Gha ta Wəshi 45

Zhozɛf kancɛ nda ghəa ŋkɛ ke ka kesaka yitenyɛ

1Ma kwa shaŋe Zhozɛf kazereghe zəzə nya mbe wənəa ŋkɛ kwa kema ta mbeli nyi yite ne, pa ŋkɛ gezete kezha jivenji hɛ. Wəndə shɛ tagha nda ncɛte nda ghəa ŋkɛ ŋkɛ ke ka kesaka yitenyɛ we. 2Ama ntake ŋkɛ kanehwene le berete kafefa ka Ɛzhipte, pa ki ghɛa Farawon ntsehe ghena shɛ. 3Ma ke sha ka kesaka yitenyɛ: «'Ya ya kaZhozɛf! Mba yiteyɛ ɗa teghweme na?» Ama kashɛ ka kesaka yitenyɛ zhɛne nda ghena va medada we. 4Ma ke sha hɛ zhɛkwa: «Hendave ɗa mə geva!» Pa hɛ hendave nda geva. «'Ya ya kaZhozɛf, wəza yiteyɛ ŋayɛ nya pamte nda yɛ ke ka Ɛzhipte. 5Ama mba yɛ kenza le kema teheɗe, mba yɛ keŋele ghə ŋayɛ va nya pamte ɗa yɛ teke, kwa nza ŋkɛ Shala nde ghweneke ɗa kase teke mpelɛa ma ke gheyɛ kezha mbele mpia ŋayɛ. 6Va bake ghala me ma te hɛɗi, mba va mcɛfe zhɛkwa kaɗema mbeli shɛ wəza keɗema kamene wəshi se te wəve. 7Shala nde ghweneke ɗa mpelɛa ma ke gheyɛ kadzete hɛɗi nya kezha wəmbəyi hwelefefi yɛ ba'a kezha mbele mpia ŋayɛ kala meŋele. 8Gheyɛ ka ghweneke ɗa kase teke we, ama Shala. Gheŋkɛ nde veyi ɗa kawəndə kwele nya yitea Farawon, kande sleke ghɛa ŋkɛ ba'a kawəndə nya te ghəa pɛtɛa hɛɗia Ɛzhipte. 9Ma pe yɛ kahe kahe sha yiteyɛ ɗa kedzeme yɛ: ‹Wa nya ghena nya geze wəzege ta ŋa Zhozɛf nya: Nahe Shala keveyi ɗa kawəndə nya te ghəa pɛtɛa hɛɗia Ɛzhipte. Sawa sha 'ya kahe kahe. 10Katenza na te hɛɗia Goshɛn le ŋwalea ŋa, ka shihɛ ŋa, timɛtia ŋa, kwia ŋa, sla ta ŋa ba'a pɛtɛa wəshi nyi va gha. Ma tsagha, dekwede tenza na yitea 'ya. 11Teke ne, kateve ŋayɛ wəshi kezeme 'ya le mbelia ŋa ba'a wəshi keseɗa ta ŋa, yitea ɗema kwete wəsə kadewə va gha, kwa nza ŋkɛ mba va ta ma mcɛfe.›»

12Ma ke Zhozɛf zhɛkwa: «Kanewe newe yɛ le ntsə ta ŋayɛ, kanewe newe wəza meyɛ ɗa Bɛnjamɛn le ŋa ŋkɛ ntsə perə, 'ya nde geze ŋayɛ ghena. 13Kwiɗi mə kalə kageze nda zləvə nya te 'ya mbe Ɛzhipte ke yiteyɛ ɗa ba'a ɓelate nda mə wəshi nyi nakɛ yɛ. Kwa sebe ta ŋkɛ, kelakawa mə ŋkɛ teke kahe kahe.» 14Həməwə Zhozɛf sha wəza meghekɛ Bɛnjamɛn le nehwene. Pa Bɛnjamɛn həməwə ŋkɛ le nehwene perə. 15Pɛtɛ Zhozɛf hehəməwəve ka kesaka yitenyɛ le kema bətə mbe nehwene. Ma kwa sebe ta ŋkɛ, ntake hɛ kageze nda ghena.

Farawon kaheka Zhakob kadzawa Ɛzhipte

16Pa mbeli fate ki ghɛa Farawon nahe ka kesaka yiteyɛa Zhozɛf kentsehe mbe Ɛzhipte. Zeɗehwe nda ghena shɛ ke yɛ Farawon le mbeli nyi yite. 17Ma ke Farawon sha Zhozɛf: «Geze nda ke ka kesaka yiteyɛ ŋa kave wəshi te wəshi keseɗa ta nci ba'a kazhɛre geva kadzeme hɛɗia Kanan 18kezha kelakawa yɛ yiteyɛa nci le mbelia nci kasawa teke. Kateve nda ŋkwa nya ganyɛ mbe Ɛzhipte 'ya ke hɛ, katezeme wəshi ganji nyi te hɛɗi nya hɛ. 19Kategeze nda na ke hɛ kanta yɛ wəmata gədəwə mbe Ɛzhipte kezha fə mia nci, ŋwalea nci ba'a yiteyɛa nci kasawa perə. 20Mba hɛ kezəzə wəshi nyi tesərə hɛ pelɛagha, kwa nza ŋkɛ te hɛɗi nya ganyɛ ma mbe Ɛzhipte tesawa hɛ kanza.» 21Tsagha ŋwalea Israyɛl menete. Pa Zhozɛf nta nda wəmata gədəwə ba'a wəshi kezeme kwa hweŋkwa ke hɛ kala nya gezete Farawon. 22Pa ŋkɛ nta nda lekwesa gəsəkə ke yayata wəndə, ama mcɛfe ŋkɛ shɛ va Bɛnjamɛn, tsagha dəɓərəa mze kwa tɛawetɛa gwəmsə mahekene. 23Pa ŋkɛ ghweneghe nda wəshi ganji nyi mbe Ɛzhipte kabidalea kwara lɛmə meŋe, tsagha ha, ɗafa ba'a kweci wəshi kezeme kwa hweŋkwa kaŋemia kwara meŋe ke yitenyɛ. 24Pa ŋkɛ gezave nda ke ka kesaka yitenyɛ kezha ɗema hɛ kampa kwa hweŋkwa. Kwa sebe ta ŋkɛ, pa ŋkɛ pelakɛ hɛ kaslə. 25Cape hɛ shave mbe Ɛzhipte, hwa'a hɛ pelɛ hɛɗia Kanan sha yiteyɛa nci Zhakob. 26Ma ke hɛ shɛ: «Mba Zhozɛf teghweme! Gheŋkɛ ya te ghəa pɛtɛa hɛɗia Ɛzhipte.» Ama kepele ghəa Zhakob yite we, kwa nza ŋkɛ keyɛte ghena ta nci ŋkɛ we. 27Pa hɛ ɓelate nda pɛtɛa ghena nyi gezete nda Zhozɛf ke hɛ. Pa Zhakob nakɛ wəmata gədəwə nyi ghweneghe Zhozɛf kezha kele ŋkɛ. Ma tagha gɛ, werete mehele ta Zhakob. 28Ma ke Israyɛl: «Ka'yɛwe kwete ghena 'ya zhɛkwa we! Mba wəzege ta ɗa Zhozɛf teghweme. Kaɗe 'ya kalə kanakɛ ŋkɛ nda temte 'ya.»

Currently Selected:

Gha ta Wəshi 45: BEKDC12

Highlight

Copy