Shave 2

Ya ta Moyize ba'a nza ta ŋkɛ kawəzege

1Pa kwete wəndə kwa yita ta Lɛvi wəmeve male kwa yita shɛnyɛ. 2Pa malea shɛ dzawa hwə ba'a yake wəzege teza. Ma kwa nakɛ nde kendeɗenyɛ wəzegea shɛ ne, pa wəfərəakɛ katere mahekene. 3Ma kwa ɗema nde mba kawəfərəakɛ ne, pa nde kelete kwaciga nya tsate mbeli yitea mahawa, pa nde zleraɗate ŋ'wa ba'a ɗəkə te. Kwa sebe ta ŋkɛ, pa veyi wəzegea shɛ kwa ba'a veyi ŋkɛ hwa ghwəvərə, mɛa hələbəa Nil. 4Pa wəzha ta meghekɛa wəzegea shɛ ghereŋenyɛ cakeɗake kezha newe wəsə nya ketemene nda geva.

5Kwa sebe ta ŋkɛ, cape wəzha ta Farawon kadzawa Nil kezha pɛ, vəa ŋkwa nya dzeghwa dzeghwa ta nci mi nyi kwa sebe ta nta dzeyi mɛa hələ. Dəkwə nde te kwaciga te tepe ta ghwəvərə, pa nde ghwenakɛ kwatera ta nta kalə kakele. 6Ma kwa ghwenemte nde ne, dəkwə nde te wəzege kanehwene. Pa helia nta zhɛte nda yite, ma ke le berete: «A wəzege ta ka Ɛbrə.» 7Ma ke wəzha ta meghekɛa wəzegea shɛ 'yɛwete va wəzha ta Farawon: «Kaɗe na kalə 'ya kazeleke male hwa mia ka Ɛbrə kezha sa nda ŋ'wa ke wəzegea shɛ na?» 8Ma ke zhɛnete nda: «E'e!»

Pa wəzha shɛ lə kazeleke meghekɛa wəzegea shɛ. 9Ma ke wəzha ta Farawon sha malea shɛ: «Kelete wəzege nya shɛ na sa nda ŋ'wa kezha kelete ɗa ŋkɛ. Kateŋki ŋa zhɛme ta ŋa 'ya.» Laŋe malea shɛ kelete wəzegea shɛ kasa nda ŋ'wa.

10Ma kwa kele wəzege kewəbanyɛ ne, pa meghekɛ keleke nda ke wəzha ta meghe. Pa nde kelete kawəzege ta nta, ma ke: «Ma kwa nza ŋkɛ te yɛmə kelete 'ya ne, Moyize heka nda slə 'ya.»

Hwɛ ta Moyize kadzembe Madiyan

11Ma te kwete hɛ, kwa kelenyɛ Moyize ne, cape kalə kanewe ka menəhɛnyɛ, pa nakɛ slene berete nyi ndeke nda mbeli ke hɛ. Taghanyɛ ne, pa nakɛ kwete nde Ɛzhipte kaɗa kwete hwa ka menəhɛnyɛ nyi kaka Ɛbrə. 12Ma kwa nahe Moyize kaɗema wəndə tagha yite ne, pa peslekɛ nde Ɛzhipte, kalamte mbe ndaleghe. 13Ma kwa zhɛneke geva ŋkɛ kase te hendɛ ta ŋkwa, pa nakɛ ka Ɛbrə bake kampa. Ma ke sha wəndə nya nza fete ve: «Wa raberə ɗa menə ŋa na wa?» 14Ma ke zhɛnete nda: «Wa nde nteyi ŋa kameghe nya kemeha ghwə te ghen'yɛ wa? Gha ɗe kapesle ɗa kala nya peslekɛ nde Ɛzhipte na na?» Ma kwa nakɛ Moyize nahe mbeli keɗepete ghena shɛ ne, pa ghazlənənyɛ. 15Nahe Farawon le ghəa ŋkɛ kefate ghena shɛ, ntake ŋkɛ kazele kapesle Moyize. Ama pa Moyize hwɛnyɛ kalə kawəfərə te hɛɗia Madiyan. Pa ntishɛnyɛ mɛa kwete belageji.

16Ma nde dzeghe Shala ta ka Madiyan, Zhɛtro ne, mberefaŋe ŋwalea kwɛ ve. Hwa'a hɛ kezha gə yɛmə kadzawa ŋkwa kesa yɛmə ta yɛ timɛti le kwia yiteyɛa nci. 17Ama pa kweci ka ya wəshi se kaŋkamte ŋwalea kwɛa shɛhɛ. Tagha ne, pa Moyize yakɛ hɛ ba'a same nda yɛmə ke wəshia nci. 18Tewətelɛwe hɛ sha geva kalə sha yiteyɛa nci Zhɛtro, ma ke sha hɛ: «Wa raberə sheke ŋayɛ yɛ mba ŋkwa ɓeshi wa?» 19Ma ke hɛ zhɛnete nda: «Kwete nde Ɛzhipte nde yakɛ n'yɛ va ka ya wəshi, gheŋkɛ le ghəa ŋkɛ nde same nda yɛmə ke wəshia ɓəmə.» 20Ma ke sha ŋwalea kwɛa ŋkɛ: «Tema wəndəa shɛ tse wa? Wa raberə ɗema yɛ hekake ŋkɛ kase teke wa? Kwiɗi mə kalə kaheka ŋkɛ yitea wəsə kezeme.»

21Pa Moyize yɛte kanza ki ghɛa wəndəa shɛ. Pa Zhɛtro ndeke nda wəzha ta ŋkɛ Sɛfora kamale. 22Pa malea shɛ yake wəzege teza. Tagha, ma ke Moyize: «Ma kwa nza ŋkɛ kande se se 'ya te hɛɗi nya ne, kaheka nda slə 'ya kaGɛrshom, geze ta ŋkɛ, ‹Nde se se teke.›»

Shala kanta Moyize kezha mbele ka Israyɛl

23Temə kwele kwele kwa sebe ta ŋkɛ ne, mtiwə meghea ka Ɛzhipte. Ntake ka Israyɛl kaŋələvə ba'a katsa lewela mbe nza ta nci kaka mavashi. Pa nehwene ta nci ntsehe pelɛagha sha Shala. 24Pa Shala fate nehwene ta nci ba'a zəzəte jikə geva nya menete ŋkɛ le Abraham, Izak ba'a Zhakob. 25Pa betate ntsə te ka Israyɛl ba'a ncɛte nda ghəa ŋkɛ ke hɛ.

Currently Selected:

Shave 2: BEKDC12

Highlight

Copy