Shave 36

1Nahe Mahwətə kendeke nda caŋa ba'a ɗepe wəshi ke yɛ Bɛsalɛl, Oholiyab le kweci ka ɗepe mene wəshi. Ma tsagha ne, katemene slene nyi kehi hɛ kezha slene ta ŋkɛ mbe ŋkwa nya keveyi geva tekeleke. Katemene pɛtɛa slene nyi gezete Mahwətə hɛ.»

2Pa Moyize hekakɛ yɛ Bɛsalɛl, Oholiyab le kweci ka ɗepe mene wəshi nyi ndeke nda caŋa nya wəba Mahwətə ke hɛ ba'a nyi kendeke nda ghəa nci ke mene slenea shɛhɛ. 3Pa Moyize fəave nda wəshi nyi fəke ka Israyɛl kezha mene ŋkwa nya keveyi geva tekeleke ke hɛ. Kala kiɗi ta ŋkwa ne, nda fə yafə nda wəshi gəmə mbeli kase ke Moyize le ɗe ta nci. 4Tagha gɛ, pa ka ɗepe mene wəshi nyi kemene ŋkwa nya keveyi geva tekeleke ghereŋeyi slene ta nci, 5ma ke hɛ sha Moyize: «Kekwele fəke wəshi mbeli kezha mene slene nya gezete Mahwətə.» 6Tagha ne, ma ke Moyize ndeke nda hweŋkwa ke mbeli kezha zlape mbe ghedəkwə: «Yagha za keɗema male kabete wəshi tekeleke kezha ŋkwa nya keveyi geva tekeleke!» Pa mbeli fɛanji kefə wəshi kase. 7Kwa nza ŋkɛ ma wəshi nyi kemave mbeli ne, wərə nza hɛ kezha mene slenea shɛhɛ, tene nza hɛ yite.

Cɛ lekwesa nya keveyi geva tekeleke

8Pa ka ɗepe mene wəshi nyi caŋa ma menete cɛ lekwesa nya keveyi geva tekeleke: pa hɛ tsate zlave meŋe le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Pa tseyi pa ta ka shɛrəbɛŋe dzeyi te hɛ. 9Kanya kwetɛŋe wəba ta zlave shɛhɛ, kamɛtre meŋe wəfaɗeghəmbe biya ta nci, mɛtre bake bezlea nci. 10Pa hɛ ntsəzləte zlave mcɛfe mɛ mɛ kaba, kwa sebe ta ŋkɛ, pa hɛ ntsəzləte kweci mcɛfe tsagha shɛ. 11Pa hɛ hwepeyi zewe nyi neghate mbeli le shintia təmə nyi kefi fi le yirə kwa ndereme ndereme dzeyi mɛa kwa keɗaŋe ta zlave nyi ghate mbeli jikəte. Pa hɛ hwepeyi hɛ ɓiyitsa dzeyi mɛa kwa ghate ta zlave nyi jikəte mbeli kakwa bake zhigə. 12Zewe mcɛfemsə ya dzeyi mɛa bela kwa zeme ta zlave nyi ghate mbeli kajikəte mcɛfe, tsagha dzeyi mɛa bela kwa gwela ta kweci zlave nyi jikəte mbeli mcɛfe. Yayata zewe kwa kema ta kwete wəndəa ŋkɛ. 13Pa hɛ vɛsəte ndɛaŋe mcɛfemsə le mze kwa tere tere kezha jikə zlave nyi ntsəzləte nyi mbeli mcɛfe nyi, mcɛfe nyi. Ma tsagha ne, kanya kwetɛŋe nza cɛ lekwesa nya keveyi geva tekeleke.

14Kwa sebe ta ŋkɛ ne, pa hɛ tsate zlave meŋe kwetɛŋeghəmbe le shintia kwe kakwa bake ta zlave nya teve mbeli kənəa cɛ lekwesa nya keveyi geva tekeleke. 15Kanya kwetɛŋe wəba ta zlavea shɛhɛ pɛtɛ: mɛtre meŋe mcɛfeghəmbe biya ta ŋkɛ ba'a mɛtre bake bezlea ŋkɛ. 16Pa hɛ ntsəzləte zlave mcɛfe mɛ mɛ kaba, kwa sebe ta ŋkɛ, pa hɛ ntsəzləte kweci nyi ŋkwaŋe tsagha shɛ. 17Pa hɛ hwepeyi zewe mcɛfemsə dzeyi mɛa kwa keɗaŋe ta zlave nyi ghate mbeli jikəte mcɛfe, pa hɛ hwepeyi zewe mcɛfemsə ɓiyitsa dzeyi mɛa kwa ghate ta zlave nyi jikəte nyi mbeli ŋkwaŋe. 18Pa hɛ vɛsəte ndɛaŋe mcɛfemsə le mze kwa ghwə ghwə ba'a jikəte zlave nyi bake nyi jikəte nyi hɛ kezha nza nde kazlave kwetɛŋe. 19Ma kezha nza kənəa kwa bake ta zlave ne, pa hɛ menete yɛ hweta ta gamea lɛmə nyi kefi fi le yirə kwa ghɛmɛ ba'a hweta nyi berete berete.

20Pa hɛ feɗete sheghwə nyi slapesla slapesla yitea gwevɛre ba'a pa hɛ sletete hɛ kezha ve nda berete ke ŋkwa nya keveyi geva tekeleke. 21Kamɛtre mcɛfe nza biya ta sheghwə kwa slapesla shɛ ba'a kadzeghe kwetɛŋe slə yitea fegwele hwa'a mɛa ŋwalea dzeve ba'a kwete gasle yite nza bezlea ŋkɛ. 22Ghɛ nyi tiɗiɗia tiɗiɗia ya bake te yayata sheghwə kwa slapesla. Tsagha te yɛ sheghwə nyi slapesla slapesla ta cɛ lekwesa nya keveyi geva tekeleke. 23Pa hɛ feɗete sheghwə nyi slapesla slapesla bakemsə kezha ŋkwa nya laka bela kwa zeme ta cɛ lekwesa nya keveyi geva tekeleke, 24pa hɛ vɛsəte wəshi kentare sheghwə nyi slapesla slapesla shɛhɛ wəfaɗemsə le mze kwa tɛawetɛa, wəshi kentare bake ya kwa ghɛ nyi bake te yayata sheghwə kwa slapesla. 25Ma kezha ŋkwa nya laka bela kwa gwela ta cɛ lekwesa nya keveyi geva tekeleke ne, pa hɛ feɗete sheghwə nyi slapesla slapesla bakemsə 26ba'a vɛsəte wəshi kentare sheghwə wəfaɗemsə le mze kwa tɛawetɛa ɓiyitsa. Wəshi kentare sheghwə ya bake kwa ghɛ nyi bake te yayata sheghwə kwa slapesla. 27Ma kezha ŋkwa nya kwetere wəmbəa cɛ lekwesa nya keveyi geva tekeleke, laka ŋkwa kepəkwə ta veci ne, pa hɛ feɗete sheghwə nyi slapesla slapesla ŋkwaŋe, 28zhɛne ne, pa hɛ feɗete sheghwə nyi slapesla slapesla nyi tekeleke bake kezha megwekwe nyi kwetere wəmbə. 29Tɛahe tɛahe sheghwə nyi slapesla slapesla shɛhɛ kwayite, ama pelɛghə ne, jikə hɛ kwa kwa ghate ta takase. Kanya kwetɛŋe nza ta nci bake nci ba'a ghenci ya kasheghwə nyi te yɛ megwekwe. 30Ma kwetere wəmbəa cɛ lekwesa nya keveyi geva tekeleke gɛ ne, deghese sheghwə nyi slapesla slapesla ba'a meŋe ŋkwaŋeghəmbe wəshi kentare hɛ nyi le mze kwa tɛawetɛa, geze ta ŋkɛ, bake yitea yayata sheghwə kwa slapesla.

31Kwa sebe ta ŋkɛ ne, pa hɛ feɗete sheghwə nyi kejive mbe mcɛfe yitea gwevɛre kezha sheghwə nyi slapesla slapesla nyi te kwa ghate ta bela ta cɛ lekwesa nya keveyi geva tekeleke, 32sheghwə mcɛfe kezha sheghwə nyi slapesla slapesla nyi te kwa bake ta bela ba'a mcɛfe kezha sheghwə nyi slapesla slapesla nyi kwetere wəmbə, laka ŋkwa kepəkwə ta veci. 33Ma sheghwə nya jive te tepe ne, jive mbe tepe ta sheghwə nyi slapesla slapesla nyi veyi hɛ, slə te kwete bela hwa'a te kwete bela ta cɛ lekwesa nya keveyi geva tekeleke. 34Pa hɛ fikɛ sheghwə nyi slapesla slapesla ba'a sheghwə kejive nyi mbe le mze kwa tere tere, pa hɛ vɛsəte yɛ takase le mze kwa tere tere kezha ha sheghwə nyighɛ jive mbe.

35Pa ka tsa zlave tsate mayafe le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. Pa hɛ tsate pa ta ka shɛrəbɛŋe dzeyi te kezha pesa. 36Pa hɛ feɗete selə wəfaɗe yitea gwevɛre ba'a fiaghe mze kwa tere tere kənəa hɛ. Te hɛ ndɛaŋete mayafe mbeli le ndɛaŋe nyi le mze kwa tere tere. Pa vɛsəte wəshi kentare seləa shɛhɛ wəfaɗe le mze kwa tɛawetɛa.

37Ma kezha ŋkwa kedzembe cɛ lekwesa nya keveyi geva shɛ tekeleke ne, pa ka tsa zlave tsate kwete mayafe le pawa nyi berete berete, welaɗe mbe shintia təmə nyi kefi fi le yirə kwa ndereme ndereme, kwa gheme ba'a kwa ghɛmɛ. 38Ma kezha mayafe ne, pa mbeli feɗete selə mcɛfe, vɛsəte yɛ ndɛaŋe ba'a yɛ geta. Kwa sebe ta ŋkɛ ne, pa mbeli fikɛ ghəa selə nyi nza pəkələ yite ba'a yɛ geta le mze kwa tere tere. Ma wəshi kentare selə nyi mcɛfe nyi ne, le mze kwa ghwə ghwə vɛsəte hɛ mbeli.

Currently Selected:

Shave 36: BEKDC12

Highlight

Copy