Mak 10
10
Jisas mwa Bagahi Huri Atatu be mwa Bev Dagara Tasalana
(Mat 19.1-12; Luk 16.18)
1Haḡe Jisas mwa domare nin ute gea mwa ban vai lol vanua Judia haltavalun wai Jodan, sinombu ram mai ram ḡoḡo mulei abena i mwa bagahira kunia gabe mwa lolia tagaro.
2Ira Varise rituai ram mai abena be ramen lol ron̄oe gin avoan hudaligi rituai ram bevea be, “Vevea lalai kamai, silo mwa mahin̄ai atatu be vi vev dagara dum tasalana sa sigai?”
3Haḡe Jisas mwa bwaliura gin avoan hudaligi be, “Hava Leo horai gabe Moses nu laia lalai kimiu?”
4Ram bwaliua be, “Moses nu tau silo be, atatu vi lai dum pepa huri be vi vev dagara tasalana, haḡe vi vev dagara dumwia.”
5Take Jisas mwa bwaliura mwa bevea be, “Moses nu rav silo geki lalai kimiu bwatuna be gin ririhai be ramen vagahi kimiu. 6Take la bwatun tauva ravrava sabuga mwa bevea be, ‘God nu tau atamwani i vavine. 7Bwatuna higea atamwani mwa lin̄ tamana mai ratahina i mwa bulu mai tasalana, 8i atatu gairua gea ramuru bora atatu gaituvwa.’ i ramuru hav mom bora te atatu gairua ta gaituvwa. 9Atatu sihav harabora te ira hei gabe God nu harabultainira huba.”
10Batena be ram dabagilu mulei vai la imwa ira roron̄tai ram hudali Jisas huri ginau uhu. 11Haḡe mwa bwaliura be, “Atatu gabe mwa bev dagara tasalana i mwa lagi vavine dolua mwa buroga mai tasalana; 12kunia n̄an be vavine mwa bev dagara ahoana i mwa lagi atamwani dolua mwa buroga mulei.”
Jisas mwa Batavuhai Naturirigi
(Mat 19.13-15; Luk 18.15-17)
13Atatu rituai ram lai ira naturirigi vai aben Jisas be vi tau limana alura, take ira roron̄tai ram bisigai ginira. 14Batena be Jisas mwa ḡitae, mwa lol horo mwa bevea lalainira roron̄tai be, “Giv lin̄ ira naturirigi be rav mai huriau, gisav tu te ḡorora, bwatuna be atatu be sinera kun ira naturirigi God mwa bora nora Ratahigi. 15Nam bev mwasigi lalai kimiu be, ihei gabe mwa hav lai te dum rahuan gara gabe God mwa Ratahigi ḡoro non sinombu alolona kun naturigi uhu sihav haroro te dum alolona.” 16Haḡe mwa avin̄ai batugehira naturirigi gin limana i mwa dau limana alura gaitutuvwai i mwa batavuhainira.
Atat Rosoga Vwate mwa Doron Rahuana Vai Tuai
(Mat 19.16-30; Luk 18.18-30)
17Mahavana be Jisas mwa dau bwatun non lagoana mulei atatu vwate mwa rovo vai abena mwa sisiabwau ḡoroe mwa hudalinia mwa bevea be, “Vagahi Tavuha, nav lol hano be nav haḡo dum rahuana vai tuai?”
18Haḡe Jisas mwa hudalinia be, “Huri hano gom uloiau be tavuha? Atatu vwate nu hav tavuha tehe ta God gaituvwa n̄an. 19Gom ilo Leohorai duluai be: ‘Gosav wehi te atatu; gosav surai te vavine; gosav surasura tehe; gosav tul te bonogai; gosav tentene tehe; gov binihi marahi tamamwa mai ratahimwa.’ ”
20Haḡe wani gea mwa bwaliua mwa bevea be, “Vagahi mahavana be inau mwalaḡelo nan ḡoḡoi ḡoro leo horai duluai kera geki.”
21Jisas mwa ḡarere mwa ḡita ma-maragainia i mwa dabea mwa bevea lalainira be, “Ginau gaituvwa radu be gov lolia. Van ba salei nom viloḡoana duluai i gov lai homuna lalai ira hiru, i gov lai rosomwa lol ute atamare, vuvuri gov mai ba huriau.” 22Haḡe mahavana gabe mwalaḡelo mwa ron̄ vuvuri avoana non Jisas, lolmatana mwa hantai mwa ban dagai gin ron̄ḡagarasi bwatuna be kea atat rosoga.
23Jisas mwa ḡarere mwa ḡitara roron̄tai duluai mwa bevea lalainira be, “Vi ririhai lalainira gabe rosora gaivua be rav haroro lol rahuan gara non God gabe mwa Ratahigi alolona!”
24Ira roron̄tai ram ron̄ mwahantai gin avoana gabe mwa bevera, ta Jisas mwa bev rahurahuinia be, “Ira nituku, nu ririhai mwasigi huri haroroana lol rahuan gara gabe God mwa bora Ratahigi alolona! 25Nu ririhai maragai lalai wani rosona gaivua be vi haroro dum lol rahuana gabe God mwa bora Ratahigi alolona, ninia be kamel vi bwihi sivi lulun gaon nidil.”
26Haḡe ira roron̄tai ram dan̄an̄a maragai gin non avoana ram hudali gaitutuvwainira be, ira tua, “Ihei vi rahu dum?”
27Jisas mwa ḡitara i mwa bwaliu nora avoana mwa bevea be, “Geki nu ririhai lalai atatu, take nu hav ririhai te lalai God; huri ginau duluai nu maron̄ron̄o lalai God.”
28Haḡe Pita mwa av lua mwa bevea be, “Gita, gan lin̄ nomai ginau duluai gam hurigo.”
29Jisas mwa bevea lalainira be, mwasigi, “Ta nai vev ginau uhu lalai kimiu be, wani mwa lin̄ imwana sa ira tuana, sa ira hogosina, ratahina sa tamana, sa nituna, sa non talu duluai bwatuna inau i huri Roroi Tavuha, 30vi laia liu lol rahuana geki. Kea vi lai vudolua mulei alun hano be nona huba, kun imwa, ira tuana, ira hogosina, ratahina, ira nituna mai non tano duluai--i ron̄ḡagarasi mulei; i lol rahuana gabe vi mai kea vi lai rahuana vai tuai. 31Take kera ivusi kadogaha gabe ram domua, rav tu atagu i kera gabe ram du atagu garigi rav tomua.”
Jisas mwa Bevea Vatoluna huri Mateanana i non Tomarean Mulei
(Mat 20.17-19; Luk 18.31-34)
32Haḡe Jisas mai non roron̄tai ram ban la hala gabe mwa hae vai Jerusalem. Haḡe kea mwa ban dotomua nin ira roron̄tai gabe ram huria ram dan̄an̄a maragai ginia; sinombu gabe ram mai ataguna ram matagu. Haḡe Jisas mwa lai dagainira roron̄tai han̄vul domwan gairua mwa avo huri ginau duluai gabe vi loli lalainia. 33Mwa bevea lalainira be, “Giv roron̄tai hano be nai vevea. Gida tav hae vai Jerusalem, aia Nitun Atatu vi lin̄iana lalainira muai tataroi mai ira vagahin Silo. Kera rai vevegi bamatea i rav lin̄ia lalai ira Lolobon̄i, 34i kera rav lol leileia, rav lodovia, rav vivilisia i rav wehi bamatea; take atagun gubwen̄ gaitolu kea vi tomare mulei vai lol rahuana.”
Avoan Hudaligi non Ratahin Semes mai Jon
(Mat 20.20-28)
35Haḡe Semes mai Jon, gabe ira nitun Sebedi, ramuru mai aben Jisas. Ramuru bevea be, “Vagahi, ginau vwate gamuru doronia be gov lolia lalai kamaru?”
36Haḡe Jisas mwa bwaliura be, “Gumuru doron hano?”
37I ramuru bwaliua be, “Batena be gov togo la tanon nom togotogo lol nom ute Ratahigi sarisari, gamuru hudalinigo be gov mahin̄a be garu vi togo bul maigo, vwate vi togo la mwatuamwa i vwate vi togo la mwairimwa.”
38Haḡe Jisas mwa bwaliura mwa bevea be, “Gumuru hav ilo te havanau gumuru hudaligi huria. Matu giru vi mwin dum lol lahan ron̄ḡagarasi gabe nav mwin aluna? Matu giru vi lai dum garuhisabuga hurin hala gabe inau nav garuhisabuga aluna?”
39Haḡe ramuru bwaliua be, “Uwe garu vi lol dumwia.”
Haḡe Jisas mwa bevea lalainira be, “Giru vi mwin dum lol laha gabe inau nav mwinua i giru vi garuhisabuga dum la hala gabe inau nav garuhisabuga aluna. 40Take mwa hav vora te noḡu be nav vev lalai kimiru be ihei vi togo la mwatuaku i ihei vi togo la mwairiku. God mau sibona vi lai tanoi kera uhu lalai irahei gabe nu lol vatvwainira hurira.”
41Batena be ira roron̄tai han̄vulu ram ron̄ ute uhu ram bavora ram lolhoroi Semes mai Jon. 42Haḡe Jisas mwa uloinira duluai vai abena mwa bevea lalainira be, “Gim iloe be atatu gabe ram binihira be kera ira lavoa ḡoro ira len̄len̄aga ram haḡo muramura ḡorora, i ira tomuai ram haḡo roron̄o ḡorora duluai. 43Geki, mwa hav vora te hala be giv lolia kunia. Be ihei nin kimiu mwa doron be vi vora lavoa, kea vi vora nomiu atatun rovoga duluai; 44i be ihei nin kimiu mwa doron be kea vi vora tomuai vivora turin nomiu rovoga. 45Kunia n̄an be inau Nitun Atatu nan hav mai tehe be atatu ramen lol rovoga lalaiau; take nan mai be nav lol rovoga lalainira, i nam lin̄ rahuku be men vol rahun atatu ivusi.”
Jisas mwa Lol Bugeri Matan Batimeas
(Mat 20.29-34; Luk 18.35-43)
46Haḡe kera ram mai vai Jeriko, i batena gabe Jisas mwa domare mulei nin Jeriko maira non roron̄tai bul mai sinombu ivusi maragai, matagara vwate ihana Batimeas nitun Timeas kea nu togo hurin halgaivua, mwa uraura gana. 47Mahavana gabe mwa ron̄oe be Jisas ata Nasaret mwa mai, mwa dau bwatuna mwa ulo amare be, “Jisas nitun Deved! Gov hagaviau!”
48Kera ivusi ram borotainia ram bevea lalainia be vi togo ḡoḡonai. Take kea mwa ulo amare gin silo gaivua be, “Nitun Deved gov hagaviau!”
49Jisas mwa barahidu mwa bevea lalainira be, “Gin uloinia.”
Kera ram uloinia ram bevea be, “Nu tavuha, tomare ba mai ke mwa uloinigo.”
50Kea mwa bohai dagai non koti mwa burere amare mwa mai vai aben Jisas.
51Haḡe Jisas mwa hudalinia be, “Gom doroniau be nav lol hano lalainigo?”
Haḡe matagara mwa bwaliua be, “Vagahi, nam doron be nav ḡita mulei ute.”
52Haḡe Jisas mwa bwaliua mwa bevea be, “Vano, nom binihimwasigi garagusi mwa barahugo.”
Haḡe vilehi kea mwa ḡita dum ute, i mwa ban bul mai Jisas la hala.
Currently Selected:
Mak 10: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
