Shave 37

Səndəkwəa jikə geva

1Pa Bɛsalɛl baŋete səndəkwə yitea gwevɛre. Dzeghe bake slə yitea fegwele hwa'a mɛa ŋwalea dzeve ba'a kwete gasle yite biya ta ŋkɛ, dzeghe kwetɛŋe ba'a kwete gasle yite bezlea ŋkɛ ba'a dzeghe kwetɛŋe ba'a kwete gasle yite dzeme ghweme ta ŋkɛ. 2Pa Bɛsalɛl fikɛ ŋkwa nya kwa hwəa ŋkɛ ba'a nya te wəmbəa ŋkɛ le mze kwa tere tere nya wɛŋe, pa menete mze kwa tere tere dzasle dzeyi mɛa mɛa ŋkɛ. 3Pa ŋkɛ vɛsəte takase wəfaɗe yitea mze kwa tere tere, pa veveyi hɛ te megwekwe nyi wəfaɗe te səndəkwə, bake laka kwete bela, bake laka kwete. 4Pa ŋkɛ feɗete geta bake yitea gwevɛre ba'a fiaghe mze kwa tere tere kənəa hɛ. 5Pa mbeli hame hɛ mbe takase nyi dzeyi vare yɛ bela ta səndəkwə kezha kele te.

6Pa ŋkɛ vɛsəte wəsə keŋzle səndəkwə yitea mze kwa tere tere nya wɛŋe. Ma wəsə keŋzlea shɛ ne, dzeghe bake ba'a kwete gasle yite biya ta ŋkɛ ba'a dzeghe kwetɛŋe ba'a kwete gasle yite bezlea ŋkɛ. 7Pa ŋkɛ vɛsəate ka shɛrəbɛŋe bake le mze kwa tere tere te bela nyi bake te wəsə keŋzle. 8Ma ka Shɛrəbɛŋe nyi bake nyi ne, ndendeɓe hɛ te wəsə keŋzle, te bela ta ŋkɛ nyi bake. 9Kwa kema kwa kema hɛ ba'a laka wəsə keŋzle nya ya hɛ le bidzəa nci nyi pepelake kema ta nci.

Tabelea ɗafa nyi ve nda mbeli ke Shala

10Pa Bɛsalɛl baŋete tabele yitea gwevɛre. Kadzeghe bake slə yitea fegwele hwa'a mɛa ŋwalea dzeve biya ta ŋkɛ, dzeghe kwetɛŋe bezlea ŋkɛ ba'a dzeghe kwetɛŋe ba'a kwete gasle yite dzeme ghweme ta ŋkɛ. 11Pa ŋkɛ fiaghe mze kwa tere tere nya wɛŋe kənə ba'a meneyi mze kwa tere tere dzasle dzeyi mɛa mɛa ŋkɛ. 12Ma dzeyi vare bela ta ŋkɛ nyi wəfaɗe ne, pa meneyi sheghwə kwa slapesla gare bezlea hwə dzeve ba'a pa meneyi mze kwa tere tere dzasle dzeyi mɛa mɛa ŋkɛ. 13Pa ŋkɛ vɛsəte takase wəfaɗe le mze kwa tere tere ba'a veveyi hɛ te megwekwe nyi wəfaɗe, takwa yitea seɗa nyi wəfaɗe. 14Ma takasea shɛhɛ ne, dekwe yitea sheghwə kwa slapesla veveyi hɛ ŋkɛ kezha nza geta nyi tekele tabele mbeli te mbe hɛ. 15Pa ŋkɛ feɗete geta bake yitea gwevɛre, pa fiaghe mze kwa tere tere kənəa hɛ. Te hɛ tekele tabele mbeli. 16Pa ŋkɛ vɛsəte wəshi kemene slene te tabele le mze kwa tere tere nya wɛŋe: yɛ parantɛ, yɛ tasa, yɛ kwalekwə ba'a yɛ ghwelepe tɛ.

Wəsə kentare yɛ paterela

17Pa Bɛsalɛl vɛsəte wəsə kentare yɛ paterela le mze kwa tere tere nya wɛŋe. Kanya kwetɛŋe ŋkɛ le seɗa ta ŋkɛ, yɛ dzeve ta ŋkɛ, yɛ wəbəzlia n'yi nyi te, kweci wəshia ŋkɛ nyi tehwepərə tehwepərə ba'a kweci wəshia ŋkɛ nyi kala ghwə ta wəfe. 18Dzeve ŋkwaŋe ya te seɗa ta ŋkɛ, mahekene laka nya bela, mahekene laka nya. 19Ma te yayata dzeve ne, wəbəzli nyi kala ya ta vegeme ya shɛ mahekene, kweci wəshi tehwepərə tehwepərə ba'a kweci wəshi kala ghwə ta wəfe ya te hɛ. 20Ma te dəŋwə ne, wəbəzli nyi kala ya ta vegeme ya shɛ wəfaɗe, kweci wəshi tehwepərə tehwepərə ba'a kweci wəshi kala ghwə ta wəfe ya te hɛ. 21Ma kwayite ta yayata jikə ta dzeve nyi keslə bake nyi, bake nyi mahekene zhigə te dəŋwə: kwete wəsə ya shɛ tehwepərə. 22Ma wəshi nyi tehwepərə tehwepərə nyi ba'a yɛ dzeve ne, kanya kwetɛŋe hɛ le wəshi nyi ketene, pɛtɛ hɛ le mze kwa tere tere nya wɛŋe. 23Pa ŋkɛ vɛsəte paterela mberefaŋe, tsagha yɛ mekese ba'a wəshi kefə pəsəɗə le mze kwa tere tere nya wɛŋe. 24Ma kezha vɛsə wəsə kentare yɛ paterela, yɛ mekese ba'a wəshi kefə pəsəɗə ne, kiləwəa mze kwa tere tere nya wɛŋe mahekenemsə yamenehwe slene mbeli le.

Reghwetɛ ketere 'wərdə

25Ma kwa sebe ta ŋkɛ ne, pa Bɛsalɛl baŋete reghwetɛ ketere 'wərdə yitea sheghwəa gwevɛre. Yipə yipə yɛ biya ta reghwetɛa shɛ le bezlea ŋkɛ, kadzeghe kwetɛŋe slə yitea fegwele hwa'a mɛa ŋwalea dzeve yayata bela ta ŋkɛ ba'a dzeghe bake dzeme ghweme ta ŋkɛ. Jikə tereme nyi te yɛ sleme ta ŋkɛ le. 26Pa ŋkɛ fiaghe pɛtɛa mze kwa tere tere nya wɛŋe: ŋkwa nya te, tereme nyi te yɛ sleme ta ŋkɛ, bela ta ŋkɛ nyi wəfaɗe. Pa ŋkɛ menete ŋkwa nya dzeyi mɛa mɛa ŋkɛ dzasle le mze kwa tere tere. 27Pa ŋkɛ vɛsəte yɛ takase mze kwa tere tere ba'a pa beteyi hɛ bake laka nya, bake laka nya bela ta reghwetɛ, kwayite ta ŋkwa nya dzeyi mɛa mɛa ŋkɛ. Mbe hɛ teha geta nyi tekele mbeli te mbeli. 28Pa ŋkɛ feɗete geta bake yitea gwevɛre ba'a fiaghe mze kwa tere tere kənəa hɛ.

29Pa nde ta 'wərdə takɛ n'yi keve ŋkwa tekeleke, tsagha 'wərdə ganyɛ kezha tere te reghwetɛ.

Currently Selected:

Shave 37: BEKDC12

Highlight

Copy