Gala 4:29,30

11Iwɛ ɛtɛ gwumanɛ Abraham tebiye, iwɛnɛ po ubwa du kaa meci bu. 12Nazhɛ Agwatana hiɛŋ Abraham, Kede iwɛ usemberi ga keeni iwɛ bujama ga bụ bo o ubu gwumanɛ o, iyi elele nɛ ga Sara mo bu mbiso iwɛ ubwa, na hwuga-unu ubwa, iwɛnɛ po tedure na Azik ɛɛ zhɛ a suyana ajalalo bu.#Rom 9:7; Ehib 11:18 13N zhɛ du ma nda yɛu bujama ga bo o udenji uko, iwɛnɛ tu baa shɛ ụlamụ bụ.

14Ibɛ po ga Abraham gbatụ ti'ishijɛ nu uvwungwa dididi, bee peni Haga iyimɛyɛ keeni okoko meni, bee peteni bu nu ututu, bee peneneni bu yɛu ɛtɛ, bee unzhi aŋ ee hwuri. Ga Haga beni apata, baa inanga nụ ụshɛka Biɛ-shiba.

15Aka na meni mo okoko mu hwuwowu, ga Haga shepi yɛu bee keri tuta tu ukokoto uko na namɛ apata. 16Bee zhe baa jɛjɛ zalụ bu ko apata taa dụlụ i ci ụkwụmbwụ gana na bụtụ eri ba kala i'ilɛ. Iwɛnɛ po bi hiɛŋ, Kede yɛu gɛ dwa ihwungwɛ ni i'ɛlɛ mi o. Baa jɛjɛ tee bebeye, bee shepi rụhwụŋ na azuba baa twa-u'wo.

17Nazhɛ Agwatana hwụjɛ rụhwụŋ ri yɛu ɛtɛ, ibɛ po butumwa-ba-azuba suyanɛ Haga, na azuba, bɛɛ hiɛŋ bụ, A-Haga, imbe bɛ njɛɛ? Ta nda inyɛsɛ o, iwɛnɛ po Agwatana hwụjɛ n'ungwa mi yɛu ɛtɛ no olugwo na yaa namɛ. 18Ishijɛ maa shepi yɛu ɛtɛ maa untangana iŋ, iwɛnɛ ti Ngɛɛ zhɛ ma nda ajalalo ubwa udenji ụ'wụtụ.

19Nazhɛ Agwatana kepishinji eshe Haga, baa kwụbɛ umɛzhinjɛ meni uko, bee zhe bee shidinje meni no okoko, bee peni yɛu ɛtɛ yee swe.

20Agwatana kaa namɛ ni yɛu ɛtɛ, yaa waŋnɛ, yaa jɛjɛ kaa nụ ụshɛka ata, yaa shɛ bugwoni ba tijala. 21Bɛ jɛjɛ nụ ụshɛka Paran, ibɛ bino zenenji bu biyikwo na shɛ yɛu ye Ejipti.

Ga Abraham Twa-unu na Abimɛlɛk

22Aka ata, ga Abimɛlɛk keeni Fikol na shɛ uhiu we ejeshi ubwa, hiɛŋ Abraham, Agwatana namɛ na bụ, na amɛ iyi elele nɛ aba nda.#Umoz 26:26 23Iwɛbɛ po Ama jala maa n teji Agwatana epe, maa bu zha shɛ bu ma halakaka, ti yɛu mi keeni ajalụ mi o, semi gana na ti Ngee bi mepeni iwɛ, gana ata du ɛbi zhɛ bu ma nda na cɛnjɛ tu ga abɛ jɛjɛ na tuba.

24Ga Abraham hiɛŋ, N zhɛ ma ta ga Agwatana.

25Ga Abraham gagwụmɛ na Abimɛlɛk iwɛ umɛzhinjɛ meni na miaụŋ-mu-ugondu Abimɛlɛk mi leshiji na abwagara. 26Ga Abimɛlɛk hiɛŋ bụ, M mepi shi bụtụ na njɛ iŋ o, gabụ kaa du bi m mbishi shi o, Gamba kaa N hwụjɛ shɛ o, semi hwayɛ ga kiri.

27Ga Abraham peni Abimɛlɛk agwụdụ oko keeni inɛ, nazhɛ aa twa-unu hwɛɛ aba ebe yebi. 28Ga Abraham suji miaụŋ-ma-agwụdụ mo o mi cenje bee tileni aŋ swooŋ. 29Nazhɛ ga Abimɛlɛk heŋteni Abraham, bɛɛ hiɛŋ, Imbe kwuuŋ shɛ ecilo miaụŋ-ma-agwụdụ mo o mi cenje mu ga ebi tileni swoooŋ?

30Ga Abraham jishijɛ bụ, bɛɛ hiɛŋ, Iwɛ maa leshiji miaụŋ-ma-agwụdụ ga mo o mi cenje, maa i shɛ useyida maa Gamba n hini u'ibwa meni ga.

31Iwɛbɛ po boo po apata izeci maa Biɛ-shiba#21:31 Biɛ-shiba: Egini Biɛ-shiba i shɛ, a'ibwa meni ecenje, kwo kaa a'ibwa meni unu-tishilo. iwɛnɛ ta a twa-unu ebe yebi apata.#Umoz 26:33

32Aka na to o momo shilonu-unu apata nu Biɛ-shiba, ga Abimɛlɛk ne Fikol na shɛ uhiu we ejeshi ubwa ishijɛ, ee gwuri na cɛnjɛ ta Afilistia. 33Ga Abraham bɛrɛ i'wɛ'wɛ ike nɛ ɛɛ hiɛŋ Tamarisk ni Biɛ-shiba, bo o po apata AGWANGWAMA izeci, bɛɛ hiɛŋ Agwatana unyizo-nom. 34Ga Abraham kaa jɛjɛ na cɛnjɛ ta Afilistia te ilegeji.

Currently Selected:

UMOZHIGO 21: RBT

Highlight

Copy