UMOZHIGO 40

Go Josɛf ba Duma Ecilo Awalabụ nu Umwono-tishi

1Na aka oko ti inɛ gɛ henici, ibɛ bipeni ba agwuma Ijpiti meni mu tuswa keeni bɛnjɛ bi iyimɛyɛ pindeni agwuma-ihwɛ aba na shɛ agwuma Ijipti. 2Ibɛ po ga Faro njɛ isɛbwɛ na anjɛ-ugondu ata ubwa eyebi. 3Bee suji aŋ bee zweni nu umwono-tishi no ofwo uhiu wa angbaracɛ, no ofwo na ee kepi du Josɛf. 4Nazhɛ uhiu wa angbaracɛ peni aŋ Josɛf maa bu na ngbaraka aŋ, baa 'yaka aŋ. A namɛ na ti'ima ta ata te ilegeji fwalaa. 5Ee wetegeni awalabụ hwɛɛ aba ebe yebi na amɛ ụjita uko, ibɛ shɛ bipeni ba agwuma meni mu tuswa keeni bɛnjɛ bi iyimɛyɛ ba agwuma Ijipti, a na namɛ na tukapa nu umwono-tishi. Bụtụ bụtụ wetegeni una ubwa ụwalabụ, ụwalabụ bụtụ bụtụ kaa 'yajɛ ecilo ubwa.

6Aka na tu go Josɛf zhajɛ no ofwo aba nu uvwungwa, baa kwụbɛ te shishe sha aba shɛ hashaganụ. 7Ibɛ po go Josɛf heŋteni aŋ, bɛɛ hiɛŋ, Iwembe po shishe shi hiŋ shɛ hashaganụ hwayɛ i ci gana gaa?

8Ɛɛ jishijɛ Josɛf, ɛɛ hiɛŋ, Tu wetegeni awalabụ, i zasa kaa bụtụ okwo bu ko na eri mo ti mbiso ecilo aba o.

Go Josɛf hiɛŋ aŋ, Shɛ Agwatana suu 'yajɛ ecilo awalabụ tụdụma? Ma hi tabwa m mbishi aŋ ma.

9Nazhɛ uhiu bipeni ba agwuma meni mu tuswa mbishi Josɛf ụwalabụ ubwa, bɛɛ hiɛŋ bụ, N kwụbɛ ukparɛ ufwafwa na namɛ nu umbe mu, nụ ụwalabụ. 10Ukparɛ ata ufwafwa 'yajɛ shɛ'walụ shɛ tatụ, waa shɛ maa wa saba, tusaba tu bwa tu banɛ, ofwo ata na te cimbengeni 'weri tụ'walụ ta afwafwa tu na tɛ nɛ. 11Ngaa 'waŋnɛ ya ukwopi Faro nu u'ala mu, Ngee shepi tụ'walụ ta ata ta afwafwa Ngee piri tu nu ukwopi ebe, Ngee utegeni Faro ukwopi ata nu u'ala ubwa.

12Nazhɛ go Josɛf hiɛŋ bụ, Ecilo ibɛ nɛ, shɛ'walụ sha ata shɛ tatụ, shɛ shɛ ijitɛ itɛtu. 13Na amɛ ijitɛ gɛ itɛtu, ga Faro zhɛ ma bụ bacɛnga nu umwono-tishi, bɛɛ zhɛ mo bu gwuricingo na ajɛjɛ bụ, bi zhɛ kaa ba pana Faro ukwopi nu u'ala ubwa gana ala aba pana bụ meni hiiŋ. 14Ama ne me teyinje hwuŋ aka na ti yaa bụ zhɛmanɛ, maa hieci inyɛmɛnyɛmɛ mi. Ma bu tabwa maa mbishi Faro iwe mi maa e m becinji du nu umwono ga tishi. 15Iwɛnɛ po tuzunje ee n zunje gom na cɛnjɛ te Ehibru, te epe sasana N njɛ shɛ iyi elele nɛ lanɛ maa e n shiyeni nu umwono ga tishi o.

16Aka na tu uhiu bɛnjɛ bi iyimɛyɛ kwụbɛ maa ecilo ụwalabụ ubupeni ba agwuma meni zhɛmɛ, bɛɛ hiɛŋ Josɛf, N wetegeni du ụwalabụ. N-ngwumi ma akara mu tatụ mu patanganɛ nu uhiuhiu mu. 17Iyimɛyɛ tuswoswoswo nɛ bɛnjɛ bi iyimɛyɛ ndanɛ Faro zweni ni igwumi ɛtɛ patanɛ na azuba, ama shanụnụ sha ya iyimɛyɛ ɛtɛ patanɛ nu uhiuhiu mu.

18Go Josɛf jishijɛ bụ, bɛɛ hiɛŋ, Ecilo ibɛ nɛ, n-ngwumi ma ata mu tatụ mɛ shɛ ijitɛ itɛtu. 19Wanabeyiko ga Faro zhɛ ma bu bacɛnga nu umwono-tishi, bi zhɛ mo bu mwo uhiuhiu, nazhɛ bɛɛ zhɛ ba swata ru'wo rụ bụ nụ ụ'wụ'wụ maa shanụnụ shɛ yɛ usunda bụ.

20Nụ ụjita ụtatụ, na shɛ ụjita titeyinje ta tumata tu Faro, baa njɛ iyimɛyɛ unyasa iwɛ anjɛ-ugondu ubwa kpaaŋ. Bɛɛ bɛcinjɛ uhiu bipeni ba agwuma meni keeni bɛnjɛ bi iyimɛyɛ ne eshe anjɛ-ugondu ubwa. 21Bee gwuricinji bipeni ba agwuma meni no ohwolu ubwa, bee peni Faro ukwopi ata ni i'ɛlɛ ibwɛ. 22Ama ga Faro sweci ga uhiu bɛnjɛ bi iyimɛyɛ, gana na tu go Josɛf ge mbishi aŋ ecilo ibɛ gom.

23Okwo ti yaa shɛ gana ata uhiu bipeni ba agwuma meni nu ukwopi teyinji shi ya iwɛ Josɛf o, ama isɛbwɛ ibwɛ 'wi bu.

Currently Selected:

UMOZHIGO 40: RBT

Highlight

Copy