Gha ta Wəshi 37

ZHOZƐF

37–50

Yɛ shiwəa Zhozɛf

1Pa Zhakob nzanyɛ te hɛɗia Kanan nya se yitenyɛ. 2Wa nya ghena ta ŋwalea Zhakob nya. Va meŋe mberefaŋeghəmbe menete Zhozɛf nda dzemte ŋkɛ yitea yɛ timɛti ba'a kwi zlaɓe le ka kesaka yitenyɛ, ŋwalea yɛ Bilha le Zilpa, mia yitenyɛ. Pɛtɛ geze nda wəsə kwa ndiremi nyi geze mbeli te hɛ Zhozɛf ke yitenyɛ 3Kwele ma ɗehwe Zhozɛf Zhakob ke kweci ŋwalea ŋkɛ, va nya nza ŋkɛ mbe meha yake ŋkɛ ŋkɛ. Pa ŋkɛ slate nda lekwesa ganyɛ kwa verezlɛzlɛ. 4Newe ke ŋwalea yitenyɛ ne, za ma Zhozɛf ɗehwe ŋkɛ ke hɛ pɛtɛ. Ntake hɛ kazlɛ ve kwele kwele ba'a kaɗema geze nda ghena zeɗe.

5Ma te kwete hɛ ne, pa Zhozɛf shiwəte shiwə. Pa ŋkɛ gezete nda shiwəa shɛ ke ŋwalea yitenyɛ, nyi keɗema ntsə ta ŋkɛ za ma zhɛkwa. 6Ma ke sha hɛ: «Fatema mə shiwə nya shiwəte 'ya gi: 7Kahwepe ha gheɓəmə hwa ɓeleve hɛ gheɓəmə kwamte mbe wəve kanewe 'ya, te ŋkwa shɛnyɛ ne, slete ŋa ɗa sletenyɛ, pa pɛtɛa ŋa ŋayɛ dzaslete ŋkɛ ba'a gwəɗəŋənji yite.» 8Ma ke ka kesaka yitenyɛ shɛ: «Gha ɗe kanza kameghea n'yɛ keɗema kasleke n'yɛ tsagha na?» Pa hɛ ɗema ntsə ta ŋkɛ za ma zhɛkwa va shiwəa ŋkɛ ba'a va ghena ta ŋkɛ.

9Pa Zhozɛf shiwəte kwete shiwə, pa ŋkɛ gezete nda ke ka kesaka yitenyɛ, ma ke: «Nahe 'ya keshiwəte kwete shiwə zhɛkwa: ma newe 'ya ne, kase veci, tere ba'a saseregwa meŋe kwetɛŋeghəmbe kagwəɗəŋə yitea hwəa ɗa.» 10Pa ŋkɛ gezete nda shiwəa shɛ ke yitenyɛ kala nya gezete nda ŋkɛ ke ŋwalea yitenyɛ. Pa yitenyɛ ŋelete ŋkɛ, ma ke shɛ: «Wa mama ta shiwə nya shiwəte nya na wa? Kaɗe na kase n'yɛ le meyɛ ŋa ba'a ŋwalea yiteyɛ ŋa kagwəɗəŋə ntiŋə ghə mbe hɛɗi yitea hwəa ŋa na?» 11Kazhɛ nda zlɛ ke ŋwalea yitenyɛ ve, ama mbe zəzə shiwəa shɛ yitenyɛ.

Ŋwalea yitenyɛ kapamte Zhozɛf

12Ntəŋə ŋwalea yitenyɛa Zhozɛf kadzawa Sishɛm kaya wəshia yite nci. 13Ma ke Zhakob sha Zhozɛf te kwete hɛ: «Ashɛ kwa Sishɛm ŋwalea yiteyɛ ŋa kaya wəshi wəka? Nde, 'ya kaghwene ŋa kadzawa sha hɛ.» -- «Yewə», a ke Zhozɛf zhɛnete nda. 14Ma ke shɛ zhɛkwa: «Kwiɗi newakɛ tsema tsema nza ta nci ba'a wəshi keseɗa, nda se na kageze ɗa.»

Pa ŋkɛ ghwenakɛ ŋkɛ same kwa zlərəa Hɛbron. Ma kwa nza Zhozɛf takwa yitea Sishɛm ne, 15begeme ŋkɛ le kwete wəndə vəa ŋkwa nya dzeghwa ŋkɛ hwa gamba. Ma ke wəndəa shɛ shɛ: «Wa yaghweze na wa?» 16Ma ke Zhozɛf zhɛnete nda: «'Ya kaghweze ka kesaka yiteyɛ ɗa. Kancɛte ɗa na ŋkwa nya ya wəshi hɛ te na təhwə təhwə ŋa 'ya tse na?» 17Ma ke wəndəa shɛ zhɛnete: «Nahe hɛ keslənji teke, kwa nza ŋkɛ nahe ŋkɛ kefa kageze dzawa Dotan hɛ.» Cape Zhozɛf kalə kazele ŋwalea yitenyɛ, pa ŋkɛ nakɛ hɛ kwa Dotan. 18Nda tentsehe ŋkɛ sha hɛ ne, nahe hɛ kenakɛ ŋkɛ cakeɗake, pa hɛ tsahwe ghena kezha pesle ŋkɛ. 19Ma ke hɛ kwelɛ ghəa nci: «Wa nya nde shiwə nya kase! 20Tsetsenya ne, nde mə, peslekɛ ɓəmə ŋkɛ shɛ mə negheyi ŋkɛ kwa belageji. Kategeze gheɓəmə nahe wəsə nya hwa gamba kempeɗehwe ŋkɛ, nda newe gheɓəmə tsema tsema tenza shiwəa ŋkɛ.» 21Pa Rəbɛn fate ghena nyagha. Kaɗe ŋkɛ kambele Zhozɛf shave mbe dzeve ta nci. Ma ke: «Mba gheɓəmə keza mpia ŋkɛ.» 22Ma ke sha hɛ zhɛkwa: «Peslema wəndə yɛ ma. Negheyi mə ŋkɛ kwa belageji nya te ɓerama nya ɓetəkə, mba yɛ kedɛape dzeve te.» Kezha mbelemte ŋkɛ shave mbe dzeve ta nci ba'a kezha keleghe nda ŋkɛ ke yitenyɛ nda gezete ŋkɛ kala nyagha.

23Ma kwa ntsehe Zhozɛf sha ŋwalea yitenyɛ ne, pa hɛ keseve ŋkɛ ba'a seɗemte lekwesa ganyɛ kwa verezlɛzlɛ nya kənə. 24Pa hɛ negheyi ŋkɛ kwa belageji. Kehase hase belagejia shɛ kaɗema yɛmə kwa. 25Kwetere wəmbəa ŋkɛ, ntishɛ hɛ kazeme wəsə kezeme. Newe ke hɛ ne, dandelaŋe ka Ismayɛl kwa zəɗə se mbe Gala'ad kajive Ɛzhipte. Kwele kwele mama ta 'wərdə va hɛ te zlegweməa lɛmə. 26Ma ke Zhəwda sha ŋwalea meghekɛ: «Wa yateŋ'we gheɓəmə kepeslekɛ wəza yiteyɛ ɓəmə gheɓəmə ba'a kewəfərəakɛ mte ta ŋkɛ gheɓəmə tse wa? 27Pamte nda ɓəmə ŋkɛ ke ka Ismayɛl nyi, mba gheɓəmə kepesle ŋkɛ, va nya nza ŋkɛ kawəza yiteyɛ ɓəmə, kamimia ɓəmə!» Pa ka kesaka yitenyɛ fate nda ghena. 28Ama pa ka Madiyan nyi kemene fəli dzeghwake dzeghwa ta nci ba'a kelakame Zhozɛf same kwa belageji. Pa hɛ pamte nda ŋkɛ ke ka Ismayɛl kadəɓərəa mze kwa tɛawetɛa bakemsə, pa mbelia shɛhɛ keleghe Zhozɛf kajive Ɛzhipte. 29Ma kwa zhɛneke geva Rəbɛn kadzemɛa belagejia shɛ ne, mba Zhozɛf kwa we. Pa ŋkɛ ŋkwahemte lekwesa ta ŋkɛ. 30Tewətelɛwe ŋkɛ zhɛneghe geva kalə sha ka kesaka yitenyɛ, ma ke: «Mba Zhozɛf kwa we. Dzeyi tema 'ya tse gɛ wa?»

31Pa hɛ kelete lekwesa ganyɛ ta Zhozɛf, ma kwa henekɛ zhɛfa hɛ ne, selame hɛ selamahwe ŋkɛ hwa mimia ŋkɛ. 32Kwetere wəmbəa ŋkɛ, pa hɛ ghweneghe nda lekwesa ganyɛ kwa verezlɛzlɛa shɛ ke yiteyɛa nci, ma ke hɛ shɛ: «Wa nya wəsə nya ntsate ghen'yɛ nya! Neweve kenza ŋkɛ lekwesa ganyɛ ta wəzege ta ŋa ŋkɛ.» 33Pa ŋkɛ ɗepete lekwesa shɛ, ma ke sha lewela: «Lekwesa ta wəzege ta ɗa deŋwa! Wəsə nya hwa gamba nde slekwemte ba'a nde mpeɗehwe Zhozɛf.» 34Pa Zhakob ŋkwahemte lekwesa ta ŋkɛ, mɓɛke ŋkɛ sha zewe hwa hwə, kwele kwele menete hɛ ŋkɛ kanehwene wəzege ta ŋkɛ. 35Pa pɛtɛa ŋwale tezhili ba'a ŋwale kwɛa ŋkɛ dzeghakɛ kezha gweɗakwe ŋkɛ, ama pa ŋkɛ ɗema gweɗakwe ta ŋwalea ŋkɛ. Kwa nza ŋkɛ ma ke: «Mbe nehwene tedzawa 'ya sha wəzege ta ɗa hwa mbelia kwahɛɗi.» Nda nehwene yanehwene ŋkɛ.

36Pa ka Madiyan pamte nda pelɛ Ɛzhipte ke Potifar, wəndə kwele nya yitea Farawon. Gheŋkɛ ya te ghəa mbeli nyi keya meghe.

Currently Selected:

Gha ta Wəshi 37: BEKDC12

Highlight

Copy