UMOZHIGO 39

Iyi Elele Zhɛmanɛ Josɛf ni Ihwɛ Potifa

1Atwa Ishmɛl shepi Josɛf ee zwi ni Ijipti, go Potifa na shɛ bɛnjɛ-bu-ugondu Faro bu ko na kaa shɛ uhiu wa a'iywa ni ihwɛ Faro Bijipti ata so bu ni i'ɛlɛ ya atwa Ishmɛl a na shepi bu zwi apata. 2AGWANGWAMA kaa namɛ no Josɛf, baa shɛ bụtụ na iyi elele zhɛmanɛ, baa namɛ ni ihwɛ ya agwuma-ihwɛ ibwɛ na shɛ Bijipti ata.#Ugo 7:9 3Agwuma-ihwɛ ɛtɛ ibwɛ kaa kwụbɛ maa AGWANGWAMA namɛ no Josɛf, AGWANGWAMA kaa leni maa ge iyi na zhɛmana bụ. 4Ibɛ po go Potifa bo lubo Josɛf, baa nda bụ tebiye, baa njɛ bụ kaa uhiu ihwɛ ibwɛ kpaaŋ, bee utegeni bu kaa iyi elele nɛ baa 'yajɛ kpaaŋ. 5Te kwuni na aka ata tu baa njɛ bụ uhiu ihwɛ ibwɛ, ti iyi elele nɛ baa 'yajɛ. Nazhɛ AGWANGWAMA peni ihwɛ Bijipti ata uwebiye iwɛ Josɛf, ibɛ po uwebiye ya AGWANGWAMA namɛ ni iyi elele nɛ baa 'yajɛ, ti ihwɛ ibwɛ, te ehilo ubwa. 6Ibɛ po go Potifa gengeni Josɛf iyi elele ni i'ɛlɛ ibwɛ maa ngbaraka iŋ. Bi mepi shi ya okwo iyi elele nɛ baa 'yajɛ o, semi iyimɛyɛ nɛ baa ya kiri.

Go Josɛf kaa sebi usemberi tebiye, baa pilanụ kaa igbɛtɛtɛ. 7Na aba ibɛ biyikwo ba agwuma-ihwɛ Josɛf ngbarakacɛ bụ, bɛɛ hiɛŋ Josɛf, hwure woto ne mi.

8Ama go Josɛf lacɛ, bɛɛ hiɛŋ biyikwo ba agwuma-ihwɛ ibwɛ, Hioko, agwuma-ihwɛ mi mepi shi iwɛ iyi elele nɛ namɛ ne mi ni ihwɛ gɛ o, Gamba kaa bee utegeni iyi elele nɛ baa 'yajɛ hwɛɛ. 9I zasa kaa bụtụ na te me hwuri ni ihwɛ gɛ ya o, i zasa kaa iyi elele nɛ baa n nyashɛ o, semi gabụ, iwɛnɛ ta abɛ shɛ biyikwo bwa. Gana na Ngee te eri ma nda iyi ci'nyɛ i ci gana ga, maa ma nda Agwatana iwɛwɛɛ? 10Ama okwo tu boo mbiso Josɛf iwɛ gɛ iyi-heri, go Josɛf kaa shiri shi acɛbɛ, maa woto nu bwa, kwo kaa maa bu na nama nu bwa o.

11Ama jitoo ko, tu go Josɛf teni nu umwono maa nda ugondu ubwa, i zasa kaa bụtụ okwo bu ko na ashashɛ etwenyi ihwɛ ɛtɛ namba nu umwono ata o. 12Nazhɛ biyikwo ata 'imɛ utogwo Josɛf, bɛɛ hieŋ, Hwure woto ne mi.

Ama go Josɛf ganganɛ bụ utogwo ubwa ni i'ɛlɛ ibwɛ, bee gezhije, baa banɛ nu umwono.

13Aka na to biyikwo ata kwụbɛ maa go Josɛf gengeni bu utogwo ubwa ni i'ɛlɛ ibwɛ, baa banɛ nu umwono ata. 14Biyikwo ata suyanɛ etwenyi ihwɛ ɛtɛ, bɛɛ hiɛŋ aŋ, Kwụba ma, bu shapɛ Bihibru ga na ashashɛ tu maa ma tu nda ụpụrụsa, bi teni pi mi hwayɛ ga maa woto ne mi, ibɛ Ngee keri n'ungwa duwa. 15Aka na tu baa hwụjɛ ti Ngee keri n'ungwa duwa, baa n ganganɛ utogwo ubwa, bee gezhije baa banɛ nu umwono.

16Ibɛ po biyikwo ata tileni utogwo ata pu bwa uuwa i ci aka na agwuma-ihwɛ Josɛf jiye. 17Biyikwo ata mbishi bu unabarɛ we ebe uko uko, bɛɛ hiɛŋ, Bujama ga Bihibru abụ shapɛ na ashashɛ tu, bi teni pi mi hwayɛ ga maa ma n nda ụpụrụsa. 18Gunu na ti Ngee shepi rụhwụŋ na azuba Ngaa uganɛ, baa n ganganɛ utogwo ubwa, bee gezhije baa banɛ nu umwono.

19Aka na ta agwuma-ihwɛ Josɛf hwụjɛ n-ndumwa mu na biyikwo bwa mbishi bu, maa gana go bujama bu n njɛ, ibɛ po isɛbwɛ ibwɛ ishijɛ tebiye. 20Nazhɛ agwuma-ihwɛ Josɛf shepi bu bee shiyeni nu umwono-tishi, no ofwo na ee kepi ajama agwuma, baa namɛ apata nu umwono-tishi. 21Ama AGWANGWAMA kaa namɛ no Josɛf, bee hieci inyɛmɛnyɛmɛ ibwɛ, iwɛ ubwa kaa kwụlanɛ bungbaracɛ bu umwono ata tishi.#Ugo 7:9 22Ibɛ po bungbaracɛ bu umwono ata tishi utegeni Josɛf atwa na zweni nu umwono ata tishi kpaaŋ. Iyi elele nɛ kaa zhɛ ya nda apata, go Josɛf ubwa zhɛ ba nda iŋ. 23Bungbaracɛ bu umwono ata tishi yeleji shi ya okwo iyi elele nɛ namɛ ni i'ɛlɛ Josɛf o, iwɛnɛ ta AGWANGWAMA namɛ nu bwa, iyi elele nɛ kaa baa njɛ AGWANGWAMA o lono maa ga i zhɛmanɛ bụ.

Currently Selected:

UMOZHIGO 39: RBT

Highlight

Copy