Gha ta Wəshi 44

Zhozɛf kadzeghe ka kesaka yitenyɛ

1Ma ke Zhozɛf gezave nda ke wəndə nya te ghəa wəshia ŋkɛ: «Viɗikɛ nda behwe mbeli nyi le ha kala nya nza hɛ wərə kakelete. Zhɛneyi nda cɛdɛa ŋkɛ ke yayata wəndə mɛa behwea ŋkɛ. 2Kateve helape kesa wəsə kwa mze kwa tɛawetɛa ta ɗa na mɛa mɛa behwea nya ɓɛhwɛ, tsagha cɛdɛa ŋkɛ.» Pa wəndəa shɛ menete kala nya gezete nda Zhozɛf. 3Kiɗima ta ŋkwa te hendɛ ta ŋkwa ne, pa mbeli pelakɛ hɛ kaslə le kwara lɛməa nci. 4Nahe hɛ keshavenji mbe meleme kaɗema kenaka kalə cakeɗake ne, ma ke Zhozɛf gezete nda ke wəndə nya te ghəa wəshia ŋkɛ: «Kwiɗi le hwɛ, kekave mbeli nyighɛ. Ma pa na sha hɛ: ‹Yitea wa wate wəsə kwa ganyɛ yɛ le kwa ndiremi wa? 5Yitea wa ghərəhwe helape kesa wəsə ta nde sleke ɗa ba'a nya newe wəsə nya ketemene geva ŋkɛ kwa yɛ wa? Wəsə nya ndiremi yamenete yɛ.›»

6Pa wəndə nya te ghəa wəshi nyi ki ghɛa Zhozɛf kekave hɛ ba'a gezete nda ghena shɛhɛ ke hɛ. 7Ma ke ka kesaka yita nyighɛ: «Tsema geze ghena nya kala nya na te ghen'yɛ tse wa nde sleke n'yɛ? Ndiremike ŋkɛ sha ghen'yɛ kamene wəsə nya kala nya! 8Ma cɛdɛ nya ntsate ghen'yɛ mɛa mɛa behwea n'yɛ ne, ashɛ ghen'yɛ kezhɛneke se te hɛɗia Kanan wəka? Tsema nza ghen'yɛ kaghərəve mze kwa tɛawetɛa keɗema mze kwa tere tere ki ghɛa nde sleke ŋa wa? 9Ma wəndəa n'yɛ nya ntsate helape kesa wəsəa shɛ mbeli ve ne, pa mbeli peslekɛ ŋkɛ. Ma ghen'yɛ ɓiyitsa, kaka mavashi ŋa tenza n'yɛ.» 10Ma ke wəndəa shɛ zhɛnete: «Ma wəndə nya ntsate mbeli ve ne, kamava ta ɗa tenza ŋkɛ, ama waɗe tenza kweci.» 11Pa ka kesaka yita nyighɛ fəakawa behwea nci kahe kahe, yayata wəndə kapele behwea ŋkɛ. 12Ntake wəndə shɛ kanewe pɛtɛa behwea nci. Pa ŋkɛ ghate te ŋa wəndə kwele ba'a keɗaŋemte te ŋa nya ɓɛhwɛ. Pa mbeli ntsate zlerekwe kwa behwea Bɛnjamɛn. 13Pa hɛ ŋkwahemte lekwesa ta nci, yayata wəndə kave behwea ŋkɛ kadzete kwara, tewətelɛwe hɛ zhɛneghe geva kadzembe meleme.

Zhəwda kakele ghena te Bɛnjamɛn

14Hwa'a yɛ Zhəwda le ka kesaka yitenyɛ ki ghɛa Zhozɛf, mba Zhozɛf kiagha. Gwəɗəŋə hɛ ntiŋə ghə mbe hɛɗi kwa kema ta ŋkɛ. 15Ma ke Zhozɛf sha hɛ: «Wa nya wəsə menete yɛ wa? Keɗepe yɛ wərə wəndə nya kala 'ya kaɗepete wəshi nyi tewəfərə wəka?» 16Ma ke Zhəwda zhɛnete: «Wa ke ghen'yɛ sha geze gɛ wa nde sleke ɗa? Wa ghena nya geze n'yɛ tse wa? Tsema nza ghen'yɛ kawiɗike fela yitea ghəa n'yɛ wa? Shala nde ncɛte fete ta n'yɛ. Kaka mavashia ŋa tenza n'yɛ, ghen'yɛ le ghəa n'yɛ ba'a wəndə nya ntsate helape kesa wəsə mbeli ve.» 17Ma ke Zhozɛf zhɛkwa: «Ewə, kehite geva ŋkɛ kamene 'ya tsagha we. Ma wəndə nya ntsate helape kesa wəsə nya mbeli ve ne, kamava ta ɗa tenza ŋkɛ. Ma gheyɛ le ŋayɛ, kwiɗi mə kalə sha ghɛ le kwelɛŋe.»

18Pa Zhəwda hendave nda geva ke Zhozɛf, ma ke: «Təhwə təhwə ŋa 'ya nde sleke ɗa, pelave ɗa hweŋkwa kagezete ŋa ghena, mba na kehwepe wənə, ya gha nza yipə yipə le Farawon. 19Ma vecagha ne, nahe na ke'yɛwakɛ kenza nde mba yiteyɛa n'yɛ teghweme ba'a kenza kwete wəza yita va ghen'yɛ. 20Ma ke ghen'yɛ zhɛnete ŋa: ‹Mba yiteyɛa n'yɛ teghweme ba'a wəza yiteyɛa n'yɛ nya kawəzege meha ya shɛ. Kwele kwele ɗehwe ŋkɛ yitenyɛ, kwa nza ŋkɛ deke gheŋkɛ nde tene va male kwa jiwənia ŋkɛ. Nahe wəza meghekɛ kemte.› 21Ma pa na sha ghen'yɛ: ‹Keleke ɗa mə ŋkɛ, kaɗe 'ya kanakɛ ŋkɛ.› 22Nahe ghen'yɛ kegezete ŋa kaɗema wəzegea shɛ kanehemte geva le yitenyɛ. Kwa nza ŋkɛ ma keslənyɛ ŋkɛ yite ne, katemte yitenyɛ. 23Ama pa na gezete n'yɛ kaɗema n'yɛ kazhɛne kadzawa kema ta ŋa keɗema wəzegea shɛ kesawa yitea ghen'yɛ. 24Pa ghen'yɛ zhɛreghe geva kalə sha yiteyɛa n'yɛ nya kande mene slene ta ŋa, pa ghen'yɛ gezete nda ghena ta ŋa. 25Ma ke yiteyɛa n'yɛ: ‹Zhɛneghe mə geva kalə kapa ɓəmə wəshi kezeme.› 26Ma ke ghen'yɛ shɛ: ‹Kashɛ ghen'yɛ dzawa keɗema wəza yiteyɛa n'yɛ nya ɓɛhwɛa yitea ghen'yɛ we. Ma keɗema ŋkɛ le ghen'yɛ ne, hweŋkwa va ghen'yɛ kadzawa kema ta wəndə nya te ghəa hɛɗia Ɛzhipte we.› 27Ma ke yiteyɛa n'yɛ sha ghen'yɛ: ‹Nahe yɛ keɗepe deke bake yake ɗa ŋwale male ta ɗa Rashɛl. 28Nahe kwete kezanyɛ, wəshi nyi hwa gamba ka mpeɗehwe ŋkɛ, zəzə 'ya, kwa nza ŋkɛ kezhɛne 'ya kanakɛ ŋkɛ we. 29Gheyɛ ka ɗe kakele nya va 'ya zhɛkwa! Ma kemenete nda geva wəsə kwa ndiremi, kehale hale 'ya kala nya ne, katemte ɗa 'ya va zəzə ta fete ta ŋayɛ.› 30Ma tsetsenya gɛ nde sleke ŋkwa, tsema nza 'ya kazhɛreghe geva kalə sha yiteyɛ ɗa kaɗema wəzege nya yitea ghen'yɛ wa? Mbe wəzege nya mpia yiteyɛ ɗa tsape tsape, 31ma kenakɛma ŋkɛ ŋkɛ kezhɛneke geva ne, katemte ŋkɛ. Ma tsagha gɛ, ghen'yɛ ya te ghəa mte ta ŋkɛ mbe meha va zəzə. 32Ɓiyitsa, nahe 'ya kekelete ghena ta wəzegea shɛ kwa ghə kwa kema ta yiteyɛ ɗa. Ma 'ya shɛ: ‹Ma kekelekema ŋa ŋkɛ 'ya ne, ŋa ɗa tenza fete kaghala ghala kwa kema ta ŋa.› 33Təhwə təhwə ŋa 'ya, pelakɛ ɗa kanza teke kamava ta ŋa te zhia wəzege nya! Zhɛneghe geva ŋkɛ kadzeme le kweci ka kesaka yitenyɛ! 34Tsema nza 'ya kazhɛneghe geva kalə kadzawa kema ta yiteyɛ ɗa kaɗema wəzege nya yitea 'ya wa? Katesəwəte newe ndiremi nya ketedzete yiteyɛ ɗa 'ya we.»

Currently Selected:

Gha ta Wəshi 44: BEKDC12

Highlight

Copy