Shave 1

SHALA KAFƏ KA ISRAYƐL SHAVE MBE ƐZHIPTE

1–15: 21

Ka Israyɛl kaka mavashi mbe Ɛzhipte

1Wa nyi sləa ŋwale tezhilia Israyɛl nyi kedzembe Ɛzhipte zlaɓe le Zhakob, yayata wəndə le mbeli nyi ki ghɛa ŋkɛ nyi:

2Rəbɛn, Simɛyon, Lɛvi ba'a Zhəwda,

3Isakar, Zabəlon ba'a Bɛnjamɛn,

4Dan ba'a Nɛftali,

Gad ba'a Asɛr.

5Pɛtɛa hwelefefia Zhakob ne, mbeli mberefaŋemsə: kwa Ɛzhipte wəzege ta ŋkɛ Zhozɛf le ŋa ŋkɛ. 6Kwa sebe ta ŋkɛ, pa Zhozɛf mtenyɛ, tsagha ka kesaka yitenyɛ ba'a mbeli nyi mbe vəa shɛ. 7Ama pa ka Israyɛl yate ya kwele kwele ba'a zhɛrenji kaka berete. Viɗi ŋkwa nya te hɛɗi va hɛ.

8Pa kwete meghe nya keɗepema Zhozɛf dzembe meghe mbe Ɛzhipte. 9Ma ke sha mbelia ŋkɛ: «Newe mə ka Israyɛl keyate ya kwele kwele ba'a kezhɛrenji berete ma ke gheɓəmə. 10Megela ma zelete ntsehwele kefɛa hɛ keya mə. Ma kemenete geva mpa ne, katejikə geva hɛ le ka ghema ta ɓəmə yitea gheɓəmə ba'a kateslənji hɛ te hɛɗi nya.» 11Tagha gɛ, pa ka Ɛzhipte tsehave mbeli nyi te ghə kezha sa nda yaka ke ka Israyɛl le slene berete. Tsetse menete geva ŋkɛ nda ŋate yɛ meleme ta Pitom le Ramsɛs hɛ kezha bete wəshi kezeme ta Farawon. 12Ama kamtsehe sa nda yaka mbeli ke hɛ ne, kamtsehe ya hɛ kwele kwele ba'a kakele ŋkwa hɛ va mbeli. Tsekwe tseɗekwe nza helia ka Ɛzhipte va ka Israyɛl. 13Ntake ka Ɛzhipte kasa nda yaka ke ka Israyɛl kala ka mavashi. 14Pa hɛ zhɛrete nda nza dzawe ke hɛ le slene berete: ŋkeɗe rekɛ, mpa brəki, mene slene dzeyi mbe yɛ wəve. Geze ta ŋkɛ ne, mama ta slene berete yasa nda yaka hɛ le ke hɛ.

Farawon kaghweze mɛ hwa ka Israyɛl

15Ma ke meghea ka Ɛzhipte sha mia ka Ɛbrə nyi keya ŋkwa, yɛ Shifra le Pəwa: 16«Ma kenza yɛ katawe wəzege yitea mia ka Ɛbrə ne, neweve mə wəzegea shɛ megela: ma kenza ŋkɛ kawəzege teza ne, peslekɛ mə, ma kenza nde kawəzha makwa ne, sərəakɛ mə teghweme.» 17Ama mi nyi keya ŋkwa nyighɛ ne, kahawe hɛ va Shala. Kese hɛ kamene kala nya gezave nda meghea ka Ɛzhipte ke hɛ we, pa hɛ sərəakɛ ŋwale tezhili teghweme. 18Pa meghe hekake hɛ, ma ke sha hɛ: «Wa raberə menete yɛ kala nya wa? Wa raberə sərəakɛ ŋwale tezhili yɛ teghweme wa?» 19Ma ke hɛ zhɛnete nda ke Farawon: «Kenza mia ka Ɛbrə kala mia ka Ɛzhipte we. Kwele kwele berete mbe hɛ ba'a nahe hɛ keyake ŋwalea nci nda tese male keya ŋkwa.»

20Tsetse yate ya ka Israyɛl kwele kwele ba'a zhɛrenji hɛ kaka berete berete. Pa Shala wəpikɛ mi nyi keya ŋkwa nyi 21laka ve nda ya ŋwale ke hɛ, va nya yɛte nda fete hɛ. 22Tagha gɛ, ma ke Farawon gezave nda ke mbelia ŋkɛ pɛtɛ: «Negheyi mə yayata wəzege teza nya yake ka Ɛbrə kwa hələa Nil! Deke ŋwalea kwɛ yasərə yɛ teghweme!»

Currently Selected:

Shave 1: BEKDC12

Highlight

Copy