Mak 9
9
1Haḡe mwa bev rahurahuinia be, “Giv vinihi dum ginau uhu! Atatu rituai rasav mate tehe vaivotu rav gita rahuan gara gabe God mwa Ratahigi ḡoro non sinombu alolona vi visirai mai muramura.”
Rebehin Jisas mwa Dori
(Mat 17.1-13; Luk 9.28-36)
2Atagun gubwen̄ gaiono Jisas mwa lai Pita mai Semes i Jon ram hae vai la vusi holomare vwate gahera. Mahavana be ram dol ḡarere ram dol ḡitae be rebehin Jisas mwa dori, 3i gaisagana mwa sarisari kun gav maita nu maita liu gav abwaga be atatu mwa bwagae. 4Haḡe ira roron̄tai gaitolu ram ḡita Elaija mai Moses ram avo mai Jisas. 5Haḡe Pita mwa av lua lalai Jisas mwa bevea be, “Vagahi, nu tavuha haḡea be tav to teti! Be gos doron, gas lol vale gaitolu, vwate hurigo, vwate huri Moses, i vwate huri Elaija.” 6Ram dol matagu maragai, bwatuna gea Pita mwa len̄a be vi vev hano.
7Mahavana be mwa avo radu tenlan̄i mwa haravuinira, haḡe silo mwa mai lol tenlan̄i mwa bevea be, “Geki mwasin Nituku gabe nam dabea giv ron̄oe!” 8Ram dol ḡarere dalisira ram hav gita te dum atatu dolua, take Jisas gahena mwa du bul maira.
9Batena ram hivo nin vusi, Jisas mwa bev wasinia lalainira be, “Gitol sihav vevuri te aben ihei huri ginau uhu be gitol gitae, vaivotu gabe inau Nitun Atatu nav tomare mulei nin mateana.”
10Ram dol ron̄ silona, take ram dol bevuri ginau gabe nu loli ram dol bevea be, “Hava binihiva uhu be tomarean mulei nin mateana?” 11Ram dol hudali Jisas be, “Huri hano ira vagahin Silo ram bevea be Elaija vi mai amua?”
12Kea mwa bwaliura mwa bevea be, “Elaija mwasigi vi mai amua be men lol vatuvwai ginau duluai. Take huri hano ravrava sabuga mwa bevea be, Nitun Atatu vi ron̄ḡagarasi gaivua i rai varihainia? 13Nam bevea lalai kimiu be Elaija nu mai huba, sinombu ran lol lalainia hano gabe ram doron be rav lolia, kun gabe ravrava Sabuga nu vevea huria.”
Jisas mwa Hora lua Vui Hantai nin Naturigi Vwate
(Mat 17.14-21; Luk 9.37-43a)
14Batena be ram dol botui mulei ira roron̄tai dodolua, ram habwe sinombu ivusi aia, i ira vagahin Silo rituai ram biavoavo mai ira roron̄tai. 15Mahavana gabe sinombu ram ḡita Jisas, ram dan̄an̄a maragai ram rovo vai abena ram laiḡoḡoe. 16Haḡe Jisas mwa hudalinira non roron̄tai be, “Gim biavoavo huri hano bul maira gea?” 17Haḡe atatu vwate lol sinombu mwa bwaliua mwa bevea be, “Vagahi, nam lai nituku atamwani vai abemwa, bwatuna be vui hantai alolona mwa lolia mwa hav avo te dum. 18Batena be vui hantai mwa lolia, mwa bohainia vai ata, mwa lua, i mwa ḡan livona i rebehina mwa dori. Nam hudalinira nom roron̄tai be ramen hora lua vui hantai take ram hav lol te dumwia.”
19Jisas mwa bevea lalainira be, “Kimiu ata garigi nomiu binihimwasigi sigai! Nav to abemiu vain̄ava kun hanigi? Nav haḡo mai kimiu vaviha mulei? Gin lai naturigi vai abeku!” 20Haḡe ram laia vai aben Jisas.
Batena be vui hantai mwa ḡita Jisas mwa lol naturigi mwa matmatei vula mwa hovi vai ata, mwa mwalulu mwa lua. 21Haḡe Jisas mwa hudali tamana mwa bevea be, “Mwa lolia vain̄ava huba?”
Haḡe tamana mwa bwaliua be, “Nu tau bwatuna lol mahavana be kea tirigi. 22Vaivusi vui hantai mwa lol ron̄oe be vi wehia, mwa bohainia vai lol gabi i lol wai. Gov hagav kamaru, ba bului kamaru, be gos doron!”
23Jisas mwa bwaliua mwa bevea be, “Uwe, be gom binihimwasigi, ginau duluai nu maron̄ron̄o lalai wani gabe non binihimwasigi garagusi abena.”
24Haḡe tamana mwa haharigi amare mwa bevea be, “Nam binihimwasigi garagusi, take noḡu binihimwasigi garagusi nu hav dadariha tehe, buluiau ba noḡu binihimwasigi garagusi na wasi!”
25Jisas mwa ḡitae be sinombu gaivua mwa mai sosorira, i mwa avo wasi lalai vui hantai mwa bevea be, “Vuin bwerovono i buhi nam bevea lalainigo be, gov mwalue nin naturigi i gosav mom haroro te alolona mulei!”
26Vui hantai mwa haharigi mwa lol naturigi mwa matmatei vula, i mwa bwihavare ninia mwa eno kun be nu mate, i sinombu ram bevea be, “Kea nu mate!” 27Jisas mwa rav domarei naturigi la limana mwa buluia mwa du dum amare.
28Ataguna be Jisas mwa dalin̄oro la imwa, non roron̄tai ram mai ram hudali ḡoḡonainia be, “Hurihano kamai gam hav hora te lua dum vui hantai?”
29Haḡe Jisas mwa bwaliura mwa bevea be, “Ginau mulei sigai, take tataro n̄an vi goro dum lua ginau kun uhu.”
Jisas mwa Avo Mulei huri Mateanana i non Tomarean Mulei
(Mat 17.22-23; Luk 9.43b-45)
30Haḡe Jisas mai non roron̄tai ram derai ute gea ram ban sivi vanua Kalili. Jisas mwa hav doron tehe be atatu rav iloe be kea mwa do behe, 31bwatun be mwa bagahira non roron̄tai mwa bevea be, “Nitun Atatu vi lin̄ia lalai sinombu i kera rav wehi bamatea. Atagun gubwen̄ gaitolu vi tomare mulei vai lol rahuana.”
32Non roron̄tai ram hav lai te dum binihiva huri silo vagahi gabe kea mwa bevea lalainira, i kera ram matagu be ramen hudalinia.
Ihei vi Vora Tomuai?
(Mat 18.1-5; Luk 9.46-48)
33Mahavana be ram botui Kapanium ram haroro lol imwa vwate Jisas mwa hudalinira non roron̄tai be, “Gim avoi hano duluai la hala be tam mai?”
34Ta ram hav vwaliua tehe, bwatuna la hala ram avo mau ginira, ram doron be rav habwea be ihei vi vora tomuai alolora. 35Haḡe Jisas mwa do mahuri mwa uloinira han̄vul domwan gairua mwa bevea lalainira be, “Ihei tehe be mwa binihia be vi vora kea tomuai, ke vi togo hivhivo i vi vora atatun nomiu rovoga duluai.” 36Haḡe kea mwa lai naturigi vwate mwa daria la lolmatara. Kea mwa avin̄ainia mwa bevea lalainira be, 37“Ihei tehe mwa lai ḡoḡora naturigi vwate ninira uhu, mwa lai ḡoḡoau; ihei mwa lai ḡoḡoau, mwa hav lai te ḡoḡoau take mwa lai ḡoḡo wani gabe nu horau.”
Atatu mwa Ḡoro Lua Vui Hantai Ta Kea Mwa Hav Vora Te Roron̄tai non Jisas
(Luk 9.49-50)
38Haḡe Jon mwa bevea lalai Jisas be, “Vagahi, gam ḡita atatu vwate nu hora lua vui hantai lol ihamwa, i gam du ḡoroe be sihav lol te lalaḡova gea, bwatuna kea mwa hav vora te bul mai gida.”
39Jisas mwa bwaliua mwa bevea be, “Gisav lol te ron̄oe be gimen tuḡoroe bwatuna wani gabe mwa lol ginau dan̄an̄a lol ihaku kea sihav van te darihou be men vev ginau hantai vai aluku. 40Bwatuna be wani gabe mwa hav ivwalui te gida kea bul mai gida. 41Nam bev mwasigi lalai kimiu be, Giv binihi dum ginau uhu! Ihei tehe mwa lai wai mwinu lalai kimiu bwatuna be kimiu noḡu atatu kea vi lai dum tavwena huria.”
Kalkaliana be mwa Lol Atatu Ram Buroga
(Mat 18.6-9; Luk 17.1-2)
42“Be ihei si lol naturigi vwate ninira uhu be men hovi lol non binihimwasigi garagusi huriau, nu tavuha lalai wani gea be vi vauhiana na vat marahi la mwagorona ba bohaiana lol tahi. 43Be limwamwa mwa loligo gom sala lol non binihimwasigi garagusi, tav n̄andu kaburainia! Nu tavuha lalainigo be gov haroro lol rahuana mai limwamwa gaituvwa ninia be ras tu saraḡo i vi vohai kaburainigo vai lol gabin ron̄ḡagarasi vai tuai. 44Aia ulehira be ram ḡanira ram hav mate te dum i gabi mwa hav mate te dum mulei. 45Be bwalagemwa mwa loligo nom binihimwasigi garagusi mwa hovi tai n̄andu kaburainia, nu tavuha be gov haroro lol rahuana mai bwalagemwa gaituvwa n̄an ninia be ras tu saraḡo i vi vohai kaburainigo vai lol gabin ron̄ḡagarasi vai tuai. 46Aia ulehira be ram ḡanira ram hav mate te dum i gabi mwa hav mate te dum mulei. 47Be matamwa mwa loligo nom binihimwasigi garagusi mwa hovi, lai dagainia, nu tavuha be gov haroro lol rahuana gara gabe God mwa Ratahigi alolona mai matamwa gaituvwa ninia be ras tu saraḡo i vi vohai kaburainigo vai lol gabin ron̄ḡagarasi. 48Aia ulehira be ram ḡanira ram hav mate tehe, i gabi mwa hav mate te mulei dum.”
49“Vataha hei vi lol melmeloinia mai gabi kun gabe mwa dahiana na ginaganiana.”
50“Tahi ginau tavuha; be tam lolia lol ginaganiana, take la mahavana be garagarana mwa bano, gov lol haninia be vi garagara mulei?”
“Tahi vi togo lol rahumiu tagaro i giv togo lol tamwata tagaro bul mai ira tuamiu.”
Currently Selected:
Mak 9: HNB
Highlight
Share
Copy
Want to have your highlights saved across all your devices? Sign up or sign in
Bible Society of the South Pacific
